“Ikọ Eke Ẹtịn̄de ke Ekem Ini”
1 Nte ndibuana etop uwem ye mbon efen edi n̄kpọ-ata ọnọ fi? Nte afo ekere ke ana etịn̄ n̄kpọ oro owụtde akwaifiọk man otụk mbon oro ẹkpan̄de utọn̄ ẹnọ fi? Ke ini Jesus okosiode mme mbet esie ọdọn̄, enye ọkọdọhọ mmọ ete: “Edi nte mbufo ẹkade, ẹkwọrọ ẹte, Ubọn̄ Heaven ke ekpere.” (Matt. 10:7) Etop oro ekedi mmemmem ikonyụn̄ isọn̄ke ndibuana ye mbon efen. Enye ikpụhọkede mfịn.
2 Ediwak ini esiyom ikọ ifan̄ kpọt man ẹtọn̄ọ nneme. Ke ini Philip okosobode eunuch owo Ethiopia, Philip okobụp enye ete: “Nte ọmọfiọk se ikọ oro okotde ọwọrọde?” (Utom 8:30) Nso ọnọ-uyụhọ nneme okosụn̄ọ oto “ikọ eke ẹtịn̄de ke ekem ini” ntem!—N̄ke 25:11.
3 Afo emekeme ndida ukem usụn̄ emi ke utom ukwọrọikọ fo. Didie? Ebede ke nditịn̄ enyịn nnyụn̄ mmek mme ikọ oro ekemde ye mme idaha. Bụp mbụme, nyụn̄ kpan̄ utọn̄ ke ibọrọ.
4 Ndusụk Akpan Mbụme: Man ọtọn̄ọ nneme, afo emekeme ndibụp mbụme ekededi ke otu emi:
◼ “Nte emesibọn̄ Akam Ọbọn̄ (m̀mê, Ete Nnyịn) ke utuakibuot fo?” (Matt. 6:9, 10) Tịn̄ ekpri ubak ke ibuot, ekem dọhọ ete: “Ndusụk owo ẹsibụp ẹte, ‘Nso idi enyịn̄ Abasi oro Jesus ọkọdọhọde ke ẹnyene ndikpono?’ Mbon efen ẹbụp ẹte, ‘Nso idi Obio Ubọn̄ oro Jesus ọkọdọhọde ke ikpenyene ndibọn̄ akam mben̄e?’ Nte afo emenyene mme ibọrọ ẹnọde uyụhọ ọnọ mme mbụme emi?”
◼ “Nte akanam afo emekere ete: ‘Nso ke uwem ọwọrọ?’” Wụt ete ke enye enyene ebuana ye ifiọk Abasi.—Eccl. 12:13; John 17:3.
◼ “Nte afo emekere ke ẹyesio n̄kpa ẹfep tutu amama?” Da Isaiah 25:8 ye Ediyarade 21:4 nọ ibọrọ oro ẹkemede ndiberi edem.
◼ “Nte mmemmem usọbọ odu ọnọ ndutịme emi odude ke ererimbot?” Wụt nte ke Abasi ekpep ete “Ma mbọhọidụn̄ fo.”—Matt. 22:39.
◼ “Nte ikan̄ otode heaven oyosobo isọn̄ usen kiet?” Buana un̄wọn̄ọ Bible oro nte ke isọn̄ edidu ke nsinsi.—Ps. 104:5.
5 Nọ eti mbụk ke mmemmem, nnennen usụn̄ ye ido owụtde mfọnido. Jehovah ọyọdiọn̄ ukeme fo ndibuana ọkpọkọm ‘ikọ akpanikọ kiet’ ye mbon efen.