Ndi Afo Emenyene Esịtekọm?

Ke ufọkidụn̄ isụn̄utom kiet ke West Africa, ebua ukpeme kiet emi ekekerede Teddy ama odu inikiet ko. Ke ini owo okotopde ibio unam ọnọ Teddy, enye ama emen unam oro emen inikiet inikiet, ye unana edin̄wen̄wịne, ye unana editata. Enye etie ye ọkpọsọn̄ udọn̄ ke utịn n̄kan̄ ufiop isọn̄ ebet ẹtop mben̄e udia efen ẹnọ imọ. Ke ini unam okokụrede, enye ama ọwọn̄ọde onyụn̄ aka ebiet amade.

Akananam Teddy ikowụtke esisịt esịtekọm iban̄a se enye ọkọbọde. Owo ndomokiet ikodorike enyịn enye ndinam ntre. Idem n̄kpọ, enye n̄kukụre ekedi ebua.

KABAN̄A esịtekọm, nnyịn imesiwak ndiyom ekese nto ekemmọ owo n̄kan nte iyomde ito unam. Nte ido edide ẹsikpu nnyịn. Ediwak owo ẹsikọ se mmọ ẹkekeme ke uwem ẹnyụn̄ ẹyom efen efen. Emi n̄ko idịghe n̄kpọ n̄kpaidem. Bible ama ebem iso etịn̄ ete ke ukperedem ini, mme owo ẹyenana esịtekọm.—2 Timothy 3:1, 2.

Nte ededi, mme asan̄autom Abasi ẹnyene isio isio edu. Mmọ ẹnam item apostle Paul, emi ọkọdọhọde mme ekemmọ andinịm ke akpanikọ ete: “Mbufo ẹnyụn̄ ẹnyene esịt ekọm.”—Colossae 3:16.

Jehovah Enyene Esịtekọm

Jehovah Abasi enịm mfọnmma uwụtn̄kpọ ke ediwụt esịtekọm. Kere ban̄a nte enye esede mme anam-akpanikọ asan̄autom esie. Ke ndausụn̄ odudu spirit, Paul ama ewet ọnọ mme Christian ẹdide mme Hebrew ete: “Abasi ikwan̄ake nte efrede utom mbufo ye ima enyịn̄ Esie eke mbufo ẹwụtde, ke emi mbufo ẹkenamde n̄kpọ ẹnọ ikọt Abasi, ẹnyụn̄ ẹsụk ẹnanam.”—Mme Hebrew 6:10.

Mme uwụtn̄kpọ esịtekọm oro Jehovah owụtde aban̄a mme anam-akpanikọ ikọt esie ẹyọyọhọ. Enye ama ọdiọn̄ Abraham ebe ke ndinam ata nditọ esie ẹwak, tutu mmọ ẹkabade ẹtie “nte ntantafiọn̄ enyọn̄, ye nte ntan emi odude ke mben inyan̄.” (Genesis 22:17) Ke ndiwụt esịtekọm mban̄a edinam akpanikọ Job ke idak idomo, Jehovah ikafiakke inọ Job ekese inyene esie kpọt edi ama ọnọ enye n̄ko “utịm ikaba.” (Job 42:10) Nte Jehovah anamde n̄kpọ ye mme owo ke ediwak tọsịn isua ẹmi ẹbede ọsọn̄ọ nte ikọ emi edide akpanikọ: “Koro enyịn Jehovah ẹsan̄ade ke ofụri ererimbot, ete isọn̄ọ imụm mmọ eke ofụri esịt mmọ odude ye enye ikama.”—2 Chronicles 16:9.

Esịtekọm ye ekikere Abasi ndinọ mbon oro ẹyomde ndinam uduak esie utịp edi akpan ikpehe ke edu esie. Ndifiọk emi edi akpan n̄kpọ ke mbuọtidem Christian. Paul ekewet ete: “Ke mbuọtidem mîdụhe, owo ikemeke ndinem Abasi esịt; koro owo eke asan̄ade ekpere Abasi enyene ndinịm ete Enye . . . edi Andinọ mmọ ẹmi ẹyomde Enye utịp.”—Mme Hebrew 11:6.

Edieke Jehovah okpowụtde nsọn̄ido, idiọk edu, utu ke esịtekọm, ẹkpebiom kpukpru nnyịn ikpe. Andiwet psalm ama etịn̄ akpan n̄kpọ emi anyan ini ko ete: “O Jehovah, afo ekpese mme idiọk idọ, O Ọbọn̄, anie ekpekeme ndida?” (Psalm 130:3) Jehovah inanake esịtekọm inyụn̄ idịghe andikụt ndudue nnọ owo. Enye adara mbon oro ẹnamde n̄kpọ ẹnọ enye. Enye enyene esịtekọm.

Jesus—Owo Emi Owụtde Ntotụn̄ọ Esịtekọm

Ke owụtde mme edu Ete esie eke heaven ke mfọnmma usụn̄, Jesus Christ ama owụt esịtekọm aban̄a mme n̄kpọ oro enye okokụtde nte mbon efen ẹnamde ke mbuọtidem. Kere ban̄a se iketịbede ini kiet ke temple ke Jerusalem: “Jesus emenede enyịn okụt nte mbon inyene ẹsịnde enọ mmọ ke usịn-etịbe. Enye onyụn̄ okụt ubuene ebe-akpa kiet nte esịnde n̄kpri okudọk iba ke esịt. Ndien Enye ete, Ke akpanikọ ke ndọhọ mbufo nte, Ebe-akpa emi ama esịn okụk akan kpukpru mmọ: koro kpukpru mmọ ẹkesiode n̄kpọ ke nyọhọ-nsụhọ mmọ ẹsịn ke etịbe: edi ke unana esie enye osio kpukpru se enye akpadade odu uwem ọnọ.”—Luke 21:1-4.

Ke ndise ke n̄kan̄ okụk, etịbe oro ekedi ekpri, akpan akpan ke ẹmende ẹdomo ye eke mbon inyene oro. Ọkpọsọsọn̄ ata ediwak mbon oro ẹkedude do ndikụt enye. Edi, Jesus ama okụt ebeakpa oro. Enye ama etịm ọfiọk mme idaha esie. Jesus ama okụt enye onyụn̄ owụt esịtekọm aban̄a enye.

N̄kpọntịbe efen akabuana Mary, n̄wan emi ekenyenede n̄kpọ. Nte Jesus eketiede ke itie udia, enye ama ọtọhọ ata ọsọn̄urua ufuọn̄n̄kpọ ke ukot ye ibuot Jesus. Ndusụk owo ẹma ẹkụt ndudue ẹnọ n̄wan oro ẹban̄a edinam esie, ẹkerede ẹte ke ẹkpenyam aran oro ẹnyụn̄ ẹda okụk oro ẹn̄wam mme ubuene. Didie ke Jesus akanam n̄kpọ? Enye ọkọdọhọ ete: “Ẹkpọn̄ enye; nsinam ẹfịnade enye? enye akanam eti utom ke idem Mi. Ke akpanikọ ke ndọhọ mbufo, Ebiet ekededi eke ẹdikwọrọde gospel ke ofụri ererimbot, ẹyenyụn̄ ẹtịn̄ se n̄wan emi akanamde, ndida nti enye.”—Mark 14:3-6, 9; John 12:3.

Jesus ikesemeke idiọk idiọk ite ke owo ikadaha ọsọn̄urua aran oro inam n̄kpọ efen. Enye ama owụt esịtekọm aban̄a ima ye mbuọtidem oro Mary okowụtde ke ofụri esịt. Ẹwet n̄kpọntịbe oro ke Bible ndida nti eti edinam esie. Mme mbụk ẹmi ye mbon efen ẹwụt nte ke Jesus ekedi eren emi enyenede ntotụn̄ọ esịtekọm.

Edieke afo edide asan̄autom Abasi, afo emekeme nditịm nnịm nte ke Jehovah Abasi ye Jesus Christ ẹwụt ntotụn̄ọ esịtekọm ẹban̄a mme ukeme fo ke ndimenede edisana utuakibuot ke enyọn̄. Utọ ifiọk oro odụri nnyịn ekpere mmọ onyụn̄ onụk nnyịn ndikpebe mmọ ebe ke ndiwụt ke nnyịn imenyene esịtekọm.

Edu Satan Ndikụt Ndudue

Ẹyak nnyịn idahaemi ikere iban̄a uwụtn̄kpọ owo emi mînyeneke esịtekọm—Satan kpa Devil. Unana esịtekọm Satan eketịp esịn ke enye nditọn̄ọ enyene-ndịk nsọn̄ibuot ye Abasi.

Ke ama ọkọkọri idiọk edu unana uyụhọ ke idemesie, Satan ama ọtọn̄ọ nditọ enye ke esịt mbon efen. Kere ban̄a mme n̄kpọntịbe ke in̄wan̄ Eden. Jehovah ama obot akpa eren ye n̄wan, onyụn̄ esịn mmọ ke in̄wan̄ ebietde paradise, ama onyụn̄ ọdọhọ mmọ ete: ‘Ẹdia kpukpru eto in̄wan̄.’ Ukpan kiet kpọt okodu. Abasi ọkọdọhọ ete: ‘Edi ama edi eto ifiọk, eti ye idiọk, ẹkûdia ke esịt: koro ke usen eke mbufo ẹdiade ke esịt mbufo ẹyekpa n̄kpa.’—Genesis 2:16, 17.

Nte ededi, ikebịghike, Satan ama eneni ete ke Jehovah idịghe se ẹkemede ndiberi edem. Ke ubak ubak, enye okoyom ndinam Eve anana esịtekọm aban̄a Jehovah tutu onụk enye ndisọn̄ ibuot ye enye, kpa nte Satan ke idemesie ọkọsọn̄de. Satan okobụp ete: “Nte Abasi ọkọdọhọ ete, Mbufo ẹkûdia baba eto in̄wan̄ emi kiet?” (Genesis 3:1) In̄wan̄în̄wan̄ ekikere ekedi nte ke Abasi ama edịp Eve ọsọn̄urua n̄kpọ, n̄kpọ oro edinamde enyịn esie atara onyụn̄ anam enye etie nte Abasi ke idemesie. Utu ke ndiwụt esịtekọm mban̄a uwak edidiọn̄ oro Jehovah ọkọnọde enye, Eve ama ọtọn̄ọ ndiyom se ẹkekpande.—Genesis 3:5, 6.

Ẹtịm ẹdiọn̄ọ mme enyene-ndịk utịp oro. Okposụkedi ẹkenọde enye enyịn̄ oro Eve “koro enye edide eka kpukpru mme andidu uwem,” ke usụn̄ifiọk efen, enye ama akabade edi eka kpukpru mme andikpan̄a. Kpukpru owo ẹma ẹda idiọkn̄kpọ oro osion̄ode n̄kpa ẹto Adam.—Genesis 3:20; Rome 5:12.

Kpebe Abasi ye Christ

Kere ban̄a ukpụhọde oro odude ke ufọt Satan ye Jesus. Ẹtịn̄ ẹban̄a Satan nte “enye emi odoride nditọ-ete nnyịn ikọ . . . emi odoride mmọ ikọ ke iso Abasi ke uwemeyo ye okoneyo.” (Ediyarade 12:10) Jesus “ekeme ndinyan̄a mmọ ẹmi ẹsan̄ade ke Enye ẹkpere Abasi ọyọhọ-ọyọhọ, sia Enye odude uwem ke nsinsi ndinam n̄kpe-ubọk nnọ mmọ.”—Mme Hebrew 7:25.

Satan esidori mme asan̄autom Abasi ikọ. Jesus enyene esịtekọm aban̄a mmọ onyụn̄ anam n̄kpeubọk ke ibuot mmọ. Nte mme andikpebe Christ, mme Christian ẹkpenyene ndidomo ndikụt eti n̄kpọ ke idem kiet eken, ẹdarade ẹnyụn̄ ẹbatde kiet eken ke ọsọn̄urua. Ke ndinam ntre, mmọ ẹwụt esịtekọm oro ẹnyenede ẹnọ enye emi enịmde akakan uwụtn̄kpọ ke ediwụt esịtekọm, kpa Jehovah Abasi.—1 Corinth 11:1.

[Ndise ke page 17]

Jesus ama owụt esịtekọm aban̄a eti edinam Mary