“Ẹnyene Ifiopesịt ke Spirit”
1. Nso edu ke ikpenyene iban̄a utom ukwọrọikọ nnyịn?
1 Ikpanaha ikpehe utom Christian nnyịn ndomokiet etie ndebe ndebe. Utu ke oro, ẹsịn udọn̄ ẹnọ nnyịn ẹte ‘inyene ifiopesịt ke spirit’ inyụn̄ ‘idụk ufụn inọ Jehovah.’ (Rome 12:11) Edi odu ediwak n̄kpọ oro ẹkemede ndinam itek ke ifịk ke utom ukwọrọikọ nnyịn. Didie ke ikeme ndinam ifịk ye ifiopesịt oro inyenede inọ utom Obio Ubọn̄ nnyịn “asak nte ikan̄”?—2 Tim. 1:6, 7.
2. Nso ebuana ke ọkpọkpọ ukpepn̄kpọ Bible enyene ye ifịk oro isịnde ke utom ukwọrọikọ?
2 Ọkpọkpọ Ukpepn̄kpọ Bible: Asuanetop Obio Ubọn̄ oro okụtde unen edi enye emi amade mbet Abasi onyụn̄ ayakde akpanikọ oro enye okụtde ke mbet oro enen̄ede otụk uwem esie. (Ps. 119:97) Ke ini ikụtde akpanikọ Bible ke adan̄aemi inamde ọkpọkpọ ukpepn̄kpọ, emi oyotụk nnyịn onyụn̄ anam idọdiọn̄ isịn ifịk. Ima oro imade Andinọ utọ akpanikọ oro ye udọn̄ ndikwọrọ eti mbụk nnọ mbon en̄wen ẹsinam itoro Abasi inyụn̄ itan̄a enyịn̄ esie an̄wan̄wa. (Heb. 13:15) Ndisịn ifịk n̄kwọrọ eti mbụk owụt ke imenen̄ede ikụt ufọn utom emi.
3. Didie ke spirit Abasi ekeme ndin̄wam nnyịn ke utom ukwọrọikọ nnyịn?
3 Bọn̄ Akam Ben̄e Spirit Abasi: Edikụt unen ke utom ukwọrọikọ itoho ukeme nnyịn. Spirit Abasi anam owo enen̄ede esịn ifịk. (1 Pet. 4:11) Ndisan̄a n̄kpere Andinọ ‘owo nsọn̄idem’ ọyọnọ nnyịn ukeme ke n̄kan̄ eke spirit ndikwọrọ ikọ uko uko. (Isa. 40:26, 29-31) Apostle Paul ama ‘ọbọ un̄wam emi otode Abasi’ ke adan̄aemi enye okosobode afanikọn̄ ke ini utom ukwọrọikọ esie. (Utom 26:21, 22) Ntre ana ibọn̄ akam iben̄e edisana spirit Jehovah emi ekemede ndinam inyene ifiopesịt ke utom ukwọrọikọ nnyịn.—Luke 11:9-13.
4. Nso nti utịp ke ifịk ekeme ndinyene, edi nso item ke ẹnọ nnyịn?
4 Edieke ifịk oro inyenede iban̄a edikwọrọ Obio Ubọn̄ asakde nte ikan̄, emi ekeme ndinam ekemmọ nditọete ẹtiene ẹsịn ifịk n̄ko. (2 Cor. 9:2) Mme owo ke efakutom esiwak ndikpan̄ utọn̄ nnọ etop oro ẹdade ifiopesịt ye uko ẹnọ. Edi, ana ifịk asan̄a ye mbufiọk ye ifụre ifụre ido. (Titus 3:2) Kpukpru ini, oyom ikpono enyene-ufọk inyụn̄ ifiọk ke enye enyene ifụre ndimek se enye oyomde.
5. Ikọ eke odudu spirit ewe ke ikpodomo ndida nsịn ke edinam?
5 Nnyịn ikpakam ‘inyene ifiopesịt ke spirit’ kpukpru ini sia idide mme anditan̄a etop Obio Ubọn̄. Ẹyak ọkpọkpọ ukpepn̄kpọ Bible ye akam ofụri esịt oro ibọn̄de inọ Jehovah, emi ekemede ndinọ nnyịn edisana spirit, anam nnyịn ikọri ifịk. Ke usụn̄ emi ke ikeme ndida “edisana spirit ye ọkpọsọn̄ mbuọtidem” n̄kwọrọ ikọ ifịk ifịk!—1 Thess. 1:5.