Nte Afo Emenyene “N̄kukịm ke Obụkidem”?
1 Etịm ọdọn̄ nnyịn ndida ofụri ukeme nnyịn nyọhọ utom edikwọrọ eti mbụk oro inyenede. Ediwak ke otu ndima nditọete iren ye iban nnyịn, nte ededi, ẹkụt nte edide ọkpọsọn̄ n̄kpọ ndibuana ọyọhọ ọyọhọ ke ntak ikpọ udọn̄ọ ikpọkidem m̀mê mme unana ukeme ẹmi ẹbiọn̄ọde, ẹnamde ọsọn̄ mmọ ndinam adan̄a nte mmọ ẹkpemade ndinam. Ye mmọ, ekeme ndidi n̄kpọ-ata ndiyọ ekikere edikop mmemidem, akpan akpan ke ini mmọ ẹkụtde mmọ en̄wen ẹmi ẹdude ẹkpere mmọ nte ẹtịmde ẹsịn ifịk ke utom ukwọrọikọ.—1 Cor. 9:16.
2 Uwụtn̄kpọ Ndikpebe: Apostle Paul ekenyene ndiyọ “n̄kukịm ke obụkidem.” Enye ama ekpe Jehovah ubọk utịm ikata ndisio akama-mfụhọ n̄kpọ ubiọn̄ọ oro mfep, emi enye eketịn̄de aban̄a nte “isụn̄utom Satan” oro akatuaide enye. Edi, kpa ye oro, Paul ama ọyọ onyụn̄ aka iso ke utom ukwọrọikọ esie. Enye ikatuaha idemesie mbọm m̀mê ndikabade ndi uyịre uyịre andiseme. Enye ọkọnọ ofụri ukeme esie. Se ikanamde enye okụt unen ke ndiyọ ekedi nsọn̄ọ emi okotode Abasi mi: “Mfọn Mi ke ekekem fi; koro ẹnamde odudu Mi ọfọn ama ke mmemidem.” Mmemidem Paul ama akabade edi odudu ke ini enye ekekpepde ndinyịme idaha esie nnyụn̄ mberi edem ke Jehovah ye edisana spirit man ọyọ.—2 Cor. 12:7-10.
3 Nte Afo Ekemede Ndiyọ: Nte mmeme eke owo enịm mme adan̄a ke utom oro afo anamde ọnọ Abasi? Ke edide ntre, kpebe idaha ekikere Paul. Idem edieke udọn̄ọ m̀mê unana ukeme fo mînyeneke nsinsi usọbọ ke editịm n̄kpọ emi, afo emekeme ndikọn̄ ọyọhọ mbuọtidem fo ke Jehovah, emi ọdiọn̄ọde mme udọn̄ fo edinyụn̄ ọnọde “akwa ubom odudu.” (2 Cor. 4:7) Bọ ufọn to un̄wam oro odude ọnọ fi ke esop, kûnịm idem nsannsan. (N̄ke 18:1) Edieke okụtde nte ọsọn̄de fi ndibuana ke utom eke enyịnusụn̄ ke enyịnusụn̄, yom nti usụn̄ ndinọ ikọ ntiense ido nneme.
4 Okposụkedi n̄kukịm ke obụkidem ekemede ndisụhọde se afo ekemede ndinam ke utom ukwọrọikọ, kûkere ke imọ inyeneke ebuana. Ukem nte Paul, afo n̄ko emekeme ‘ndikwọrọ gospel mfọn Abasi,’ anamde se ukeme ye mme idaha fo ẹyakde. (Utom 20:24) Nte afo esịnde ukeme ndinam utom ukwọrọikọ fo mma, diọn̄ọ ete ke Jehovah enen̄ede enem esịt.—Heb. 6:10.