Ana Nnyịn Ika Iso Isịn Ifịk ke Utom Ukwọrọikọ
1 Isua kiet kiet ọtọn̄ọde ke 1992, Mme Ntiense Jehovah ẹmesịn ifịk ẹbiat se ikande hour biliọn kiet ke utom edikwọrọ Obio Ubọn̄ ye edinam mbet eke ofụri ererimbot. Nnyịn inem esịt didie ntem ndikenyene esisịt ebuana ke utọ utịbe utịbe utom oro!—Matt. 28:19, 20.
2 Nte ededi, kpukpru ekọm ye itoro ẹnyene Jehovah, emi ọnọde nnyịn ibetedem ke utom ukwọrọikọ nnyịn ke “ndiọkeyo” emi. (2 Tim. 3:1) Nso ke ẹyom ẹto nnyịn edieke anade ika iso ibuana ifịk ifịk ke akpan utom emi?
3 Se Inamde Inyene Ifịk: Ntotụn̄ọ ima oro inyenede inọ Abasi ye mbọhọidụn̄, ọkọrọ ye ata udọn̄ oro inyenede ndidu uwem ekekem ye uyakidem nnyịn, ẹnụk nnyịn ndinam utom Obio Ubọn̄. (Matt. 22:37-39; 1 John 5:3) Ima esinụk nnyịn ndiwa idem man ikeme ndibuana ọyọhọ ọyọhọ ke utom ukwọrọikọ.—Luke 9:23.
4 Sịn Ukeme Ndika Iso Nnyene Ifịk: Asua nnyịn, kpa Devil, esisịn ikpafak ndinam nnyịn itek ke ifịk ke utom ukwọrọikọ. Mme owo ke efakutom nnyịn ndinana udọn̄, mme n̄kpọ oro ẹsiwọn̄ọrede owo ntịn̄enyịn ke ererimbot emi, mme mfịghe uwem eke usen ke usen, ye editịmede esịt mban̄a unana nsọn̄idem nnyịn ẹdi sụk ibat ibat ke otu mme n̄kpọ oro enye esidade odomo ndinam nnyịn itek ke ifịk.
5 Ke ntre, ana inen̄ede isịn ukeme mbak nnyịn iditek ke ifịk. Edi akpan n̄kpọ nnyịn ndika iso mbọk ‘ima emi nnyịn ikenyenede ke akpa.’ Oro abuana ndikot nnyụn̄ ntie n̄kere Ikọ Abasi, kpa Bible, kpukpru ini, nnyụn̄ nda kpukpru enọ eke spirit oro “ofụn emi anamde akpanikọ onyụn̄ enyenede ọniọn̄” ọnọde n̄n̄wam idem.—Edi. 2:4; Matt. 24:45; Ps. 119:97.
6 Nte mme ntịn̄nnịm ikọ Bible ẹwụtde in̄wan̄-in̄wan̄, usen oro Jehovah edisobode mbon oro mîten̄eke enye enen̄ede ekpere. (2 Pet. 2:3; 3:10) Ke ntre, ẹyak nnyịn isịn ukeme ika iso inam utom Obio Ubọn̄ ifịk ifịk, ibuanade ọyọhọ ọyọhọ ke utom ukwọrọikọ ye edinam mbet oro akade iso idahaemi ke ofụri ererimbot!