Mme Uyen—Nso Idi Mme Utịtmbuba eke Spirit Mbufo?
1 Jehovah ọfiọk nte utom emi enyenede se ọwọrọde ye mme utịtmbuba oro ẹkemede ndisịm edide akpan n̄kpọ ke ndida inemesịt ndi. (Se Genesis 1:28; 2:15, 19.) Mfịn, Jehovah ọmọnọ ikọt esie utom edikwọrọ ikọ ye edikpep owo n̄kpọ. Nnyịn n̄ko imenyene akakan utịtmbuba eke edinyene nsinsi uwem ke Paradise. Kan̄a kemi, oyom nnyịn inịm n̄kaiso utịtmbuba eke spirit edieke anade ifep ediwọn̄ọde odudu nnyịn ye mme inyene nnyịn nsịn ke n̄kpọ en̄wen.—1 Cor. 9:26.
2 Mme Utịtmbuba Ẹdide Ata Idem N̄kpọ ẹnọ N̄kparawa Owo: Akpana mme uyen ẹnyene mme utịtmbuba ukara Abasi oro ẹkemede ndisịm nte ekemde ye mme ukeme mmọ owo kiet kiet. (1 Tim. 4:15) Ndusụk ata n̄kpri nditọ ẹma ẹsịm utịtmbuba eke edimụm mme n̄wed Bible ndọn̄ ke ibuot idem mbemiso mmọ ẹkpepde ndikot n̄wed. Ebede ke ukpepn̄kpọ ubon, nditọwọn̄ ẹkpep nte ẹtịmde idem ẹnọ mme mbonoesop man mmọ ẹkeme ndisịm mme utịtmbuba eke edinọ nti ibọrọ ye edisịn enyịn̄ ke Ufọkn̄wed Utom Ukara Abasi. Ke ini nditọ ẹsan̄ade ye mme ete ye eka mmọ ke an̄wautom, mmọ ẹkpep ndinyene udeme ke ndinọ ikọ ntiense nte mmọ ẹnamde n̄kọri ẹbịne utịtmbuba eke edikabade ndi mme asuanetop oro mînaha baptism. Mme ete ye eka ẹkpenyene ndisọn̄ọ ntịn̄ nnọ n̄kpri nditọ mmọ mban̄a utịtmbuba eke ediyak idem nnọ ye baptism.
3 Edieke afo edide uyen, nso isịne ke mme utịtmbuba eke spirit fo? “Nyụn̄ ti Andibot fi” ke ndiwụk ntịn̄enyịn ke mme utịtmbuba ẹdide ata akpan n̄kpọ ke uwem. (Eccl. 12:1; Ps. 71:17) Ntak mûnamke utom usiakusụn̄ unọ un̄wam ke mme ini nduọkodudu ufọkn̄wed? Ndi ama ekere aban̄a edidụk utom usiakusụn̄ uyọhọ ini nte asiakusụn̄ ofụri ini? Nso kaban̄a edikpep obufa usem man otodo ke ini iso afo ekpekeme ndin̄wam otu m̀mê esop oro esemde usem esenidụt ke edem mbufo m̀mê ke ebiet en̄wen? Ediwak mbon ẹmi ẹnamde utom idahaemi ke Bethel m̀mê nte mme esenyịn oro ẹsan̄ade-san̄a m̀mê mme akpan asiakusụn̄ m̀mê mme isụn̄utom ẹkenịm akpan utom uyọhọ ini nte utịtmbuba mmọ ini emi mmọ ẹkesụk ẹdude ke ufọkn̄wed. Ntak afo mûnamke ukem oro?
4 Ke adan̄aemi ẹsụk ẹdide uyen, ẹdomo ndikpebe uwụtn̄kpọ Jesus. Idem ke ekedide isua 12 ke emana, enye ama etịn̄ n̄kpọ ifụre ifụre aban̄a mme n̄kpọ eke spirit. (Luke 2:42-49, 52) Ndinịm mme ọnọ-ufọn utịtmbuba nnọ idemfo ndinam ukpepn̄kpọ idemowo, ndikot Bible ke usen ke usen, ye edibuana kpukpru ini ye mme Christian ẹkọride ẹsịm ọyọhọ idaha ke mme mbonoesop ye ke an̄wautom ayan̄wam fi enyene usọ ndikpep mbon en̄wen mban̄a Obio Ubọn̄ Abasi ke usụn̄ emi Jesus akanamde.