San̄a Kpere Abasi

Ke Ini Abasi Efende Idiọkn̄kpọ, Ndi Enye Esifre?

KE NDITỊN̄ ibio ibio, ibọrọ edi ih. Kop se Jehovah ọn̄wọn̄ọde ọnọ ikọt esie mi: “Nyefen ndudue mmọ, ndinyụn̄ ntịghi aba mme idiọkn̄kpọ mmọ.” (Jeremiah 31:34) Jehovah ọn̄wọn̄ọ ọnọ nnyịn ete ke ini imọ ifende inọ mme anamidiọk oro ẹkabarede esịt, ke imọ isitịghi aba mme idiọkn̄kpọ mmọ. Edi ndi emi ọwọrọ ke Andibot akaka ekondo emi ikemeke nditi mme idiọkn̄kpọ oro enye ama ekefen? Se idude ke Ezekiel owụt nte Abasi esifende onyụn̄ efrede mme idiọkn̄kpọ.—Kot Ezekiel 18:19-22.

Jehovah ọkọdọn̄ prọfet Ezekiel ete akatan̄a etop ubiomikpe esie ọnọ Judah ye Jerusalem emi ẹkedide mbon nsọn̄ibuot. Mmọ ẹma ẹkpọn̄ Jehovah ẹnyụn̄ ẹnam afai ọyọhọ obio. Jehovah ama ọdọhọ ke iyada mbon Babylon isobo Jerusalem. Jehovah ama onyụn̄ ọnọ mbon oro ẹkabarede esịt etop idotenyịn. Owo kiet kiet ekenyene ndibiere se idinamde, sia enye edibọ utịp edinam esie.—Ufan̄ikọ 19, 20.

Nso ndien iditịbe edieke anamidiọk akabarede esịt ọtọn̄ọ ndinam eti n̄kpọ? Jehovah ọkọdọhọ ete: “Amaedi idiọkowo, edieke enye ọwọn̄ọrede ọkpọn̄ kpukpru idiọkn̄kpọ emi enye anamde onyụn̄ enịmde kpukpru mme ewụhọ mi onyụn̄ ekpede unenikpe onyụn̄ anamde edinen ido, enye iditreke ndidu uwem. Enye idikpaha.” (Ufan̄ikọ 21) Ih, Jehovah ama ‘enyịme ndifen’ nnọ anamidiọk ekededi emi akatuade n̄kpọfiọk onyụn̄ enen̄erede akabade esịt.—Psalm 86:5

Nso kaban̄a idiọkn̄kpọ oro enye akanamde? Jehovah ọkọdọhọ ete: “Kpukpru ubiatibet emi enye akabiatde—owo iditịghi mmọ ibat inọ enye.” (Ufan̄ikọ 22) Omokụt ke ufan̄ikọ emi ọdọhọ ke ‘owo iditịghi mme idiọkn̄kpọ anamidiọk oro akabarede esịt ibat inọ enye.’ Nso ke emi ọwọrọ?

Ke Bible, ikọ Hebrew oro ẹkabarede nte ‘nditi’ isiban̄ake sụk nditi se iketịbede. N̄wed ndụn̄ọde kiet ọdọhọ ke enye “esiwak ndida mban̄a edinam n̄kpọ.” Ntre, ‘nditi’ ekeme ndiwọrọ “ndinam n̄kpọ mban̄a se ẹtide oro.” Mmọdo, ke ini Jehovah ọdọhọde anamidiọk oro akabarede esịt ete ke imọ ‘itịghi aba mme idiọkn̄kpọ esie ibat inọ enye,’ Abasi ọdọhọ ke imọ idimiaha enye ufen ke ntak idiọkn̄kpọ oro.a

Ezekiel 18:21, 22 etịn̄ ikọ oro enen̄erede otụk owo ke idem aban̄a adan̄a nte Abasi esifende ọnọ owo. Ke ini Jehovah efende mme idiọkn̄kpọ nnyịn, enye idifiakke imia nnyịn ufen ke ntak idiọkn̄kpọ oro. Utu ke oro, enye esitop kpukpru idiọkn̄kpọ mbon oro ẹkabarede esịt ọduọk ke edem. (Isaiah 38:17) Esitie nte n̄kpọ eke enye ọsọhide mme idiọkn̄kpọ oro efep.—Utom 3:19.

Nnyịn emi idide mme anana-mfọnmma owo imoyom Abasi atua nnyịn mbọm. Imesidue Abasi kpukpru ini. (Rome 3:23) Edi Jehovah oyom nnyịn ifiọk ke edieke nnyịn inen̄erede ikabade esịt, ke imọ iyefen inọ nnyịn. Ndien ke ini efende, enye esifre—oro edi, enye idifiakke ibat idiọkn̄kpọ oro inọ nnyịn m̀mê ndimia nnyịn ufen tutu amama ke ntak idiọkn̄kpọ oro. Nso n̄kpọ ndọn̄esịt ke oro edi ntem! Ndi nte Abasi atuade owo mbọm inamke fi oyom ndisan̄a n̄kpere enye?

Itie Bible emi okpokotde ke July:

◼ Ezekiel 6-20

[Ikọ Idakisọn̄]