Ntak Abakde Ata Abasi Idahaemi-e?

“Bak Abasi, nyụn̄ nịm mbet esie: koro emi edi eke kpukpru owo.”—ECCLESIASTES 12:13.

1, 2. Ntak odotde ndinyene eti mbak Abasi?

ETI ye ukpono ukpono mbak Abasi ọfọn ye owo. Ih, okposụkedi ekese ndịk oro ediwak owo ẹsikopde ẹsitịmerede ntụk, idem ẹdiọkde ye mfọnọn̄kpọ nnyịn, ọfọn nnyịn ndibak Jehovah Abasi.—Psalm 112:1; Ecclesiastes 8:12.

² Andibot ọfiọk emi. Ke ntak ima emi enye enyenede ọnọ edibotn̄kpọ esie, enye ọnọ kpukpru owo ewụhọ ete ẹbak imọ ẹnyụn̄ ẹtuak ibuot ẹnọ imọ. Nnyịn ikot ite: “N̄kụt angel en̄wen efefe ke ufọt enyọn̄, emi enyenede nsinsi gospel ete ikwọrọ inọ mmọemi ẹdụn̄de ke isọn̄, ye kpukpru idụt ye esien ye usem ye obio; ndien enye ọdọhọ ke ọkpọsọn̄ uyo ete, Mbufo ẹten̄e Abasi, ẹnyụn̄ ẹnọ Enye ubọn̄; koro ekem ini ikpe Esie; ẹnyụn̄ ẹtuak ibuot ẹnọ Enyeemi okobotde enyọn̄ ye isọn̄.”—Ediyarade 14:6, 7.

3. Nso ke Andibot akanam ọnọ akpa ete ye eka nnyịn?

³ Nnyịn ke akpanikọ ikpenyeneke ndifụmi Andibot kpukpru n̄kpọ, kpa Ntọn̄ọ uwem, koro enye enyene nnyịn ye ekondo emi. (Psalm 24:1) Ke ndiwụt akwa ima esie, Jehovah ama ọnọ nditọ esie eke isọn̄ uwem onyụn̄ ọnọ mmọ ata eti ebiet ndidụn̄—ediye paradise. Edi, utịbe utịbe enọ emi ama enyene n̄kpọ emi ẹyomde. Ke nditịm ntịn̄, ẹkenọ enye ke ubiọn̄. Akpa ete ye eka nnyịn ẹkenyene ndise mban̄a ebietidụn̄ mmọ nnyụn̄ ntat enye tutu mmọ ẹyọhọ ẹnyụn̄ ẹkan ofụri isọn̄. Mmọ ẹma ẹnyene mme ifetutom ye mme mbiomo ke idem mme unam obot, mme inuen, ye iyak—kpukpru mme oduuwem edibotn̄kpọ eken ẹmi ẹdibuanade isọn̄ oro ye mmọ ye nditọ mmọ. Owo ekenyene ndinam ibat kaban̄a akwa ubiọn̄ emi.

4. Nso ke owo anam ye edibotn̄kpọ Abasi?

⁴ Kpa ye utịbe utịbe ntọn̄ọ emi, sese se owo anamde ndisabade ediye ebietidụn̄ isọn̄ esie! Otode ke emiom emiom edifụmi itie Abasi nte andinyene ọsọn̄urua n̄kpọ emi, mme owo ẹmenam isọn̄ edehe. Usabaden̄kpọ emi odu ke idaha oro anamde uwem ata ekese uduot unam, mme inuen, ye iyak ẹdu ke itiendịk. Edinen ye ima ima Abasi nnyịn idiyọhọ emi ke nsinsi. Isọn̄ ẹbiatde mi ofiori oyom edinam ibat, emi edide se inamde ediwak owo ẹnyene ntak ndikop ndịk. Ke n̄kan̄ eken, ye mbon oro ẹbuọtde idem ukpono ukpono ke Abasi, edi n̄kpọ ndọn̄esịt ndifiọk se iditịbede. Jehovah eyeyom edinam ibat, ndien ẹyefiak ẹdiọn̄ isọn̄. Emi ke akpanikọ edi eti mbụk idatesịt ọnọ kpukpru mbon ẹmi ẹnyenede eti esịt ke isọn̄.

5, 6. Didie ke Jehovah edinam n̄kpọ aban̄a se owo anamde ye edibotn̄kpọ Esie?

⁵ Ke ewe usụn̄ ke Abasi edinam ubiereikpe esie? Ebe ke Jesus Christ, emi ẹma ẹkedori idahaemi ke ebekpo nte Edidem Obio Ubọn̄ Abasi eke heaven. Ebede ke Eyen eke heaven oro, Jehovah eyeda ndek ndek, ọsọn̄ibuot editịm n̄kpọ odude kemi osịm utịt. (2 Thessalonica 1:6-9; Ediyarade 19:11) Ke usụn̄ emi enye eyeda ubọhọ ọsọk mbon ẹmi ẹbakde enye ndien, ke ukem ini oro, anyan̄a onyụn̄ otịm ebietidụn̄ isọn̄ nnyịn onịm.

⁶ Didie ke emi editịbe? Bible etịn̄ aban̄a akwa ukụt emi edide emi edisịmde utịt ke ekọn̄ Armageddon. (Ediyarade 7:14; 16:16) Emi edidi ubiereikpe Abasi ọnọ editịm n̄kpọ emi ẹma ẹkesabade mi ye mbon oro ẹsabarede enye. Nte owo ndomokiet eyebọhọ? Ih! Emi edidi mbon oro mînyeneke akama-oyomonsia, idiọk mbak Abasi, edi ẹnyenede ukpono ukpono mbak esie. Ẹyenyan̄a mmọ.—Mme N̄ke 2:21, 22.

Enyene-Ndịk Ediwụt Odudu

7. Ntak emi Abasi akanamde n̄kpọ ke ntak Israel ke eyo Moses?

⁷ N̄wọrọnda edinam Jehovah Abasi emi edi se akwa edinam oro enye akanamde ke ntak mme andituak ibuot nnọ enye n̄kpọ nte isua 1,500 mbemiso Eyo Nnyịn akadade aban̄a. Akwa odudu ekọn̄ Egypt ama esịn mme anamutom ẹdide nditọ Israel emi ẹkewọrọde ẹkedụn̄ do ke ufụn, idem odomode ndinam se itiede nte ediwot ofụri orụk ke ini Pharaoh, andikara idụt emi, ọkọnọde uyo ete ẹwot kpukpru nsek nditọiren Israel. Edikan oro Abasi akakande Egypt ekedi ndinam nditọ Israel ẹwọrọ ufụn ufịk ufịk ndutịm ukaraidem, ih, ẹbọhọ ufụn idụt emi ẹkesabarede oto ke edituak ibuot nnọ ediwak abasi.

8, 9. Didie ke Moses ye nditọ Israel ẹkenam n̄kpọ ẹban̄a se Abasi akanamde?

⁸ Exodus ibuot 15 owụt nte Israel akanamde n̄kpọ aban̄a uwọrọ ufụn oro ke Egypt. Edidụn̄ọde mbụk emi eyen̄wam nnyịn ndifiọk nte ẹkemede ndinyan̄a mme Christian nsio ke editịm n̄kpọ odude kemi emi ẹma ẹkesabarede ke spirit ye ke ikpọkidem. Ẹyak nnyịn ikere iban̄a Exodus ibuot 15, iwụkde ntịn̄enyịn ke ibat ibat ufan̄ikọ man ifiọk ntak emi nnyịn ikpemekde ndibak Jehovah, kpa ata Abasi. Nnyịn itọn̄ọ ye Ex 15 ufan̄ikọ 1 ye 2:

⁹ “Ndien Moses ye nditọ Israel ẹkwọ ikwọ emi ẹnọ Jehovah, ẹnyụn̄ ẹdọhọ ẹte, Nyekwọ nnọ Jehovah, koro enye okon̄de; enye ekemen horse ye andidoro horse, ọduọk ke inyan̄. Jehovah edi odudu mi ye ikwọ, omonyụn̄ edi edinyan̄a mi.”

10. Nso ikada ikosụn̄ọ ke Abasi ndikosobo udịmekọn̄ Egypt?

¹⁰ Mme owo ke ofụri ererimbot ẹmehe ye mbụk aban̄ade nte Jehovah akanyan̄ade Israel osio ke Egypt. Enye ama ada mme ufen amia akwa ukara ererimbot oro tutu Pharaoh ke akpatre ama ayak nditọ Israel ẹnyọn̄ọ. Edi ekem udịmekọn̄ Pharaoh ama ebịne mme anana ukpeme mme owo ẹmi okonyụn̄ etie nte ẹma ẹmụm mmọ ke mben Ididuot Inyan̄. Jehovah ama enyene n̄kpọ en̄wen ke ekikere, okposụkedi eketiede nte ke nditọ Israel ẹmọn̄ ẹsọp nditaba obufa ubọhọ-ufụn mmọ. Enye ke utịbe usụn̄ ama asiak usụn̄ ke inyan̄ oro onyụn̄ anyan̄a ikọt esie. Ke ini nditọ Egypt ẹketienede, enye ama anam Ididuot Inyan̄ ọtọ ofụk mmọ onyụn̄ owot Pharaoh ye udịmekọn̄ esie.—Exodus 14:1-31.

11. Nso ikedi utịp edinam oro Abasi akanamde ye Egypt?

¹¹ Jehovah ndikosobo udịmekọn̄ Egypt ama emenede enye ke enyịn mme andituak ibuot nnọ enye onyụn̄ anam ẹdiọn̄ọ enyịn̄ esie ntatara ntatara. (Joshua 2:9, 10; 4:23, 24) Ih, enyịn̄ esie ama okon̄ akan mme anana-odudu, nsunsu abasi Egypt, ẹmi mîkekemeke ndinyan̄a mme andituak ibuot nnọ mmọ. Mbuọtidem oro ẹkenyenede ke idem mme abasi mmọ ye owo ye odudu ekọn̄ okosụn̄ọ ke ndotndot edikpu. (Psalm 146:3) Eyịghe idụhe okonụkde nditọ Israel ndikwọ itoro oro okowụtde eti mbak ẹnyenede ẹnọ oduuwem Abasi, emi esidade odudu anyan̄a ikọt esie!

12, 13. Nso ke nnyịn ikpenyene ndikpep nto edikan oro Abasi akakande ke Ididuot Inyan̄?

¹² Ukem ntre, nnyịn ikpenyene ndifiọk nte ke idụhe mme nsunsu abasi eke eyo nnyịn inyụn̄ idụhe akwa odudu, idem ye mme n̄kpọekọn̄ nuclear, ẹmi ẹkemede ndikem ubọk ye Jehovah. Enye ekeme ndien eyenyan̄a ikọt esie. “Enye onyụn̄ anam kpa nte enye amade ke otu mme udịm enyọn̄ ye ke otu mme andidụn̄ isọn̄: ndien baba owo kiet eke edituakde enye ubọk, onyụn̄ ọdọhọde enye, ete, Afo a[n]anam nso? idụhe.” (Daniel 4:35) Ke nnyịn itịmde ifiọk mme ikọ ẹmi, eyenụk nnyịn n̄ko ndikwọ itoro esie ye inemesịt.

¹³ Ikwọ edikan oro ke Ididuot Inyan̄ akaiso ete: “Jehovah edi owoekọn̄, Jehovah edi enyịn̄ esie.” Ke ntre, Owoekọn̄ emi owo mîkemeke ndikan mi, idịghe ndusụk anana enyịn̄ n̄kpọ emi owo ekerede-kere. Enye enyene enyịn̄! Enye edi ‘Enyeemi anamde akabade edi,’ Akwa Andinam, Enyeemi “ekerede Jehovah, . . . Ata Edikon̄ ke ofụri ererimbot.” (Exodus 3:14; 15:3-5; Psalm 83:18) Nte afo unyịmeke nte ke okpokowụt ọniọn̄ nditọ Egypt eset oro ndinyene eti ye ukpono ukpono ekikere mbak nnọ Ata Ọkpọsọn̄ utu ke ndisọn̄ ibuot ye enye?

14. Didie ke ẹkewụt nte mbak Abasi enyenede ufọn ke Ididuot Inyan̄?

¹⁴ Nte Andidiọn̄ isọn̄, Andinam inyan̄ enyene ọyọhọ odudu ndikara mme akpa mmọn̄. (Exodus 15:8) Ke ndida odudu esie n̄ko nnam n̄kpọ ke ndikara ofụm, enye ama anam n̄kpọ etiede nte se owo mîkpekemeke ndinam. Enye ama abahade mmọn̄ ke ebiet kiet onyụn̄ anam enye afiak edem man edi usụn̄ emi mmọn̄ odude ke edem mbiba ọnọ ikọt esie ndibe. Kere ban̄a n̄kpọntịbe emi: ediwak miliọn tọn mmọn̄ ke inyan̄ oboho okon̄ akabade edi mme ibibene emi ẹsakde iso ẹse kiet eken, anamde usụn̄ ubọhọ oro ọnọde ukpeme odu ọnọ Israel. Ih, mbon ẹmi ẹkenyenede eti mbak ẹnọ Abasi ẹma ẹnyene ukpeme. Ekem Jehovah ama asana mmọn̄ ayak, anamde enye afiak ọtọ nte akwa ukwọ, ofụkde udịmekọn̄ Pharaoh ye kpukpru n̄kpọekọn̄ mmọ. Nso ediwụt odudu Abasi ke emi ekedi ntem ke idem mbukpo abasi ye odudu ekọn̄ eke owo! Ke akpanikọ, Jehovah edi enyeemi ẹkpebakde, nte enye idịghe?—Exodus 14:21, 22, 28; 15:8.

Ndiwụt Mbak Oro Nnyịn Inyenede Inọ Abasi

15. Didie ke nnyịn ikpanam n̄kpọ iban̄a mme okopodudu edinam edinyan̄a Abasi?

¹⁵ Ke ekpedide nnyịn ikada ye Moses ikụt ubọhọ, ke akpanikọ okpokonụk nnyịn ndikwọ ete: “Anie, ke otu mme abasi ebiet fi O Jehovah? Anie ebiet fi, emi okponde ubọn̄ ke edisana ido, emi eten̄ede ke itoro, anamde mme utịben̄kpọ?” (Exodus 15:11) Ẹmetịn̄ ẹfiak ẹtịn̄ utọ ekikere oro ke ofụri isua ikie emi toto ke ini oro. Ke akpatre n̄wed eke Bible, apostle John etịn̄ aban̄a otu mme anam-akpanikọ asan̄autom Abasi ẹmi ẹyetde aran ete: “Mmọ ẹnyụn̄ ẹkwọ ikwọ Moses owo Abasi ye ikwọ Eyenerọn̄.” Nso idi akwa ikwọ emi? “Mme utom Fo ẹkponi ẹnyụn̄ ẹnyene ndyọ, O Ọbọn̄ Abasi, Andikara kpukpru n̄kpọ; mme usụn̄ Fo ẹnen ẹnyụn̄ ẹdi akpanikọ, O Edidem mme obio. Anie editre nditen̄e Fi, O Ọbọn̄, ndinyụn̄ nnọ enyịn̄ Fo ubọn̄? Koro Afo ikpọn̄ edi edisana.”—Ediyarade 15:2-4.

16, 17. Nso utịbe utịbe edinam ke nnyịn ikụt adade itie mfịn?

¹⁶ Ntre n̄ko mme andituak ibuot ẹmi ẹbọhọde ufụn ẹdu mfịn ẹmi mîwụtke esịtekọm ke mme n̄kpọ obot Abasi ikpọn̄ edi n̄ko ke mme ewụhọ esie. Mme owo ke kpukpru idụt ẹmebọhọ ufụn ke n̄kan̄ eke spirit, ẹdianade ẹkpọn̄ ererimbot emi ẹma ẹkesabade koro mmọ ẹfiọkde ẹnyụn̄ ẹdade ndinen ewụhọ Abasi ẹsịn ke edinam. Kpukpru isua, ediwak tọsịn owo ke mme itie ikie ẹsibọhọ mbiara ererimbot emi man ẹdu ye edisana, edinen esop eke mme andituak ibuot nnọ Jehovah. Ibịghike, ke ẹma ẹkebiere ikan̄ ikan̄ ubiereikpe Abasi ẹnọ nsunsu ido ukpono ye idiọk editịm n̄kpọ eken emi osụhọde, mmọ ẹyedu uwem ke nsinsi ke edinen obufa ererimbot.

¹⁷ Nte ekemde ye Ediyarade 14:6, 7, ubonowo kemi ke okop etop ubiereikpe emi Mme Ntiense Jehovah ẹtan̄ade ke ndausụn̄ mme angel. Ke se iwakde ikan idụt 230 ke isua emi ekebede, n̄kpọ nte Mme Ntiense miliọn ition ẹma ẹtan̄a eti mbụk Obio Ubọn̄ Abasi ye ini ubiereikpe esie. Man ẹnọ ekemmọ owo ukpep kaban̄a ubọhọ, Mme Ntiense ẹma ẹwaha ke ufọk mme owo kpukpru ini, ẹnịmde mme ukpepn̄kpọ Bible mfọn. Ntem kpukpru isua ediwak tọsịn owo ke mme itie ikie ẹsibọ ukpep ekem ndibak ata Abasi ke usụn̄ esịnede ifiọk, ẹyak uwem mmọ ẹnọ enye, ẹnyụn̄ ẹna baptism. Edi n̄kpọ inemesịt didie ntem nte ke utọ mbon oro ẹmedi ẹdibak ata Abasi!—Luke 1:49-51; Utom 9:31; men Mme Hebrew 11:7 domo.

18. Nso iwụt ke mme angel ẹnyene ebuana ke ukwọrọikọ nnyịn?

¹⁸ Ndi edi akpanikọ nte ke mme angel ẹnyene ebuana ke utom ukwọrọikọ emi? Ọfọn, otịm ana in̄wan̄în̄wan̄ nte ke ndausụn̄ mme angel esiwak ndida Mme Ntiense Jehovah n̄ka ke ufọk emi ndusụk mbon nnanenyịn ẹkenyenede udọn̄, idem ẹbọn̄de akam ẹyom un̄wam eke spirit! Ke uwụtn̄kpọ, owo iba ke otu Mme Ntiense Jehovah ẹsan̄ade ye ekpri eyen kiet ke ẹketịn̄ eti mbụk ke isuo Caribbean kiet. Nte ekperede ndisịm ufọt uwemeyo, ikpọ owo iba oro ẹma ẹbiere nditre do usen oro. Edi eyen oro ama enyene esen esen udọn̄ ndiwaha udiana ufọk. Ke ini enye okokụtde ete ke ikpọ owo ẹmi ikoyomke ndiwaha ini oro, enye ama aka ke idemesie onyụn̄ ọkọkọn̄ usụn̄. N̄kaiferi kiet ama eberede usụn̄. Ke ini ikpọ owo ẹmi ẹkekụtde, mmọ ẹma ẹwọn̄ọde ẹka ẹnyụn̄ ẹkenyene nneme ye enye. Enye ama ọdọhọ mmọ ẹdụk ẹdi, anamde an̄wan̄a nte ke ata nnennen ini oro ikokopde nte ẹkọn̄de usụn̄, imọ ikọbọn̄ akam ite Abasi ọnọ Mme Ntiense ẹbịne imọ man ẹdikpep imọ Bible. Ẹma ẹnam ndutịm ẹnọ ukpepn̄kpọ Bible.

19. Nso ke nnyịn ikeme ndisio n̄wụt nte ufọn otode edibak Abasi?

¹⁹ Nte nnyịn ke edinam akpanikọ inọde etop ubiereikpe Abasi, nnyịn n̄ko imesikpep ndinen ewụhọ esie. Ke ini mme owo ẹdade mmọemi ẹsịn ke edinam ke uwem, esisụn̄ọ ke mme edidiọn̄ eke obụk ye eke spirit. Ke uwụtn̄kpọ, Bible ana ata in̄wan̄în̄wan̄ ke ndibiom kpukpru oburobụt ido idan̄ ikpe. (Rome 1:26, 27, 32) Ẹmefụmi mme idaha oro Abasi onịmde ntatara ntatara mfịn ke ererimbot. Nso idi utịp? Ndọ ke ẹbiara. Nsọn̄ibuot ke ọkọri. Mme obiomo-owo ndo udọn̄ọ ẹmi ẹmende ẹto idan̄, ẹmi ẹtarade ẹsuana ke ọyọhọ isua ikie 20 emi, ke ẹtatara ẹsuana. Ke akpanikọ, ẹmen enyene-ndịk udọn̄ọ AIDS ke akamba udomo ẹto oburobụt ido idan̄. Edi nte ukpono ukpono mbak ẹnyenede ẹnọ Abasi idịghe akwa ukpeme inọ mme ata andituak ibuot?—2 Corinth 7:1; Philippi 2:12; se n̄ko Utom Mme Apostle 15:28, 29.

Mme Utịp Edibak Abasi Idahaemi

20. Nso iwụt ke mmọ en̄wen ẹdiọn̄ọ ẹban̄a eti enyịn̄ oro Mme Ntiense Jehovah ẹnyenede?

²⁰ Mbon oro ẹbakde Abasi ẹnyụn̄ ẹtienede mme ewụhọ esie ẹnyene akpakịp edidiọn̄. Kere ban̄a n̄kpọntịbe kiet emi owụtde n̄kaiso ifiọk odude aban̄a akpanikọ oro nte ke Mme Ntiense Jehovah ẹnam emem emem otu nditọete Christian ẹmi ẹnyenede nti ido uwem. Ediwak Mme Ntiense, mme andidụk mbono ofụri ererimbot ke South America, ẹkedụn̄ ke ufọkisen kiet emi n̄ko ẹkedade ke okoneyo kiet ẹnịm mbono mbon emi mîdịghe Mme Ntiense emi adaibuot ukara idụt oro ekenyenede ndinọ utịn̄ikọ. Nte otu mbon ukpeme ẹkenamde adaibuot ukara ọsọp odụk n̄kpọ umen owo ndọk ufọkenyọn̄, Ntiense kiet emi mîkọfiọkke owo emi odude ke n̄kpọ umen owo ndọk ufọkenyọn̄ oro ama ọdọk odụk, anamde idem akpa mbon ukpeme ẹmi! Ke ọfiọkde se enye akanamde, Ntiense emi ama ekpe ubọk ke ndikebe ndụk. Enye ama owụt kad mbenọfọn̄ mbono esie emi anamde ẹdiọn̄ọ enye nte Ntiense onyụn̄ ọdọhọ ke imọ idịghe n̄kpọndịk ndomokiet inọ adaibuot ukara oro. Ye inua imam, owo ukpeme kiet ama ọdọhọ ete: “Edieke kpukpru owo ẹkpetiede nte Mme Ntiense Jehovah, nnyịn ikpoyomke orụk ukpeme emi.”—Isaiah 2:2-4.

21. Mme usụn̄ edinam ewe ẹberede ẹnọ mme owo mfịn?

²¹ Emi edi orụk mme owo ẹmi Jehovah atan̄de idahaemi obok onyụn̄ otịmde idem ‘ndito ke akwa ukụt n̄wọrọ’ oro adade editịm n̄kpọ emi osịm utịt. (Ediyarade 7:9, 10, 14) Utọ ubọhọ oro ididịghe ke mbuari. Man edi andibọhọ, ana owo abak Jehovah, ọdiọn̄ọ enye nte Andikara oro enyenede unen, onyụn̄ ayak idem ọnọ enye. Nte ededi, akpanikọ edi nte ke ekese owo idikọrike orụk mbak oro edinamde ẹdot ndibọ ukpeme. (Psalm 2:1-6) Nte ekemde ye kpukpru uyarade ẹdude, Jesus Christ, Andikara oro Jehovah emekde, ke akara nte Edidem toto ke akpan isua oro 1914. Emi ọwọrọ ete ke ini emi osụhọde ke okụre usọp usọp ọnọ mme owo ndikọri nnyụn̄ n̄wụt eti mbak nnọ Jehovah. Edi, Andibot nnyịn ke ayak mme owo, idem mbon ẹmi ẹdude ke ikpọ itie, ndiyere ikot: “Mbufo ndidem ẹdi ọniọn̄, ndien: mbufo, mme ebiereikpe ererimbot, ẹkop item. Ẹnam n̄kpọ Jehovah ke ndịk, ẹnyụn̄ ẹdara ke unyek-idem. Ẹtịm Eyen inua, mbak Enye ediyat esịt, ndien mbufo ẹbiara ke usụn̄, koro ke ini esisịt iyatesịt esie ẹyesak. Ọfọfọn ọnọ kpukpru mmọ eke ẹbuọtde idem ye Enye.”—Psalm 2:7-12.

22. Nso ke ini iso akama ọnọ mbon oro ẹbakde Abasi idahaemi?

²² Akpakam nnyịn idu ke otu mbon ẹmi ẹditorode Andibot nnyịn nte Enyeemi anyan̄ade nnyịn. Nte ededi, emi oyom nnyịn ibak ata Abasi idahaemi! (Men Psalm 2:11; Mme Hebrew 12:28; 1 Peter 1:17 domo.) Ana nnyịn ikaiso ndikpep ndinen ewụhọ esie inyụn̄ inịm mmọ. Ikwọ Moses ye eke Eyenerọn̄, emi ẹwetde ke Ediyarade 15:3, 4, eyetotịm ọsọn̄ uyo akan ke ini Jehovah osiode kpukpru idiọkn̄kpọ efep ke isọn̄ onyụn̄ ọtọn̄ọde ndinam owo ye ebietidụn̄ isọn̄ esie etre ndinyene mme utịp idiọkn̄kpọ ẹmi ẹsabarede. Adan̄aoro, ke ofụri esịt nnyịn, nnyịn iyekwọ ite: “Mme utom Fo ẹkponi ẹnyụn̄ ẹnyene ndyọ, O Ọbọn̄ Abasi, Andikara kpukpru n̄kpọ; mme usụn̄ Fo ẹnen ẹnyụn̄ ẹdi akpanikọ, O Edidem mme obio. Anie editre nditen̄e Fi, O Ọbọn̄, ndinyụn̄ nnọ enyịn̄ Fo ubọn̄?”

Nte Afo Emeti?

◻ Ntak emi Jehovah odotde eti mbak nnyịn?

◻ Nso ke mme edinam Abasi ke Ididuot Inyan̄ ẹkeyarade ẹwụt?

◻ Mme ufọn ewe ẹsụn̄ọ ẹto nnyịn ndinyene ukpono ukpono mbak nnọ Jehovah?

◻ Nso ini iso ina ibet mbon ẹmi ẹbakde ata Abasi idahaemi?