Ikpe Ẹbierede Ke Itịghede Ikpe
“Yak mme idụt . . . ẹdọk ẹdi ke ebeden̄ Jehoshaphat: koro nyetie do n̄kpe ikpe kpukpru mme idụt.”—JOEL 3:12.
1. Ntak emi Joel okụtde mme udịm ẹsopde idem ke “itịghede ikpe”?
“UDỊM! udịm! ke itịghede ikpe”! Nnyịn ikot mme ikọ oro ẹdemerede owo udọn̄ do ke Joel 3:14. Ntak emi ẹsopde mme udịm ẹmi? Joel ọbọrọ ete: “Usen Jehovah emekpere.” Enye edi akwa usen uwụt unen Jehovah—usen edibiere ikpe nnọ akwa udịm owo ẹmi ẹsịnde Obio Ubọn̄ Abasi oro ẹma ẹkewụk ke idak Christ Jesus. Ke akpatre, “angel inan̄” eke Ediyarade ibuot 7 ẹyesana “ofụm isọn̄ mbinan̄” ẹyak, osụn̄ọde ke “akwa ukụt . . . orụk eke akanam mîdụhe toto ke editọn̄ọ ererimbot tutu esịm emi, eke mîdinyụn̄ idụhe aba.”—Ediyarade 7:1; Matthew 24:21.
2. (a) Ntak emi ẹkotde itie ubiereikpe Jehovah nte odotde ẹte “ebeden̄ Jehoshaphat”? (b) Didie ke Jehoshaphat akanam n̄kpọ nte enende ke ini ẹkedade en̄wan ẹtiene enye?
2 Ke Joel 3:12, ẹkot itie ubiereikpe emi “ebeden̄ Jehoshaphat.” Nte odotde, ke ini afanikọn̄ ke mbụk Judah, Jehovah ama ebiere ikpe do ke ibuot eti Edidem Jehoshaphat, emi enyịn̄ esie ọwọrọde “Jehovah Edi Ebiereikpe.” Ndikere mban̄a se iketịbede ke ini oro eyetịm an̄wam nnyịn ndifiọk se iyomde ndida itie ke eyo nnyịn. Ẹkụt mbụk oro ke 2 Chronicles ibuot 20. Ke ufan̄ikọ 1 eke ibuot oro, nnyịn ikot ite ke “nditọ Moab, ye nditọ Ammon, ye ubak mme Meunim n̄ko ẹdi ndin̄wana ekọn̄ ye Jehoshaphat.” Jehoshaphat akanam n̄kpọ didie? Enye akanam se mme anam-akpanikọ asan̄autom Jehovah ẹsinamde kpukpru ini ke ini afanikọn̄. Enye ama ọwọn̄ọde ebịne Jehovah kaban̄a ndausụn̄, ọbọn̄de akam ifịk ifịk ete: “O Abasi nnyịn, nte afo udukpehe ikpe ye mmọ? koro nnyịn mînyeneke odudu ke iso akwa otuowo ẹmi ẹdide ndin̄wana ekọn̄ ye nnyịn? nnyịn inyụn̄ ifiọkke se nnyịn idinamde: edi nnyịn idori enyịn ye afo.”—2 Chronicles 20:12.
Jehovah Ọbọrọ Akam
3. Nso item ke Jehovah ọkọnọ Judah ke ini ẹkesobode en̄wan okotode mme idụt n̄kann̄kụk?
3 Ke adan̄aemi “ofụri Judah [ẹdade] ke iso Jehovah ye n̄kpri nditọwọn̄ mmọ, ye iban mmọ, ye nditọ mmọ,” Jehovah ama ọnọ ibọrọ esie. (2 Chronicles 20:13) Kpa nte enye adade “asan̄autom [esie] emi anamde akpanikọ, onyụn̄ enyenede ọniọn̄” mfịn, ntre ke akwa Andikop akam ọkọnọ prọfet owo Levi oro Jahaziel odudu ndinọ mbon oro ẹkesopde idem ibọrọ Esie. (Matthew 24:45) Nnyịn ikot ite: “Ntem ke Jehovah ọdọhọ mbufo, ete, Mbufo ẹkûdịghe, nsia okûnyụn̄ oyomo mbufo ke iso akwa otuowo emi; koro mîdịghe mbufo ke ekọn̄ emi enyene, ke edi eke Abasi. . . . Mbufo ẹkûkpa ndin̄wana ekọn̄ emi: [Ẹda itie mbufo, ẹsọn̄ọ ẹda ẹnyụn̄ ẹkụt edinyan̄a Jehovah ke ibuot mbufo. . . . Ẹkûfehe ndịk m̀mê ndiyomo nsia. Ẹwọrọ ẹbịne mmọ n̄kpọn̄, NW] koro Jehovah odude ye mbufo.”—2 Chronicles 20:15-17.
4. Ke nso usụn̄ ke Jehovah okoyom ete ikọt esie ẹsịn ifịk, ẹkûtie ndebe ndebe, ke ini mmọ ẹkesobode n̄kpọ-ata otode mme asua?
4 Jehovah ama oyom n̄kpọ efen efen oto Edidem Jehoshaphat ye ikọt esie akan mmọ ndiwan̄ ubọk ntie ikpîkpu, ẹbetde utịbe utịbe edinyan̄a. Mmọ ẹkenyene ndinam usio-ukot ndinam n̄kpọ mban̄a n̄kpọ-ata mbon asua oro. Edidem ye ‘ofụri mbon Judah, idem n̄kpri nditọwọn̄, iban mmọ ye nditọ mmọ,’ ẹma ẹwụt ọkpọsọn̄ mbuọtidem nte mmọ ke n̄kopitem ẹkebakde ẹdemede ke usenubọk ẹnyụn̄ ẹwọrọ ẹka ndisobo ye akwa udịm owo oro ẹkedade ekọn̄ ẹdụk. Ke usụn̄, edidem ama aka iso ndinọ item ukara Abasi ye nsịnudọn̄, akpakde mmọ ete: “Ẹberi idem mbufo ye Jehovah Abasi mbufo, ndien oyomụm mbufo akama; ẹnịm uyo mme prophet esie ke akpanikọ, ndien mbufo ẹyekụt unen.” (2 Chronicles 20:20) Mbuọtidem ke Jehovah! Mbuọtidem ke mme prọfet esie! Oro ekedi ukpọhọde edikụt unen. Kpasụk ntre mfịn, nte nnyịn ikade iso ndisịn ifịk ke utom Jehovah, akpakam nnyịn idehede iyịk ke enye ayanam mbuọtidem nnyịn akan!
5. Didie ke Mme Ntiense Jehovah mfịn ẹsịn ifịk nte mmọ ẹtorode Jehovah?
5 Ukem nte mbon Judah eke eyo Jehoshaphat, ana nnyịn “[itoro] Jehovah; koro ima esie edide nsinsi.” Didie ke nnyịn inọ itoro emi? Ebe ke nnyịn ndikwọrọ Obio Ubọn̄ ifịk ifịk! Nte mbon Judah oro “[ẹketọn̄ọde] ikwọ ye itoro,” ntre ke nnyịn ida mme utom idian ke mbuọtidem nnyịn. (2 Chronicles 20:21, 22) Ih, ẹyak nnyịn iwụt ukem ata n̄kokon̄ mbuọtidem oro nte Jehovah eben̄ede idem ndinam n̄kpọ mban̄a mme asua nnyịn! Okposụkedi ekemede nditie nte usụn̄ oyom, ẹyak nnyịn ibiere ndiyọ, ikopde idem ke mbuọtidem, kpa nte ikọt esie oro ẹkande ẹnamde ke mme itie afanikọn̄ ke isọn̄ mfịn. Ke ndusụk idụt oro ukọbọ, afai, akan̄, ye nsọn̄ọn̄kpọ ndutịm uforo ẹnen̄erede ẹsọn̄ ubọk, mme anam-akpanikọ asan̄autom Abasi ke ẹkụt n̄wọrọnda utịp, nte 1998 Yearbook of Jehovah’s Witnesses ọtọtde.
Jehovah Anyan̄a Ikọt Esie
6. Didie ke ọkpọsọn̄ mbuọtidem an̄wam nnyịn ndisọn̄ọ nda mfịn?
6 Mme idụt oro mîten̄eke Abasi oro ẹkekande Judah ẹkụk ẹma ẹdomo ndifụk ikọt Abasi, edi ye mbuọtidem oro odotde ẹkpebe ikọt Jehovah ẹma ẹnam n̄kpọ ẹban̄a ebe ke ndikwọ itoro. Nnyịn imekeme ndiwụt ukem mbuọtidem oro mfịn. Ebede ke ndisịn ofụri uwem nnyịn ke mme utom oro ẹtorode Jehovah, nnyịn imọsọn̄ọ n̄kpọekọn̄ eke spirit nnyịn, inamde ufan̄ okûdu ọnọ mme n̄kari n̄kari edinam Satan ndibe ndụk. (Ephesus 6:11) Ọkpọsọn̄ mbuọtidem ọyọbiọn̄ọ idomo edidi se esuene esuene unọ idem inemesịt, uma-inyene, ye unana udọn̄ oro ẹdade ẹdiọn̄ọ n̄kpakpa ererimbot oro akande nnyịn okụk ọwọn̄ọrede ntịn̄enyịn. Mbuọtidem emi owo mîkemeke ndikan mi ayanam nnyịn ika iso inam utom ke nsọn̄ọnda ye “asan̄autom emi anamde akpanikọ, onyụn̄ enyenede ọniọn̄” nte nnyịn ikade iso ndibọ ufọn nto udia eke spirit oro ẹnọde “ke edikem ini.”—Matthew 24:45.
7. Didie ke Mme Ntiense Jehovah ẹnam n̄kpọ ẹban̄a nsio nsio en̄wan oro ẹdade ẹtiene mmọ?
7 Mbuọtidem nnyịn oro ọkọn̄ọde ke Bible eyekpeme nnyịn ọbiọn̄ọ ubịnikọt usua oro mbon oro ẹwụtde edu “idiọk asan̄autom” eke Matthew 24:48-51 ẹdemerede. Ke ẹsude prọfesi emi ke n̄wọrọnda usụn̄, mbon nsọn̄ibuot ke ẹsịn ifịk ẹsuan nsu ye nsunsu ekikere ke ediwak idụt mfịn, idem ẹdụkde odu ye ndusụk owo oro ẹdude ke ukara ke otu mme idụt. Ke ebiet odotde, Mme Ntiense Jehovah ẹnam n̄kpọ ẹban̄a, nte ẹbụkde ke Philippi 1:7, ebe ke ‘ndineni eneni man gospel ọsọn̄ọ ada.’ Ke uwụtn̄kpọ, ke September 26, 1996, ke ikpe kiet ke Greece, mme ebiereikpe usụkkiet eke Esopikpe Mbon Europe Kaban̄a Mme Unen Owo, ke Strasbourg, ẹma ẹsọn̄ọ ye esịt kiet ẹte ke “Mme Ntiense Jehovah ẹdu ke otu ‘ido ukpono oro ẹdiọn̄ọde,’” ẹnyenede unen ndinyene ifụre ekikere, ubieresịt, ye eke ido ukpono, ye unen ndinam ẹdiọn̄ọ mbuọtidem mmọ. Amaedi mbon nsọn̄ibuot, ubiereikpe Abasi ọdọhọ ete: “Ọwọrọ ye mmọ ada ekekem ye n̄ke akpanikọ emi, Ebua akabade adia se ọkọkpọhide; edi eke ẹkeyetde mmọn̄ afiak aka ndiwere ke mbat.”—2 Peter 2:22.
8. Ke eyo Jehoshaphat, didie ke Jehovah ekebiere ikpe ọnọ mme asua ikọt Esie?
8 Ko ke eyo Jehoshaphat, Jehovah ama ebiere ikpe ọnọ mbon oro ẹkeyomde ndinọ ikọt Esie unan. Nnyịn ikot ite: “Jehovah anam mbon udịbe ẹbịne nditọ Ammon, ye Moab, ye eke obot Seir, ẹmi ẹkedide ekọn̄ ye Judah; ndien mmọ ẹsuana. Ndien nditọ Ammon ye Moab ẹdaha ke enyọn̄ ẹn̄wana ekọn̄ ye mme andidụn̄ obot Seir, ẹnyụn̄ ẹwot ẹnyụn̄ ẹsobo mmọ: ndien ẹma ẹkesuan mme andidụn̄ obot Seir ẹma, kpukpru owo ufan anyan̄a ndisobo ufan.” (2 Chronicles 20:22, 23) Mbon Judah ẹkekot itie oro Itịghede Beracah, Beracah ọwọrọde “Edidiọn̄.” Ke eyomfịn n̄ko, Jehovah ndibiere ikpe nnọ mme asua esie edida ikosụn̄ọ ke mme edidiọn̄ inọ ikọt esie.
9, 10. Mmanie ẹwụt idemmọ nte idotde ndibọ ubiomikpe Jehovah?
9 Nnyịn imekeme ndibụp ite, Mmanie ke eyomfịn ẹdibọ ubiomikpe ito Jehovah? Man inyene ibọrọ inọ mbụme oro, nnyịn inyene ndifiak n̄ka prọfesi Joel. Joel 3:3 etịn̄ aban̄a mme asua ikọt esie ẹmi ẹkenọde “eyeneren ke akpara, ẹnyụn̄ ẹnyam eyenan̄wan ke wine.” Ih, mmọ ẹse mme asan̄autom Abasi nte se idide ata usụhọde inọ mmọ, ẹmi nditọ mmọ mînyeneke ufọn ndomokiet ikan se ẹbọde ke ukpeokụk nte akpara m̀mê ekọmurua otu mmịn kiet. Mmọ ẹyebọrọ ẹban̄a oro.
10 Mbon oro ẹdide akpara eke spirit ẹnyene ubiomikpe ukem ntre. (Ediyarade 17:3-6) Mme andinyene nduduọhọ akpan akpan ẹdi mbon ẹmi ẹnụkde ukaraidem ẹsịn ke ndikọbọ Mme Ntiense Jehovah nnyụn̄ mbiọn̄ọ utom mmọ, nte ndusụk mme adaiso ido ukpono ẹdide mbon ntịme ẹnamde ke Edem Usiahautịn Europe ke ndondo emi. Jehovah owụt ubiere esie ndinam n̄kpọ mban̄a mme utọ anamutom ukwan̄ido oro.—Joel 3:4-8.
“Ẹtịm N̄kpọekọn̄”!
11. Didie ke Jehovah amia ata ye mme asua esie ke ekọn̄?
11 Ekem, Jehovah okot ikọt esie ete ẹtan̄a n̄kpọ-ata ke otu mme idut: “Ẹtịm n̄kpọekọn̄: ẹdemede mbon uko: yak kpukpru mbonekọn̄ ẹsan̄a ẹkpere ẹdọk ẹdi.” (Joel 3:9) Emi edi editan̄a orụk esen esen ekọn̄—edinen ekọn̄. Mme anam-akpanikọ Ntiense Jehovah ẹberi edem ke mme n̄kpọekọn̄ eke spirit nte mmọ ẹnamde n̄kpọ ẹban̄a nsunsu usuanetop, ẹdade akpanikọ ẹbiat nsu. (2 Corinth 10:4; Ephesus 6:17) Ke mîbịghike, Abasi eyetịm “ekọn̄ akwa usen Abasi, Andikara kpukpru n̄kpọ.” Enye oyosobo kpukpru mme andibiọn̄ọ itie edikara Abasi efep ke isọn̄. Ikọt esie ke isọn̄ iditieneke ibuana ke ata ata usụn̄. Ke ata ata usụn̄ ye ke ndamban̄a usụn̄, mmọ “[ẹda] ofụt mmọ ẹdom n̄kpọ ufụn̄isọn̄, ẹda eduat mmọ ẹdom ikwa udiọn̄ vine.” (Isaiah 2:4) Ke edide isio, Jehovah amia ata ye mme idụt oro ẹbiọn̄ọde-biọn̄ọ ete ẹnam se idide isio ye oro: “Mbufo ẹda n̄kpọ ufụn̄isọn̄ mbufo ẹdom ofụt, ẹnyụn̄ ẹda ikwa udiọn̄-eto mbufo ẹdom eduat.” (Joel 3:10) Enye okot mmọ ete ẹda ofụri masịn ekọn̄ mmọ ye mme n̄kpọekọn̄ eke eyomfịn ẹdi ekọn̄. Edi mmọ ikemeke ndikụt unen, koro en̄wan ye edikan ẹnyene Jehovah!
12, 13. (a) Kpa ye oro En̄wan Ukaraidem etrede, didie ke ediwak idụt ẹwụt ẹte ke mmimọ isụk imama ekọn̄? (b) Nso ke mme idụt mîtịmke idem inọ?
12 Ke ntọn̄ọ ntọn̄ọ iduọk isua 1990, mme idụt ẹma ẹtan̄a ẹte ke En̄wan Ukaraidem ama okụre. Ke ikerede iban̄a oro, ndi ẹma ẹsịm akpan utịtmbuba Edidiana Mme Idụt edide emem ye ifụre? Imemke utom! Nso ke mme n̄kpọntịbe ke Burundi, Democratic Republic of Congo, Iraq, Liberia, Rwanda, Somalia, ye akani Yugoslavia ẹsian nnyịn? Ke mme ikọ Jeremiah 6:14, mmọ ẹdọhọ ẹte: “‘Emem, emem;’ ndien baba emem idụhe.”
13 Idem okposụkedi ekọn̄ oro ẹn̄wanade nnennen nnennen ẹtrede ke ndusụk ebiet, mme idụt oro ẹbuanade ke UN ẹsụk ẹkaka iso ndimia mbuba ye kiet eken ke ndibot mme awak-n̄kukọhọ n̄kpọekọn̄. Ndusụk ẹka iso ndinyene akpakịp n̄kpọekọn̄ nuclear. Mbon en̄wen ẹsion̄o n̄kpọekọn̄ ẹdide mmọn̄ibọk m̀mê mme n̄kpri unam uwot ofụri owo ẹdi. Nte mme idụt oro ẹsopde idem ke ndamban̄a itie oro ẹkotde Armageddon, enye amia ata ye mmọ ete: “Yak owo mmemidem ọdọhọ ete, Ami ndi ọkpọsọn̄. Mbufo kpukpru mme idụt ẹmi ẹkande ẹkụk, ẹwara ẹto ẹdi, ẹnyụn̄ ẹsop idem.” Joel ndien esịbe odụk ye eben̄e esiemmọ: “Da mbon uko fo, O Jehovah, sụhọde ka do.” (Sịghisịghi ubọkn̄wed edi eke nnyịn.)—Joel 3:10, 11.
Jehovah Ekpeme Ikọt Esie
14. Mmanie ẹdi mbon uko Jehovah?
14 Mmanie ẹdi mbon uko Jehovah? N̄kpọ nte utịm ike 280 ke Bible, ẹkot ata Abasi “Jehovah mme udịm.” (2 Ndidem 3:14) Mme udịm ẹmi ẹdi udịm mme angel eke heaven oro ẹdude ke mben̄eidem ndinam se Jehovah ọdọhọde. Ke ini mbon Syria ẹkeyomde ndimụm Elisha, Jehovah ke akpatre ama atat asan̄autom Elisha enyịn man enye ekeme ndikụt ntak oro mmọ mîdikwe unen: “Sese, horse, ye chariot ikan̄ ke ẹyọhọ ke obot ẹkan Elisha ẹkụk.” (2 Ndidem 6:17) Jesus ọkọdọhọ ete ke imọ imekeme ndikpe Ete imọ ubọk mbọ “se ibede legion mme angel duopeba.” (Matthew 26:53) Ke obụkde aban̄a Jesus ndiwat n̄ka ndikebiere ikpe ke Armageddon, Ediyarade ọdọhọ ete: “Udịmekọn̄ ẹmi ẹdude ke heaven ẹdoro ke mfia enan̄-mbakara ẹtiene Enye ke edem, mmọ ẹsịne ediye linen emi afiade onyụn̄ asanade. Edisọp ofụt onyụn̄ oto Enye ke inua ọwọrọ, man Enye ada ekpen̄e mme idụt; Enye oyonyụn̄ ada esan̄ ukwak akara mmọ. Enye onyụn̄ edịghi obube udịghi-wine ikan̄-ikan̄ iyatesịt Abasi Andikara kpukpru n̄kpọ.” (Ediyarade 19:14, 15) Ẹda mme in̄wan̄în̄wan̄ ikọ nte “akwa obube udịghi-wine iyatesịt Abasi” ẹnam ndamban̄a udịghi-wine oro an̄wan̄a.—Ediyarade 14:17-20.
15. Joel ọdọhọ ke ekọn̄ Jehovah ye mme idụt editie didie?
15 Didie, ndien, ke Jehovah ọbọrọ eben̄e oro Joel eben̄ede Abasi ada mbon uko esie edi? Edi ke mme in̄wan̄în̄wan̄ ikọ ẹmi: “Yak mme idụt ẹdemede ẹnyụn̄ ẹdọk ẹdi ke ebeden̄ Jehoshaphat: koro nyetie do n̄kpe ikpe kpukpru mme idụt ẹmi ẹkande ẹkụk. Mbufo ẹsịn ikwa ukpen̄e-ibokpot koro se ẹkpen̄ede amadat: mbufo ẹsụhọde ẹdi koro ebiet unuak-wine ọmọyọhọ: aban̄ wine ọyọhọ ọduọhọ: koro mme ukwan̄n̄kpọ mmọ ẹkponde. Udịm! udịm! ke itịghede ikpe: koro usen Jehovah emekpere ke itịghede ikpe. Utịn ye ọfiọn̄ ẹyebịre, ntantaọfiọn̄ ẹyenyụn̄ ẹnịme uyama mmọ. Ndien Jehovah eyetie ke Zion ofiori, onyụn̄ etie ke Jerusalem osioro uyo esie: ndien enyọn̄ ye isọn̄ ẹyenyek.”—Joel 3:12-16.
16. Mmanie ke ẹdisịn ke otu mbon oro Jehovah edibierede ikpe ọnọ?
16 Kpasụk nte enyịn̄ oro Jehoshaphat ọwọrọde “Jehovah Edi Ebiereikpe,” kpasụk ntre ke Abasi, Jehovah, ediwụt unen esie ọyọhọ ọyọhọ ke ini enye edibierede ikpe. Prọfesi oro etịn̄ aban̄a mbon oro ẹbọde ubiomikpe nte ‘udịm udịm ke itịghede ikpe.’ Owo ekededi emi osụhọde oro adade ọnọ nsunsu ido ukpono edidu ke otu udịm oro. Mbon oro ẹdisịnede n̄ko ẹdidi mbon oro ẹtịn̄de ẹban̄a ke Psalm ọyọhọ iba—mme idụt, mme obio, ndidem ererimbot, ye mbọn̄—ẹmi ẹmade mbiara editịm n̄kpọ ererimbot emi ẹkan ‘ndinam n̄kpọ Jehovah ke ndịk.’ Mmọ ẹmi ẹsịn ‘nditịm Eyen inua.’ (Psalm 2:1, 2, 11, 12) Mmọ inyịmeke Jesus nte nsan̄a Edidem Jehovah. Ke adianade do, udịm oro ẹnịmde idiọn̄ọ ẹnọ nsobo ẹyesịne kpukpru mbon oro ubọn̄ ubọn̄ Edidem oro edibierede ikpe ọnọ nte ẹdide “ebot.” (Matthew 25:33, 41) Ke ini esịmde edikem ini ọnọ Jehovah nditie ke Jerusalem eke heaven nsioro uyo, Edidem ndidem oro enye emekde ayawat aka ndibiere ikpe oro. Ke akpanikọ enyọn̄ ye isọn̄ ẹyenyek! Nte ededi, ẹnọ nnyịn nsọn̄ọ ẹte: “Jehovah eyedi ubọhọ ikọt esie, edi odudu nditọ Israel.”—Joel 3:16.
17, 18. Mmanie ke ẹdiọn̄ọ nte mme andibọhọ akwa ukụt, ndien nso mme idaha ke mmọ ẹdidara?
17 Ediyarade 7:9-17 owụt mbon oro ẹbọhọde akwa ukụt nte “akwa otuowo” ẹmi mbon oro ẹbuọtde idem ke odudu usio isop eke iyịp Jesus ẹnamde. Mmọ ẹmi ẹyenyene ukpeme ke usen Jehovah, ke adan̄aemi ata akwa otu eke prọfesi Joel ẹbọde ubiomikpe. Joel ọdọhọ mme andibọhọ ete: “Mbufo ẹyefiọk ẹte ke ami ndi Abasi mbufo, ke ndụn̄ ke Zion, edisana obot mi,” kpa ebietidụn̄ Jehovah eke heaven.—Joel 3:17a.
18 Ekem prọfesi oro asian nnyịn ete ke ikpehe ukara Obio Ubọn̄ Abasi eke heaven “eyedi edisana, isenowo idinyụn̄ isan̄ake aba ke esịt ibe.” (Joel 3:17b) Ke heaven ye ke ikpehe Obio Ubọn̄ oro eke isọn̄, isenowo ididụhe, koro kpukpru owo ẹyediana kiet ke edisana utuakibuot.
19. Didie ke Joel etịn̄ aban̄a inemesịt paradise eke ikọt Abasi mfịn?
19 Idem mfịn, akpakịp emem odu ke otu ikọt Jehovah mi ke isọn̄. Ke edidianakiet, mmọ ke ẹtan̄a mme ubiereikpe esie ke se ibede idụt 230 ye ke se iwakde ibe nsio nsio usem 300. Joel etịn̄ prọfesi aban̄a uforo mmọ ediye ediye ete: “Ama ekem ke usen oro, ikpọ obot ẹyetọi obufa wine, n̄kpri obot ẹyenyụn̄ ẹfiọrọ mmọn̄eba; kpukpru akpa mmọn̄ Jerusalem ẹyefiọrọ mmọn̄.” (Joel 3:18) Ih, Jehovah ayaka iso ndin̄wan̄a akpakịp idara idara edidiọn̄ ye uforo ye udịm udịm ọsọn̄urua akpanikọ nnọ mme anditoro enye ke isọn̄. Ẹyewụt unen itie edikara Jehovah ọyọhọ ọyọhọ ke itịghede ikpe, ndien idatesịt oyokpon nte enye odụn̄de ke nsinsi ke otu ikọt esie oro ẹnyan̄ade.—Ediyarade 21:3, 4.
Nte Afo Emeti?
◻ Didie ke Jehovah akanyan̄a ikọt esie ke eyo Jehoshaphat?
◻ Mmanie ke Jehovah ebiere ikpe ọnọ nte ẹdotde nsobo ke “itịghede ikpe”?
◻ Mmanie ẹdi mbon uko Abasi ndien nso udeme ke mmọ ẹdinyene ke akpatre ekọn̄?
◻ Nso inemesịt ke mme anam-akpanikọ andituak ibuot ẹdara?
[Ndise ke page 21]
Ẹma ẹsian Judah ẹte: ‘Ẹkûfehe ndịk koro ekọn̄ mînyeneke mbufo edi enyene Abasi’
[Ndise ke page 23]
Jehovah amia ata ye mme asua esie ete ‘ẹda n̄kpọ ufụn̄isọn̄ mmọ ẹdom ofụt’
[Ndise ke page 24]
Bible owụt akwa otuowo eke mme andibọhọ akwa ukụt