“Ẹkabade Ẹdi Mme Anam Ikọ”

1-2. Nso isinam ikọt Abasi ẹkop inemesịt? (James 1:22-25)

JEHOVAH ye edima Eyen esie ẹyom esịt enenem nnyịn. Owo emi ekewetde Psalm 119:2 ọdọhọ ete: “Mbon oro ẹnamde se enye etide mmọ ẹkop inemesịt; mmọ ẹyom enye ke ofụri esịt mmọ.” Jesus ọkọdọhọ esiemmọ ntem ete: “Mbon oro ẹkopde ikọ Abasi ẹnyụn̄ ẹnamde enye ẹkop inemesịt!”​—Luke 11:28.

² Nnyịn emi ikponode Jehovah idi mbon inemesịt. Nso inam edi ntre? Awak ntak-o. Edi enye emi mîkpanaha ifre edi ke imesikot Ikọ Abasi kpukpru ini inyụn̄ idomo ndinanam se ikpepde.​—Kot James 1:22-25.

3. Nso ufọn ke isidia ima inanam se ikotde ke Ikọ Abasi?

³ Ufọn emi isidiade ima ‘ikabade idi mme anam ikọ’ awak. Kiet edi ke imọdiọn̄ọ ke nnyịn ndidi mme anam ikọ edi akpan n̄kpọ emi anamde inem Jehovah esịt. Ndien nnyịn ndidiọn̄ọ ke esịt enem Jehovah esinam esịt enem nnyịn n̄ko. (Eccl. 12:13) Nte inamde mme n̄kpọ emi ikotde ke Bible emi Abasi ọkọnọde spirit esie ewet, imesidu ke emem ye mbonubon nnyịn inyụn̄ inen̄ede ikpere nditọete. Ekeme ndidi omokụt nte edide ntre ke uwem fo. N̄kpọ en̄wen edi ke ediwak mfịna emi ẹsisịmde mbon emi mîmaha ndidu uwem nte Jehovah ọdọhọde isisịmke nnyịn. Onyụn̄ edi ukem ukem nte Edidem David eketịn̄de. Ke David ama eketịn̄ aban̄a ibet, mme ewụhọ, ye mme ubiereikpe Jehovah ke ikwọ kiet emi enye ọkọkwọde, enye ama ọdọhọ ete: “Akwa udori odu ke ndinịm mmọ.”​—Ps. 19:7-11.

4. Nso isinam ọsọn̄ nnyịn ndidi mme anam ikọ?

⁴ Imọdiọn̄ọ ke idịghe kpukpru ini ke esimem nnyịn utom ndidi mme anam ikọ. Mme n̄kpọ emi anade inam ẹyọyọhọ nnyịn idem, edi ana isinyene ini emi ididade ikot inyụn̄ ikpep Bible man se Jehovah oyomde inam an̄wan̄a nnyịn. Ke ntak oro, ẹyak ineme ndusụk se ikemede ndinam man an̄wam nnyịn isikot Bible kpukpru ini. Iyeneme n̄ko se idin̄wamde nnyịn isikere se ikotde, inyụn̄ ikụt mme usụn̄ emi ikemede ndinanam se ikotde.

NYENE INI EMI EDISIKOTDE IKỌ ABASI

5. Tịn̄ ndusụk n̄kpọ emi ẹsidade ini nnyịn.

⁵ N̄wakn̄kan ikọt Jehovah inyeneke ini sia n̄kpọ ọyọyọhọ mmọ idem. Ini emi isidade inam mme n̄kpọ emi Bible ọdọhọde ke ẹdi utom nnyịn idịghe ekpri. Ke uwụtn̄kpọ, n̄wakn̄kan ke otu nnyịn imenyene utom emi isinamde ise iban̄a idem ye mbonubon nnyịn. (1 Tim. 5:8) Ediwak nditọete nnyịn ẹnyene iman emi ẹdọn̄ọde m̀mê ẹsọn̄de ndien mmọ ẹsise mbon oro enyịn. Ke eke kpukpru nnyịn, nsọn̄idem nnyịn esịne nnyịn ke ubọk, ndien ndise mban̄a nsọn̄idem oro esida ini. Itetịn̄ mi, utom emi inyenede ke esop mmọdo n̄ko. Ata akpan utom emi inyenede edi ndisịn idem ntiene n̄kwọrọ ikọ. Ama etie ekere kpukpru se enyenede ndinam emi, edinam didie enyene ini esikot Bible kpukpru ini, etie ekere se okotde, onyụn̄ ananam se okotde?

6. Akpanam nso man okụt ete ke emesikot Bible? (Se ndise n̄ko.)

⁶ Ndikot Bible esịne ke otu mme n̄kpọ emi mme Christian ẹdade nte “se idide akpan n̄kpọ ikan.” Ntre ana ikụt ite ke imesikot Bible. (Phil. 1:10) Kop se ata akpa Psalm etịn̄de aban̄a owo emi okopde inemesịt. Itie oro ọdọhọ: “Ibet Jehovah adat enye esịt, enye onyụn̄ okot ibet esie ke nsụhọde-uyo uwemeyo ye okoneyo.” (Ps. 1:1, 2) Imenen̄ede ikụt ke oro ọwọrọ ke ana isinyene ini ikot Bible. Ini ewe edi mfọnn̄kan ini emi ikpesikotde Bible? Ini emi ọfọnde ye owo kiet ekeme ndidi isio ye owo en̄wen. Edi se idide akpan n̄kpọ edi yak akam edi ini emi idisikemede ndikot Bible kpukpru ini. Brọda Victor ọdọhọ ete: “Nsima ndikot Bible usenubọk. Kpa ye emi mmensimaha ndibak ndemede idap, iwakke n̄kpọ emi edisiode mi ekikere ikpọn̄ se n̄kotde ke usenubọk. Ekikere iditịmekede mi, nyonyụn̄ n̄keme ndinen̄ede nsịn esịt ke se n̄kotde. Ekeme ndidi ntre n̄ko ye afo. Bụp idemfo ete, ‘Ini ewe ikpenen̄erede ifọn ye ami ikan se n̄kotde Bible?’

KERE SE OKOTDE

7-8. Nso ikeme ndikpan nnyịn ndinen̄ede ndia ufọn n̄kpọ emi ikotde? Nọ uwụtn̄kpọ.

⁷ Se idude edi ke imekeme ndikot ediwak n̄kpọ kpukpru ini, edi se ikotde inen̄ekede idụk nnyịn ibuot. Ndi akanam omokot n̄kpọ, ekpri ini ekebe afo odomo nditi se okokotde oro edi unen̄ekede uti? Esitịbe ọnọ kpukpru nnyịn. Se idiọkde edi ke ekeme nditịbe n̄ko ima ikot Bible. Yak idọhọ ke enyene n̄wed Bible emi okotde ndien emebiere ke edikot ibuot ntem m̀mê ntem kpukpru usen. Idiọkke-o. Akpana ibiere se idinamde inyụn̄ idomo ndikụt ite ke imanam se ikebierede oro. (1 Cor. 9:26) Ndikot Bible ọfọn-o, edi ọfọn idiọn̄ọ ke enye oro akam edi ntọn̄ọ. Enyene mme n̄kpọ en̄wen emi akpanade inam idian do edieke iyomde ndinen̄ede ndia ufọn nto se ikotde ke Ikọ Abasi.

⁸ Kere uwụtn̄kpọ emi ise: Edịm mîdepke, mme n̄kpọ emi ẹtọde ẹyekpan̄a. Edi edịm ekpedep ọkpọsọn̄ ọkpọsọn̄ ke ufan̄ usen m̀mê urua ifan̄, mmọn̄ emi edidụkde isọn̄ ayawak akaha. Edịm efen okposụk edep adian do, mmọn̄ enye oro ediwewet ibe, se ẹtọde idinyụn̄ idiaha ufọn mmọn̄ oro. Ọfọn yak edi edịm ama edep, ọnọ ufan̄ ekpri man mmọn̄ ekeme ndidụk isọn̄ ọfọn onyụn̄ an̄wam se ẹtọde ọkọri. Ukem oro n̄ko, ikpanaha ikot Bible nte ẹbebịne nnyịn, oro edi ikot ọsọp akaha tutu se ikotde inen̄ekede idụk nnyịn ibuot, nnyịn inyụn̄ ikemeke nditi se ikokotde oro nnyụn̄ nnanam.​—Jas. 1:24.

9. Ekpedi emehe nnyịn ndisikot Bible itọk itọk, ikpanam nso?

⁹ Ama okot Bible ndusuk ini, ndi emesikụt ke esikot itọk itọk? Akpanam nso? Tehede idem kot. Nen̄ede domo ndikot sụn̄sụn̄ man ekeme ndikere se osụk okotde, mîdịghe ama okot ama, afo ọnọ idem ini man ekeme ndikere se okotde. Se itịn̄de emi idịghe n̄kpọ emi akpakakde-kak owo. Ekpedi etie fi nte edikakak fi, kûnam nte anam ndụn̄ọde ke se okotde. Da nte ke ẹdọhọ ama okot ama, afo obụp idemfo m̀mê an̄wan̄a fi; okụre ke oro. Emekeme ndibiere ndinam ini emi esikpepde n̄kpọ afiak ọniọn̄ man ekeme ndikere se ekpepde. Mîdịghe emekeme ndibiere ndikot ufan̄ikọ ifan̄ kpọt, ada ndien ini emi osụhọde ekere se osụk okotde oro. Victor emi ima iketetịn̄ iban̄a ọdọhọ ete: “Nsikotke Bible yak awawak. Mmekeme ndikot ibuot kiet kpọt. Sia edide nsikot ata usenubọk ntem, oro anam nsikeme ndikere se n̄kokotde ofụri usen oro.” Edide omokot awak m̀mê okot ekpri ekpri, akpan n̄kpọ edi yak okot ke usụn̄ emi edin̄wamde fi enen̄ede adia ufọn n̄kpọ emi okotde.​—Ps. 119:97; se ekebe emi “Mme Mbụme Emi Ekpekerede Aban̄a.”

10. Tịn̄ ise nte ekemede ndiyom usụn̄ nnanam se ekpepde. (1 Thessalonica 5:17, 18)

¹⁰ Edide okot Bible ekpri ekpri m̀mê omokot awak, m̀mê onyụn̄ okot ini ewe, kụt ete ke omoyom usụn̄ ananam se ekpepde. Nte osụk okotde Ikọ Abasi aka, bụp idemfo ete, ‘Didie ke n̄keme ndinam se n̄kotde idahaemi m̀mê ekpri ini ko ke iso?’ Se uwụtn̄kpọ mi. Yak idọhọ ke omokot ekesịm 1 Thessalonica 5:17, 18. (Kot.) Ke ama okokot ufan̄ikọ iba oro ama, emekeme ndituak nda n̄kere m̀mê isibọn̄ akam ikafan̄, m̀mê imesinyụn̄ ibọn̄ ke ofụri esịt. N̄kpọ en̄wen edi ke emekeme ndikere mme n̄kpọ emi edikọmde Abasi. Emekeme ndibiere ke enyene akpan n̄kpọ ita emi imọ idikọmde enye. Ọkpọkọm ada minit ifan̄ kpọt etịm ekere se okotde, oro ayan̄wam fi enen̄ede edi andikop ikọ ye owo emi esinamde se enye ekpepde ke Ikọ Abasi. Kere ufọn emi edidiade ama anam ntre kpukpru usen ke mme itie Bible en̄wen emi okotde. Edidi eyo esiere, afo etetịm edi anam ikọ. Edi edinam didie edieke etiede nte ke se anade okpụhọde awak etieti?

YAK SE EBIEREDE NDINAM OKÛDI SE IKPONDE IKAN FI

11. Nso ikeme ndinam idem emem fi ndusụk ini? Nọ uwụtn̄kpọ.

¹¹ Ama okot Bible onyụn̄ oyom mme usụn̄ emi akpanamde-nam mme item do, idem ekeme ndimem fi ekpetie nte ke se anade okpụhọde awak etieti. Yak idọhọ ke okot Bible mfịn okụt ke Bible ọdọhọ ke ndiwụt uma ifọnke. (Jas. 2:1-8) Afo okụt ke edi se okpụhọrede nte esinamde n̄kpọ ye ndusụk owo, afo onyụn̄ ebiere ke imọn̄ ikpụhọde. Enye oro ọfọn! Ekem n̄kpọn̄ afo okot itie en̄wen emi ọdọhọde ke ọfọn ekpekpeme nte esitịn̄de ikọ. (Jas. 3:1-12) Afo edikụt ke enyene nte ikọ fo esitiede ndusụk ini. Ntre afo ebiere ke iyom ndidomo ndisitịn̄ ikọ yak enenem mme owo onyụn̄ ọsọn̄ọ mmọ idem. Okokot Bible ọyọhọ usen ita, afo okụt itie emi ọdọhọde yak ekpeme man ududi ufan ye ererimbot. (Jas. 4:4-12) Afo okụt ke edi se enen̄ede ekpeme utọ fim emi esisede, ikwọ emi esikwọde, ye n̄wed emi esikotde. Ekesịm ọyọhọ usen inan̄, ekeme nditie fi nte ke mme n̄kpọ emi anade okpụhọde awak akaha.

12. Okpokot Bible okụt mme n̄kpọ emi anade okpụhọde, ntak emi mûkpayakke idem emem fi? (Se ikọ idakisọn̄ n̄ko.)

¹² Ekpedi se anade okpụhọde awak, kûyak idem emem fi. Oro akam owụt ke udịghe esịt itiat. Owo emi osụhọrede idem mînyụn̄ ibian̄ake idem esidi ama okot Ikọ Abasi, enye oyom mme ebiet emi enye ekemede ndikpụhọde.a Ti n̄ko ke idịghe usen kiet ke ẹsimen “obufa owo” ẹsịne, ke esida ini. (Col. 3:10; men se idude ke “is being made new” ke nwtsty domo.) Nso idin̄wam fi aka iso edi anam ikọ?

13. Nso idin̄wam fi ebiere n̄kpọ ifan̄ emi ekemede ndinam, edi mme n̄kpọ oro ikponke ikan fi? (Se ndise n̄ko.)

¹³ Utu ke ndidomo ndinam kpukpru se okotde ini kiet, mek ifan̄ emi editọn̄ọde kan̄a. (N̄ke 11:2) Emekeme ndidomo ndinam ntem ise: Wewet kpukpru mme n̄kpọ emi anade okpụhọde, ekem mek kiet m̀mê iba emi editọn̄ọde, kpọn̄ kan̄a mbon eken nọ ini en̄wen. Ọkpọtọn̄ọ ke m̀mọ̀n̄?

14. Ekpenyene mme n̄kpọ emi anade okpụhọde, ọkpọtọn̄ọ ye ewe?

¹⁴ Emekeme ndimek nditọn̄ọ ye enye emi edifiakde imem fi utom, mîdịghe ọtọn̄ọ ye enye emi ekerede ke edi se ọsọpde-sọp anam n̄kpọ aban̄a. Ama emek enye emi editọn̄ọde, da mme n̄wed esop Abasi utọ nte Watch Tower Publications Index m̀mê N̄wed Ndụn̄ọde Mme Ntiense Jehovah nam ndụn̄ọde ban̄a n̄kpọ oro. Bọn̄ akam dọhọ Jehovah se aduakde ndikpụhọde nyụn̄ dọhọ enye anam ọdọn̄ fi ndikpụhọde onyụn̄ ọnọ fi odudu okpụhọde. (Phil. 2:13) Ekem nanam se ekpepde ke mme n̄wed oro. Ama anam akpa oro okụt ibuot, ọyọdọn̄ fi ndinam en̄wen. Se idude edi ke ekpekeme ndikpụhọde n̄kpọ kiet ke uwem fo mîdịghe ekeme ndinam n̄kpọ emi anamde edi eti Christian, ọyọdọn̄ fi ndinam mme n̄kpọ eken emi anade anam, oyonyụn̄ enen̄ede emem fi utom ndikpụhọde.

YAK IKỌ ABASI ‘ANAM UTOM KE IDEMFO’

15. Didie ke ikọt Jehovah ẹkpụhọde ye ediwak owo emi ẹsikotde Bible? (1 Thessalonica 2:13)

¹⁵ Ndusụk owo ẹdọhọ ke mmimọ imokot Bible ediwak ini. Edi ndi mmọ ẹnen̄ede ẹnịm se idude ke Bible? Ndi mmọ ẹnanam se ẹkpepde ke Bible oro mîdịghe ẹyak okpụhọde uwem mmọ? Ediwak ini ibọrọ mme mbụme oro esidi ihih. Ikọt Jehovah itiehe ntre! Mmọ ẹda Bible nte “ikọ Abasi” koro “se enye ke akpanikọ edide” edi oro. Nte mme Christian eyo mme apostle ẹkenyụn̄ ẹdade Bible edi oro. N̄kpọ en̄wen edi ke imesinen̄ede idomo ndiwụt ke Bible ke anam utom ke uwem nnyịn.​—Kot 1 Thessalonica 2:13.

16. Nso ikeme ndin̄wam nnyịn idi mme anam ikọ?

¹⁶ Idịghe kpukpru ini ke esimem utom ndikot Ikọ Abasi nnyụn̄ nnanam se ikotde. Mîdịghe imekeme nditịme etieti ndinyene ini n̄kam n̄kokot idem Ikọ Abasi. Ekeme ndimehe nnyịn ndisikot itọk itọk, nnyịn inyụn̄ inyeneke ini ikere ediwak se ikotde. Mîdịghe se anade ikpụhọde awak tutu idem emem nnyịn. Inamke n̄kpọ m̀mê ewe ke otu oro edi mfịna fo, edi n̄kpọ emi ekemede ndikan ubọk. Jehovah ayan̄wam fi afo akan n̄kpọ oro ubọk. Ẹyak ibiere ndinyịme enye an̄wam nnyịn, inyụn̄ ibiere ke ididi mme anam ikọ idịghe mbon emi edide ẹma ẹkop, ẹfre. Imenịm ke ikpenen̄ede ikot Ikọ Abasi inyụn̄ inanam se ikpepde, ke iyenen̄ede ikop inemesịt.​—Jas. 1:25.