Nte Afo Ekemede Ndisịm Mme Utịtmbuba eke Spirit Fo
1. Mme utịtmbuba eke spirit ewe ke ediwak mme uyen Christian ẹnịm?
1 Nte uyen Christian, eyịghe idụhe nte ke edi ima oro afo amade Jehovah ye ikọ oro Jesus eketịn̄de ọnọ kpukpru mme Christian ete ‘ẹbem iso ẹyom obio ubọn̄’ ẹkara mme utịtmbuba oro afo ẹnịmde ke uwem. (Matt. 6:33) Utịtmbuba fo ekeme ndidi nditat utom ukwọrọikọ fo ebe ke ndinam utom nte asiakusụn̄ m̀mê ndinam utom ke ebiet oro ẹnen̄erede ẹyom mme anditan̄a Obio Ubọn̄. Ndusụk owo ẹkeme ndikere ndinọ idemmọ unyịme unyịme kaban̄a utom ubọpn̄kpọ ofụri ererimbot, ndinam utom ke n̄kọk itieutom, m̀mê ndinam utom nte isụn̄utom ke esenidụt. Nso mme utịtmbuba oro ẹnọde uyụhọ ẹnyụn̄ ẹdotde itoro ke mmọ ẹdi ntem!
2. Nso ikeme ndin̄wam fi ndisịm mme utịtmbuba eke spirit fo?
2 Se idin̄wamde fi ndisịm mme utịtmbuba fo edi ndiwewet mmọ nnịm. Enyọn̄-Ukpeme eke July 15, 2004, ọkọdọhọ ete: ‘Se afo enyenede ke ekikere esinen̄ede ana in̄wan̄-in̄wan̄ ke ini etịn̄de-tịn̄ mmọ. Ntre afo emekeme ndiwewet mme utịtmbuba fo ye usụn̄ oro oyomde ndida nsịm mmọ nsịn ke n̄wed.’ Ke adianade do, mme utịtmbuba ibio ini ẹkeme ndin̄wam fi ndidomo n̄kọri fo nse nnyụn̄ n̄ka iso n̄wụk ntịn̄enyịn nte afo ebịnede utịtmbuba anyan ini.
3. Siak ndusụk utịtmbuba ibio ini oro ẹkemede ndin̄wam owo ndidot ndina baptism.
3 Mme Utịtmbuba Ibio Ini: Edieke afo mûnaha baptism kan̄a, kere ban̄a se afo akpanamde man esịm utịtmbuba oro. Ekeme ndiyom afo enen̄ede ọfiọk mme akpan ukpepn̄kpọ Bible. Ke edide ntre, nam edi utịtmbuba fo nditịn̄ enyịn n̄kpep n̄wed Bible Ekpep, okotde kpukpru mme itie N̄wed Abasi oro ẹsiakde ẹsịn. (1 Tim. 4:15) Nịm utịtmbuba n̄ko ndikot ofụri Bible ọtọn̄ọde ke Genesis esịm Ediyarade, nte ẹsidọhọde mbon Bethel ye nditọ ufọkn̄wed Gilead ẹkot. Ke ama akanam oro ama, ka iso ndikot Bible kpukpru usen. (Ps. 1:2, 3) Kam kere adan̄a nte oro edin̄wamde fi ndikọri ke n̄kan̄ eke spirit! Bọn̄ akam ofụri esịt mbemiso ọtọn̄ọde ye ke ini okụrede ndikot nnyụn̄ n̄kpep Bible, ndien domo ndida se ekpepde sịn ke edinam kpukpru ini.—Jas. 1:25.
4. Mme utịtmbuba ibio ini ewe ke Christian emi enyenede utịtmbuba anyan ini ndinam utom ke Bethel m̀mê utom isụn̄utom ekeme ndinịm?
4 Mme utịtmbuba ewe ke afo ekeme ndibịne edieke edide afo ama anana baptism? Ndi oyom afo ofori usụn̄ oro afo esikwọrọde ikọ? Ke uwụtn̄kpọ, nte afo emekeme ndinam edi utịtmbuba fo ndinen̄ede nnyene usọ ke ndida Ikọ Abasi nnam n̄kpọ ke an̄wautom? (2 Tim. 2:15) Didie ke afo ekeme nditat utom ukwọrọikọ fo? Nịm mme utịtmbuba ibio ini oro ẹkemde ye isua emana ye mme idaha fo, oro ẹdinyụn̄ ẹn̄wamde fi ndisịm mme utịtmbuba anyan ini oro afo enịmde.
5. Didie ke edinịm mme utịtmbuba ibio ini akan̄wam eyenete eren kiet ndisịm utịtmbuba esie ndinam utom ke Bethel?
5 Ndikụt Unen: Ke ini Tony emi edide isua 19 akakade ekese n̄kọk itieutom eke Mme Ntiense Jehovah, ama enen̄ede ọdọn̄ enye ndinam utom ke Bethel. Nte ededi, enye ekedi otụtutọn̄ eyen emi mîkakam iyakke idem inọ Abasi. Tony ama ebiere ndidu uwem ekekem ye mme usụn̄ Jehovah onyụn̄ enịm edina baptism nte utịtmbuba esie. Ke enye ama ekesịm utịtmbuba enye emi, enye ama enịm utịtmbuba efen, oro edi, ndidụk usiakusụn̄ unọ un̄wam ekem ebe odụk usiakusụn̄ ofụri ini, ewetde ke n̄wed usenọfiọn̄ esie usen oro enye oyomde nditọn̄ọ. Kam kere nte esịt ekenemde enye ke ini ẹkenọde enye ikot ndinam utom ke Bethel ke ama akanam utom usiakusụn̄ ke ndusụk ini!
6. Nso ikeme ndin̄wam fi ndisịm mme utịtmbuba eke spirit fo?
6 Nte afo oyomde ndinam mme n̄kpọ Obio Ubọn̄ edi akpa, afo n̄ko emekeme ndisịm mme utịtmbuba eke spirit fo. Men “utom fo” nịm Jehovah ke iso ke akam nyụn̄ domo ofụri ukeme ndisịm mmọ.—N̄ke 16:3; 21:5.