Jehovah Isịnke edibụn̄ọ Esịt Ke Ndek
“Mme uwa emem Abasi edi spirit eke obụn̄ọde: O Abasi, afo usịnke edibụn̄ọ ye edinuaha esịt ke ndek.”—PSALM 51:17.
1. Didie ke Jehovah ese mme andituak ibuot nnọ enye oro ẹnamde akwa idiọkn̄kpọ edi oro ẹkabarede esịt?
JEHOVAH ekeme ‘ndida obubịt enyọn̄ ofụk idem, ndien n̄kpeubọk ikemeke ndibe.’ (Eseme 3:44) Edi enye oyom ikọt esie ẹdi ẹbịne imọ. Idem edieke kiet ke otu mme andituak ibuot nnọ enye akpanamde akwa ndudue edi akabarede esịt, Ete nnyịn eke heaven esiti eti n̄kpọ oro owo oro akanamde. Ntem, apostle Paul ama ekeme ndidọhọ ekemmọ mme Christian ete: “Abasi ikwan̄ake nte efrede utom mbufo ye ima enyịn̄ Esie eke mbufo ẹwụtde.”—Mme Hebrew 6:10.
2, 3. Nso ke mbiowo ẹdide Christian ẹkpenyene ke ekikere ke ẹnamde n̄kpọ ye ekemmọ andinịm ke akpanikọ oro ẹduede?
2 Mbiowo Christian ẹkpenyene ndikere n̄ko mban̄a isua oro ekemmọ mme andinịm ke akpanikọ esịnde ke ndinam utom ke edinam akpanikọ nnọ Abasi. Emi esịne edisana utom oro mbon ẹmi ẹkenamde ndudue m̀mê oro ẹkekam ẹnamde akwa idiọkn̄kpọ edi ẹkabarede esịt ẹkenamde. Mme ekpemerọn̄ Christian ẹyom mfọnọn̄kpọ eke spirit eke kpukpru mbon oro ẹdude ke otuerọn̄ Abasi.—Galatia 6:1, 2.
3 Anamidiọk oro akabarede esịt oyom mbọm Jehovah. Edi, ẹyom se ikande oro. Mme ikọ David ke Psalm 51:10-19 ẹnam emi an̄wan̄a.
Ẹyom Edisana Esịt
4. Ntak emi David ọkọbọn̄de akam oyom edisana esịt ye obufa spirit?
4 Edieke Christian oro ama akayak idem ọnọ odude ke idiọk idaha ke n̄kan̄ eke spirit ke ntak idiọkn̄kpọ, nso ke enye ekeme ndiyom ke ẹsiode mbọm ye edifen Jehovah ẹfep? Ọfọn, David ama ekpe ubọk ete: “Bot edisana esịt nọ mi, O Abasi; nyụn̄ nam obufa spirit eke ọsọn̄ọde ada, sịn mi ke idem.” (Psalm 51:10) Nte an̄wan̄ade, David akanam eben̄e emi koro enye ama ọfiọk ete ke ntụhọ unam akwa idiọkn̄kpọ okosụk ododu ke esịt imọ. Ekeme ndidi nnyịn ikesịnke idem ke mme orụk idiọkn̄kpọ oro David akanamde ke ebuana ye Bath-sheba ye Uriah, edi nnyịn imoyom un̄wam Jehovah man ifep ndiyak idem nnọ idomo ndibuana ke eduuwem unam akwa idiọkn̄kpọ ekededi. N̄ko-n̄ko, nnyịn ke idem nnyịn imekeme ndiyom un̄wam Abasi man isio mme utọ ntụhọ nte edisịn esịt ke n̄kpọ owo ye usua—kpa mme ubiatibet ẹmi ẹbietde inọ ye uwotowo ifep ke esịt nnyịn.—Colossae 3:5, 6; 1 John 3:15.
5. (a) Nso ke ọwọrọ ndinyene edisana esịt? (b) Nso ke David okoyom ke ini enye ekeben̄ede obufa spirit?
5 Jehovah oyom mme asan̄autom esie ẹnyene “edisana esịt,” oro edi, eti ekikere m̀mê uduakesịt. Ke ọfiọkde ete ke imọ ikowụtke utọ edisana idaha oro, David ama ọbọn̄ akam ete Abasi anam esịt imọ asana onyụn̄ anam odu ke n̄kemuyo ye mme idaha Abasi. Andiwet psalm n̄ko ama oyom obufa, edinen edu, m̀mê usụn̄ ekikere. Enye okoyom edu oro edin̄wamde enye ndibiọn̄ọ idomo nnyụn̄ nsọn̄ọ nyịre ke ibet ye mme edumbet Jehovah.
Edisana Spirit Edi Akpan N̄kpọ
6. Ntak emi David ekeben̄ede ete Jehovah okûbọ imọ edisana spirit?
6 Ke ini inanade idotenyịn ke ntak ndudue m̀mê idiọk edinam nnyịn, nnyịn imekeme ndikere nte ke Abasi ọmọn̄ otop nnyịn ọduọk onyụn̄ ọbọ nnyịn edisana spirit, m̀mê anamutom odudu esie. David ekekere ntre, koro enye ekekpede Jehovah ubọk ete: “Kûmen mi ke iso fo uduọk; kûnyụn̄ ubọ mi edisana spirit fo.” (Psalm 51:11) Akabade esịt ye osụhọdeidem David ama ekere ete ke mme idiọkn̄kpọ imọ ẹma ẹnam imọ ikûdot ndinam n̄kpọ Jehovah. Ndidi se ẹmende ke iso Abasi ẹduọk ọkpọwọrọ nditaba mfọn, ndọn̄esịt, ye edidiọn̄ esie. Man David afiak okop nsọn̄idem ke n̄kan̄ eke spirit, enye ama oyom edisana spirit Jehovah. Ke enye ndinyene edisana spirit, edidem emi ama ekeme ndiyom ndausụn̄ Abasi ke akam man enem Jehovah esịt, ama ekeme ndifep idiọkn̄kpọ, onyụn̄ ekeme ndikara ye ọniọn̄. Ke ọfiọkde aban̄a mme idiọkn̄kpọ oro enye akanamde adian Andinọ edisana spirit, David nte odotde ama ekpe Jehovah ubọk ete okûbọ imọ edisana spirit emi.
7. Ntak emi nnyịn ikpọbọn̄de akam iyom edisana spirit inyụn̄ ikpeme ibiọn̄ọ ediyat enye esịt?
7 Nso kaban̄a nnyịn? Nnyịn ikpenyene ndibọn̄ akam mben̄e edisana spirit ndien akpana ikpeme ibiọn̄ọ ediyat enye esịt ebe ke ndikpu nditiene ndausụn̄ esie. (Luke 11:13; Ephesus 4:30) Ke mîdịghe ntre, nnyịn imekeme nditaba spirit emi inyụn̄ ikemeke ndision̄o mbun̄wụm esie oro Abasi ọnọde, kpa ima, idatesịt, emem, anyanime, mfọnido, eti ido, mbuọtidem, ifụre ifụre ido, ye mfara ke idem. Jehovah Abasi eyebọ nnyịn edisana spirit esie akpan akpan edieke nnyịn ye unana edikabade esịt ikade iso ndinam idiọkn̄kpọ ndian enye.
Idara Edinyan̄a
8. Edieke nnyịn inamde idiọkn̄kpọ edi iyom ndinyene idara edinyan̄a, nso ke oyom nnyịn inyene?
8 Anamidiọk oro akabarede esịt oro afiakde enyene nsọn̄idem eke spirit ekeme ndifiak ndara ndutịm Jehovah kaban̄a edinyan̄a. Ke enyenede udọn̄ aban̄a emi, David ama ekpe Abasi ubọk ete: “Tọn̄ọ ntak nọ mi idara edinyan̄a fo; nyụn̄ da edinyịme spirit mụm mi kama.” (Psalm 51:12) Ekedi ndyọ ndyọ n̄kpọ didie ntem ndidara ke ata idotenyịn edinyan̄a Jehovah Abasi! (Psalm 3:8) Ke ama akanam idiọkn̄kpọ adian Abasi, David ama oyom Enye anam imọ ifiak inyene idara edinyan̄a. Ke ukperedem, Jehovah ama ọnọ edinyan̄a ebe ke uwa ufak Eyen esie, kpa Jesus Christ. Edieke nnyịn nte mme asan̄autom Abasi oro ẹma ẹkeyak idem ẹnọ inamde akwa idiọkn̄kpọ edi iyomde ẹfiak ẹnam nnyịn inyene idara edinyan̄a, oyom nnyịn inyene edu edikabade esịt man ifep edinam idiọkn̄kpọ ndian edisana spirit.—Matthew 12:31, 32; Mme Hebrew 6:4-6.
9. Nso ke David ekeben̄e ke ini enye ọkọdọhọde Abasi ọnọ imọ “edinyịme spirit”?
9 David ama eben̄e ete Jehovah ada “edinyịme spirit” omụm imọ akama. Nte an̄wan̄ade, emi iban̄ake unyịme Abasi ndinọ un̄wam m̀mê edisana spirit esie, edi aban̄a uyịre uyịre ntụhọ ekikere David. David okoyom Abasi omụm imọ akama ebe ke ndinọ imọ edu edinyịme ndinam se inende inyụn̄ idịghe ndiduọ ndụk idiọkn̄kpọ inikiet efen. Jehovah Abasi akaiso ndimụm mme asan̄autom esie n̄kama onyụn̄ emenede mmọ eke ẹnụhọde ke ntak nsio nsio idomo. (Psalm 145:14) Edi n̄kpọ ndọn̄esịt didie ntem ndifiọk emi, akpan akpan edieke edide nnyịn ima inam ndudue edi imakabade esịt inyụn̄ iyom ndinam n̄kpọ Jehovah ke edinam akpanikọ ke nsinsi!
Ẹteme Mme Edue-Ibet Nso?
10, 11. (a) Nso ke David ekpekekpep nditọ Israel ẹmi ẹkedide mme edue-ibet? (b) David ekpekekpep mme anamidiọk n̄kukụre ke enye ke idemesie ama akanam nso?
10 Edieke Abasi ekpenyịmede, David ye unana ibụk ama oyom ndinam n̄kpọ oro ediwụtde esịtekọm oro enye okowụtde aban̄a mbọm Jehovah ama onyụn̄ oyom ndin̄wam mbon en̄wen. Ke ikọ akam ọkọbọn̄de ọnọ Jehovah, edidem emi akabarede esịt mi ama atan̄a ete: “Nyeteme mme edue-ibet usụn̄ fo; mme idiọkowo ẹyenyụn̄ ẹkabade ẹtiene fi.” (Psalm 51:13) Didie ke David emi edide anamidiọk ekpekekpep mme edue-ibet Ibet Abasi? Nso ke enye ekpetịn̄ ọnọ mmọ? Ndien nso ufọn ke emi akpakanam?
11 Ke ini owụtde nditọ Israel oro ẹkeduede mme usụn̄ Jehovah ke odoride enyịn ndinam mmọ ẹkabade ẹkpọn̄ idiọk usụn̄, David ama owụt nte idiọk edibiat ewụhọ etiede, se edikabade esịt ọwọrọde, ye nte ẹkpekụtde mbọm Abasi. Ke ama okokop ubiak otode editaba mfọn Jehovah ye esịt oro ikpe obiomde, David nte eyịghe mîdụhe ekpekekeme ndidi anditeme mme akabade esịt, anamidiọk oro esịt okobụn̄ọde ye edikere mban̄a. Nte ededi, enye ama ada uwụtn̄kpọ esie ke ndikpep mmọ en̄wen n̄kukụre ke enye ke idemesie ama okonyịme mme edumbet Jehovah onyụn̄ ọbọ edifen nnọ Esie, koro mbon oro ẹsịnde ndinam mme n̄kpọ oro Abasi oyomde inyeneke unen ‘nditan̄a mme ewụhọ Abasi.’—Psalm 50:16, 17.
12. Didie ke David ọkọbọ ufọn oto ifiọk oro nte ke Abasi ama anyan̄a enye osio ke ubiomikpe iyịp?
12 Ke afiakde etịn̄ aban̄a se uduak esie edide ke usụn̄ efen, David ama ọdọhọ ete: “Biomode mi iyịp ke idem fep. O Abasi, Abasi edinyan̄a mi: edeme mi eyetan̄a edinen ido fo.” (Psalm 51:14) Ubiomikpe iyịp asan̄a ye ubiomikpe n̄kpa. (Genesis 9:5, 6) Ntre ifiọk oro nte ke Abasi edinyan̄a esie ama anyan̄a enye osio ke ubiomikpe iyịp ke ebuana ye Uriah ama anam David enyene emem ke esịt ye ke ekikere. Edeme esie adan̄aoro ama ekeme ndikwọ ye idara mban̄a edinen ido Abasi, idịghe eke esie. (Ecclesiastes 7:20; Rome 3:10) David ikekemeke ndisọhi oburobụt ido esie mfep m̀mê ndikafiak nda Uriah nto udi ndi, kpa nte owo mfịn mîkemeke ndinam owo oro enye akasabarede afiak edi edisana m̀mê ndinam owo oro enye okowotde eset. Nte nnyịn ikpekereke iban̄a oro ke ini ẹdomode nnyịn idomo? Ndien nnyịn ikpowụt esịtekọm didie ntem iban̄a mbọm oro Jehovah owụtde nnyịn ke edinen ido! Ke akpanikọ, esịtekọm ekpenyene ndinụk nnyịn ndiwụt mmọ en̄wen usụn̄ Idịm mmọn̄ edinen ido ye edifen nnọ emi.
13. Ke mme ewe idaha kpọt ke anamidiọk ekeme ndikụbọde n̄kpọkinua esie nte odotde ntoro Jehovah?
13 Anamidiọk ndomokiet ikemeke ndikụbọde n̄kpọkinua esie nte odotde man otoro Jehovah ibọhọke Abasi, yak idọhọ, ke mbọm esie okụbọde mmọ man ẹtịn̄ akpanikọ Esie. David ke ntre ama ọkwọ ete: “O Ọbọn̄, tat mi n̄kpọkinua; ndien inua mi eyetịn̄ itoro fo.” (Psalm 51:15) Ye ifụre ke esịt esie ke ntak emi Abasi efende ọnọ, ama obiomo David ndikpep mme edue-ibet mme usụn̄ Jehovah, ndien enye ama ekeme nditoro Enye ifụre ifụre. Kpukpru mbon oro ẹfende mme idiọkn̄kpọ mmọ nte ẹkefende David ẹkpenyene ndiwụt esịtekọm mban̄a mfọnido Jehovah oro owo mîdotke emi enye owụtde mmọ, ndien mmọ ẹkpenyene ndida kpukpru ifet oro ẹbederede nditan̄a akpanikọ Abasi nnyụn̄ ‘ntịn̄ itoro esie.’—Psalm 43:3.
Mme Uwa Oro Abasi Onyịmede
14. (a) Ẹkeyom mme ewe uwa nte ekemde ye Ibet ediomi? (b) Ntak ọkpọdiọkde ndikere nte ke nnyịn imekeme ndikpe utịp n̄kaiso idiọkn̄kpọ ke ndinam ndusụk nti n̄kpọ?
14 David ama enyene ntotụn̄ọ ikike oro akanamde enye ọdọhọ ete: “Koro afo [Jehovah] mûyomke uwa emem; (okpoyom) n̄kpọnọ: unyụn̄ umaha edifọp uwa.” (Psalm 51:16) Ibet ediomi ama oyom ete ẹfọp uwa unam ẹnọ Abasi. Edi idiọkn̄kpọ David ẹkedide efịbe ye uwotowo, ẹmi ufen ekedide n̄kpa, ikedịghe se mme utọ uwa oro ẹkpekesiode isop. Ke mîkpedịghe ntre, ikpakakpaha enye n̄kpọ ndomokiet ndifọp uwa unam nnọ Jehovah. Ye unana n̄kpọfiọk ofụri esịt, mme uwa inyeneke ufọn. Enye ke ntre akpakwan̄a ndikere nte ke nnyịn imekeme ndikpe utịp n̄kaiso idiọk edinam ke ndinam ndusụk nti n̄kpọ.
15. Nso idi edu owo oro ama akayak idem ọnọ emi enyenede spirit eke obụn̄ọde?
15 David ama adian do ete: “Mme uwa emem Abasi ẹdi spirit eke obụn̄ọde: O Abasi, afo usịnke edibụn̄ọ ye edinuaha esịt ke ndek.” (Psalm 51:17) Kaban̄a anamidiọk oro akabade esịt, “uwa emem Abasi ẹdi spirit eke obụn̄ọde.” Utọ owo oro inyeneke edu iyatesịt. Esịt owo oro ama akayak idem ọnọ emi enyenede spirit eke obụn̄ọde okop mfụhọ ntotụn̄ọ ntotụn̄ọ aban̄a idiọkn̄kpọ esie, osụhọdeidem ke ọdiọn̄ọde aban̄a unana unyịme Abasi, onyụn̄ onyịme ndinam n̄kpọ ekededi man afiak enyene mfọn Abasi. Nnyịn ikemeke ndinọ Abasi n̄kpọ ndomokiet oro enyenede ufọn ibọhọke nnyịn ikabade esịt ke idiọkn̄kpọ nnyịn inyụn̄ inọ enye esịt nnyịn ke san̄asan̄a utuakibuot.—Nahum 1:2.
16. Didie ke Abasi ese owo emi esịt obụn̄ọde ke ntak idiọkn̄kpọ esie?
16 Abasi isịnke utọ uwa nte edibụn̄ọ ye edinuaha esịt. Kpa ye mfịna ekededi oro nnyịn isobode nte ikọt esie, ke ntre, ẹyak nnyịn ikûyak idem inọ unana idotenyịn. Edieke edide nnyịn ima ituak ukot iduọn̄ọ ke afan̄ usụn̄uwem ke ndusụk usụn̄ oro anamde nnyịn iseme iyom mbọm Abasi, idotenyịn osụk ododu. Idem ekpedi ikanam akwa idiọkn̄kpọ edi ikabade esịt, Jehovah idisịnke edibụn̄ọ esịt nnyịn. Enye eyefen nnyịn ke isọn̄ uwa ufak Christ eyenyụn̄ anam nnyịn ifiak inyene mfọn Esie. (Isaiah 57:15; Mme Hebrew 4:16; 1 John 2:1) Nte ededi, ukem nte David, akam nnyịn ẹkpenyene ndidi eke edifiak nnyene mfọn Abasi inyụn̄ idịghe edibọhọ nsuannọ m̀mê edinen̄ede oro oyomde. Abasi ama efen ọnọ David, edi ama otụnọ enye n̄ko.—2 Samuel 12:11-14.
Edikere Mban̄a Edisana Utuakibuot
17. Ke ẹsiode ediben̄e Abasi efen ọnọ owo ẹfep, nso ke mme anamidiọk ẹkpenam?
17 Edieke nnyịn ikanamde ndusụk akwa idiọkn̄kpọ, nte eyịghe mîdụhe emi eyetịmede nnyịn ekikere akamba akamba, ndien esịt eke ofụhọde eyenụk nnyịn ndikpe Abasi ubọk nyom edifen nnọ. Edi, ẹyak nnyịn n̄ko ibọn̄ akam iban̄a mbon efen. Okposụkedi David akasakde iso ese edifiak nnọ Abasi utuakibuot oro ẹnyịmede, psalm esie ikofụmike mbon efen ke ntak ibụk. Enye ama esịne n̄kpeubọk emi ọnọ Jehovah: “Fọn ido ye Zion ke ima fo: diọn̄ ibibene Jerusalem.”—Psalm 51:18.
18. Ntak emi David emi akakabarede esịt ọkọbọn̄de akam aban̄a Zion?
18 Ih, David akasak iso ese edifiak nnyene mfọn Abasi. Nte ededi, ekedi n̄ko akam nsụhọdeidem andiwet psalm oro nte yak ‘Abasi ke ima ọfọn ido ye Zion,’ ibuot obio Israel, Jerusalem, emi David okodoride enyịn ndibọp temple Abasi. Ikpọ idiọkn̄kpọ David ẹma ẹdịghe ofụri idụt oro, koro kpukpru owo ẹkpekebọ ufen ke ntak idiọk edinam edidem. (Men 2 Samuel, ibuot 24 domo.) Ke nditịm ntịn̄, idiọkn̄kpọ esie ẹma ẹnam “ibibene Jerusalem” emem, ntre aema oyom ẹfiak ẹbọp.
19. Edieke edide nnyịn ima inam idiọkn̄kpọ edi ẹfen nnyịn, odot ndibọn̄ akam mban̄a nso?
19 Edieke nnyịn ikanamde akwa idiọkn̄kpọ edi inyene edifen nnọ otode Abasi, eyedi n̄kpọ oro odotde ndibọn̄ akam nte yak enye ke usụn̄ ekededi ọdiọn̄ unan oro edu nnyịn ọkọnọde. Ekeme ndidi nnyịn ima ida esuene idori edisana enyịn̄ esie, ekeme ndidi ima isuene esop, ndien ekeme ndidi ima ida mfụhọ isọk ubon nnyịn. Ima ima Ete nnyịn eke heaven ekeme ndisọhi esuene ekededi oro ẹkedoride ke enyịn̄ esie efep, ekeme ndinam esop ọkọri ebe ke edisana spirit esie, onyụn̄ ekeme ndidọn̄ mbonima nnyịn esịt ẹmi ẹmade ẹnyụn̄ ẹnamde n̄kpọ esie. Nte ededi, edide idiọkn̄kpọ abuana m̀mê ibuanake, edinam enyịn̄ Jehovah asana ye mfọnọn̄kpọ ikọt esie ekpenyene ndidi se nnyịn ikerede iban̄a kpukpru ini.— Matthew 6:9.
20. Ke idak mme idaha ewe ke Jehovah okokop inemesịt ke mme uwa ye enọ Israel?
20 Edieke Jehovah akafiakde ọbọp ibibene Zion, nso efen ikpotịbe? David ama ọkwọ ete: “Ke ini oro mme uwa eti ido, ye edifọp uwa eke ẹfọpde ofụri, ẹyenem fi [Jehovah] esịt: ke ini oro ẹyedori enan̄ ke itieuwa fo.” (Psalm 51:19) David ke ofụri esịt okoyom ete imọ ye ofụri idụt oro inyene mfọn Jehovah man ẹkpekeme ndituak ibuot nnọ Enye ke usụn̄ oro ẹnyịmede. Adan̄aoro Abasi ekpekenem esịt ke edifọp uwa ye ofụri enọ mmọ. Emi ekpedi ntre koro mmọemi ẹkpedi mme uwa edinen ido ẹmi mbon oro ẹma ẹkeyak idem ẹnọ, ẹnamde akpanikọ, ẹnyụn̄ ẹkabarede esịt, ẹmi ẹnyenede mfọn Abasi, ẹwade. Ke ntak esịtekọm oro ẹnyenede ke mbọm Jehovah, ke itieuwa esie mmọ ẹkpewa nyara enan̄—kpa mfọnn̄kan ye ọsọn̄urua n̄kan uwa. Mfịn, nnyịn ikpono Jehovah ke ndida mfọnn̄kan n̄kpọ oro nnyịn inyenede nsọk enye. Ndien mme enọ nnyịn ẹsịne “uwa n̄kpọkinua nnyịn,” kpa uwa ekọm oro inọde Abasi nnyịn oro atuade owo mbọm, Jehovah.—Hosea 14:2; Mme Hebrew 13:15.
Jehovah Okop Eseme Nnyịn
21, 22. Psalm 51 esịne mme ukpepn̄kpọ ewe kaban̄a ufọn nnyịn?
21 Akam ofụri esịt David oro ẹwetde ke Psalm 51 owụt nnyịn nte ke nnyịn ikpenyene ndinam n̄kpọ mban̄a idiọkn̄kpọ nnyịn ye ata edu edikabade esịt. Psalm emi n̄ko esịne ata ukpepn̄kpọ ẹnyenede ufọn ẹnọ nnyịn. Ke uwụtn̄kpọ, edieke nnyịn inamde idiọkn̄kpọ edi ikabade esịt, nnyịn imekeme ndinyene mbuọtidem ke mbọm Abasi. Nte ededi, ẹyak nnyịn ikere akpan akpan iban̄a esuene ekededi oro ekemede ndidi nnyịn ima ida isọk enyịn̄ Jehovah. (Ufan̄ikọ 1-4) Ukem nte David, nnyịn imekeme ndikpe Ete nnyịn eke heaven ubọk ite atua nnyịn mbọm ke ntak ndammana idiọkn̄kpọ nnyịn. (Ufan̄ikọ 5) Nnyịn ikpenyene nditịn̄ akpanikọ, ndien oyom nnyịn iyom eti ibuot otode Abasi. (Ufan̄ikọ 6) Edieke edide nnyịn ima inam idiọkn̄kpọ, oyom nnyịn ikpe Jehovah ubọk iyom edinam asana, edisana esịt, ye spirit eke ọsọn̄ọde ada.—Ufan̄ikọ 7-10.
22 Otode Psalm 51 nnyịn imekeme ndikụt n̄ko nte ke nnyịn ikpedehede ikabade isọn̄ esịt ke edinam idiọkn̄kpọ. Edieke nnyịn ikpanamde ntre, Jehovah ọkpọbọ nnyịn edisana spirit, m̀mê anamutom odudu esie. Ye spirit Abasi odude ye nnyịn, nte ededi, nnyịn imekeme ndinọ mbon en̄wen ukpep uforo uforo ke usụn̄ esie. (Ufan̄ikọ 11-13) Edieke nnyịn iduede edi ikabade esịt, Jehovah eyeyak nnyịn ikaiso itoro enye koro enye akanam isịnke edibụn̄ọ ye edinuaha esịt ke ndek. (Ufan̄ikọ 14-17) Psalm emi akaiso owụt ete ke akam nnyịn ikpenyeneke ndiwụhọ ke idem nnyịn ikpọn̄. Utu ke oro, nnyịn ikpenyene ndibọn̄ akam mban̄a edidiọn̄ ye mfọnọn̄kpọ eke spirit kpukpru mbon oro ẹbuanade ke edisana utuakibuot Jehovah.—Ufan̄ikọ 18, 19.
23. Ntak emi Psalm 51 okponụkde nnyịn ndinyene uko ye idotenyịn?
23 Psalm David emi otụkde owo esịt mi ekpenyene ndinụk nnyịn ndinyene uko nnyụn̄ nnyene idotenyịn. Enye an̄wam nnyịn ndifiọk nte ke iyomke nnyịn ikere ite ke idotenyịn idụhe idem ekpedi nnyịn imọduọ idụk idiọkn̄kpọ. Ntak-a? Koro edieke nnyịn ikabarede esịt, mbọm Jehovah ekeme ndinyan̄a nnyịn nsio ke unana idotenyịn. Edieke nnyịn ifụhọde inyụn̄ iyakde idem ofụri ofụri inọ ima ima Ete nnyịn eke heaven, enye okop eseme oro nnyịn isemede iyom mbọm. Onyụn̄ edi n̄kpọ ndọn̄esịt didie ntem ndifiọk nte ke Jehovah isịnke edibụn̄ọ esịt ke ndek!
Didie ke Afo Ọkpọbọrọ?
◻ Ntak emi mme Christian ẹyomde edisana esịt ye edisana spirit Abasi?
◻ Nso ke owo oro akabarede esịt ekeme ndikpep mme edue-ibet Jehovah?
◻ Didie ke Jehovah ese edibụn̄ọ ye edinuaha esịt?
◻ Nso ukpepn̄kpọ ke ẹkụt ke Psalm 51?
[Ndise ke page 15]
Nte afo emesibọn̄ akam oyom edisana spirit onyụn̄ ekpeme ọbiọn̄ọ ediyat enye esịt?
[Ndise ke page 17]
Wụt esịtekọm ke mfọnido Jehovah oro owo mîdotke ke nditan̄a akpanikọ esie