Ime Oro Enyenede Edikan

“Ana nte mbufo ẹnyene ime man ẹbọ se Abasi ọkọn̄wọn̄ọde, ke ẹma ẹkenam se Enye amade.”—MME HEBREW 10:36.

1. Ntak emi anade kpukpru mbon oro ẹnamde n̄kpọ Jehovah Abasi mfịn ẹnyene ime?

OFỤRI ererimbot emi esịne ke ubọk ọsọn̄ibuot abasi. Andikara esie oro enyịn mîkwe, Satan kpa Devil, esịn ofụri ukeme esie ke ndibiọn̄ọ Jehovah nnyụn̄ n̄wana mbiọn̄ọ unen itie edikara ofụri ekondo Jehovah ebe ke Obio Ubọn̄ Messiah. Emi anam edi se owo mîkemeke ndinyan̄a nte ke owo ekededi oro ayakde idemesie ọnọ Abasi onyụn̄ adade ke n̄kan̄ esie ke eneni aban̄ade itie edikara eyedi se ererimbot emi ọbiọn̄ọde kpukpru ini. (John 15:18-20; 1 John 5:19) Ntre, ana owo nnyịn kiet kiet otịm idemesie ndiyọ tutu ererimbot emi osụhọde ke akpatre nsobo ke Armageddon. Man idu ke otu mbon edikan Abasi oro ẹkande ererimbot ebe ke mbuọtidem ye nsọn̄ọnda mmọ, ana nnyịn isọn̄ọ ida ye unana edimem idem tutu osịm utịt. (1 John 5:4) Didie ke nnyịn ikeme ndinam oro?

2, 3. Didie ke Jehovah Abasi ye Jesus Christ ẹdi mme akakan uwụtn̄kpọ ime?

² N̄kpọ kiet edi, nnyịn imekeme ndiyom nsịnudọn̄ nto n̄wọrọnda uwụtn̄kpọ ime iba. Mmọ ẹdi mmanie? Owo kiet edi Jesus Christ, “andibem iso mmana ke otu kpukpru edibotn̄kpọ,” emi ke edinam akpanikọ esịnde ifịk ke utom Abasi toto nte ẹkebot enye ke ini emi owo mîdiọn̄ọke ke edem. Ke enye ndisịn ifịk ke ndinam utom Abasi ke edinam akpanikọ, Jesus ama akabade edi uwụtn̄kpọ ọnọ kpukpru mme enyene-ifiọk edibotn̄kpọ ẹmi ẹkebotde ke heaven ye ke isọn̄ ke oro ebede. (Colossae 1:15, 16, NW) Nte ededi, akakan uwụtn̄kpọ ime edi Jehovah Abasi, emi ke anyanini ọyọde nsọn̄ibuot ye itie edikara ofụri ekondo esie edinyụn̄ akade iso ndinam ntre tutu enye anam n̄kpọ ndibiere eneni aban̄ade itie edikara ke nsinsi.

³ Jehovah eme ime ke usụn̄ oro odotde ẹkpebe ke mme n̄kpọ ẹmi uku ye ọkpọsọn̄ ọkpọkpọ ntụk esie abuanade. Enye ama omụm idemesie akama ke iso akwa iyatesịt onyụn̄ akpan idemesie ndinam n̄kpọ ye mbon oro ẹkesuenede enye—esịnede Satan kpa Devil. Nnyịn imowụt esịtekọm iban̄a ime Abasi ye mbọm esie. Ke mmọemi mîkpedụhe, nnyịn ikpekemeke ndidu idem ke esisịt ini. Ke akpanikọ, Jehovah Abasi amadianade idemesie ada san̄asan̄a ke ẹmende ẹdomo ye kpukpru owo ebe ke ime esie.

4, 5. (a) Didie ke uwụtn̄kpọ Paul aban̄ade oboteso owụt ime ye mbọm Abasi? (b) Didie ke ẹdiwụt nte ke mbọm Abasi ikedịghe ke idiọk usụn̄?

⁴ Apostle Paul anyan ubọk owụt ime ye mbọm Abasi ke ini enye ọdọhọde ete: “Nte oboteso inyeneke unen ndisio ubak mbat kiet mbot eso nnịm nnọ itie ukpono, nnyụn̄ nsio ubak mbat eken mbot eso nnịm nnọ usụhọde itie? Edi ekpedi nte Abasi, emi onyịmede ndiwụt iyatesịt Esie, ndinyụn̄ nnam owo ẹfiọk odudu Esie, emede anyanime ye mme eso iyatesịt ẹmi ẹnade ẹnọ nsobo; man otodo Enye akpayarade uwak ubọn̄ Esie ke idem mme eso mbọm, emi Enye ekebemde iso onịm ọnọ ubọn̄; kpa nnyịn, emi Enye okonyụn̄ okotde, idịghe ke otu mme Jew ikpọn̄, edi ke otu mme Gentile nde?”—Rome 9:21-24.

⁵ Nte ikọ ẹmi ẹwụtde, ke ini ime esie emi, Jehovah akaiso ye ubọn̄ ubọn̄ uduak esie onyụn̄ owụt ndusụk eso mbọm ẹdide owo mbọm. Enye otịm mme eso ẹmi idem ọnọ nsinsi ubọn̄ ndien ke ntre akande ndiọi uduak akwa andibiọn̄ọ, Satan kpa Devil, ye kpukpru udịmowo Satan. Idịghe ofụri ubonowo ẹkabade ẹdi eso iyatesịt, ẹdotde nsobo. Oro owụt nte ime Ata Ọkpọsọn̄ Abasi ọfọnde. Mbọm esie idiwọrọke idi ikpîkpu. Enye eyesụn̄ọ ke (1) ubọn̄ ubọn̄ ubon Obio Ubọn̄ ke heaven ke idak ima ima Eyen Jehovah, Jesus Christ, ye (2) edifiak nnyene nnyụn̄ nnam ubon edibotn̄kpọ ẹdide owo ẹsịm mfọnmma ke paradise isọn̄, kpukpru ẹdide mme andida nsinsi uwem nnyene.

Ndime Ime Tutu Osịm Utịt

6. (a) Ntak emi mme Christian mîkemeke ndifep udomo ime? (b) Nso ke ikọ Greek oro adade ọnọ “ime” esiwak ndida nnọ?

⁶ Ye utọ ubọn̄ ubọn̄ idọtenyịn oro ke iso, inem inem ikọ Jesus ẹkpenyene ndimia ke utọn̄ nnyịn kpukpru ini nte n̄kanika, oro edi: “Ẹyenyan̄a owo eke edimede ime tutu osịm akpatre.” (Matthew 24:13) Edi akpan n̄kpọ ndinyene eti ntọn̄ọ ke usụn̄uwem Christian nte mbet. Edi se idide akpan n̄kpọ ke akpatre edi nte nnyịn imede ime, nte nnyịn ikụrede usụn̄uwem oro ọfọn. Apostle Paul ama ọsọn̄ọ emi ke ini enye ọkọdọhọde ete: “Ana nte mbufo ẹnyene ime man ẹbọ se Abasi ọkọn̄wọn̄ọde, ke ẹma ẹkenam se Enye amade.” (Mme Hebrew 10:36) Ikọ Greek oro ẹkabarede mi nte “ime” edi hy·po·mo·neʹ. Emi nte ido edide esiwụt uko, nsọn̄ọnda, m̀mê ime ime ediyọ oro mîduọkke idotenyịn ke osobode mme ubiọn̄ọ, ukọbọ, udomo, m̀mê mme idomo. Edieke nnyịn idoride enyịn ndinyene akpatre edinyan̄a, ana nnyịn isụhọde idem inọ udomo ediyọ nte ubak ntịmidem oro ẹyomde kaban̄a edinyan̄a oro.

7. Nso n̄kpọ abian̄a ke ana nnyịn ifep, ndien uwụtn̄kpọ mmanie edin̄wam nnyịn ndiyọ?

⁷ Nnyịn ikpabian̄ake idem nnyịn ye ekikere unem idem esịt oro nte ke nnyịn imekeme ndikụre udomo oro usọp usọp. Man ẹkpebiere mme eneni ẹban̄ade itie edikara ofụri ekondo ye nsọn̄ọnda owo ke akpatre, Jehovah ikosioho idemesie ifep. Enye ama ọyọ mme n̄kpọ oro mîfọnke idem okposụkedi oro enye ekpekekemede ndisọhi mmọ mfep kpa ke ini oro. Jesus Christ n̄ko ekedi uwụtn̄kpọ ime. (1 Peter 2:21; men Rome 15:3-5 domo.) Ye nnyayama uwụtn̄kpọ ẹmi ẹdude nnyịn ke iso, ke akpanikọ nnyịn n̄ko imonyịme ndime ime tutu osịm akpatre.—Mme Hebrew 12:2, 3.

N̄kpọ Oro Anamde Owo Odot Oro Ẹyomde

8. Nso edu oro kpukpru nnyịn iyomde ke apostle Paul okowụt?

⁸ Idụhe asan̄autom Abasi ndomokiet, idem ke ata ini eset, ẹmi ẹsiode ẹfep ke ufọn ediwụt nsọn̄ọnda esie ebe ke edime ime. Mme ata ọwọrọiso owo ke mbụk Bible ẹmi ẹkesọn̄ọde ẹda ke edinam akpanikọ tutu osịm n̄kpa ẹnyụn̄ ẹdotde ndinyene nsinsi uwem ke heaven ẹkenyene ndiwụt nsọn̄ọnda mmọ. Ke uwụtn̄kpọ, akani owo Pharisee oro, Saul eke Tarsus, ọkọdọhọ mbon Corinth ete: “Koro mmen̄kprike n̄kan mme akakan apostle ke baba usụn̄ kiet, okposụkedi nte mmendịghe n̄kpọ. Ke akpanikọ mma nda anyanime nnam kpukpru utom itie apostle ke otu mbufo, ke mme idiọn̄ọ ye mme utịben̄kpọ ye utom odudu.” (2 Corinth 12:11, 12) Kpa ye mme mfịghe utom, Paul ama ada utom esie ke ọsọn̄urua n̄kpọ tutu enye ọyọ ekese n̄kpọ onyụn̄ esịn ifịk odomo nditre ndida esuene nsọk enye.—2 Corinth 6:3, 4, 9.

9. (a) Didie ke nsụhọ oro ẹyetde aran ẹwụt ediyọ, ndien ye nso utịp? (b) Nso inam n̄kpọ nte n̄kpọ ndemede udọn̄ inọ nnyịn ndikaiso ke edinam akpanikọ ke utom Abasi?

⁹ Ke eyomfịn, mme Christian oro ẹyetde aran ẹmi ẹkenamde n̄kpọ Abasi mbemiso akpa ekọn̄ ererimbot ẹma ẹfiọk ẹte ke 1914 edinịm utịt Ini mme Gentile idiọn̄ọ, ndien ediwak mmọ ẹma ẹdori enyịn ndibọ utịp mmọ eke heaven ke onịm-mbụk isua oro. Edi emi ikotịbeke. Nte akpanikọ owụtde idahaemi, mmọ ẹma ẹnyene ediwak isua ke mme itie duop oro ẹdiande ẹnọ mmọ. Ke ufọt ini uwem utom unana-idotenyịn mmọ eke isọn̄ oro ẹfiakde ẹdian mi, ẹma ẹnam mmọ ẹsana ke ubọk Jehovah. (Zechariah 13:9; Malachi 3:2, 3) N̄kaiso ime amanam utom ke ufọn mmọ. Nte mme asan̄autom Jehovah, mmọ ẹma ẹdara ndidi se ẹsiode ẹnịm san̄asan̄a nte ikọt enyịn̄ esie. (Isaiah 43:10-12; Utom 15:14) Mfịn, ke ẹma ẹkeda ẹbe ekọn̄ ererimbot iba ye ediwak n̄kpri en̄wan, mmọ ẹkop nduaidem ndidi se akwa otuowo eke mme erọn̄ en̄wen, emi ibat mmọ idahaemi awakde akan miliọn inan̄, ẹn̄wamde ndisuan eti mbụk. Paradise eke spirit oro mmọ ẹdarade amatara ke ofụri isọn̄, idem osịmde ata nsannsan isuo inyan̄ibom. Eti ukama emi, emi nnyịn ifiọkde ikan adan̄a nte idude uwem, amanam n̄kpọ nte se inọde odudu ndikaiso ye edinam akpanikọ ke utom Abasi tutu ẹnam uduak Jehovah ọyọhọ ọyọhọ.

10. Man ikûnyene mmemidem ekededi, nso ke oyom inam kpukpru ini?

¹⁰ Sia utịp nnyịn ọkọn̄ọde ke nsọn̄ọnda nnyịn, nnyịn kpukpru ini imoyom item ke akpan n̄kpọ emi. (1 Corinth 15:58; Colossae 1:23) Man mmemidem ndomokiet edidu ke otu ikọt Jehovah, ana ẹsịn udọn̄ ẹnọ nnyịn kpukpru ini ndisọn̄ọ nda ke akpanikọ ye ọsọn̄urua ifet edisuan akpanikọ, kpa nte mme esop oro ẹkesiakde obufa obufa ke akpa isua ikie ẹkenamde ebe ke mme mfiakn̄ka oro Paul ye Barnabas ẹkesinamde. (Utom 14:21, 22) Yak edi ọkpọsọn̄ ubiere ye en̄wọn̄ọ nnyịn nte apostle John ekesịnde enye, nte ke akpanikọ eyedụn̄ ye nnyịn, ‘onyụn̄ odu ye nnyịn ke nsinsi.’—2 John 2.

Ndibet ye Ime Oro N̄kpọ Mîsehekede

11. Nso itie nte ibet Abasi inọ mme asan̄autom esie, ndien didie ke ẹkenam emi an̄wan̄a ke n̄kpọ aban̄ade Joseph?

¹¹ Esida ini mbemiso udomo oro abuanade nnyịn okụre. (James 1:2-4) Bet! Bet! Bet! etie nte ekedi ewụhọ oro Abasi ọkọnọde mme asan̄autom eke eset ke ini ẹkedomode mmọ kaban̄a ubiere mmọ ndikaiso ke mbuọtidem. Edi edibet oro, ke akpatre, kpukpru ini ekedi enyeoro akamade utịp ọnọ mme anam-akpanikọ asan̄autom oro. Joseph ke uwụtn̄kpọ, ama ebet ke isua 13 nte ofụn ye owo n̄kpọkọbi, edi ifiọk n̄kpọntịbe emi ama eyet edu esie asana.—Psalm 105:17-19.

12, 13. (a) Didie ke Abraham ekedi uwụtn̄kpọ ime mbuọtidem? (b) Ke nso usụn̄ ke mbuọtidem ye ime Abraham ẹdi uwụtn̄kpọ ẹnọ nnyịn?

¹² Abraham ama ọsọsọn̄ ke isua 75 ke ini Abasi okokotde enye ọwọrọ ke Ur eke mbon Chaldean aka Isọn̄ Un̄wọn̄ọ. Enye ọkọsọn̄ n̄kpọ nte isua 125 ke ini enye ọkọbọde nsọn̄ọ oro asan̄ade ye un̄wọn̄ọ kaban̄a un̄wọn̄ọ Abasi—emi okotịbede ndondo oro ke Abraham ama okowụt odudu mbuọtidem esie ke ndikosịm udomo ediwa Isaac, edima eyen esie, etrede n̄kukụre ke ini angel Jehovah okomụmde ubọk esie akama onyụn̄ etrede uwa oro. (Genesis 22:1-18) Isua 50 ekedi anyanini ọnọ Abraham ndibet nte ododụn̄ ke esenidụt, edi enye ama akam ebet ke isua 50 efen tutu enye akpa ke edide isua 175. Ke ofụri ini emi, Abraham ekedi anam-akpanikọ ntiense ye prọfet Jehovah Abasi.—Psalm 105:9-15.

¹³ Ẹnịm mbuọtidem ye ime Abraham nte uwụtn̄kpọ ẹnọ kpukpru mme asan̄autom Abasi oro ẹyomde ndibọ mme edidiọn̄ oro ẹken̄wọn̄ọde ebe ke Jesus Christ, kpa Mfri Abraham. (Mme Hebrew 11:8-10, 17-19) Kaban̄a enye, nnyịn ikot ke Mme Hebrew 6:11-15 ite: “Ọdọn̄ nnyịn nte kpukpru mbufo ẹwụt kpa orụk ifịk oro, man ẹnyene ọyọhọ idotenyịn tutu osịm utịt: man mbufo ẹkûkop ifem, edi ẹdi mme andikpebe mmọemi ẹkesan̄ade ke mbuọtidem ye ime ẹbọ mme un̄wọn̄ọ Abasi ẹnyene. Koro ke adan̄aemi Abasi ọkọn̄wọn̄ọde un̄wọn̄ọ ọnọ Abraham, sia Enye mîkemeke nditomo se ikponde ikan Idemesie, Enye otomo Idemesie, ete, Ke akpanikọ nditreke-tre ndidiọn̄ fi nnyụn̄ nnam fi ọtọt. Ntre ke Abraham ọkọbọ mme un̄wọn̄ọ Abasi ke enye ama ekeme anyanime.”

14. Ntak emi nnyịn mîkpekereke ite ke udomo ime inyeneke utịt ye nte ke utịp edi abian̄a abian̄a n̄kpọ?

¹⁴ Mi kan̄a nsụhọ oro ẹyetde aran ẹmekụt isua 77 ẹbede ọtọn̄ọde ke utịt Ini Mme Gentile ke 1914, ke ini ndusụk mmọ ẹkedoride enyịn ndikụt ẹnọde ata esop Christian ubọn̄ ke heaven. M̀mê adan̄a anyanini didie ke ana nsụhọ ẹbet nnyịn idiọn̄ọke. Nte nnyịn ndien ikpenyene ndiyok nnyụn̄ n̄kere ke edibet oro inyeneke utịt ndien ke utịp oro edi abian̄a abian̄a n̄kpọ ndap? N̄wan̄ansa-o! Oro tutu amama ikpowụtke unen itie edikara Abasi m̀mê ndikpono enyịn̄ esie. Enye ikpenenke ke iso ererimbot ke ini ọnọde nnyịn edikan ye utịp nsinsi uwem emi osụn̄ọde oto oro. Inamke n̄kpọ se idide uniọn̄ ini, nsụhọ, ọkọrọ ye mme anam-akpanikọ mbon mbieterọn̄ nsan̄a mmọ, ẹbiere ndibet Jehovah ndinam n̄kpọ ke ini esie. Ke ndiwụt utọ uwụtn̄kpọ ime oro, mmọ ẹtiene usụn̄uwem Abraham.—Rome 8:23-25.

15. (a) Nso idi ufiet nnyịn, ndien ebede ke mme ifiọk n̄kpọtịbe ewe ke Abasi omụm nnyịn akama ye edikan? (b) Nso item oro Paul ọkọnọde ẹsụk ẹdot ke usen nnyịn?

¹⁵ Ufiet, ndien, osụk edi ime oro mîyokke ke edinam uduak Abasi. (Rome 2:6, 7) Ke ini edem enye ama ọnọ nnyịn ibetedem ndikan n̄kpọsọn̄ ukụt, esịnede edisịn ke ufọk-n̄kpọkọbi ye mme itienna ekikere, ndien enye ama ada nnyịn ọwọrọ ye edikan ye ubọn̄ kaban̄a enyịn̄ ye uduak esie.a Ke ini oro osụhọde udomo nnyịn ndikụre, Jehovah eyekaiso ndinam ukem oro. Item Paul osụk ododu nte odotde ọnọ usen nnyịn: “Koro oyom mbufo ẹnyene ime eke mîyokke ye ediyọ, man mbufo ẹkeme ndinam ẹnyụn̄ ẹma uduak Abasi ọyọhọ ọyọhọ, ndien ke ntre ẹbọ ẹnyụn̄ ẹda ẹdaha ẹnyụn̄ ẹdara se ẹken̄wọn̄ọde ọyọhọ ọyọhọ.”—Mme Hebrew 10:36, The Amplified Bible; Rome 8:37.

16. Ntak emi nnyịn mîkpesehe uyakidem nnyịn nnọ Jehovah nte ikpîkpu usụn̄ oro enyenede-nyene adan̄a?

¹⁶ Adan̄a nte Jehovah enyenede utom ọnọ nnyịn ndinam ke ufọt idiọk ererimbot emi, ndien, etienede uwụtn̄kpọ Jesus, nnyịn iyom ndisịn idem ke utom oro tutu enye okụre. (John 17:4) Ediyak idem nnyịn nnọ Jehovah ikedịghe ke ifiọk oro nte ke nnyịn idinam n̄kpọ esie ke ekpri ibio ini kpọt ndien ekem Armageddon edi. Ediyak idem nnyịn nnọ ekedi ke nsinsi. Utom oro Abasi enyenede ọnọ nnyịn iditreke ke ekọn̄ Armageddon. Nte ededi, edi n̄kukụre ke nnyịn ima ikokụre utom oro anade ẹnam mbemiso Armageddon ke nnyịn idikụt mme ikpọ n̄kpọ ẹmi edisan̄ade ke edem akwa ekọn̄ oro idi. Adan̄aoro, ke adianade ye idara idara ifet edikaiso nnam utom esie, ẹyenọ nnyịn utịp ye mme edidiọn̄ oro enye ọkọn̄wọn̄ode, emi ẹkedoride enyịn ẹban̄a ke anyanini.—Rome 8:32.

Ima Ẹnyenede Ẹnọ Abasi An̄wam Nnyịn Ndiyọ

17, 18. (a) Ke mme ini mfụhọ, nso idin̄wam nnyịn ndiyọ ye unyịme Abasi? (b) Nso idin̄wam nnyịn ndinyene edikan, ndien nso ke nnyịn mîtịn̄ke iban̄a ini emi osụhọde?

¹⁷ Iso-ọfọn, ke ini mme idaha ẹsọn̄de, nnyịn imekeme ndibụp ite: ‘Didie ke nnyịn ikeme ndiyọ n̄kaiso?’ Nso idi ibọrọ? Ebe ke ndima Abasi ke ofụri esịt, ekikere, ukpọn̄, ye odudu nnyịn. “Ima enyenyene anyanime, onyụn̄ ọfọn ido; ima ifụbeke ufụp; ima inamke inua, ikohokede idem. Ima ememe kpukpru n̄kpọ, ononịm se ifọnde ke akpanikọ kpukpru ini, ododori enyịn aban̄a kpukpru n̄kpọ, ememe ime ke kpukpru n̄kpọ Ima idibehe ifep [ke] nsinsi.” (1 Corinth 13:4, 7, 8) Ibọhọke nnyịn ime ime oto ke ima oro inyenede inọ Abasi, ime nnyịn idinyeneke ufọn. Edi edieke nnyịn imede ime ke idak mfịghe ke ntak utuakibuot nnyịn nnọ Jehovah, do ime nnyịn enyene odudu ndinam ima oro inyenede inọ enye otụn̄ọ akan. Ima enyenede ọnọ Abasi, kpa Ete esie, ama an̄wam Jesus ndiyọ. (John 14:30, 31; Mme Hebrew 12:2) Edieke ata uduakesịt nnyịn edide ima oro inyenede inọ Abasi, kpa Ete nnyịn, nso idu oro nnyịn mîkemeke ndiyọ?

¹⁸ Edi ima nnyịn oro mîyokke emi inyenede inọ Jehovah Abasi an̄wam nnyịn ndinyene edikan ke ererimbot ke ata idiọk ini udomo emi. Ndien Jehovah, ebe ke Jesus Christ, eyekaiso ndinọ nnyịn un̄wam oro iyomde inamke n̄kpọ m̀mê ẹnyịme akani editịm n̄kpọ emi odu ebịghi adan̄a didie. (1 Peter 5:10) Ke akpanikọ, nnyịn ibemke iso itịn̄ inịm adan̄a ini oro osụhọde, ndien nnyịn inịmke akpan usenọfiọn̄ ekededi. Nnyịn iyak oro inọ Akwa Ekpemeini, kpa Jehovah Abasi.—Psalm 31:15.

19, 20. (a) Didie ke nnyịn ikpese usen kiet kiet oro ebede emi nnyịn iyọde? (b) Nso ndisịme ke nnyịn iyom ndifep, ndien ntak-a?

¹⁹ Nte ededi, emana oro ẹkebemde iso ẹtịn̄ ẹban̄a nte editiede ntiense onyụn̄ okụt “akpatre ini eyo emi” aka anyan idahaemi ke isua emana. (Matthew 24:3, 32-35) Ntre ẹyak nnyịn ikûdede ifre ite ke usen kiet kiet oro ebede emi nnyịn iyọde osio usen kiet efep ke ini emi Satan ye mme demon esie ẹnyenede ndisabade ekondo ye mmọ ndidu uwem onyụn̄ ada usen kiet esịk ekpere ini emi Jehovah mîdiyọhọ edidu eke “eso iyatesịt ẹmi ẹnade ẹnọ nsobo.” (Rome 9:22) Ibịghike, ke ini anyanime Jehovah edide edisịm utịt, enye eyen̄wan̄a iyatesịt esie ke idem irenowo ye iban oro mîbakke Abasi. Ntem, enye eyeyarade unana unyịme esie ke usụn̄ edinam, idem okposụkedi oro enye okonyịmede mmọ ndikaiso ndu ke adan̄a anyanini emi.

²⁰ Ekpedi ata ndisịme n̄kpọ ọnọ nnyịn nditre ima ima ukeme oro nnyịn isịnde ndinyene ubọn̄ ubọn̄ utịp oro ẹnịmde ẹnọ nnyịn ebe ke Jesus Christ. Utu ke oro, nnyịn imebiere ndikaiso ke edinam akpanikọ nte Mme Ntiense nnọ Jehovah ke ata akpan ini emi, emi Jehovah oyomde ndinịm idemesie nte Ọbọn̄ Andikara ekondo.

[Mme Ikọ idakisọn̄]

Didie ke Afo Ọkpọbọrọ?

◻ Ntak emi nnyịn mîkemeke ndifep ndinyene udomo ime nnyịn?

◻ Nso n̄kpọ abian̄a ke ana nnyịn ifep?

◻ Man nnyịn ifep mmemidem, nso ke ẹyom?

◻ Nso idi ufiet nnyịn?

◻ Ke mme ini mfụhọ, nso idin̄wam nnyịn ndiyọ?

[Ndise ke page 11]

Ikọt Abasi, ukem nte Mme Ntiense ẹmi ke Port eke Spain, Trinidad, kpukpru ini ẹsinyịme ndibet Jehovah