“Ẹwụt Esịtekọm”
1 Ke ini Jesus akanamde mbon akpamfia duop ẹsana, owo kiet kpọt ke otu mmọ akafiak edikọm Jesus. Jesus ama obụp ete: “Nte idịghe owo duop ke ẹkenam ẹsana? Enye, ndien, owo usụkkiet eken?” (Luke 17:11-19) Ọfọn didie ntem nnyịn ndisiwụt esịtekọm mban̄a kpukpru nti enọ ye kpukpru enọ eke ẹfọnde ẹma, emi edima Ete nnyịn eke heaven oro ọfọnde ido, kpa Jehovah Abasi, ọnọde nnyịn!—Col. 3:15; Jas. 1:17.
2 Nso idi ndusụk n̄kpọ oro ikpowụtde esịtekọm iban̄a? Nnyịn imowụt esịtekọm iban̄a ufak, n̄kponn̄kan enọ oro Abasi ọnọde ubonowo. (John 3:16) Imọkọm Jehovah n̄ko ke enye ndidụri nnyịn ndian idem. (John 6:44) Nte nnyịn mme Christian idianade kiet n̄ko anam iwụt esịtekọm inọ Abasi. (Ps. 133:1-3) Ke akpanikọ, afo emekeme ndikere mban̄a ekese enọ eken oro Jehovah ọnọde. Nnyịn ikpedehedei itie nte nditọ Israel emi mîkowụtke esịtekọm, edi oro ẹkefrede se Jehovah akanamde ọnọ mmọ!—Ps. 106:12, 13.
3 Nanam N̄kpọ Wụt Esịtekọm Fo: Okposụkedi etiede nte ke mbon akpamfia duop oro ẹma ẹma se Jesus akanamde ọnọ mmọ, owo kiet kpọt akanam n̄kpọ owụt esịtekọm esie. (Luke 17:15) Ukem ntre, nnyịn inam n̄kpọ ndiwụt esịtekọm ke ini ibuanade ifịk ifịk ke utom ukwọrọikọ. Edieke nnyịn inen̄erede iwụt esịtekọm iban̄a kpukpru se edima Ete nnyịn eke heaven anamde, ọyọdọn̄ nnyịn nditiene n̄wụt ima ye mfọnido esie ke nditịn̄ mban̄a enye nnọ mbon en̄wen. (Luke 6:45) Ke adianade do, adan̄a nte ibụkde ‘utịbe ido Jehovah ye ekikere emi enye ekerede aban̄a nnyịn’ inọ mbon en̄wen, ntre ke ima ye esịtekọm oro inyenede iban̄a Jehovah edikọri.—Ps. 40:5.
4 N̄wam Mbon En̄wen Ẹwụt Esịtekọm: Nnyịn ikpenyene ndiben̄e idem ndin̄wam nditọ nnyịn ye nditọ ukpepn̄kpọ Bible nnyịn ẹwụt esịtekọm. Mme ete ye eka ẹnyene ediwak ifet ndinam emi, utọ nte ke ini ẹtiede ye nditọ mmọ ẹse mme n̄kpọ oro Jehovah okobotde. (Rome 1:20) Ke ini inịmde ukpepn̄kpọ Bible, nnyịn imekeme ndibụp eyen ukpepn̄kpọ nnyịn ite, “Nso ke emi ekpep nnyịn aban̄a orụk owo emi Jehovah edide?” Nte eyen ukpepn̄kpọ oro akade iso ndiwụt esịtekọm, ntre ke enye edika iso ama Abasi onyụn̄ ebiere ndinem enye esịt.
5 Ke mme akpatre usen emi, ediwak owo ẹnana esịtekọm. (2 Tim. 3:1, 2) Esinem Jehovah esịt didie ntem ndikụt mme anam-akpanikọ asan̄autom esie ẹwụtde esịtekọm ke ndisịn ifịk mbuana ke utom ukwọrọikọ!—Jas. 1:22-25.