Nte Abasi Edi Ata Owo Ọnọ Fi?

KE INI afo osobode mme mfịna oro ẹkamade mfụhọ, nte afo emesisọsọp ebịne Abasi ke akam? Edieke edide ntre, ndi esitie fi ke idem nte ke etịn̄ ikọ ọnọ ata owo?

Ke etịn̄de aban̄a Ete esie eke heaven, Jesus Christ ọkọdọhọ ete: “Enye emi ọkọdọn̄de Mi edi ata Abasi.” (John 7:28) Ih, Jehovah Abasi edi ata owo, ndien ndibọn̄ akam nnọ enye etie nte ndiwọn̄ọde mbịne n̄kpet n̄kpet ufan n̄koyom un̄wam m̀mê item. Nte ededi, man Abasi eyere nnyịn, ana mme akam nnyịn ẹsịm mme n̄kpọ oro ẹyomde ke N̄wed Abasi kaban̄a akam oro ẹnyịmede. Ke uwụtn̄kpọ, ana nnyịn ke nsụhọdeidem ibịne ‘Enye emi okopde akam’ ebe ke Eyen esie, Jesus Christ.—Psalm 65:2; 138:6; John 14:6.

Ndusụk owo ẹkeme ndikere ke sia enyịn mîkemeke ndikụt Abasi, ke enye inyeneke idem. Ye mmọ, etie nte Abasi odu ke ekikere. Idem ndusụk Christian, ẹmi ẹma ẹkekpep ẹban̄a mme utịbe utịbe edu Abasi, ẹkeme ndikụt nte edide ọkpọsọn̄ n̄kpọ ke ndusụk ini ndifiọk nte enye edide ata owo. Ndi afo emenyene ukem ifiọk n̄kpọntịbe emi? Edieke edide ntre, nso ikeme ndin̄wam ndinam Jehovah Abasi edi ata owo ọnọ fi?

Kpep N̄wed Abasi

Ndi afo emesikpep Edisana N̄wed Abasi kpukpru ini? Adan̄a nte afo etịn̄de enyịn ekpep Bible ofụri ini, ntre ke Jehovah Abasi edidi ata owo ọnọ fi. Ntem ke mbuọtidem fo edisọn̄ idem, nte utịp an̄wamde fi ‘ndikụt Enye emi enyịn owo mîkwe.’ (Mme Hebrew 11:6, 27) Ke n̄kan̄ eken, ukpepn̄kpọ Bible ẹnamde ntomo ntomo ye enye oro owo mînamke kpukpru ini iditụkke mbuọtidem fo ke n̄wọrọnda usụn̄.

Ke ndinọ uwụtn̄kpọ: Da nte ke dọkta fo ọkọdọhọ ete yak ọfiọn̄ọ ibọk ikaba ke usen man owot n̄kpọ emi akade iso ndiwọn̄ọ fi ke ikpọkidem. Nte n̄kpọ oro ọwọn̄ọde fi oyokụre edieke afo ọfiọn̄ọde ibọk oro inikiet m̀mê ikaba ke ọfiọn̄? Itiehe nte oyokụre. Ukem ntre, andiwet psalm ọnọ nnyịn “item ibọk” kaban̄a nsọn̄idem eke spirit. Kot Ikọ Abasi “ke uwemeyo ye ke okoneyo.” (Psalm 1:1, 2) Man inyene n̄kaiso ufọn, oyom nnyịn itiene “item ibọk” emi—edikot Ikọ Abasi ye editie n̄kere ke usen ke usen ye un̄wam mme n̄wed Christian.—Joshua 1:8.

Nte afo akpama ndinam mme ini ukpepn̄kpọ fo ẹdi se itịmde-tịm isọn̄ọ mbuọtidem? Ekikere kiet edi emi: Ke ama okokot ibuot kiet ke New World Translation of the Holy Scriptures m̀mê Bible efen oro ọdọn̄ọde mme ebiet oro ẹtịn̄de n̄kpọ ẹtụk, mek ufan̄ikọ oro amade nyụn̄ se itien̄wed etịn̄de n̄kpọ otụk oro ẹsiakde ẹsịn. Emi ayanam ukpepn̄kpọ fo enyene inem, ndien nte eyịghe mîdụhe oyotụk fi ke idem ndikụt nte Bible odude ke n̄kemuyo. Ndien, emi ayanam Andiwet enye, Jehovah Abasi, enen̄ede edi ata owo ọnọ fi.

Ndida mme ebiet ẹtịn̄de n̄kpọ ẹtụk nnam n̄kpọ ekeme n̄ko ndinam fi etịm emehe ye mme prọfesi Bible ye mme edisu mmọ. Ekeme ndidi afo ememehe ye mme akpan prọfesi Bible, utọ nte mbon oro ẹnyenede ebuana ye mbon Babylon ndisobo Jerusalem. Edi, Bible esịne otu prọfesi oro ẹyịrede kiet ye mme edisu mmọ. Owo itịmke ifiọk ndusụk ke otu ẹmi.

Ke uwụtn̄kpọ, kot prọfesi aban̄ade ufen eke edifiak mbọp Jericho ndien ekem kere ban̄a edisu esie. Joshua 6:26 ọdọhọ ete: “Joshua owụk ke ini oro, ete, Osụk ọdọdiọk ke iso Jehovah ọnọ owo eke edidahade ada ọbọp obio Jericho emi: enye ayada akpan esiemọ ọtọn̄ọ ndibọp, onyụn̄ ada ekperedem eyen esiemọ ọkọn̄ mme itịm esie.” Edisu esie ekedi ke n̄kpọ nte isua 500 ke ukperedem, koro nnyịn ikot ke 1 Ndidem 16:34 ite: “Hiel a-Bethel ọbọp Jericho ke eyo [Edidem Ahab]: ọtọn̄ọ ndibọp ke Abiram akpan esie, onyụn̄ ọkọn̄ itịm esie ke Segub ekpri eyen esie, ekem ke [uyo] Jehovah oro enye ọkọdọhọde ke inua Joshua eyen Nun.”a Ata Abasi kpọt ekeme ndinọ odudu ẹtịn̄ utọ prọfesi oro onyụn̄ okụt ete ke mmọ ẹsu.

Ke adan̄aemi okotde Bible, afo emekeme ndinyene udọn̄ mban̄a akpan n̄kpọ kiet. Ke uwụtn̄kpọ, afo emekeme ndikere m̀mê isua ifan̄ ẹkebe tọn̄ọ nte ẹketịn̄ prọfesi mbemiso edisu esie. Utu ke ndikam mbụp owo, ntak mûsịnke ukeme ndidụn̄ọde ke idemfo? Adade chart ye mme n̄wed un̄wam ukpep Bible, dụn̄ọde yom ibọrọ ifịk ifịk nte okpodomode ndidụn̄ọde n̄wed ndise emi owụtde n̄kpọuto. (Mme N̄ke 2:4, 5) Ndikụt ibọrọ oyotụk mbuọtidem fo ntotụn̄ọ ntotụn̄ọ oyonyụn̄ anam Jehovah Abasi enen̄ede edi ata owo ọnọ fi.

Bọn̄ Akam Ifịk Ifịk Kpukpru Ini

Kûse ufọn akam ye mbuọtidem ke usụhọde. Mme mbet Jesus ẹma ẹnam nnennen eben̄e emi ẹte: “Nam mbuọtidem nnyịn okpon akan.” (Luke 17:5) Edieke etiede nte Jehovah idịghe ata owo inọ fi, ntak mûbọn̄ke akam unọ enye uban̄a mbuọtidem efen efen oro afo oyomde? Ben̄e Ete fo eke heaven un̄wam man anam fi okụt nte enye edide ata owo.

Edieke mfịna efịghede fi ke esịt, da ini oro ekemde nditịn̄ mban̄a idemfo nnọ Ufan fo eke heaven ke esịt akpanikọ. Ke ini n̄kpa Jesus ama akasan̄a ekpere, enye ama ọbọn̄ akam ọkpọsọn̄ ọkpọsọn̄. Okposụkedi enye okobiomde edinam ido ukpono eke edibọn̄ nnyan akam ikpe koro ẹkenamde man ẹkụt, enye ama abiat ofụri okoneyo ndibọn̄ akam ke idemesie mbemiso ekemekde apostle esie 12. (Mark 12:38-40; Luke 6:12-16) Nnyịn imekeme ndikpep n̄kpọ n̄ko nto Hannah, oro akakabarede edi eka prọfet Samuel. Ke enyenede ọkpọsọn̄ udọn̄ ndinyene eyeneren, “enye [ama ọbọn̄] akam ke iso Jehovah ebịghi.”—1 Samuel 1:12.

Nso idi akpan ukpepn̄kpọ odude ke kpukpru ẹmi? Edieke odoride enyịn ndibọ ibọrọ ke mme akam fo, ana afo ọbọn̄ akam ke ofụri esịt, ifịk ifịk, kpukpru ini—ndien, nte ido edide, ke n̄kemuyo ye uduak Abasi. (Luke 22:44; Rome 12:12; 1 Thessalonica 5:17; 1 John 5:13-15) Ndinam emi ayan̄wam ndinam Abasi edi ata owo ọnọ fi.

Se Edibot N̄kpọ

Se ewet ndise ewetde ekeme ndiyarade owo emi enye edide. Ukem ntre, ẹkụt “ndịbe-ndịbe n̄kpọ ẹmi ẹnyenede” Jehovah, kpa Ọdiọn̄-Ndudiọn̄ ye Andibot ekondo, in̄wan̄în̄wan̄ ke mme edibot n̄kpọ. (Rome 1:20) Ke ini nnyịn itịn̄de enyịn ise utom ubọk Jehovah, nnyịn imetịm ifiọk owo emi enye edide, ndien enye ke ntre eyenen̄ede edi ata owo ọnọ nnyịn.

Edieke afo enen̄erede ese mme n̄kpọ oro Abasi okobotde, mme ata ata edu esie ẹkeme ndinen̄ede ntụk fi. Ke uwụtn̄kpọ, ntọt aban̄ade ukeme oro mme inuen ẹnyenede ndife nto itie kiet n̄ka efen ekeme ndinam esịtekọm emi enyenede ọnọ ọniọn̄ Jehovah ọkọri. Ke ndikot mban̄a ekondo, afo emekeme ndikpep nte ke Ntọn̄ntọn̄ Otu Ntantaọfiọn̄, emi un̄wana esie esisan̄ade oyom usụn̄ ke n̄kpọ nte isua un̄wana 100,000, edi kiet kpọt ke otu ediwak biliọn uyọ ntantaọfiọn̄ ẹmi ẹyọhọde ke edem ikpaenyọn̄. Ndi oro itụkke fi ke idem iban̄a ata ọniọn̄ Andibot?

Ke akpanikọ, Jehovah enyene ata ọniọn̄! Edi nso ke oro ọwọrọ ọnọ fi? Nte ededi, mme mfịna oro owo nnyịn ekededi adade ebịne enye ke akam ikemeke-keme nditịmede enye. Ih, idem esisịt ifiọk aban̄ade mme edibot n̄kpọ ekeme ndinam Jehovah enen̄ede edi ata owo ọnọ fi.

San̄a ye Jehovah

Nte afo ke idemfo emekeme ndifiọk nte Jehovah edide ata owo? Ih, edieke afo etiede nte anam-akpanikọ ete-ekpụk oro Noah. Enye ama osụk ibuot ọnọ Jehovah kpukpru ini, tutu ẹkeme ndidọhọ ẹte: “Noah asan̄a ye Abasi.” (Genesis 6:9) Noah okodu uwem nte n̄kpọ eke Jehovah ekenen̄erede odu enye ke n̄kan̄. Abasi ekeme ndidi ata owo ntre nnọ fi.

Edieke afo asan̄ade ye Abasi, afo ọmọbuọt idem ke mme un̄wọn̄ọ N̄wed Abasi onyụn̄ anam n̄kpọ ke n̄kemuyo ye mmọ. Ke uwụtn̄kpọ, afo emenịm mme ikọ Jesus ẹmi: “Ẹbem iso ẹyom Obio Ubọn̄ [Abasi] ye edinen ido Esie; ndien ẹyedian kpukpru n̄kpọ ẹmi [mme akpan n̄kpọ eke obụk] ẹnọ mbufo.” (Matthew 6:25-33) Edi akpanikọ, Jehovah ekeme nditre ndinọ se afo oyomde kpukpru ini ke usụn̄ oro afo odoride enyịn. Edi, ke ini afo ọbọn̄de akam onyụn̄ okụtde un̄wam Abasi, enye eyedi ata owo ọnọ fi nte owo ekededi oro odude fi ke n̄kan̄.

Utọ n̄kpet n̄kpet itie ebuana oro ye Jehovah ọkọri nte owo akade iso asan̄a ye Abasi. Kere ban̄a Manuela, Ntiense oro esemde Spanish, emi ama ọkọyọ ata ediwak idomo. Enye ọdọhọ ete: “Ini ekededi oro nnyenede mfịna m̀mê nyomde n̄kpọ, mmesida edumbet oro odude ke Mme N̄ke 18:10 nsịn ke edinam. Mmesifehe mbịne Jehovah n̄koyom un̄wam. Kpukpru ini enye esidi ‘ọkpọsọn̄ tower’ ọnọ mi.” Manuela ekeme nditịn̄ emi ke ama ekeberi edem ke Jehovah ke isua 36 onyụn̄ okụt un̄wam esie.

Ndi afo ndisụk ntọn̄ọ ndinam Jehovah edi ibetedem fo edi emi? Kûkop mmemidem edieke itie ebuana fo ye enye mîdịghe kan̄a se afo oyomde enye edi. Du uwem ke usen kiet kiet nte owo emi asan̄ade ye Abasi. Nte afo ọkọride usụn̄ uwem edinam akpanikọ, afo eyenyene ata n̄kpet n̄kpet itie ebuana ye Jehovah.—Psalm 25:14; Mme N̄ke 3:26, 32.

Usụn̄ efen ndisan̄a ye Abasi edi ndisịn idem ofụri ofụri ke utom esie. Ke ini afo abuanade ke utom ukwọrọikọ Obio Ubọn̄, afo edi ekemmọ nsan̄autom ye Jehovah. (1 Corinth 3:9) Ndifiọk emi an̄wam ndinam Abasi enen̄ede edi ata owo ọnọ fi.

Andiwet psalm akpak ete: “Kpat usụn̄ fo nọ Jehovah, nyụn̄ buọt idem fo ye enye, ndien enye ayanam.” (Psalm 37:5) Kûdede utre ndikpat mbiomo m̀mê editịmede esịt ekededi oro enyenede nnọ Abasi. Dori enyịn ke enye kpukpru ini kaban̄a un̄wam ye ndausụn̄. Edieke afo ke akam eberide edem ke Jehovah Abasi onyụn̄ ọbuọtde idem ke enye ọyọhọ ọyọhọ, afo eyenyene ukpeme koro afo ọfiọkde ete ke enye idikpụho ndinam n̄kpọ ke ufọn fo. Nte afo emenyene mbuọtidem ke ini akade ebịne Jehovah ye mme ọkpọkpọ mfịna? Afo eyenyene—edieke Abasi edide ata owo ọnọ fi.

[Mme Ikọ idakisọn̄]

[Ndise ke page 21]

Nam mme ini ukpepn̄kpọ fo ẹdi se isọn̄ọde mbuọtidem

[Ndise ke page 22]

Da ini bọn̄ akam ke ofụri esịt kpukpru ini

[Mme ndise ke page 23]

Se nte mme edu Abasi ẹwụtde idem ke n̄kpọ obot

[Ebiet Ẹdade N̄kpọ Ẹto]

Nnụn̄esien: U.S. Fish and Wildlife Service, Washington, D.C./Dean Biggins; mme ntantaọfiọn̄: Foto: Copyright IAC/RGO 1991, Dr. D. Malin et al, Isaac Newton Telescope, Roque de los Muchachos Observatory, La Palma, Canary Islands