MME MBỤME BIBLE ORO ẸBỌRỌDE
Ndi Abasi ekeme ndifen mme idiọkn̄kpọ nnyịn?
Isọn̄ke ndinam se Abasi amade
Bible ọdọhọ ke kpukpru nnyịn idi mme anamidiọk. Ikadada idiọkn̄kpọ imana ito Adam. Ntak edi oro isinamde idiọkn̄kpọ ndusụk ini, ekem itua n̄kpọfiọk. Jesus Christ emi edide Eyen Abasi ama akpa man afak nnyịn osio ke idiọkn̄kpọ nnyịn. Emi anam Abasi ekeme ndifen mme idiọkn̄kpọ nnyịn.—Kot Rome 3:23, 24.
Ndusụk mbon emi ẹnamde ata ikpọ idiọkn̄kpọ ẹsikere m̀mê Abasi ekeme ndifen nnọ mmimọ. Edi Ikọ Abasi ọdọhọ ete: “Iyịp Jesus Eyen esie eyet nnyịn isana ke kpukpru idiọkn̄kpọ.” (1 John 1:7) Jehovah enyịme ndifen ikpọ idiọkn̄kpọ nnyịn edieke ikabarede esịt idu eti uwem.—Kot Isaiah 1:18.
Nso ke ikpanam man Abasi efen ọnọ nnyịn?
Edieke iyomde Jehovah Abasi efen ọnọ nnyịn, ana nnyịn ikpep Bible, idiọn̄ọ se enye oyomde nnyịn inam, inyụn̄ inam se enye ọdọhọde. (John 17:3) Jehovah esima ndifen nnọ mbon oro ẹkabarede esịt ẹkpọn̄ idiọkn̄kpọ mmọ ẹnyụn̄ ẹdomode ndidu eti uwem.—Kot Utom 3:19.
Omokụt do ke isọn̄ke ndinam se Abasi amade. Jehovah ọdiọn̄ọ se ikemede ndinam ye se nnyịn mîkemeke. Ntre enye esifọn ido onyụn̄ atua nnyịn mbọm. Ndi enye ndifọn ntem inamke ọdọn̄ fi ndikpep ekese mban̄a enye?—Kot Psalm 103:13, 14.