Obufa Ndutịm Usen Akpan Mbono

Ediwak ntọt ẹdu idahaemi kaban̄a nte ikpanamde ata ata esịt nnyịn odu ke eti idaha man idu inem uwem oro ebịghide. Se inen̄ede idi akpan n̄kpọ ikan edi ndinịm ndamban̄a esịt nnyịn ke eti idaha. Do, odot didie ntem ibuotikọ ndutịm usen akpan mbono nnyịn oro editọn̄ọde ke February 2004 ndidi: “Ndinam N̄kpọ Jehovah ke Ofụri Esịt.” (1 Chron. 28:9) Nso ke nnyịn ikeme ndidori enyịn ndikpep?

Esenyịn circuit eyeneme ibuotikọ oro, “Ndin̄wam Mbon En̄wen Ẹnam N̄kpọ Jehovah ye Idatesịt.” Mme ndụn̄ọde ẹyewụt idatesịt oro esisụn̄ọde ke ndifiak n̄ka mbịne nnyụn̄ nnịm ukpepn̄kpọ Bible ye mbon oro ẹyomde ndinam n̄kpọ Jehovah. Nte eyịghe mîdụhe, kpukpru owo ẹyebọ ndọn̄esịt ye nsịnudọn̄ ẹto akpa utịn̄ikọ emi etịn̄ikọ oro otode-to edi edinọde, oro ibuotikọ edide, “Ndikpeme Esịt Nnyịn ke Ntịme Ntịme Ererimbot.” Utịn̄ikọ baptism ke ẹdida ẹberi ikpehe edinam usenubọk.

Ke uwemeyo, ikpehe oro, “Ndinọ Un̄wam” oyowụt nte nnyịn ikemede ndin̄wam mbon en̄wen. Nso ke mme ete ye eka ẹkeme ndinam man ẹkpeme esịt nditọ mmọ ẹbiọn̄ọ ndiọi idaha ẹnyụn̄ ẹn̄wam mmọ ẹsan̄a ẹkpere Jehovah? Ikpehe oro “Ẹn̄wam Nditọ Mbufo Ẹkop Idatesịt ke Jehovah” ọyọnọ nti ekikere oyonyụn̄ owụt nte ẹkemede ndinam emi.

Nte nnyịn ke ida kpukpru ndutịm oro Jehovah ọnọde inam n̄kpọ man inam ndamban̄a esịt nnyịn odu ke eti idaha onyụn̄ okop idem? Akpatre utịn̄ikọ etịn̄ikọ oro otode-to edi, “Ka Iso Ndinam N̄kpọ Jehovah ke Ofụri Esịt,” ọyọsọn̄ọ owụt akpan usụn̄ inan̄ oro ikemede ndika iso nse mban̄a mme idaha eke spirit nnyịn. Ini ye ukeme oro okponde adan̄a didie ke nnyịn isịn ndibọn̄ akam ofụri esịt, ndikpep Ikọ Abasi, ndikwọrọ ikọ ifịk ifịk nnyụn̄ mbuana ye mme Christian eken? Nte nnyịn imekeme ndinam n̄kọri ke mme afan̄ emi?

Jehovah ọnọ ikot emi: “Sịn esịt fo ke item, nyụn̄ kpan̄ utọn̄ fo ke ikọ ifiọk.” (N̄ke 23:12) Nam ndutịm idahaemi ndidu ke usen oro edinemede ọnọ-ufọn item N̄wed Abasi emi. Ndinam ntre ọyọsọn̄ọ fi idem ndinam n̄kpọ Jehovah ke ofụri esịt ye ke idatesịt.