Ndi Akpana Mbọn̄ Akam Nnọ Ndisana Owo?

Se Bible ọdọhọde

Ihih. Bible ọdọhọ ke akpana ibọn̄ akam inọ Abasi ikpọn̄-ikpọn̄ ke enyịn̄ Jesus. Jesus ọkọdọhọ mme mbet esie ete: “Ẹbọn̄ akam ntem ndien, ẹte, Ete nnyịn emi odude ke heaven: yak ikpono enyịn̄ Fo.” (Matthew 6:9) Jesus ikọdọhọke mme mbet esie ẹbọn̄ akam ẹnọ ndisana owo, mme angel, m̀mê owo en̄wen ekededi ke mîbọhọke Abasi.

Jesus ama onyụn̄ ọdọhọ mme anditiene enye ete: “Ami ndi usụn̄ ye akpanikọ ye uwem. Baba owo kiet itieneke Ete ibọhọke ebe ke ami.” (John 14:6) Jesus kpọt ke Abasi enyịme ete esikpe imọ ubọk ọnọ nnyịn.—Mme Hebrew 7:25.

Ndi ọfọn ndibọn̄ akam nnọ Abasi nnyụn̄ mbọn̄ nnọ ndisana owo?

Abasi ọkọdọhọ ke Ibet Duop ete: “Ami Jehovah Abasi fo ndi Abasi ufụp.” (Exodus 20:5, Edisana Ŋwed Abasi Ibom) Didie ke enye edi Abasi “ufụp”? Bible en̄wen ọdọhọ ete: “Ami Jehovah Abasi fo ndi Abasi emi oyomde san̄asan̄a utuakibuot.” Emi ọwọrọ ke Abasi oyom ẹtuak ibuot m̀mê ẹbọn̄ akam ẹnọ imọ ikpọn̄-ikpọn̄.—Isaiah 48:11.

Esịt esiyat Abasi edieke ibọn̄de akam inọ owo en̄wen ekededi, idem ekpedi ibọn̄ inọ ndisana owo m̀mê ndisana angel esie. Ke ini apostle John okoyomde ndituak ibuot nnọ angel kiet, angel oro ama ọdọhọ enye ete: “Kûnam! Ami ndi ofụn kpa nte afo ye nditọete fo emi ẹnyenede utom editie ntiense nnọ Jesus. Tuak ibuot nọ Abasi.”—Ediyarade 19:10.