Ewe N̄kpọ Iba Ẹsinam Abasi Okûkop Ndusụk Akam?

Se Bible ọdọhọde

Abasi isikopke ndusụk akam. Yak ineme n̄kpọ iba emi esinamde Abasi okûkop akam owo.

1. Edieke akam mîkemke ye uduak esie

Abasi isibọrọke akam emi mîkemke ye uduak esie emi ẹwetde ke Bible. (1 John 5:14) Ke uwụtn̄kpọ, Bible ọdọhọ ikûdiọk itọn̄. Mbre mfọniso anam owo ọdiọk itọn̄. (1 Corinth 6:9, 10) Ntre, edieke ọbọn̄de akam ete Abasi anam fi ebre mbre mfọniso adia, enye idibọrọke utọ akam oro. Abasi itiehe nte ukwakutom emi edide ama efefịk enye anam se ededi emi oyomde. Esịt akpakam enenem fi esịt sia Abasi mîsibọrọke kpukpru akam. Mîkpedịghe ntre, idem ekpesikpa fi aban̄a se ndusụk owo ẹben̄ede Abasi.—James 4:3.

2. Edieke owo emi ọbọn̄de akam edide owo nsọn̄ibuot

Abasi isikopke akam mbon oro ẹkade iso ẹnam se idiọkde enye esịt. Kop se enye ọkọdọhọde mbon nsọn̄ibuot oro ẹkedọhọde ke ikpono enye mi: “Okposụkedi mbufo ẹbọn̄de ediwak akam, ami n̄kopke; iyịp ọmọyọhọ mbufo ke ubọk.” (Isaiah 1:15) Ekpedi mmọ ẹma ẹkabade esịt ẹnyụn̄ ẹnam se inende ke enyịn Abasi, enye okpokop akam mmọ.—Isaiah 1:18.