Mmeme Owo Ọnọ Odudu Jehovah Ubọn̄

“Kpukpru owo ẹkekere ẹte ke ami ndi asan̄autom uyọhọ ini oro okopde inemesịt ye nsọn̄idem. Kpukpru ini ami n̄kesidi kiet oro an̄wamde mbon en̄wen ke mme mfịna mmọ. Nte ededi, ke ukem ini oro, n̄kokopke inemesịt. Ekikere ye editịmede esịt ke ẹkenọmọ mi. Ama ọtọn̄ọ nditie mi ke idem nte n̄kpọ eke ndianarede n̄kpọn̄ mme owo. N̄kukụre se ikọdọn̄de mi ekedi ndinana ke bed ke ufọk. Ke ediwak ọfiọn̄ mma mben̄e Jehovah nte anam n̄kpa.”—Vanessa

UKEM nte ke idaha oro ẹtịn̄de ke enyọn̄ emi, edi ndammana n̄kpọ ndidori enyịn nte ke utịp edidụn̄ ke “ukperedem ini” emi oyotụk mme asan̄autom Jehovah. (2 Timothy 3:1) Idem ndusụk owo ẹkeme ndikop editịmede esịt. (Philippi 2:25-27) Ke ini ekikere unana idotenyịn ebịghide, emi ekeme ndinam idem emem nnyịn, koro Bible ọdọhọ ete: “Esịt ama ọduọ fi ke usen ukụt, odudu fo akabade ekpri.” (Mme N̄ke 24:10) Ih, ke ini nnyịn ikopde mmemidem, nnyịn imoyom odudu—iso-ọfọn se apostle Paul akakam okotde “akwa ubom odudu.”—2 Corinth 4:7.

Jehovah Abasi edi ebiet emi odudu oro mînyeneke adan̄a otode. Ẹkụt uyarade emi ke ini nnyịn idụn̄ọrede mme edibotn̄kpọ esie. (Rome 1:20) Da utịn ke uwụtn̄kpọ. Isọn̄ ọbọ ufiop oro ọsọn̄de odudu ke n̄kpọ nte triliọn 240 oto utịn. Kpa ye oro, ibat emi ada aban̄a sụk ubak ke mbahade kiet ke itie biliọn kiet ke ofụri udomo odudu oro utịn ọnọde. Ndien utịn edi ekpri ke ẹmende ẹdomo ye mme ntantaọfiọn̄ oro ẹdiọn̄ọde nte ata ikpọ ntantaọfiọn̄. Ke otu mmọemi edi Rigel, ntantaọfiọn̄ emi odude ke uyọ Orion emi okponde utịm ike-50 akan utịn nnyịn onyụn̄ osion̄ode ufiop utịm ike-150,000 akan utịn!

Ana Andibot mme utọ itie unọ odudu eke heaven oro ke idemesie enyene ‘nsọn̄idem eke okponde.’ (Isaiah 40:26; Psalm 8:3, 4) Ke akpanikọ, prọfet Isaiah ama etịn̄ ete ke Jehovah “ikpaha mba, inyụn̄ ikpọtke.” Ndien Abasi enyịme ndibuana odudu esie ye owo ekededi emi, ke ntak mmeme eke owo, ekerede ke imakpa mba. (Isaiah 40:28, 29) Ẹwụt nte enye anamde emi ke idaha abuanade Christian apostle Paul.

Ndiyọ Mme Idomo

Paul ama etịn̄ ọnọ mbon Corinth aban̄a n̄kpọ ubiọn̄ọ oro enye ekenyenede ndiyọ. Enye okokot enye “n̄kukịm ke obụkidem.” (2 Corinth 12:7) Ekeme ndidi “n̄kukịm” emi ekedi udọn̄ọ, ndusụk unana edikụt n̄kpọ ọfọn. (Galatia 4:15; 6:11) Mîdịghe ekeme ndidi Paul eketịn̄ aban̄a mme nsunsu apostle m̀mê mbon ntịme eken oro ẹkenenide ẹban̄a itie apostle ye utom esie. (2 Corinth 11:5, 6, 12-15; Galatia 1:6-9; 5:12) Se ededi oro enye ekedide, ‘n̄kukịm eke obụkidem’ emi ama anam Paul okop ọkpọsọn̄ mfụhọ, ndien enye ama ọbọn̄ akam ndien ndien ete ẹwụhọde enye ẹfep.—2 Corinth 12:8.

Nte ededi, Jehovah ikanamke se Paul ekeben̄ede. Utu ke oro, enye ọkọdọhọ Paul ete: “Mfọn Mi ke ekekem fi.” (2 Corinth 12:9) Nso ke ikọ Jehovah emi ọkọwọrọ? Nte ededi, ke ini ikerede iban̄a akani usụn̄uwem Paul eke edikọbọ mme Christian, edi ke mfọnido oro owo mîdotke kpọt ke enye ekekeme ndinyene itie ebuana ekededi ye Abasi—owo itịn̄ke-tịn̄ iban̄a enye ndinam utom nte apostle!a (Men Zechariah 2:8; Ediyarade 16:5, 6 domo.) Ekeme ndidi Jehovah nte odotde ọkọdọhọ Paul ke ifetutom edidi mbet ‘ekem.’ Enye ikenyeneke ndisan̄a ye edinam mme ọkpọkpọ mfịna uwem esie ẹbe ẹfep ke utịbe utịbe usụn̄. Ke nditịm ntịn̄, ndusụk nsọn̄ọn̄kpọ ẹkeme ndikam nto edinyene mme ifetutom efen efen. (2 Corinth 11:24-27; 2 Timothy 3:12) Ke idaha ekededi, Paul akakam enyene ndiyọ “n̄kukịm ke obụkidem” esie.

Nte ededi, Jehovah ke baba usụn̄ kiet ikọkpọn̄ke Paul ye unana mbọm. Utu ke oro, enye ọkọdọhọ ete: “[Ẹnam] odudu Mi ọfọn ama ke mmemidem.” (2 Corinth 12:9) Ih, Jehovah ke ima ama ọnọ Paul odudu ndiyọ idaha esie. Ntem, “n̄kukịm ke obụkidem” Paul ama akabade edi ukpepn̄kpọ oro ẹkụtde ke enyịn. Enye ama ekpep enye ndiberi edem ke odudu Jehovah utu ke eke esie. Paul nte an̄wan̄ade ama etịm ekpep n̄kpọ emi, koro ke ndusụk isua ke ukperedem enye ama ewet ọnọ ẹsọk mbon Philippi ete: “Mmekpep nditie ke orụk itie ekededi eke ntiede ye inem. Mmenyene ukeme ndinam kpukpru n̄kpọ ke odudu Andisọn̄ọ mi idem.”—Philippi 4:11, 13.

Nso kaban̄a fi? Nte afo ke ọyọ ndusụk orụk “n̄kukịm ke obụkidem,” ndusụk udọn̄ọ m̀mê idaha oro anamde afo enyene ekese editịmede esịt ke uwem? Edieke edide ntre, sọn̄ esịt. Ke adan̄aemi Jehovah mîdimenke n̄kpọ ubiọn̄ọ oro ifep ke utịbe utịbe usụn̄, enye ekeme ndinọ fi ọniọn̄ ye odudu ndiyọ enye nte afo akade iso ndinịm n̄kpọ Obio Ubọn̄ akpa ke uwem fo.—Matthew 6:33.

Edieke udọn̄ọ m̀mê usọn̄ ọbiọn̄ọde fi ndinam ekese nte afo akpamade ndinam ke utom Christian, kûfụhọ. Utu ke ndise idomo fo nte n̄kpọ emi osụhọrede utom emi anamde ọnọ Jehovah, da enye nte ifet ndikọri ibetedem fo ke enye. Ti, n̄ko, ete ke owo idaha nte utom emi Christian anamde okponde ibiere nte enye ọsọn̄de urua, edi ẹda mbuọtidem ye nte ima esie otụn̄ọde ẹbiere. (Men Mark 12:41-44 domo.) Ndima Jehovah ke ofụri ukpọn̄ ọwọrọ ete afo anam n̄kpọ esie ke ofụri ukeme fo—idịghe eke owo en̄wen.—Matthew 22:37; Galatia 6:4, 5.

Edieke “n̄kukịm ke obụkidem” fo abuanade idaha oro etiede mfụhọ mfụhọ ke uwem, utọ nte n̄kpa owo ima, tiene item Bible emi: “Top mbiomo fo nọ Jehovah, ndien enye ayakama fi: enye idiyakke edinen owo esehede ke nsinsi.” (Psalm 55:22) Christian an̄wan ekerede Sylvia ama anam emi. Ke ufan̄ isua ifan̄ kpọt, enye ama ọduọk ebe esie ke n̄kpa ke ẹma ẹkedọ ndọ ke isua 50 n̄ko ye owo usụkkiet eken ke ubon—esịnede n̄kpri nditọ-nditọ iba. Sylvia ọdọhọ ete: “Edieke mîkpedịghe Jehovah, n̄kpokofụhọ idiọk idiọk. Edi mma nnyene akwa ndọn̄esịt nto akam. Mma nnyene nneme kpukpru ini ye Jehovah. Mmọfiọk ke enye ọnọ mi ukeme ndiyọ.”

Ọnọ ndọn̄esịt didie ntem ndifiọk nte ke “Abasi kpukpru ndọn̄esịt” ekeme ndinọ mbon oro ẹfụhọde odudu ndiyọ! (2 Corinth 1:3; 1 Thessalonica 4:13) Ke ifiọkde emi, ubiere Paul ke n̄kpọ emi ekeme ndin̄wan̄a nnyịn. Enye ekewet ete: “Mmadara ke mmemidem, ye esuene, ye afanikọn̄, ye isịnenyịn, ye mbaba, kaban̄a Christ; koro ke adan̄aemi idem ememde mi, adan̄aoro ke ntịm nnyene nsọn̄idem.”—2 Corinth 12:10.

Ndiyọ Unana Mfọnmma

Kpukpru nnyịn ima ida unana mfọnmma imana ito akpa ete ye eka nnyịn eke owo. (Rome 5:12) Nte utịp, nnyịn idu ke en̄wan ye mme udọn̄ mmeme ikpọkidem. Edi n̄kpọ iduọesịt adan̄a didie ndifiọk nte ke mme edu “akani owo” ẹnyene ọkpọsọn̄ odudu ndimụm nnyịn akan nte nnyịn ikekerede! (Ephesus 4:22-24) Ke mme utọ ini oro ekeme nditie nnyịn ke idem nte eketiede apostle Paul, emi ekewetde ete: “Koro [mmadara] ibet Abasi ke ọwọn̄esịt mi: edi n̄kụt ibet efen ke mbak idem mi, nte an̄wanade ye ibet eke esịt mi amade, onyụn̄ adade mi nte ibuotekọn̄ esịn ke idak ibet idiọkn̄kpọ emi odude ke mbak idem mi.”—Rome 7:22, 23.

Mi, n̄ko, nnyịn imekeme ndibọ ufọn nto odudu emi otode Jehovah. Ke ini an̄wanade ye ọkpọkpọ mmeme, kûtre ndiwọn̄ọde mbịne enye ke akam, eyịrede oyom edifen esie inamke n̄kpọ m̀mê adan̄a ediwak ini didie ke afo enyene ndibịne enye kaban̄a ukem mfịna oro. Ke ntak mfọnido esie oro owo mîdotke, Jehovah, emi ‘odomode esịt’ emi onyụn̄ ekemede ndikụt adan̄a nte afo anamde ke esịt akpanikọ, ọyọnọ fi edisana esịt. (Mme N̄ke 21:2) Ebede ke edisana spirit esie, Jehovah ekeme ndinọ fi odudu ndika iso n̄n̄wana ye mme mmeme obụkidem.—Luke 11:13.

Nnyịn n̄ko imoyom odudu otode Jehovah ke ini inamde n̄kpọ ye unana mfọnmma mbon en̄wen. Ke uwụtn̄kpọ, ekemmọ Christian ekeme nditịn̄ ikọ ye nnyịn “nte ofụt ekịmde.” (Mme N̄ke 12:18) Emi ekeme ndinen̄ede nyat nnyịn esịt, akpan akpan edieke otode owo emi nnyịn ikerede ke akpana ọfiọk se ifọnde. Emi ekeme ndifịna nnyịn idiọk idiọk. Ndusụk owo ẹkam ẹda mme utọ ndudue oro nte ẹdide eti isọn̄ ndikpọn̄ Jehovah—akakan ndudue!

Nte ededi, edu oro adade ukem ukem ayan̄wam nnyịn ndinyene nnennen ekikere mban̄a mme mmeme mbon en̄wen. Nnyịn ikemeke ndidori enyịn ndikụt mfọnmma nto mme anana mfọnmma owo. Enyene-ọniọn̄ owo oro Solomon eti nnyịn ete: ‘Baba owo kiet eke mîduehe idụhe.’ (1 Ndidem 8:46) Arthur, Christian oro eyetde aran emi akanamde n̄kpọ Jehovah ke edinam akpanikọ ke n̄kpọ nte isua 70, ọkọdọhọ ete: “Mmeme mme ekemmọ asan̄autom anam ufan̄ odu ọnọ nnyịn ndiwụt nsọn̄ọnda, odomode edu Christian nnyịn. Edieke nnyịn iyakde se mme owo ẹtịn̄de m̀mê ẹnamde ọbiọn̄ọ nnyịn ndinam n̄kpọ Jehovah, nnyịn inam n̄kpọ inọ mme owo. Akande oro, enyene ndidi nditọete nnyịn n̄ko ẹma Jehovah. Edieke nnyịn iyomde eti edu ke idem mmọ, idibịghike nnyịn iyokụt ite ke mmọ ikam idiọkke ntre.”

Odudu Ndikwọrọ Ikọ

Mbemiso ọkọdọkde aka heaven, Jesus ama ọdọhọ mme mbet esie ete: “Mbufo ẹyebọ odudu, ke Edisana Spirit ama edi edidoro mbufo ke idem: mbufo ẹyenyụn̄ ẹdi mme ntiense Mi ke Jerusalem, ye ke ofụri Judea ye Samaria, tutu esịm utịt ererimbot.”—Utom 1:8.

Ke edisu mme ikọ Jesus, Mme Ntiense Jehovah ẹnam utom emi idahaemi ke idụt 233 ke ofụri ererimbot. Nte otu, mmọ ẹsịn se iwakde ikan biliọn hour kiet ke isua ke isua ndin̄wam mbon en̄wen ẹnyene ifiọk aban̄ade Jehovah. Ndinam utom emi isidịghe mmemmem n̄kpọ kpukpru ini. Ke ndusụk idụt ẹdori ukpan mîdịghe ẹbiọn̄ọ utom edikwọrọ Obio Ubọn̄ emi. Kere, n̄ko, anie anam utom emi—mme mmemmem, anana mfọnmma owo, emi mmọ kiet kiet ẹnyenede udeme mfịna ye mme editịmede esịt mmọ. Kpa ye oro utom emi ke aka iso, ndien nte utịp, ke isua ita ẹmi ẹbede, se ibede owo miliọn kiet ẹyak uwem mmọ ẹnọ Jehovah ẹnyụn̄ ẹyarade uyakidem mmọ ke baptism mmọn̄. (Matthew 28:18-20) Ke akpanikọ, ẹnam utom emi n̄kukụre ebe ke odudu Abasi. Jehovah ama etịn̄ ebe ke prọfet Zechariah ete: “Itoho ke odudu, inyụn̄ itoho ke nsọn̄idem, edi oto ke spirit mi.”—Zechariah 4:6.

Edieke afo edide asuanetop eti mbụk, afo emenyene udeme—inamke n̄kpọ ọkpọkọm etie nte ekpri akaha—ke akamba utom oro. Inamke n̄kpọ m̀mê nso ‘mme n̄kukịm’ ke ana afo ọyọ, afo emekeme ndinyene mbuọtidem nte ke Jehovah idifreke ‘utom fo ye ima enyịn̄ esie eke afo owụtde.’ (Mme Hebrew 6:10) Ntre ka iso ndiberi edem ke okopodudu Ebiet emi odudu otode kaban̄a un̄wam. Ti, edi ke odudu Jehovah ikpọn̄ ke nnyịn ikeme ndiyọ; ẹnam odudu esie ọfọn ama ke mme mmeme nnyịn.

[Mme Ikọ idakisọn̄]

[Ndise ke page 26]

Ẹnam utom ukwọrọikọ n̄kukụre ebe ke odudu Jehovah