Obufa Uwem Eyedu Ọnọ Mme Eteete Nnyịn

NDI Ikọ Abasi, kpa Bible, ekpep nte ke kpukpru owo ẹbe nnennen ẹdụk uwem ke obio mme spirit ke n̄kpa? Baba, enye ikpepke. Bible ọnọ utịbe utịbe idotenyịn aban̄ade uwem ke n̄kpa ebede, edi idịghe ke usụn̄ emi ediwak owo ẹkerede ke enye ọnọ.

Kere ban̄a se Bible etịn̄de aban̄a akpa ete nnyịn, Adam. Jehovah akada “ntan isọn̄” obot enye. (Genesis 2:7) Adam ama enyene ifet ndidu uwem nsinsi ke inemesịt ke isọn̄. (Genesis 2:16, 17) Nte ededi, enye ama ọsọn̄ ibuot ye ima ima Andibot enye, ndien utịp ekedi n̄kpa.

M̀mọ̀n̄ ke Adam akaka ke n̄kpa? Abasi ọkọdọhọ enye ete: “[Afo eyefiak] ke isọn̄ emi ẹsiode fi ke esịt: koro afo edide ntan, eyenyụn̄ afiak ke ntan.”—Genesis 3:19.

Adam okodu m̀mọ̀n̄ mbemiso Jehovah akadade ntan obot enye? Ikodụhe ke ebiet ndomokiet. Enye ikodụhe. Ntre ke ini Jehovah ọkọdọhọde ke Adam ‘eyefiak ke ntan,’ ikọ esie n̄kukụre ọkpọwọrọ ke Adam eyefiak anana uwem, kpa nte ntan. Adam ‘ikebehe ika’ ndikedi anditọn̄ọ ererimbot spirit mme eteete. Enye ikebehe idụk uwem inemesịt ke heaven m̀mê nsinsi ufen ke ebiet ndutụhọ. N̄kukụre ukpụhọ uduot oro enye akanamde ekedi ndito ke uwem mbe ndụk itie unana uwem, ndito idaha edidu ndụk idaha unana edidu.

Nso kaban̄a mme owo eken? Nte mme andito ubon Adam n̄ko ẹsitre ndidu uwem ke n̄kpa? Bible ọbọrọ ete: “Kpukpru [mme owo ye mme unam] ẹka ọtọ kiet: kpukpru ẹto ke ntan: kpukpru ẹyenyụn̄ ẹfiak ke ntan.”—Ecclesiastes 3:19, 20.

Idaha Mme Akpan̄kpa

Ih, mme akpan̄kpa inyeneke uwem, ikemeke ndikop n̄kpọ, ndikụt n̄kpọ, nditịn̄ ikọ, m̀mê ndikere n̄kpọ. Ke uwụtn̄kpọ, Bible ọdọhọ ete: “Mme oduuwem [ẹfiọk] ẹte ke mmimọ inyene ndikpa: edi amaedi mme akpan̄kpa, mmọ ifiọkke baba n̄kpọ kiet . . . Ima mmọ, ye usua mmọ, ye ufụp mmọ ẹmetak ẹma.” Bible ọdọhọ n̄ko ete: “Baba edinam, baba uduak, baba ifiọk, baba mbufiọk [idụhe ke udi] emi afo akade do.”—Ecclesiastes 9:5, 6, 10.

Ke ntre, nte Ikọ Abasi ọdọhọde, ke adan̄aemi mme owo ẹdude uwem, mmọ ẹnyene ifiọk ẹban̄a n̄kpa. Ke ini n̄kpa otịbede, nte ededi, mmọ ifiọkke baba n̄kpọ kiet. Mmọ idaha ikpere okpo mmọ, ẹsede se ẹnamde enye. Ke idaha unana edidu uwem inemesịt m̀mê ubiak, idara m̀mê mfụhọ, idụhe. Mme akpan̄kpa ifiọkke nte ini ebede. Ekemmọ edi idaha unana ifiọk oro akande ọkpọsọn̄ idap ekededi.

Job, asan̄autom Abasi ke eset, ama ọfiọk ete ke mme owo ikaha iso idu uwem ke n̄kpa ebede. Enye n̄ko ama ọfiọk ete ke edieke Abasi mîkpodụkke idi, idotenyịn ndomokiet ikpodụhe ke owo ndifiak ndi uwem. Job ọkọdọhọ ete: “Owo akpa, ndien asuana, owo onịme, ndien odu m̀mọ̀n̄? [Enye] osụhọde ana ke isọn̄, inyụn̄ idahake ke enyọn̄.” (Job 14:10, 12) Job ke akpanikọ ikodorike enyịn nte ke ini imọ ikpade, imọ iyediana ye mme eteete imọ ke ererimbot mme spirit.

Idotenyịn Ediset ke N̄kpa

Sia mme oduuwem ẹtrede ndidu uwem ke n̄kpa, akpan mbụme edi enyeoro Job ekedemerede ke ini enye akakade iso ndibụp ete: “Ke owo akpade, nte enye ediset?” Job ke idemesie ama ọnọ ibọrọ emi: “Nyebet ke ofụri ini utom mi [ini ndude ke udi], tutu edikpụhọde itie mi edi. Afo [Jehovah] okpokot, ndien ami n̄kpeyere fi, utom ubọk fo ọkpọdọn̄ fi.”—Job 14:14, 15.

Ke nditịn̄ ke usụn̄ efen, okposụkedi Job ekpebede odụk idaha unana edidu uwem, Abasi ikpefreke enye. Job ama enyene mbuọtidem nte ke ini eyedi oro Jehovah Abasi ‘edikotde’ imọ ifiak ididu uwem ebe ke ediset ke n̄kpa.

Jesus Christ, Eyen Abasi, ama owụt nte ke idotenyịn Job ke ediset ke n̄kpa ekedi enyeoro edide ata idem n̄kpọ. Jesus ama ọsọn̄ọ owụt nte ke ẹkeme ndinam mme akpan̄kpa ẹset. Didie? Ebede ke enye ndinam oro! Enye ikodụhe do ndinam Job eset, edi ke adan̄aemi okodude ke isọn̄ Jesus ama anam eyeneren ebeakpa ke obio Nain eset. Jesus n̄ko ama anam eyenan̄wan owo oro ẹkekotde Jairus, emi ekedide isua 12 ke emana, eset. Ndien enye ama anam ufan esie, Lazarus, emi ama akakpa ke usen inan̄, eset.—Luke 7:11-15; 8:41, 42, 49-56; John 11:38-44.

Ke adianade ye edinam mme utịben̄kpọ ẹmi, Jesus ama etịn̄ aban̄a akamba ediset ke n̄kpa ini iso. Enye ọkọdọhọ ete: “Ini ke edi eke kpukpru mme andidu ke udi ẹdikopde Enye uyo ẹwọn̄ọ ẹdi.” (John 5:28, 29) Ke ukperedem, apostle Paul, emi Jehovah akadade anam akparawa kiet eset, ama owụt n̄ko ukem edinịm ke akpanikọ oro ke ediset ke n̄kpa ini iso. Enye ọkọdọhọ ete: “Mmonyụn̄ ndori enyịn ke Abasi . . . nte, nti owo ye mme idiọkowo ẹyeset ke n̄kpa.”—Utom 20:7-12; 24:15.

Mme itien̄wed Abasi ẹmi ẹtịn̄de ẹban̄a ediset ke n̄kpa ini iso idaha iban̄a uwem oro ẹkade iso ẹdu ke obio mme spirit. Mmọ ẹnyan ubọk ẹwụt ini emi ediwak miliọn mme akpan̄kpa ẹdifiakde ẹdidu uwem ke ikpọkidem mi ke isọn̄. Mme owo oro ẹdinamde ẹset mi idịghe mbon oro mîditịghi n̄kpọ ndomokiet iban̄a uwem oro mmọ ẹkedude ke isọn̄ mbemiso. Mmọ idifiakke-fiak imana nte nsek nditọ. Utu ke oro, mmọ ẹdidi ukem mbon oro mmọ ẹkedide ke ini mmọ ẹkekpade, ẹnyenede ukem ifiọk ye edu oro mmọ ẹkenyenede. Mmọ ẹyediọn̄ọ idemmọ ye mbon en̄wen. Nso idara ke edidi ntem nte mme owo ẹmi ẹfiakde ẹdiana ye mme ufan ye mme ubon mmọ! Ndien edidi n̄kpọ nduaidem didie ntem ndisobo mme eteete nnyịn!

Ediset Ndụk Uwem ke Heaven

Nte Jesus ikọdọhọke ke ndusụk owo ẹyeka heaven? Ih, enye ama ọdọhọ. Ke mbubịteyo oro mbemiso ẹwotde enye, enye ama ọdọhọ ete: “Ediwak ufọk ẹdu ke ebiet Ete Mi; . . . mmọn̄ n̄ka n̄kotịm itie nnịm nnọ mbufo. Ndien edieke n̄kade n̄kotịm itie ntre nnọ mbufo, nyefiak ndi ndida mbufo nnọ Idemmi; man mbufo ẹnyụn̄ ẹdu ke ebiet eke Ami ndude.” (John 14:2, 3) Jesus ekenyene nneme ye mme anam-akpanikọ apostle esie, edi ikọ esie iwọrọke ite ke kpukpru nti owo ẹka heaven.

Jesus okowụt ke ana mbon oro ẹdisetde ẹka heaven ẹsịm mme n̄kpọ oro ẹyomde ẹkan ikpîkpu edidu eti uwem. N̄kpọ kiet oro ẹyomde edi edinyene nnennen ifiọk aban̄ade Jehovah ye mme uduak esie. (John 17:3) Mme n̄kpọ efen oro ẹyomde ẹdi ndiwụt mbuọtidem ke uwa ufak Jesus Christ nnyụn̄ n̄kop uyo Abasi. (John 3:16; 1 John 5:3) Adianade do n̄kpọ efen oro ẹyomde edi ‘editọn̄ọ ntak mmana’ nte Christian oro ama akana baptism emi Abasi obonde ke edisana spirit. (John 1:12, 13; 3:3-6) N̄kaiso n̄kpọ oro ẹsụk ẹyomde kaban̄a uwem eke heaven edi ndiyọ nte Jesus ọkọyọde, ẹnamde akpanikọ ẹnọ Abasi idem tutu osịm n̄kpa.—Luke 22:29; Ediyarade 2:10.

Ntak odu kaban̄a mme utọ n̄kokon̄ n̄kpọ oro ẹyomde do. Mbon oro ẹnamde ẹset ẹka heaven ẹnyene akpan utom ndinam. Jehovah ama ọfiọk ete ke ukara owo tutu amama ikemeke ndise mban̄a mme mbubehe ke isọn̄ uforo uforo. Ntre enye ama anam ndutịm ọnọ ukara eke heaven, m̀mê Obio Ubọn̄, oro edikarade ofụri ubonowo. (Matthew 6:9, 10) Jesus edidi Edidem Obio Ubọn̄ oro. (Daniel 7:13, 14) Ndusụk owo oro ẹmekde ẹto isọn̄ ẹnyụn̄ ẹnamde ẹset ẹka heaven ẹyekara ye enye. Bible ama ebemiso etịn̄ ete ke mbon oro ẹnamde ẹset mi ẹyekabade ẹdi “Obio Ubọn̄ ye mme oku ẹnọ Abasi: mmọ ẹyenyụn̄ ẹda ubọn̄ ke isọn̄.”—Ediyarade 5:10.

Nte akwa udịmowo ẹyesịm mme n̄kpọ ẹyomde mi kaban̄a ediset ke n̄kpa eke heaven? Baba. Ke mîtoho ke ndudue mmọ, ata ediwak mbon oro ẹdede ke n̄kpa idotke. Ediwak owo ẹkenyene esisịt mîdịghe inyeneke-nyene ifet ndikpep akpanikọ aban̄ade Jehovah ye mme uduak esie. Mmọ ẹkedu uwem ẹnyụn̄ ẹkpan̄a ye unana ifiọk ndomokiet aban̄ade Jesus Christ m̀mê Obio Ubọn̄ Abasi.

Jesus okokot mbon oro ẹdikade heaven “ekpri otuerọn̄.” (Luke 12:32) Ke ukperedem ẹma ẹyarade nte ke ibat mbon oro ‘ẹkefakde ẹsio ke isọn̄’ ndikara ye Christ ke heaven edidi 144,000. (Ediyarade 14:1-3; 20:6) Ke adan̄aemi 144,000 edide ibat oro awakde ekem ndidụn̄ ke “ediwak ufọk” emi Jesus eketịn̄de aban̄a, enye edi ekpri ke ẹmende ẹdomo ye ediwak biliọn owo ẹmi ẹmanade ẹto Adam.—John 14:2.

Mme N̄kpọntịbe Mbemiso Ediset ke N̄kpa eke Isọn̄

Ẹyak nnyịn ifiak idụn̄ọde se nnyịn inemede tutu esịm emi. Nte Bible ọdọhọde, mbon oro ẹkpade inyeneke uwem ke n̄kpa tutu Jehovah Abasi anam mmọ ẹset. Ẹnam ndusụk ẹset ẹdụk uwem ke heaven, ke ebiet emi mmọ ẹdikarade ye Jesus Christ ke ukara Obio Ubọn̄. Ata ediwak owo ẹyeset ke isọn̄, man ẹkabade ẹdi mme andidu ke idak Obio Ubọn̄ oro.

Ebede ubak ubak ke ediset ke n̄kpa eke isọn̄, Jehovah eyesu uduak esie kaban̄a isọn̄. Jehovah okobot enye “man ẹdụn̄ ke esịt.” (Isaiah 45:18) Enye ekenyene ndidi nsinsi ebietidụn̄ ubonowo. Ntem, andiwet psalm ama ọkwọ ete: “Enyọn̄ edi heaven Jehovah: edi enye ada isọn̄ ọnọ nditọ owo.”—Psalm 115:16.

Mbemiso ediset ke n̄kpa ndụk uwem eke isọn̄ ọtọn̄ọde, ikpọ ukpụhọde ẹnyene ndida itie. Ekeme ndidi afo eyenyịme nte ke ikedịghe uduak Abasi isọn̄ ndikabade nyọhọ ye ekọn̄, usabaden̄kpọ, ubiatibet, ye afai. Mfịna ẹmi oto mme owo oro mîwụtke ukpono inọ Abasi ye ndinen ibet esie. Ke ntre, Obio Ubọn̄ Abasi ‘eyesobo mbon oro ẹsobode isọn̄’—akpan usio-ukot ke ndinam uduak esie ada itie ke isọn̄. (Ediyarade 11:18) Obio Ubọn̄ oro eyesobo kpukpru ndiọi owo, ọkpọn̄de ndinen owo ndidu uwem ke isọn̄ ke nsinsi.—Psalm 37:9, 29.

Paradise ke Isọn̄

Mbon oro ẹnamde ẹset ke isọn̄ oro ẹnamde asana ẹdidi mbon ifụre ifụre ido, ẹmi ẹnyenede edikere mban̄a ẹnyụn̄ ẹnamde se inende. (Men Matthew 5:5 domo.) Ke idak ima ima usenyịn eke Obio Ubọn̄ Abasi, mmọ ẹyedu uwem inemesịt ke ifụre. Bible ebemiso owụt mme utịbe utịbe idaha oro ẹdidude adan̄aoro ete: “[Abasi] eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep.”—Ediyarade 21:4.

Ih, ẹyenam isọn̄ akabade edi Paradise. (Luke 23:43) Kere se oro ediwọrọde! Mme ufọkibọk ye mme itie ukpeme mbonusọn̄ ẹdidi n̄kpọ eset. Ke Paradise, mbon oro mme utịp isua usọn̄ ẹnọmọde idahaemi ẹyefiak ẹkop odudu ye nsọn̄idem. (Job 33:25; Isaiah 35:5, 6) Mme ufọkikpo, udi, ye mme itiatudi ididụhe aba. Ebede ke Obio Ubọn̄ esie, Jehovah “eyemen n̄kpa ke nsinsi.” (Isaiah 25:8) Mme utọ edidiọn̄ oro ke akpanikọ ẹkeme ndiwọrọ obufa uwem ọnọ nnyịn ye mme eteete nnyịn.

[Ndise ke page 7]

Mbon oro ẹnamde ẹset ke isọn̄ ẹyedi mme andidu ke idak Obio Ubọn̄