Ndiyọ “N̄kukịm ke Obụkidem”

“Mfọn Mi ke ekekem fi.”—2 CORINTH 12:9.

1, 2. (a) Ntak emi nnyịn mîkpokopke n̄kpaidem iban̄a mme idomo ye mfịna oro nnyịn isobode? (b) Ntak emi nnyịn ikemede ndinyene mbuọtidem ke ini isobode mme idomo?

“KPUKPRU owo eke ẹyomde ndidu eti uwem ke Christ Jesus ẹnyene ndibiom isịn-enyịn.” (2 Timothy 3:12) Ntak emi edide ntre? Koro Satan ọdọhọ ete ke owo anam n̄kpọ Abasi n̄kukụre ke ntak ibụk, ndien enye odu ke mbrenyịn ndisọn̄ọ ikọ esie. Jesus ama odụri mme anam-akpanikọ apostle esie utọn̄ inikiet ete: “Satan ekeben̄e mbufo ọbọ, man asak mbufo nte ibokpot.” (Luke 22:31) Jesus ama etịm ọfiọk nte ke Abasi esiyak Satan ada mme mfịna oro ẹkamade ubiak odomo nnyịn. Nte ededi, oro iwọrọke ite ke kpukpru mfịna oro nnyịn isobode ke uwem ẹto Satan m̀mê mme demon esie nnennen nnennen. (Ecclesiastes 9:11) Edi Satan enyene ọkpọsọn̄ udọn̄ ndida kpukpru ukeme oro enye enyenede mbiat nsọn̄ọnda nnyịn.

² Bible asian nnyịn ete ke nnyịn ikpenyeneke ndikop n̄kpaidem mban̄a mme idomo nnyịn. Se ededi oro ekemede nditịbe nnọ nnyịn idịghe esen n̄kpọ m̀mê se owo mîkodorike enyịn. (1 Peter 4:12) Ke akpanikọ, “utọ ndutụhọ emi ke ọyọyọhọ ke otu nditọ-ete [nnyịn] emi ẹdude ke ererimbot.” (1 Peter 5:9) Mfịn, Satan ke esịn kpukpru asan̄autom Abasi ke idak ọkpọsọn̄ mfịghe. Devil adat esịt ndikụt ediwak mfịna oro ẹtiede nte n̄kukịm ẹtuaide nnyịn. Man anam oro, enye ada editịm n̄kpọ esie anam n̄kpọ ke usụn̄ oro ekemede ndidian m̀mê ndinam ‘n̄kukịm’ ekededi ‘ke obụkidem’ enen̄ede ọsọn̄ ubọk. (2 Corinth 12:7) Kpa ye oro, en̄wan Satan ikpenyeneke ndibiat nsọn̄ọnda nnyịn. Kpa nte Jehovah ‘edisiakde usụn̄ ubọhọ’ ọnọ nnyịn man iyọ idomo, enye ayanam ukem oro n̄ko ke ini nnyịn isobode mme mfịna oro ẹtiede nte n̄kukịm ke obụkidem nnyịn.—1 Corinth 10:13.

Nte Ikemede Ndiyọ N̄kukịm

3. Nso ikedi ibọrọ Jehovah ke ini Paul ekeben̄ede enye ete osio imọ n̄kukịm ke obụkidem?

³ Apostle Paul ama eben̄e Abasi ete osio imọ n̄kukịm ke obụkidem. “Mban̄a n̄kpọ emi ke n̄kekpe Ọbọn̄ ubọk utịm ikata, nte adaha ọkpọn̄ mi.” Nso ikedi ibọrọ Jehovah ke ifịk ifịk eben̄e Paul? “Mfọn Mi ke ekekem fi; koro ẹnamde odudu Mi ọfọn ama ke mmemidem.” (2 Corinth 12:8, 9) Ẹyak nnyịn idụn̄ọde ibọrọ emi inyụn̄ ise nte enye ekemede ndin̄wam nnyịn ndiyọ mfịna ekededi oro etiede nte n̄kukịm oro anamde nnyịn ikop ubiak.

4. Ke mme usụn̄ ewe ke Paul ọkọbọ ufọn oto mfọnido Jehovah oro owo mîdotke?

⁴ Tịm fiọk ete ke Abasi ama esịn udọn̄ ọnọ Paul ndiwụt esịtekọm mban̄a mfọnido oro owo mîdotke oro ẹma ẹkenanam esịm enye ebe ke Christ. Ke akpanikọ, ẹma ẹnen̄ede ẹdiọn̄ Paul ke ediwak usụn̄. Jehovah ke ima ima usụn̄ ama ọnọ enye ifet edidi mbet, okposụkedi enye ekedide enyene-ukwan̄ ifiopesịt andibiọn̄ọ mme anditiene Jesus. (Utom 7:58; 8:3; 9:1-4) Ke oro ebede, Jehovah ke mfọnido ama ọnọ Paul ediwak aduai-owo-idem utom ye ifetutom. In̄wan̄-in̄wan̄ ukpepn̄kpọ odu ọnọ nnyịn. Idem ke ndiọkn̄kan ini, nnyịn imesisụk inyene ediwak edidiọn̄ ndiwụt esịtekọm mban̄a. Mme idomo nnyịn ikpedehede inam nnyịn ifre mme akpakịp ufọn Jehovah.—Psalm 31:19.

5, 6. (a) Didie ke Jehovah ekekpep Paul nte ke ẹnam odudu Abasi “ọfọn ama ke mmem-idem”? (b) Didie ke uwụtn̄kpọ Paul okowụt ke Satan edi osu nsu?

⁵ Mfọnido Jehovah oro owo mîdotke ekem ke mme usụn̄ en̄wen. Odudu Abasi okpon ekem ndin̄wam nnyịn ke mme idomo nnyịn. (Ephesus 3:20) Jehovah ama ekpep Paul nte ke ẹnam odudu Abasi “ọfọn ama ke mmem-idem.” Didie? Enye ke ima ima usụn̄ ama ọnọ Paul ofụri odudu oro enye okoyomde man ọyọ idomo esie. Ke n̄kan̄ eken, ime Paul ye ọyọhọ mbuọtidem esie ke Jehovah ama owụt kpukpru owo nte ke odudu Abasi ama enyene edikan ke idem mmemmem ye anamidiọk owo emi. Ke emi, kere ban̄a utịp oro emi enyenede ke idem Devil, emi ọdọhọde ete ke mme owo ẹnam n̄kpọ Abasi n̄kukụre ke ini uwem enemde, mfịna mînyụn̄ idụhe. Nsọn̄ọnda Paul eketie nte edimia ọdọk-edidọk oro ufia!

⁶ Paul, akani nsan̄a Satan ke en̄wan esie ndibiọn̄ọ Abasi, ekedi atan̄idem andibiọn̄ọ mme Christian, ifịk ifịk owo Pharisee emi, nte eyịghe mîdụhe, inikiet ko okodude ọkpọmiọk uwem ke ntak enye akamanade odụk ufọk imọ. Paul idahaemi akanam n̄kpọ Jehovah ye Christ nte ‘n̄kpri n̄kan ke otu mme apostle.’ (1 Corinth 15:9) Ke ntre, enye ke nsụhọdeidem ama osụk ibuot ọnọ odudu ukara Otu Ukara eke akpa isua ikie. Ndien enye ama ọyọ ke edinam akpanikọ kpa ye n̄kukịm ke obụkidem esie. Ke edide n̄kpọ edikpu ọnọ Satan, mme idomo uwem ikanamke Paul etek ke ifịk. Paul ikedehede iwọn̄ọde ntịn̄enyịn esie ifep ke idotenyịn oro nte ke imọ iyabuana ke Obio Ubọn̄ Christ eke heaven. (2 Timothy 2:12; 4:18) N̄kukịm ndomokiet ikekemeke ndisụhọde ifịk esie inamke n̄kpọ m̀mê ubiak okokpon adan̄a didie. Akpakam ifịk nnyịn aka iso ndisọn̄ ukem ntre! Ebede ke ndisọn̄ọ nnyịn idem ke mme idomo nnyịn, Jehovah ada ifet ediwụt ke Satan edi osu nsu ọnọ nnyịn ukpono.—Mme N̄ke 27:11.

Mme Ndutịm Jehovah Ẹdi Akpan N̄kpọ

7, 8. (a) Ke nso usụn̄ ke Jehovah ọnọ mme asan̄autom esie odudu mfịn? (b) Ntak emi edikot Bible ke usen ke usen ye edikpep n̄kpọ ẹnen̄erede ẹdi akpan n̄kpọ ke ndiyọ n̄kukịm ke obụkidem nnyịn?

⁷ Mfịn, Jehovah ọnọ mme anam-akpanikọ Christian odudu ebe ke edisana spirit esie, Ikọ esie, ye itie nditọete Christian nnyịn. Ukem nte apostle Paul, nnyịn imekeme nditop mbiomo nnyịn nnọ Jehovah ke akam. (Psalm 55:22) Okposụkedi Abasi mîdimenke mme idomo nnyịn ifep, enye ekeme ndinọ nnyịn ọniọn̄ man iyọ mmọ, idem ye mme idomo oro ẹnen̄erede ẹsọn̄ ndiyọ. Jehovah ekeme n̄ko ndinọ nnyịn ukeme—ọnọde nnyịn “akwa ubom odudu”—man an̄wam nnyịn ndiyọ.—2 Corinth 4:7.

⁸ Didie ke nnyịn ikeme ndibọ utọ un̄wam oro? Ana nnyịn ikpep ikọ Abasi ifịk ifịk, koro edi do ke nnyịn idikụt ata ndọn̄esịt. (Psalm 94:19) Ke Bible, nnyịn imesikot mme mbọm mbọm ikọ eben̄e mme asan̄autom Abasi nte mmọ ẹkeben̄ede ẹyom un̄wam Esie. Mme ibọrọ oro Jehovah esinọde, emi ẹsiwakde ndisịne mme ikọ ndọn̄esịt, ẹdi n̄kpọ ndikere mban̄a. Ndikpep Ikọ Abasi ọyọsọn̄ọ nnyịn idem man “akwa ubom odudu esie okpoto Abasi, itoho nnyịn.” Kpa nte oyomde nnyịn idia ata udia kpukpru usen kaban̄a nsọn̄idem ye odudu, ntre ana nnyịn ibọk idem ke ikọ Abasi kpukpru ini. Nte nnyịn imanam emi? Edieke inamde, do nnyịn iyokụt nte ke ndibọ “akwa ubom odudu” an̄wam nnyịn ndiyọ se ededi ndamban̄a n̄kukịm oro ekemede ndifịna nnyịn idahaemi.

9. Didie ke mbiowo ẹkeme ndin̄wam mmọ oro ẹyọde mme mfịna?

⁹ Mbiowo Christian oro ẹbakde Abasi ẹkeme ‘ndikabade ntie nte ọtọ udịbe’ afanikọn̄, ye “etehe ubọhọ edịm” mme mfịna. Mbiowo, oro ẹyomde ikọ eke odudu spirit emi osu mmọ ke idem, ẹben̄e Jehovah ke nsụhọdeidem ye ke esịt akpanikọ ndinọ mmọ “edeme mmọ eke ẹkpepde n̄kpọ” man mmọ ẹkeme ndifiọk nte ẹkpedade ndinen ikọ ẹnọ mbon oro ẹkụtde ndutụhọ ibọrọ. Ikọ mbiowo ẹkeme nditie nte sụn̄sụn̄ edịm oro ebịtde onyụn̄ ọnọde spirit nnyịn ndọn̄esịt ke n̄kpọsọn̄ ini ke uwem. Ebede ke ‘ndisọn̄ọ mbon iduọ-esịt idem,’ mbiowo ẹnen̄ede ẹn̄wam nditọete mmọ eke spirit emi ẹkemede ndikpa mba m̀mê ẹkopde iduọesịt ke ntak ndusụk n̄kukịm ke obụkidem mmọ.—Isaiah 32:2; 50:4; 1 Thessalonica 5:14.

10, 11. Didie ke mme asan̄autom Abasi ẹkeme ndisịn udọn̄ nnọ mbon oro ẹsobode n̄kpọsọn̄ idomo?

¹⁰ Kpukpru mme asan̄autom Jehovah ẹdi ubak ubon Christian esie oro ẹdianade kiet. Ih, nnyịn idi “ndido inọ kiet eken” ndien nnyịn imenyene mbiomo ‘ndima kiet eken.’ (Rome 12:5; 1 John 4:11) Didie ke nnyịn ikeme ndibiom mbiomo emi? Nte ekemde ye 1 Peter 3:8, nnyịn inam ntre ebe ke ‘ndikop mbọm ye kiet eken, nditie ima ima nte nditọete, ndinyụn̄ nnyene mfefere esịt’ ye kpukpru mmọ emi ẹtode ke ufọk mme andinịm ke akpanikọ. Amaedi mbon oro ẹyọde n̄kukịm oro enen̄erede akama ubiak ke obụkidem, edide mmọ ẹdi n̄kpri m̀mê ikpọ owo, kpukpru nnyịn imekeme ndiwụt mmọ san̄asan̄a edikere mban̄a. Didie?

¹¹ Nnyịn ikpenyene ndisịn ukeme ndikere mban̄a ndutụhọ mmọ. Edieke nnyịn inanade esịtmbọm, m̀mê udọn̄, nnyịn ke unana edifiọk imekeme ndinam ndutụhọ mmọ etetịm ọsọn̄ ubọk. Nnyịn ndifiọk mban̄a mme idomo mmọ ekpenyene ndinụk nnyịn ndikpeme se nnyịn itịn̄de, nte nnyịn itịn̄de, ye nte nnyịn inamde n̄kpọ. Nnyịn ndinyene in̄wan̄-in̄wan̄ edu nnyụn̄ nnọ nsịnudọn̄ ekeme ndin̄wam ndisụhọde ndusụk n̄kpọsọn̄ ubiak ẹtode n̄kukịm ekededi oro mmọ ẹkopde. Nnyịn ke ntre imekeme ndidi n̄kpọ nsịnudọn̄ nnọ mmọ.—Colossae 4:11, NW.

Nte Ndusụk Owo Ẹyọde Uforo Uforo

12-14. (a) Nso ke Christian kiet akanam man ọyọ kansa? (b) Didie ke nditọete eke spirit n̄wan emi ẹkenọ enye un̄wam ye nsịnudọn̄?

¹² Nte nnyịn isan̄ade ikpere utịt ukperedem ini emi, “ntọn̄ọ ubiak uman” ke ọkọri ke usen ke usen. (Matthew 24:8) Ntem, etie nte idomo eyesịm kpukpru owo ke isọn̄, akpan akpan mme anam-akpanikọ asan̄autom Jehovah, emi ẹyomde ndinam uduak esie. Ke uwụtn̄kpọ, kere ban̄a Christian oro anamde utom ukwọrọikọ uyọhọ ini. Ẹma ẹdụn̄ọde ẹfiọk ke enye ama enyene kansa ndien ẹkenyene ndinam enye usiakidem man ẹsio efọk etap ye usan̄a iyịp ẹfep. Ke ini enye ye ebe esie ẹkefiọkde ẹte ke enye enyene udọn̄ọ emi, mmọ ẹma ẹsọsọp ẹka ẹbịne Jehovah ke anyan akam n̄kpeubọk. Eyenete an̄wan oro ama ọdọhọ ke ukperedem ete ke mmimọ ima inyene emem oro inua mîkemeke nditịn̄. Kpa ye oro, enye ama ọyọ ediwak nti ye ndiọi idaha, akpan akpan ke ini ọyọde ye mme mfịna oro ẹtode usọbọ esie.

¹³ Man ọyọ idaha esie, eyenete an̄wan emi ama odomo ndikpep adan̄a ediwak n̄kpọ nte enye ekekeme mban̄a kansa. Enye ama esinyene nneme ye mbiaibọk esie. Ke Enyọn̄-Ukpeme ye Awake!, ye mme n̄wed Christian oro ẹnyenede ebuana, enye ama okụt mme mbụk eyouwem ẹwụtde nte mme owo ẹkeyọde udọn̄ọ emi ke n̄kan̄ eke ntụk. Enye n̄ko ama esikot mme ufan̄ikọ Bible oro ẹnyenede ebuana, oro ẹwụtde ukeme Jehovah ndisọn̄ọ ikọt esie idem ke mme ini mfịna, ye ntọt eken oro ẹkedide n̄kpọ un̄wam.

¹⁴ Ibuotikọ kiet akaban̄ade nte ẹkemede ndiyọ mfụhọ ama etịn̄ aban̄a ikọ ọniọn̄ emi: “Owo ido esie ebịne se enye oyomde.” (Mme N̄ke 18:1) Ibuotikọ oro ke ntre ama ọnọ item emi: “Fep Ndidu Ikpọn̄.”a Eyenete an̄wan oro obụk ete: “Ediwak owo ẹma ẹsian mi ẹte ke mmimọ ima ibọn̄ akam iban̄a mi; mbon eken ẹma ẹnọ mi ikot ke urụk ukopikọ. Mbiowo iba ẹma ẹsinọ mi ikot ke urụk ukopikọ kpukpru ini man ẹbụp nte idem mi eketiede. Mma mbọ flawa, ye ediwak kad. Ndusụk owo ẹma ẹsikam ẹtem udia. N̄ko, ediwak owo ẹma ẹnọ idem mmọ unyịme unyịme ndida mi n̄ka ufọkibọk.”

15-17. (a) Didie ke Christian kiet ọkọyọ mme mfịna oro ẹketode mbabuat n̄kpọntịbe ubomisọn̄? (b) Nso un̄wam ke mbon oro ẹdude ke esop ẹkenọ?

¹⁵ Asan̄autom Jehovah oro anamde utom ke anyan ini ke Mexico, U.S.A, ama enyene unọmọ mbabuat n̄kpọntịbe ubomisọn̄ utịm ikaba. N̄wan emi ama ada unan ke itọn̄ ye afara esie, adade esịm udọn̄ọ ewan̄kọ emi enye ọyọde ke se ibede isua 25 idahaemi. Enye obụk ete: “Ekesidi ata ọkpọsọn̄ n̄kpọ ọnọ mi ndimenede ibuot mi ke enyọn̄ ndinyụn̄ ndịbede n̄kpọ ekededi emi okodobide akan kilogram iba. Edi akam ofụri esịt oro mbọn̄de nnọ Jehovah ọmọsọn̄ọ mi idem akamba akamba. Ntre ke onyụn̄ edi ye mme ibuotikọ oro isikpepde ke Enyọn̄-Ukpeme. Kiet ama etịn̄ n̄kpọ aban̄a Micah 6:8, owụtde nte ke ndisụk idem nsan̄a ye Abasi ọwọrọ owo ndifiọk mmeme esie. Emi ama an̄wam mi ndifiọk nte ke kpa ye idaha mi, ami n̄kpenyeneke ndikop mmemidem, idem okposụkedi ini oro mbiatde ke utom ukwọrọikọ ekekpride akan se n̄kpamade ndibiat. Ndinam n̄kpọ esie ye eti uduakesịt enen̄ede edi akpan n̄kpọ.”

¹⁶ Enye ọtọt n̄ko ete: “Mbiowo ẹma ẹsitoro mi kpukpru ini kaban̄a ukeme oro n̄kesịnde ndidụk mme mbono esop nnyụn̄ n̄wọrọ an̄wautom. N̄kpri owo ẹma ẹsikọm mi ẹnyụn̄ ẹfat mi. Mme asan̄autom asiakusụn̄ ẹma ẹsinen̄ede ẹnyene ime ye ami ndien ẹsinyụn̄ ẹwak ndifiak ndiomi ndutịm mmọ ke mme usen oro idem mîkayakke mi n̄wọrọ an̄wautom. Ke ini idaha eyo ọdiọkde, mmọ ke mfọnido ẹma ẹsida mi ẹka mme mfiakn̄ka m̀mê ẹkot mi nditiene mbuana ke mme ukpepn̄kpọ Bible mmọ. Ndien sia mmen̄kesikemeke ndikama ekpat ukwọrọikọ, mme asuanetop eken ẹma ẹsisịn mme n̄wed mi ke ekpat mmọ ke ini nnyịn inamde utom ukwọrọikọ.”

¹⁷ Tịm fiọk nte mbiowo esop ye mme ekemmọ andinịm ke akpanikọ ẹken̄wamde nditọete iban iba emi ndiyọ udọn̄ọ mmọ oro eketiede nte n̄kukịm. Mmọ ẹma ẹnọ ata ata un̄wam ke mfọnido ndiyụhọ mme akpan udọn̄ eke spirit, eke ikpọkidem, ye eke ntụk. Nte oro isịnke udọn̄ inọ fi ndinọ nditọete en̄wen oro ẹdude ke mfịna un̄wam? Mbufo n̄kpri owo n̄ko ẹmekeme ndidi n̄kpọ un̄wam nnọ mbon esop mbufo oro ẹn̄wanade ye n̄kukịm ke obụkidem mmọ.—Mme N̄ke 20:29.

18. Nso nsịnudọn̄ ke nnyịn ikeme ndinyene nto mme mbụk eyouwem oro ẹmịn̄de ke magazine Enyọn̄-Ukpeme ye Awake!?

¹⁸ Ẹmịn̄ ediwak mbụk eyouwem ye ifiọk n̄kpọntịbe Mme Ntiense oro ẹma ẹkeyọ, ẹnyụn̄ ẹkade iso ndiyọ mme mfịna uwem ke magazine Enyọn̄-Ukpeme ye Awake! Nte afo okotde mme utọ ibuotikọ oro kpukpru ini, afo oyokụt nte ke ediwak nditọete fo eke spirit ke ofụri ererimbot ẹmeyọ nsọn̄ọn̄kpọ ndutịm uforo, editaba mbonima ke ini afanikọn̄, ye ke mme enyene-ndịk ekọn̄. Mbon eken ẹyọ udọn̄ọ oro obiomode owo ndo. Ediwak ikemeke ndinam ndusụk mmemmem n̄kpọ ke uwem oro mbon oro ẹkopde nsọn̄idem ẹdade mfefere mfefere. Udọn̄ọ mmọ enen̄ede esịn mmọ ke akamba udomo, akpan akpan ke ini mmọ mîkemeke ndibuana ke mme edinam Christian adan̄a nte mmọ ẹkpemade ndinam. Mmọ ẹwụt ntotụn̄ọ esịtekọm didie ntem ẹban̄a un̄wam ye ibetedem oro nditọete mmọ, n̄kpri ye ikpọ, ẹnọde mmọ!

Ime Ada Inemesịt Edi

19. Ntak emi Paul ekekemede ndidat esịt kpa ye mme idomo ye mmemidem esie oro ẹketiede nte n̄kukịm?

¹⁹ Paul ama adat esịt ndikụt nte Abasi ọkọsọn̄ọde enye idem. Enye ọkọdọhọ ete: “Ntre ke adat mi esịt eti-eti ndinam mbụre ke mmem-idem mi, man odudu Christ odoro ofụk mi. Mmọdo mmadara ke mmem-idem, ye esuene, ye afanikọn̄, ye isịn-enyịn, ye mbaba, kaban̄a Christ; koro ke adan̄aemi idem ememde mi, adan̄aoro ke ntịm nnyene nsọn̄idem.” (2 Corinth 12:9, 10) Ke ntak ọkpọkpọ ifiọk n̄kpọntịbe esie, Paul ama ekeme nditịn̄ uko uko ete: “N̄tịn̄ke nte owo unana; koro mmekpep nditie ke orụk itie ekededi eke ntiede ye inem. Mmọdiọn̄ọ ndidu ke usụhọde-itie, mmonyụn̄ ndiọn̄ọ ndinyene n̄kpọ uwak-uwak. Ke kpukpru itie ye ke kpukpru ebiet, emehe mi ndidia nyụhọ, ndinyụn̄ ntie biọn̄; ndinyene n̄kpọ uwak-uwak, ndinyụn̄ nnana n̄kpọ. Mmenyene ukeme ndinam kpukpru n̄kpọ ke odudu Andisọn̄ọ mi idem.”—Philippi 4:11-13.

20, 21. (a) Ntak emi nnyịn ikpokopde idatesịt nditie n̄kere “se owo mîkwe ke enyịn”? (b) Nso idi ndusụk n̄kpọ oro “owo mîkwe ke enyịn” oro afo odoride enyịn ndikụt ke Paradise isọn̄?

²⁰ Ntre, ndien, ebede ke ndiyọ se ededi oro edide ndamban̄a n̄kukịm ke obụkidem nnyịn, nnyịn imekeme ndinyene akwa inemesịt ndiwụt kpukpru owo nte ke ẹnam odudu Jehovah ọfọn ama ke mmemidem nnyịn. Paul ekewet ete: “Esịt iduọhọ nnyịn; . . . Idem nnyịn emi odude ke esịt-esịt ke akabade edi obufa ke usen ke usen. Koro mfefere ukụt nnyịn, emi mîdibịghike bịghi, ọdọdiọn̄ anam nnyịn inyene nsinsi ubọn̄, eke okponde odobi; sia nnyịn . . . idọn̄ enyịn ke se owo mîkwe ke enyịn; koro . . . se owo mîkwe ke enyịn eyebịghi ke nsinsi-nsinsi.”—2 Corinth 4:16-18.

²¹ Ata ediwak ikọt Jehovah mfịn ẹdori enyịn ndidu uwem ke Paradise esie eke isọn̄ ndinyụn̄ ndara mme edidiọn̄ oro enye ọn̄wọn̄ọde. Ẹkeme ndikere mban̄a mme utọ edidiọn̄ oro mfịn nte se owo “mîkwe ke enyịn.” Nte ededi, ini oro nnyịn idikụtde mme edidiọn̄ emi ke enyịn nnyịn ke asan̄a ekpere usọp usọp, ih, idarade mmọ ke nsinsi. Kiet ke otu mme edidiọn̄ oro edidi ndibọhọ edidu uwem ye mfịna ekededi oro etiede nte n̄kukịm! Eyen Abasi ‘ayabiat utom Satan’ onyụn̄ “osobo enye emi akamade odudu n̄kpa.”—1 John 3:8; Mme Hebrew 2:14.

22. Nso mbuọtidem ye ubiere ke nnyịn ikpenyene?

²² Ke ntre, se ededi n̄kukịm ke obụkidem oro ọnọmọde nnyịn mfịn, ẹyak nnyịn ika iso ndiyọ enye. Ukem nte Paul, nnyịn iyenyene odudu ndinam ntre ito Jehovah, emi ọnọde nnyịn odudu uwak uwak. Ke ini ididude ke Paradise isọn̄, nnyịn iyọkọm Jehovah Abasi nnyịn kpukpru usen ke kpukpru utịben̄kpọ oro enye anamde ke ibuot nnyịn.—Psalm 103:2.

[Ikọ idakisọn̄]

Didie ke Afo Ọkpọbọrọ?

• Ntak-a ndien didie ke Devil esidomo ndibiat nsọn̄ọnda mme ata Christian?

• Didie ke ẹnam odudu Jehovah “ọfọn ama ke mmemidem”?

• Didie ke mbiowo ye mbon en̄wen ẹkeme ndisịn udọn̄ nnọ mbon oro ẹsobode mfịna?

[Ndise ke page 18]

Paul ama ọbọn̄ akam utịm-ikata ọnọ Abasi ete enye osio imọ n̄kukịm ke obụkidem