Uku—Unen Oro Ẹsiwakde Ndibọ Owo

“Kpukpru n̄kpọ oro ẹketịbede ke itienna ekikere ẹma ẹsụhọde nnyịn itie ẹnyụn̄ ẹsuene nnyịn.”—MAGDALENA KUSSEROW REUTER, OWO ORO OKODUDE KE ITIENNA EKIKERE NAZI.

INAMKE n̄kpọ m̀mê ibak oro ẹkenamde ke mme itienna ekikere Nazi ke ini ọyọhọ ekọn̄ ererimbot iba ẹkenyene ndịk adan̄a didie, emi ikedịghe akpa m̀mê akpatre ini oro ẹkesuenede mme owo. Edide nnyịn idụn̄ọde eset m̀mê eyomfịn, n̄kpọ kiet ana in̄wan̄-in̄wan̄: “Ẹmesụhọde ediwak owo itie ẹnyụn̄ ẹsuene mmọ” ke ediwak isua emi ẹbede.

Nte ededi, idịghe ibak ibak usụn̄ kpọt oro ẹsinamde n̄kpọ ye mme owo ke ediwak isua emi ẹbede esisuene mmọ. Ẹsiwak ndisuene owo ke ediwak n̄kari n̄kari usụn̄ en̄wen. Kere ban̄a eyenọwọn̄ oro ẹsakde ke ntak emi obiomode ndo. Mîdịghe kere ban̄a odudụn̄ oro ẹsakde ke ntak “esen esen” ido edinam esie, m̀mê owo oro ẹsaride ke ntak uduot ikpọkidem m̀mê idụt oro enye otode. Mbon nsahi emi ẹkeme ndise n̄kpọ emi nte n̄kpọ mbubru, edi ubiak ye esuene oro mbon oro ẹsakde mi ẹbọde idịghe n̄kpọ mbubru.—Mme N̄ke 26:18, 19.

Nso Idi Uku Owo?

N̄wed ukabadeikọ kiet akabade uku nte ‘edidi se ẹmade, ẹkponode, m̀mê ẹdade ke ọsọn̄urua.’ Ke ntre, uku owo abuana nte nnyịn idade idem nnyịn ye usụn̄ oro mbon en̄wen ẹnamde n̄kpọ ye nnyịn. Okposụkedi nsio nsio n̄kpọ ẹkemede nditụk nte idade idem nnyịn, nte mbon en̄wen ẹdade m̀mê ẹnamde n̄kpọ ye nnyịn enen̄ede enyene n̄kpọ ndinam ye nte idade idem nnyịn.

Mme ubuene, mbon oro mînyeneke un̄wam, ye mbon oro mînyeneke owo ẹdu ke kpukpru ebiet. Nte ededi, iwọrọke ke mme utọ owo emi inyeneke uku. Edu ye edinam mbon en̄wen ẹsikam ẹsuene owo. Edi n̄kpọ mfụhọ nditịn̄ ke ẹsiwak ndisuene mbon oro n̄kpọ ọdiọkde m̀mê ẹda mmọ ke mbio. Nnyịn imesiwak ndikop ẹtọkde n̄kani owo, mme ubuene, m̀mê mbon oro ẹnyenede mfịna ibuot m̀mê oro ẹbiomode ndo!

Ntak emi mme owo ẹsisụhọrede kiet eken itie? Ndi mme owo ẹyenyene uku oro mmọ ẹnyenede unen ndinyene? Ibuotikọ oro etienede ayada Ikọ Abasi, kpa Bible, ọbọrọ mbụme emi edifọn edifọn.