Ndiyom Paradise

Nte Pascal Stisi Obụkde

Ekedi ata okoneyo, ndien owo ikodụhe ke mme efak obio Béziers, usụk usụk France. Ke ima ikokụt ibibene ufọkurua unyam n̄wed ido ukpono kiet emi ẹkeyetde ndom mbakara obufa obufa, ami ye ufan mi ima iwet mme ikọ Nietzsche, owo akwaifiọk Germany, itọk itọk ke ikpọ mbubịt abisi: ‘Mme abasi ẹmekpan̄a. Itọn̄ uwem ọsọn̄ Anana-Mbiet Owo!’ Nte ededi, nso ikada mi ikesịm kpukpru ẹmi?

AMI n̄kamana ke France ke 1951 ke ubon Catholic emi ẹtode Italy. Ke ini n̄kedide eyenọwọn̄, nnyịn ima isika nduọkodudu ke edem usụk Italy. Do, obio-in̄wan̄ kiet kiet ama enyene mbiet Edisana Mary esie. Ke nsan̄ade ye ete-eka mi, mma nsitiene akwa mbiet emi ẹkesịnede ọfọn̄ mi ke anana-utịt isan̄ ibe ikpọ obot—edi n̄kenịmke ke akpanikọ. Mma n̄kụre ubọ ukpep oro ekemde ke ufọkn̄wed ido ukpono oro mbon Jesuit ẹkenyenede. Nte ededi, n̄kemeke nditi nte akananam n̄kopde n̄kpọ ekededi oro ekenen̄erede ọbọp mbuọtidem mi ke Abasi.

Edi ke ini n̄kọtọn̄ọde ufọkn̄wed ntaifiọk ke Montpellier ndikpep ibọkusọbọ ke n̄kọtọn̄ọ ndikere mban̄a uduak uwem. Ẹma ẹnọ ete mi unan ke ini ekọn̄ ndien mbiaibọk ẹkenyene ndidu ye enye kpukpru ini. Ndi ikpọfọnke nditre ekọn̄ utu ke ndibiat ekese ini ye ukeme ke ndikọk mme mfiomo ẹtode enye? Edi, Ekọn̄ Vietnam ke ọkọsọn̄ ubọk. Ke uwụtn̄kpọ, eketie mi nte ke n̄kukụre usụn̄ oro esịnede ifiọk ndikọk kansa obufre edi nditre akpan ntak esie—un̄wọn̄. Ndien nso kaban̄a mme udọn̄ọ oro ẹtode udia oro mînọhọ nsọn̄idem ke mme idụt oro ẹtọn̄ọde-tọn̄ọ uforo ye mbon oro ẹtode ebe-ubọk udia ke mme idụt uforo? Ndi ikpọfọnke ndisio mme ntak ẹmi mfep utu ke ndidomo ndikọk mme ubiak-ubiak utịp esie? Ntak emi ekese ndutụhọ ẹdude ntem ke isọn̄? Eketie mi nte ke n̄kpọ ama enen̄ede akwan̄a ke ererimbot uwotidem emi, ndien n̄kọdọhọ ke ukara ekedi ntak.

N̄wed oro n̄kamade n̄kan ekedi enye oro owo emi asuade ukara ekewetde, ndien mma nsision̄o mme udịmikọ ke enye n̄wet ke ibibene. Sụn̄sụn̄, ami n̄ko mma n̄kabade ndi owo emi asuade ukara, emi mînyeneke mbuọtidem m̀mê mme ibet ido uwem, emi mîkoyomke Abasi m̀mê eteufọk. N̄kada nte ke mbon imọ ye mme enyene-odudu ẹketịbi Abasi ye ido ukpono ẹdi man mmọ ẹkpekeme ndikara nnyụn̄ n̄wo nnyịn eken. Eketie nte mmọ ẹkedọhọ ẹte, ‘Ẹnam utom ọkpọsọn̄ ẹnọ nnyịn ke isọn̄, ndien utịp mbufo oyokpon ke paradise ke heaven.’ Edi ini mme abasi ama ebe. Ẹkenyene ndisian mme owo. Mme mbuwed ẹdiande ke an̄wan̄wa itie ẹkedi usụn̄ kiet ndida nsian mmọ.

Nte utịp, mma nsịk ukpepn̄kpọ mi nnịm ke udiana itie. Kan̄a ke emi, mma ntọn̄ọ ndikpep ukpepn̄kpọ aban̄ade isọn̄ ye ukpepn̄kpọ aban̄ade ebuana ke ufọt mme odu-uwem n̄kpọ ye n̄kann̄kụk ke ufọkn̄wed ntaifiọk Montpellier en̄wen emi nsọn̄ibuot akakarade. Adan̄a nte n̄kekpepde n̄kpọ mban̄a ebuana ke ufọt mme odu-uwem n̄kpọ ye n̄kann̄kụk, ntre ke n̄kọdọdiọn̄ n̄kop itekesịt ndikụt nte ẹsabarede ediye ekondo nnyịn.

Kpukpru isua ke ini nduọkodudu ndaeyo, mma nsika isan̄ ke n̄kpọisan̄ mfọn, nsan̄ade ediwak kilomita ke mme itie tọsịn ke ofụri Europe. Ke adan̄aemi n̄kade isan̄ nnyụn̄ nnyenede nneme ye ediwak mme awat-ubomisọn̄ ke mme itie ikie, mma nda enyịn iba n̄kụt idiọkido ye idiọk idaha ẹmi ẹnọmọde n̄ka owo. Inikiet, ke adan̄aemi n̄koyomde paradise, mma ndikụt ikpọ esụk ke ediye isuo Crete emi aran okofụkde. Mma n̄kop mfụhọ etieti. Ndi ama odu ikpehe paradise oro okosụhọde ke ebiet ekededi ke isọn̄?

Ndifiak Nnyọn̄ Obio-In̄wan̄

Ke France mme ekpep n̄kpọ mban̄a ebuana ke ufọt mme odu uwem n̄kpọ ye n̄kann̄kụk ẹkesọn̄ọ ẹtịn̄ edinam obio afiak eketie nte obio-in̄wan̄ nte usọbọ ke nnanenyịn ubonowo. N̄koyom ndida ubọk mi nnam utom. Ntre mma ndep akani ufọk itiat ke ekpri obio-in̄wan̄ odude ke ukot Obot Cévennes ke usụk usụk France. Ke enyịnusụn̄, mma n̄wet “Paradise Ndien,” kpa ufiet nditọ nsọn̄ibuot America. N̄kaiferi Germany kiet emi akasan̄ade do ebe ama akabade edi nsan̄a mi. N̄kpedehede nnyịme ndidian ndọ ke iso ọbọn̄ obio, kpa andida ke ibuot ukara. Nso kaban̄a ke ufọkabasi? Fre ban̄a oro!

Ata ekese ini, nnyịn ikesisan̄a ukpọk ikpat, ndien ami mma nnyene nnyan idet ye nsuahade-nsuahade ntan̄ebek. Mma n̄kop nduaidem nditọ mme mfri ye ikọn̄udia. Ke ndaeyo ikpaenyọn̄ ekesinyene awawa uduot ndien mme ataktak ẹma ẹsidiari. Mme flawa ikọt ẹma ẹsifuọn̄ etieti, ndien mme mfri Mediterranean oro nnyịn ikọtọde—grape ye fig—ẹma ẹye idem etieti! Eketie nte nnyịn ima ikụt mfọnn̄kan itie nnyịn ke paradise.

Edinịm Abasi ke Akpanikọ Ọtọn̄ọ

Ke ufọkn̄wed ntaifiọk, mma n̄kpep ukpepn̄kpọ aban̄ade mme nsen odu-uwem n̄kpọ, ọbọn̄eyen, ye obot odu-uwem n̄kpọ, ndien n̄kukọhọ n̄kpọ ẹmi ye nte mmọ ẹdude ke n̄kemuyo ẹma ẹnen̄ede ẹtụk mi. Idahaemi n̄kekemede ndikere mban̄a nnyụn̄ nse n̄kpọ-obot nnennen kpukpru usen mi, uyai ye ukeme esie ama akpa mi idem. Kpukpru usen page kiet kiet n̄wed obot ama esitịn̄ ikọ ọnọ mi. Usen kiet ke ini n̄kanamde anyan isan̄ ke obot ndien ke mma n̄kenen̄ede n̄kere mban̄a uwem, mma ndisịm ubiere nte ke anaedi Andibot odu. Mma mbiere ke esịt mi ndinịm Abasi ke akpanikọ. Ke mbemiso, eketie mi ukpọk ukpọk ke esịt, kpa ndobo oro akafịnade mi. Usen oro n̄kọtọn̄ọde ndinịm Abasi ke akpanikọ, mma ndọhọ idemmi nte, ‘Pascal, afo udukopke aba ndobo.’ Ekedi n̄wọrọnda ekikere.

Esisịt ini ke oro ebede, ami ye nsan̄a mi ima inyene ekpri eyenan̄wan—Amandine. Enye ekedi n̄kpọuto ọnọ mi. Idahaemi n̄kenịmde Abasi ke akpanikọ mi, mma ntọn̄ọ ndikpono ibet ido uwem ifan̄ oro n̄kọfiọkde. Mma ntre uyịp inọ ye usu nsu, ndien ikebịghike mma n̄kụt ke emi ama an̄wam mi nditre ndinyene ediwak mfịna ye mbon oro ẹkande mi ẹkụk. Ih, nnyịn ima inyene mme mfịna nnyịn, ndien paradise mi ikedịghe kpukpru se n̄kodoride enyịn mban̄a. Mme anditọ grape n̄kann̄kụk ẹma ẹsiduọk mme n̄kpọ uwot n̄ken̄ ye mbiet oro ẹkebiatde mme mfri mi n̄ko. Owo ikosụk ibọrọke mbụme mi aban̄ade ntak idiọkido. Akan oro, okposụkedi n̄kokotde ekese n̄wed mban̄a uwem ubon, emi ikakpanke mi ndineni ọkpọsọn̄ eneni ye nsan̄a mi. Nnyịn ikenyene ibat ibat ufan, ndien mbon oro nnyịn ikenyenede ikedịghe mme ufan akpanikọ; ndusụk ẹma ẹkam ẹdomo ndinam nsan̄a mi enyene ebuana idan̄ ye owo en̄wen. Paradise oro ọfọnde akan enyene ndidu.

Ibọrọ Akam Mi

Mma nsibọn̄ akam ke usụn̄ idemmi nnọ Abasi ediwak ini nte ada mi usụn̄ ke uwem. Usenubọk Sunday kiet, ufan-ufan an̄wan kiet ekerede Irène Lopez ye ekpri eyeneren esie ẹma ẹwaha enyịnusụn̄ mi. Enye ekedi kiet ke otu Mme Ntiense Jehovah. Mma n̄kpan̄ utọn̄ n̄kop se enye ekenyenede nditịn̄ nnyụn̄ nnyịme ẹfiak ẹdi. Iren iba ẹma ẹdise mi. N̄keti n̄kpọ iba ke nneme nnyịn—Paradise ye Obio Ubọn̄ Abasi. Mma nnen̄ede nnịm mme ekikere oro ke esịt mi, ndien nte mme ọfiọn̄ ẹkebede, mma mfiọk nte ke usen kiet nnyenyene ndinam uwem mi odu ke n̄kemuyo ye mme idaha Abasi edieke n̄koyomde ndinyene edisana ubieresịt nnyụn̄ nnyene ata inemesịt.

Man inam uwem nnyịn odu ke n̄kemuyo ye Ikọ Abasi, nsan̄a mi ke akpa ama enyene udọn̄ ndidọ mi. Ekem enye ama odụk idiọk nsan̄a ye mbon oro ẹkesakde Abasi ye mme ibet esie. Ke ini n̄kọnyọn̄de ndi ufọk ke mbubịteyo ini utọ kiet, idem ama enen̄ede akpa mi. Ufọk nnyịn akana ukpọk. Nsan̄a mi ama ọnyọn̄, asan̄ade ye eyenan̄wan nnyịn ekedide isua ita. Mma ntie ke ediwak usen mbet mmọ ndinyọn̄ ndi—edi ọkọwọrọ ikpîkpu. Utu ke ndiduọhọ Abasi, mma mbọn̄ akam nnọ enye nte an̄wam mi.

Esisịt ini ke oro ebede, mma mmen Bible, nsụhọde ntie ke idak eto fig mi, nnyụn̄ ntọn̄ọ ndikot. Ke akpanikọ, n̄kokot mme ikọ esie ye ọkpọsọn̄ udọn̄. Okposụkedi mma n̄kokot kpukpru orụk n̄wed ẹmi mme anam-ndụn̄ọde mban̄a ekikere ye mme ekpep n̄kpọ mban̄a ekikere ẹwetde, akananam n̄kwe orụk ọniọn̄ oro. Anaedi ẹkeda odudu spirit ẹwet n̄wed emi. Ukpepn̄kpọ Jesus ye nte enye ọfiọkde obot owo ama akpa mi idem. Mme Psalm ẹma ẹdọn̄ mi esịt ndien eti ọniọn̄ Mme N̄ke ama akpa mi idem. Mma nsọsọp n̄kụt nte ke adan̄aemi edikpep n̄kpọ mban̄a n̄kpọ obot edide ata eti n̄kpọ ndidụri owo n̄kpere Abasi, enye ekeme n̄kukụre ndisian nnyịn “esisịt usụn̄ esie.”—Job 26:14, NW.

Mme Ntiense ẹma ẹnọ mi mme n̄wed ẹmi n̄ko Akpanikö oro Adade osim Nsinsi Uwem ye Ndinam Uwem Ufọk Fo Enem.a Ndikot mmọ ama atat mi enyịn. N̄wed Akpanikö ama an̄wam mi ndifiọk ntak emi owo osobode usabaden̄kpọ oro atarade-tara, n̄kaiso afai, ye ndịk nsobo nuclear. Ndien kpa nte ndatndat ikpaenyọn̄ oro nsidade ke in̄wan̄esa mi n̄kụt esiwụtde ke eyo ọyọfọn ke ndan̄nsiere, mme n̄kpọntịbe ẹmi ẹsọn̄ọ ẹte ke Obio Ubọn̄ Abasi emekpere. Amaedi n̄wed Uwem Ufọk, ama ọdọn̄ mi nte n̄kpekemende enye n̄wụt nsan̄a mi nnyụn̄ nsian enye nte ke nnyịn ikpekeme ndikop inemesịt ebe ke ndida item Bible nsịn ke edinam. Edi oro ikekemeke nditịbe.

Ndinam N̄kọri eke Spirit

Mma nyom ndidiọn̄ọ mme n̄kpọ efen efen, ntre mma ndọhọ Ntiense kiet ekerede Robert nte edise mi. Ke edide ata n̄kpaidem ọnọ enye, mma nsian enye nte ke n̄koyom ndina baptism, ntre ukpepn̄kpọ Bible ama ọtọn̄ọ. Mma ntọn̄ọ inikiet inikiet nditịn̄ nnọ mbon en̄wen mban̄a se n̄kekpepde, mma nnyụn̄ ntọn̄ọ ndisuan mme n̄wed oro n̄kọbọde ke Ufọkmbono Obio Ubọn̄.

Man nnyene se ndiade, mma ntọn̄ọ ndikpep utom ukọk itiat. Ke mfiọkde ufọn oro Ikọ Abasi ekemede ndinam nnọ owo, mma nda kpukpru ifet ndikwọrọ ikọ ke ido nneme nnọ ekemmọ nditọ ufọkn̄wed ye mme andikpep. Mbubịteyo kiet, mma nsobo Serge ke usụn̄otop. Enye ama akama mme magazine ke ubọk. “Mmokụt ke afo amama ndikot n̄wed,” ntre ke n̄kọdọhọ enye. “Ih, edi enye emi efek mi.” Ndien mma mbụp enye nte, “Nte omoyom n̄wed oro enen̄ede ọfọn ndikot?” Nnyịn ima inyene ata eti nneme iban̄a Obio Ubọn̄ Abasi, ndien ke oro ebede enye ama ọbọ mme n̄wed Bible. Urua oro eketienede, enye ama etiene mi edi Ufọkmbono Obio Ubọn̄, ndien ukpepn̄kpọ Bible ama ọtọn̄ọ.

Usen kiet mma mbụp Robert m̀mê mmekeme ndikwọrọ ikọ ke ufọk ke ufọk. Enye ama adaha okosio suit kiet ke itie ubon ọfọn̄ esie ọnọ mi. Ke Sunday oro eketienede, mma nsan̄a ye enye n̄wọrọ an̄wautom ke akpa ini. Ke akpatre, ke March 7, 1981, mma nyarade uyakidem mi nnọ Jehovah Abasi an̄wan̄wa ebe ke baptism.

Un̄wam ke Adan̄aemi N̄kodude ke Nnanenyịn

Kan̄a ke emi mma mfiọk ebiet emi Amandine ye eka esie ẹkedụn̄de ke esenidụt. Ke mfụhọ, eka esie—ke ọyọhọ ọyọhọ ibet, nte ekemde ye mme ibet idụt oro enye okodụn̄de—ama ọbiọn̄ọ mi ndikụt eyen mi. Ibuot ama oyon̄ mi. Eka Amandine ama ọdọ ndọ, ndien unana idotenyịn mi ama ọdiọk akan ke ini n̄kọbọde n̄wed nto ukara nte ke ebe esie ama ada eyen mi enyene—ke ofụri ofụri ye unana unyịme mi. N̄kenyeneke unen ekededi aba ke idem eyen mi. Kpa ye oro n̄kokotde ikpe, n̄kekemeke ndibọ unen edika n̄kese. Eketie mi nte n̄kpọ eke n̄kemende mbiomo odobide ke kilogram 50 ke edem, ntre ke ubiak mi eketie.

Edi Ikọ Jehovah ama omụm mi akama ke ediwak usụn̄. Usen kiet ke ini n̄kenen̄ede ndu ke mfụhọ, mma ntịn̄ mfiak ntịn̄ mme ikọ Mme N̄ke 24:10: “Esịt ama ọduọ fi ke usen ukụt, odudu fo akabade ekpri.” Ufan̄ikọ emi ama an̄wam mi n̄kûkpa mba. Ke isan̄ en̄wen, ke mma n̄kokụt edikpu ke ndidomo ndikụt eyen mi, mma n̄wọrọ an̄wautom nnyụn̄ mmụm ubọk ekpat mi ọsọn̄ adan̄a nte n̄kekemede. Ke mme utọ n̄kpọsọn̄ idaha oro, mma n̄keme ndikụt nte Psalm 126:6 edide akpanikọ, emi ọdọhọde ete: “Owo eke obiomde akpan n̄kpasịp, aka atua eyet, aka atua eyet, iditreke ndibiom mme ebek esie nnyọn̄ ke idara.” Akpan ukpepn̄kpọ kiet oro n̄kekpepde edi nte ke ini afo enyenede ikpọ idomo, ke afo ama akanam kpukpru se ekemede ndikọk mmọ, afo enyene ndikpọnọde mmọ nnịm nnyụn̄ n̄ka iso ye ubiere ke utom Jehovah. Emi edi n̄kukụre usụn̄ ndika iso nnyene idatesịt.

Ndinyanade Mbịne N̄kpọ Oro Ọfọnde Akan

Ke ẹma ẹkekụt mme ukpụhọde oro n̄kanamde, edima ete ye eka mi ẹma ẹdọhọ ke iyan̄wam mi n̄ka iso ke ukpepn̄kpọ mi ke ufọkn̄wed ntaifiọk. Mma n̄kọm mmọ, edi idahaemi n̄kenyene utịtmbuba en̄wen. Akpanikọ ama osio mi ke ufụn ukpepn̄kpọ akwaifiọk owo, ndedịbe odudu, ye edisiak ntantaọfiọn̄. Idahaemi mma nnyene mme ata ufan ẹmi mîdiwotke kiet eken ke ekọn̄. Ndien ke akpatre mma nnyene mme ibọrọ mbụme mi ẹban̄ade ntak emi ekese ndutụhọ ẹdude ntem ke isọn̄. Ke ntak esịtekọm mma nyom ndinam n̄kpọ Abasi ke ofụri ukeme mi. Jesus ama ayak ofụri uwem esie esịn ke utom ukwọrọikọ esie, ndien n̄koyom nditiene uwụtn̄kpọ esie.

Ke 1983, mma n̄kpọn̄ utom ukọk itiat man n̄kabade ndi asan̄autom uyọhọ ini. Ke ibọrọ akam mi, mma n̄kụt utom ibio ini ke itie unọ idem inemesịt ndida n̄n̄wam idem. Nso n̄kpọ idara ke ekedi ntem ndidụk ufọkn̄wed usiakusụn̄ ye Serge, akparawa oro n̄kọnọde ikọ ntiense ke ufọkn̄wed ukpep ukọk itiat! Ke mma n̄kanam utom ke isua ita nte asiakusụn̄ ofụri ini, mma nnyene udọn̄ ndinam se ikam ikponde ikan ke utom Jehovah. Ntem, ke 1986, ẹma ẹmek mi ẹte ndi akpan asiakusụn̄ ke ediye obio Provins, emi mîyomke usụn̄ ikpọn̄ Paris. Ediwak ini, ke nyọn̄de ndi ke mbubịteyo, mma nsitọn̄ọ edọn̄ mbọn̄ akam n̄kọm Jehovah ke utịbe-utịbe utom oro n̄kanamde ke ndinyene nneme ye mbon en̄wen mban̄a enye. Ke akpanikọ, n̄kponn̄kan n̄kpọ iba oro ẹnọde mi inemesịt ke uwem edi ndinyene nneme ye Abasi ye ndinyene nneme mban̄a Abasi.

Akwa idatesịt en̄wen oro n̄kenyenede ekedi baptism eka mi oro ekedide isua 68 emi okodụn̄de ke Cébazan, ekpri obio-in̄wan̄ ke edem-usụk France. Ke ini eka mi ọkọtọn̄ọde ndikot Bible, mma ntobo Enyọn̄-Ukpeme ye Awake! nnọ ẹsọk enye. Enye ekedi owo emi esikerede n̄kpọ, ndien ikebịghike enye ama edikụt akpanikọ ke se enye okokotde.

Bethel—N̄wọrọnda Paradise eke Spirit

Ke ini Watch Tower Society ekebierede ndisụhọde ibat akpan asiakusụn̄, mma nsịn eben̄e ndidụk Ufọkn̄wed Unọ Mme Asan̄autom Ukpep ye edidụk Bethel, kpa n̄kọk itieutom Mme Ntiense Jehovah ke France. N̄koyom ndiyak Jehovah ebiere adan̄a mfọnn̄kan usụn̄ oro n̄kemede ndinam n̄kpọ nnọ enye. Ọfiọn̄ ifan̄ ke ukperedem, ke December 1989, ẹma ẹnọ mi ikot ndi Bethel ke Louviers, ufọt edem edere ye edem usoputịn France. Emi ekedi ata eti utịp, sia itie emi akanamde mi n̄keme ndin̄wam eyeneka mi ye n̄wan esie ndise mban̄a ete ye eka mi ke ini mmọ ẹkedọn̄ọde idiọk idiọk. N̄kpekemeke ndinam emi edieke n̄kpokodude ke utom isụn̄utom ke ebiet oyomde usụn̄ ke ediwak tọsịn kilomita.

Eka mi ama edise mi ediwak ini ke Bethel. Idem ekpedi ekedi ndiyak n̄kpọ atak man enye odụn̄ oyom usụn̄ ọkpọn̄ mi, enye ama esiwak ndidọhọ mi ete: “Eyen mi, tie ke Bethel. Esịt enem mi afo ndinam utom Jehovah ke usụn̄ emi.” Ke mfụhọ, ete ye eka mi ẹma ẹkpan̄a. Ndori enyịn didie ntem ndikụt mmọ ke isọn̄ oro ẹnamde akabade edi ata ata paradise!

Mmenen̄ede nnịm ke akpanikọ nte ke edieke ufọk ekededi odotde ẹwet ikọ emi “Paradise Ndien,” edi Bethel—kpa “Ufọk Abasi”—koro ata ata paradise, ke akande kpukpru n̄kpọ, edi eke spirit, ndien idaha eke spirit enen̄ede odu ke Bethel. Nnyịn imenyene ifet ndikọri mme mbun̄wụm spirit. (Galatia 5:22, 23) Eti udia eke spirit oro nnyịn isibọde ke nneme itien̄wed Bible eke usen ke usen ye ndikpep Enyọn̄-Ukpeme nte ubon an̄wam ndisọn̄ọ mi idem nnọ utom Bethel. N̄ko-n̄ko, ndikeme ndidụk nsan̄a ye nditọete iren ye iban oro ẹmade n̄kpọ eke spirit ẹmi ẹnamde n̄kpọ Jehovah ke edinam akpanikọ ke ediwak iduọk isua anam Bethel edi san̄asan̄a ebiet ndikọri ke n̄kan̄ eke spirit. Okposụkedi mmen̄kwe eyen mi ke isua 17 idahaemi, mmokụt ediwak ifịk-ifịk uyen ke Bethel, ẹmi ndade nte nditọ mi, ẹmi nnyụn̄ ndatde esịt mban̄a n̄kọri eke spirit mmọ. Ke isua itiaita ẹmi ẹbede, mma nnam utom ke itie itiaba. Ke adan̄aemi mme ukpụhọde ẹmi mîsiwakke ndidi mmemmem n̄kpọ, utọ ukpep oro esinyene ufọn ke akpatre.

Mma nsitọ orụk ọkọti kiet emi ekesin̄wụmde utịm ike ikie. Ukem ntre, mmokụt nte ke ini afo ọtọde se idiọkde, afo ọyọdọk se idiọkde ikan oro utịm ike ikie—inyụn̄ idịghe sụk idọk kiet. Ndikpep n̄kpọ nto ifiọk n̄kpọntịbe kpọt akama ntakurua etieti. N̄kpakama nditre ndinyene utọ ifiọk n̄kpọntịbe oro, utu ke oro, n̄kpekedi se ẹbọkde ke mme usụn̄ Jehovah. Nso ifet ke mme uyen oro mme ete ye eka ẹdide Christian ẹbọkde ẹnyene ntem! Nte eyịghe mîdụhe, etịm ọfọn nditọ se ifọnde ke utom Jehovah nnyụn̄ ndọk emem ye uyụhọ utịm ike ikie.—Galatia 6:7, 8.

Ke ini n̄kedide asiakusụn̄, ndusụk ini mma nsisan̄a mbe ufọkurua unyam n̄wed ido ukpono oro nnyịn ikewetde ufiet mme asua ukara do. Mma n̄kam ndụk esịt esie nnyụn̄ nnyene nneme ye andinyene enye mban̄a odu-uwem Abasi ye uduak esie. Ih, Abasi mmọdo! Akan oro, Jehovah, ata Abasi kierakiet, edi anam-akpanikọ Ete, emi akananam mîkpọn̄ke nditọ esie. (Ediyarade 15:4) Udịmowo efen efen ẹtode kpukpru idụt ẹkpekam ẹkụt paradise eke spirit idahaemi—ye Paradise oro ẹfiakde ẹwụk emi ẹdidide—ebe ke ndinam n̄kpọ nnọ nnyụn̄ ntoro odu-uwem Abasi, kpa Jehovah!

[Ikọ idakisọn̄]

[Mme ndise ke page 26]

Ke ndide se mme utịbe-utịbe n̄kpọ obot ẹtụkde, mma mbiere ke esịt mi ndinịm Abasi ke akpanikọ. (Nnasia) Ke utom Bethel mfịn