Ẹten̄e Jehovah, kpa Andikop Akam
“Afo emi okopde akam, kpukpru obụkidem ẹyetiene fi.”—PSALM 65:2.
1. Ntak emi nnyịn ikpodoride enyịn Jehovah ndinịm mme n̄kpọ oro anade mbon oro ẹyomde ndisan̄a n̄kpere enye ke akam ẹsịm-e?
JEHOVAH ABASI edi ‘nsinsi Edidem.’ Enye n̄ko edi ‘Andikop akam,’ emi ‘kpukpru obụkidem ẹtienede.’ (Ediyarade 15:3; Psalm 65:2) Edi didie ke mmọ ẹkpetiene enye? Ndidem isọn̄ ẹsinịm ewụhọ ke mme utọ n̄kpọ nte ọfọn̄ ye eduuwem ẹmi mmọ ẹyomde ẹto mbon oro ẹdinyịmede ẹdụk edi iso mmọ. Ke akpanikọ, ndien, nnyịn ikpodori enyịn Nsinsi Edidem ndinịm mme n̄kpọ oro anade owo ekededi oro oyomde ndidi ke iso esie ye n̄kpeubọk ye ekọm anam.—Philippi 4:6, 7.
2. Mme mbụme ewe idemede ke n̄kpọ aban̄ade akam?
2 Nso ke Nsinsi Edidem oyom oto mbon oro ẹsan̄ade ẹkpere enye ke akam? Mmanie ẹkeme ndibọn̄ akam ndien ẹkop? Ndien nso ke mmọ ẹkeme ndibọn̄ akam mban̄a?
Ndisan̄a N̄kpere Nsinsi Edidem
3. Mme uwụtn̄kpọ ewe kaban̄a akam ẹmi ikọt Abasi eke eset ẹkebọn̄de ke afo ekeme ndinọ, ndien nte mmọ ẹkesan̄a ẹkpere enye ebe ke esịne-ufọt?
3 Mbemiso enye akakabarede edi anamidiọk, Adam, “eyen Abasi,” nte an̄wan̄ade ama esineme nneme ye nsinsi Edidem. (Luke 3:38; Genesis 1:26-28) Ke ini Abel, eyeneren Adam akawade “akpa nditọ n̄kpri ufene esiemọ” ọnọ Abasi, uwa emi nte eyịghe mîdụhe akasan̄a ye mme ikọ n̄kpeubọk ye itoro. (Genesis 4:2-4) Noah, Abraham, Isaac, ye Jacob ẹma ẹnam itieuwa ẹnyụn̄ ẹsan̄a ẹkpere Jehovah ke akam ye mme uwa mmọ. (Genesis 8:18-22; 12:7, 8; 13:3, 4, 18; 22:9-14; 26:23-25; 33:18-20; 35:1, 3. 7) Ndien akam Solomon, Ezra, ye mme andiwet Psalm ke ndausụn̄ odudu Abasi ẹwụt ke nditọ Israel ẹma ẹsisan̄a ẹkpere Abasi ye unana esịne-ufọt ekededi.—1 Ndidem 8:22-24; Ezra 9:5! 6; Psalm 6:1, 2; 43:1; 55:1; 61:1; 72:1; 80:1; 143:1.
4. (a) Ewe obufa usụn̄ edisan̄a n̄kpere Abasi ke akam ke ẹketọn̄ọ ke akpa isua ikie? (b) Ntak otịmde odot nte ẹbọn̄ akam ke enyịn̄ Jesus?
4 Ẹma ẹtọn̄ọ obufa usụn̄ edisan̄a n̄kpere Abasi ke akam ke akpa isua ikie eke Eyo Nnyịn. Emi ekebe ke Eyen esie, Jesus Christ, emi ekenyenede san̄asan̄a ima ọnọ ubonowo. Mbemiso enye edidu uwem nte owo, Jesus ama anam utom idara idara nte ‘akpan anamutom,’ adara aban̄a mme n̄kpọ ẹbuanade ubonowo. (Mme N̄ke 8:30, 31) Nte owo ke isọn̄, Jesus ke ima ama an̄wam mme anana mfọnmma owo ke n̄kan̄ eke spirit, ọkọk udọn̄ọ mmọ onyụn̄ anam idem mme akpan̄kpa eset. (Matthew 9:35-38; Luke 8:1-3, 49-56) Akande kpukpru, Jesus ‘ama ọnọ uwem Esie ndifak ediwak owo.’ (Matthew 20:28) Odot didie ntem, ndien, nte mbon oro ẹbọde ufọn ẹto ufak emi ẹkpesan̄a ẹkpere Abasi ebe ke owo emi amade ubonowo ntem! Emi edi n̄kukụre usụn̄ ndisan̄a n̄kpere Nsinsi Edidem idahaemi, koro Jesus ke idemesie ọkọdọhọ ete: “Owo baba kiet itieneke Ete, ibọhọke ebe ke Ami” n̄ko, “N̄kpọ ekededi eke ẹdiben̄ede Ete, Enye eyenọ mbufo ke enyịn̄ Mi.” (John 14:6; 16:23) Ndiben̄e mme n̄kpọ ke enyịn̄ Jesus ọwọrọ ndidiọn̄ọ enye nte usụn̄ ndisan̄a n̄kpere Andikop akam.
5. Nso idi edu Abasi kaban̄a ererimbot ubonowo, ndien nso ebuana ke emi enyene ye akam?
5 Nnyịn akpan akpan ikpenyene ndiwụt esịtekọm ke ima oro Jehovah owụtde ke ndinọ ufak. Jesus ọkọdọhọ ete: “Abasi akamama ererimbot [ubonowo] ntem, tutu Enye osio ikpọn̄îkpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.” (John 3:16) Ẹtịm ẹwụt ntotụn̄ọ ima oro Abasi enyenede ke ikọ andiwet Psalm ẹmi: “Adan̄a nte enyọn̄ okon̄de akan isọn̄, kpa ntre ke ima esie okpon ye mmọ eke ẹbakde enye. Adan̄a nte edem usiahautịn oyomde ye edem usop, kpa ntre ke enye ọbọ nnyịn mme idiọkido nnyịn onịm anyan ebiet. Kpa nte ete atuade nditọ esie mbọm, kpa ntre ke Jehovah atua mmọ eke ẹbakde enye mbọm. Koro enye ọfiọkde nte iborode; emeti ete ke nnyịn idi ntan.” (Psalm 103:11-14) Edi n̄kpọ idatesịt didie ntem ndifiọk nte ke akam Mme Ntiense Jehovah oro ẹyakde idem ẹnọ ẹsidọk ẹbịne utọ ima ima Ete oro ebe ke Eyen esie!
Ifet oro Enyenede-nyene Adan̄a
6. Ye nso edu ke ana ẹsan̄a ẹkpere Jehovah ke akam?
6 Ndidem ẹdide owo isikam iyakke owo ekededi ebe odụk okụre ubọn̄ ye unana edibemiso mfiọk. Owo ndisobo edidem edi ifet oro enyenede-nyene adan̄a. Ntre ke edi ye akam oro ẹbọn̄de ẹnọ nsinsi Edidem. Ke akpanikọ, mbon oro ẹsan̄ade ẹkpere enye ebe ke Jesus Christ ye nnennen ifiọk aban̄ade uyama ubọn̄ Abasi ẹkeme ndidori enyịn enye ndikop. Ana ẹsan̄a ẹkpere Nsinsi Edidem ye ukpono ukpono, edu utuakibuot. N̄ko ana mbon oro ẹyomde ẹkop akam mmimọ ẹnyene “uten̄e Jehovah.”—Mme N̄ke 1:7.
7. Nso idi “uten̄e Jehovah”?
7 Nso idi “uten̄e Jehovah”? Enye edi ntotụn̄ọ ukpono oro ẹnyenede ẹnọ Abasi, emi asan̄ade ye eti mbak ediyat enye esịt. Ndịk emi oto ntotụn̄ọ esịtekọm ẹnyenede ẹban̄a ima mfọnido ye eti ido esie. (Psalm 106:1) Emi esịne edidiọn̄ọ enye nte nsinsi Edidem, emi enyenede unen ye odudu ndinọ owo ekededi oro ọsọn̄de ibuot ye enye ufen. Mbon oro ẹten̄ede Jehovah ẹkeme ndibọn̄ akam nnọ enye ye idotenyịn nte ke enye eyekop.
8. Ntak emi Abasi okopde akam mbon oro ẹten̄ede enye-e?
8 Nte ido edide, Abasi isibọrọke akam mme idiọkowo, mbon oro mînamke akpanikọ, ye mbon oro ẹkụtde idem ke edinen. (Mme N̄ke 15:29; Isaiah 1:15; Luke 18:9-14) Edi ẹsikop akam mbon oro ẹten̄ede Jehovah sia mmọ ẹdude uwem ekekem ye ndinen edumbet esie. Edi, mmọ ẹmenam se ikande oro. Mbon oro ẹten̄e Jehovah ẹma ẹnam uyakidem ẹnọ Abasi ke akam ẹnyụn̄ ẹyarade emi ke mmọn̄ baptism. Mmọ ke ntre ẹnyene ifet ubọn̄ akam oro mînyeneke-nyene adan̄a.
9, 10. Nte mbon oro mînaha baptism ẹkeme ndibọn̄ akam ye idotenyịn nte ke ẹyekop?
9 Man Abasi okop akam, ana owo etịn̄ ikọ ẹmi ẹdude ke n̄kemuyo ye uduak Abasi ke akam. Ih, ana enye enyene esịt akpanikọ, edi ẹyom se ikande oro. Apostle Paul ekewet ete, “Ke mbuọtidem mîdụhe owo ikemeke ndinem Abasi esịt; koro owo eke asan̄ade ekpere Abasi enyene ndinịm ete Enye ododu, onyụn̄ edi Andinọ mmọemi ẹyomde Enye utịp.” (Mme Hebrew 11:6) Ọfọn, ndien, nte ẹkeme ndisịn udọn̄ nnọ mbon oro mînaha baptism ndibọn̄ akam ye idotenyịn ndidi se ẹkopde?
10 Ke ọdiọn̄ọde ete ke akam edi ifet oro enyenede-nyene adan̄a, Edidem Solomon ama eben̄e Jehovah ete okop akam isenowo oro ẹbọn̄de ke temple Abasi ke Jerusalem. (1 Ndidem 8:41-43) Ediwak isua ikie ke ukperedem, Cornelius, esenowo emi ekedide owo Gentile ‘ama esibọn̄ akam ọnọ Abasi kpukpru ini’ nte eren emi eten̄ede Abasi. Ke enyenede nnennen ifiọk, Cornelius ama ayak idemesie ọnọ Abasi, emi ke ini oro ọkọnọde enye edisana spirit. Ke etienede emi, ẹma ẹnịm Cornelius ye mme Gentile eken baptism. (Utom 10:1-44) Mfịn, ukem nte Cornelius, ẹkeme ndisịn udọn̄ nnọ owo ekededi oro anamde n̄kọri ebịne uyakidem ndibọn̄ akam. Edi owo ikemeke ndidọhọ ke owo oro mînyeneke esịt-akpanikọ ke ndikpep N̄wed Abasi, mîdiọn̄ọke n̄kpọ ẹmi Abasi oyomde kaban̄a akam, mînyụn̄ inyeneke kan̄a edu oro enemde Abasi esịt emeten̄e Jehovah, enyene mbuọtidem, m̀mê oyom enye ke esịt-akpanikọ. Utọ owo oro idụhe ke idaha ndibọn̄ akam oro Abasi onyịmede.
11. Nso itịbe inọ ndusụk owo oro ẹkenamde n̄kọri ẹbịne uyakidem, ndien nso ke mmọ ẹkpebụp idemmọ?
11 Ndusụk mbon oro ke ini kiet ẹkenamde n̄kọri ẹbịne uyakidem nte ini akade ẹkeme nditie nte ẹtek ubọk. Edieke mmọ mînyeneke ima oro ekemde inọ Abasi ke esịt mmọ ndinam uyakidem oro owo mîfamke n̄kpọ ida inọ enye, mmọ ẹkpenyene ndibụp idemmọ m̀mê mmimọ ke isụk inyene utịbe utịbe ifet edibọn̄ akam. Nte an̄wan̄ade mmọ inyeneke, sia anade mbon oro ẹsan̄ade ẹkpere Abasi ẹyom enye ke esịt-akpanikọ, n̄ko ẹnyụn̄ ẹyom edinen ido ye sụn̄sụn̄ ido. (Zephaniah 2:3) Owo kiet kiet emi enen̄erede eten̄e Jehovah edi andinịm ke akpanikọ emi ayakde idem ọnọ Abasi onyụn̄ ayararede emi owụt ke ndina baptism. (Utom 8:13; 18:8) Ndien edi mme andinịm ke akpanikọ oro ẹnade baptism ikpọn̄îkpọn̄ ẹnyene ifet oro mînyeneke-nyene adan̄a ndisan̄a n̄kpere Nsinsi Edidem ke akam.
‘Ndibọn̄ Akam Ke Edisana Spirit’
12. Ini ewe ke ẹkeme ndidọhọ ke owo ‘ọbọn̄ akam ke edisana spirit’?
12 Ke owo ama akayak idem ọnọ Abasi onyụn̄ ayarade emi owụt ke ndina baptism, enye odu ke idaha ‘ndibọn̄ akam ke edisana spirit.’ Kaban̄a emi, Jude ekewet ete: “Edi ndima, mbufo ẹbọp idem ke enyọn̄ edisana mbuọtidem mbufo ẹkọri, ẹbọn̄ akam ke edisana spirit; ntem ke ẹdimụm idem mbufo ẹnịm ke ima Abasi, ẹnyụn̄ ẹtie ẹbet mbọm Ọbọn̄ nnyịn Jesus Christ emi edisụn̄ọde ke nsinsi uwem.” (Jude 20, 21) Owo ọbọn̄ akam ke edisana spirit ke ini ọbọn̄de akam ke idak odudu spirit Abasi, m̀mê anamutom odudu, ye ke n̄kemuyo ye mme n̄kpọ oro ẹtịn̄de ke Ikọ Esie. N̄wed Abasi, emi ẹkewetde ke idak ndausụn̄ spirit Jehovah, owụt nnyịn usụn̄ nte ẹkpebọn̄de akam ye se ẹkpeben̄ede ke akam. Ke uwụtn̄kpọ, nnyịn imekeme ndibọn̄ akam ye mbuọtidem ite Abasi ọnọ nnyịn edisana spirit esie. (Luke 11:13) Ke ini nnyịn ibọn̄de akam ke edisana spirit, akam nnyịn ayarade idaha oro odude ke esịt emi Jehovah amade.
13. Edieke nnyịn ibọn̄de akam ke edisana spirit, nso ke nnyịn idifep, ndien ewe item Jesus ke nnyịn idida isịn ke edinam?
13 Ke ini nnyịn ibọn̄de akam ke edisana spirit, akam nnyịn iyọhọke ye ikọ n̄wụtidem. Mmọ isịneke ikọ ẹmi ẹwetde-wet ẹmi ẹtịn̄de ẹfiak ẹtịn̄ ke ibuot. Baba, mmọ iyọhọke ye mme anana ufọn ikọ itoro, kpa mme ikọ itoro ẹmi mîtoho esịt. Mme orụk akam ntre ẹyọhọ ke Christendom ye ikpehe Akwa Babylon eken, kpa ukara ererimbot eke nsunsu ido ukpono. Edi mme ata Christian ẹnam item Jesus ẹmi: “Ke ini mbufo ẹbọn̄de akam ẹkûbiet mbon mbubịk; koro mmọ ẹma ndida ke mme synagogue ye mme enụk efak mbọn̄ akam, man mme owo ẹkụt . . . Ndien ke ini ẹbọn̄de akam ẹkûyịre nditịn̄ mfiak ntịn̄ ukem ikọ nte mme okpono ibọk; koro mmọ [ke ndudue] ẹkere ke edikop akam mmimọ oto ke uwak ikọ eke itịn̄de. Mmọdo ẹkûbiet mmọ.”—Matthew 6:5-8, Byington.
14. Nso ikọ ẹmi ẹsịnede ifiọk ke ndusụk owo ẹtịn̄ ẹban̄a akam?
14 Adianade ye Jesus ye mme andiwet Bible, mbon en̄wen ẹma ẹtịn̄ mme ikọ oro ẹsịnede ifiọk ẹban̄a akam. Ke uwụtn̄kpọ, ewetn̄wed owo England oro, John Bunyan (1628-1688), ọkọdọhọ ete: “Akam edi edin̄wan̄a oro owo an̄wan̄ade ukpọn̄ esie ọnọ Abasi ke esịt-akpanikọ, ke usụn̄ oro esịnede ifiọk, ke ima ima usụn̄, ebe ke Christ, ke odudu ye un̄wam Spirit, nnyom mme utọ n̄kpọ oro Abasi ọkọn̄wọn̄ọde.” Ọkwọrọikọ owo n̄ka Puritan oro, Thomas Brooks (1609-1680) ọkọdọhọ ete: “Abasi isehe nte akam fo etiede udọn udọn, nte mmọ ẹnemde; m̀mê nte akam fo ẹtiede enyọn̄ enyọn̄, nte mmọ ẹniọn̄de; m̀mê nte ọkọkde ibuot ke mme akam fo, nte mmọ ẹwakde; isehe nte ebuende akam fo, nte otịmde mmọ; edi enye ese nte mmọ ẹtode esịt.” Ẹkeme ndidian ikọ oro Bunyan etịn̄de ke ikọ emi: “Ke akam ọfọn ndinyene esịt emi ikọ mîdụhe, akan ikọ ẹmi esịt mîdụhe.” Edi edieke nnyịn inyenede esịt-akpanikọ inyụn̄ isịmde mme n̄kpọ oro Abasi oyomde, didie ke nnyịn ikeme ndinịm ke akpanikọ ite ke nsinsi Edidem eyekop akam nnyịn?
Akananam Iwọn̄ọkede Utọn̄ Ifep
15. Ke ata idem n̄kpọ, nso ke Jesus eketịn̄ ke Luke 11:5-8?
15 Akananam Jehovah Abasi isịnke ndikop akam mme asan̄autom esie oro ẹma ẹkeyak idem ẹnọ. Ẹma ẹnam emi an̄wan̄a ke akama-idatesịt ikọ Jesus ke ini mme mbet esie ẹkeyomde ndausụn̄ nte ẹbọn̄de akam. Ke ubak ubak enye ọkọdọhọ ete: “Anie ke otu mbufo edinyene ufan, edinyụn̄ adaha etiene enye ke ufọt okoneyo, onyụn̄ ọdọhọ enye ete, Ufan, buọt mi uyo ita: koro ufan mi kiet, emi asan̄ade isan̄, ama edi ke ufọk mi, ndien nnyeneke se nnịmde enye ke iso; ndien enyeemi odude ke esịtufọk edibọrọ ete, kûnọ mi afanikọn̄: mmesesịn usụn̄; ami ye nditọ mi imodụk; n̄kemeke ndidaha nnọ fi. Ndọhọ mbufo nte, okposụkedi nte enye mîdidahake inọ enye ke ntak ufan, edi koro owo eyịrede, enye eyedaha ke enyọn̄ ọnọ enye adan̄a nte enye oyomde.” (Luke 11:1, 5-8) Nso ikedi akpan n̄kpọ ke uwụtn̄kpọ emi?
16. Kaban̄a akam, nso ke Jesus oyom nnyịn inam?
16 Ikọ Jesus ke akpanikọ ikọwọrọke ite ke Jehovah isinyịmeke ndin̄wam nnyịn. Utu ke oro, Christ oyom nnyịn iberi edem ke Abasi ofụri ofụri inyụn̄ itịm ima enye ke ndibọn̄ akam ye unana edidop. Ntre, Jesus ama akaiso ete: “Ndọhọ mbufo nte, [ẹkaiso] ẹben̄e, ndien ẹyenọ mbufo; [ẹkaiso] ẹyom, ndien mbufo ẹyekụt; [ẹkaiso] ẹtuak, ndien ẹyesio usụn̄ ẹnọ mbufo. Koro kpukpru owo eke ẹben̄ede ẹbọde; owo eke oyomde okụtde; ẹdinyụn̄ ẹsiode usụn̄ ẹnọ owo eke atuakde.” (Luke 11:9, 10) Ke akpanikọ, ndien, nnyịn ikpenyene ndikaiso mbọn̄ akam ke ini isobode ukọbọ, mfụhọ otode ndusụk ọkpọ ọkpọ mmemme, m̀mê idomo efen ekededi. Jehovah esidu ke mben̄eidem kpukpru ini ndin̄wam mme anam-akpanikọ asan̄autom esie. Enye akananam idọhọke nnyịn ite: “[Ẹ]kûnọ mi afanikọn̄.”
17, 18. (a) Didie ke Jesus ekesịn udọn̄ ọnọ nnyịn ndiben̄e edisana spirit, ndien nso inam ikọ esie ẹnyene odudu? (b) Didie ke Jesus ekemen mme edinam ete eke isọn̄ odomo ye eke Abasi?
17 Edieke nnyịn iyomde ndinyene n̄kpet n̄kpet ebuana ye Abasi, nnyịn iyom edisana spirit, m̀mê anamutom odudu esie. Ntre, Jesus ama akaiso ete: “Ewe ete odu ke otu mbufo eke edinọde eyen itiat, ke ini eyen eben̄ede enye uyo; m̀mê edinọde eyen urụkikọt ke ibuot iyak ke ini eyen eben̄ede enye iyak; m̀mê edinọde eyen ikpeyen, ke ini eyen eben̄ede enye nsenunen? Mmọdo edieke mbufo ẹmi ẹdiọkde ẹfiọkde ndinọ nditọ mbufo nti enọ, adan̄a didie akan oro ke Ete mbufo ke heaven ediyak edisana spirit ọnọ mmọ eke eben̄ede Enye?” (Luke 11:11-13) Matthew 7:9-11 etịn̄ n̄ko aban̄a edinọ itiat ke ibuot uyo. Odudu emi ikọ Jesus ẹnyenede eyekọri edieke idiọn̄ọde ite ke uyo eke mme idụt Bible eset ẹkesibiet ẹnyụn̄ ẹkpon nte mbat mbat, ekara itiat. Ndusụk orụk urụkikọt ẹbiet ndusụk orụk iyak, ndien odu ekpri afia ikpeyen oro ebietde nsenunen. Edi edieke eyen eben̄ede uyo, iyak, m̀mê nsenunen, nso utọ ete ọkpọnọ eyen esie itiat, urụkikọt, m̀mê ikpeyen?
18 Ekem Jesus emen mme edinam ete eke isọn̄ odomo ye mme edinam Abasi ye mbonubon ẹmi ẹtuakde ibuot ẹnọ Enye. Edieke nnyịn, okposụkedi idiọkde ke ntak idiọkn̄kpọ oro ikadade-da imana, isinọde nditọ nnyịn nti enọ, adan̄a didie akan oro ke nnyịn ikpodori enyịn Ete nnyịn eke heaven ndiyak ata eti enọ esie kpa edisana spirit nnọ mme ama-akpanikọ ikọt esie ẹmi ẹben̄ede ẹyom emi ke nsụhọdeidem!
19. (a) Nso ke ikọ Jesus ẹmi ẹwetde ke Luke 11: 11-13 ye Matthew 7:9-11 ẹwụt? (b) Edieke edisana spirit adade nnyịn usụn̄, didie ke nnyịn ikpese mme idomo oro ẹsịmde nnyịn?
19 Mme ikọ Jesus ẹwụt ke nnyịn ikpenyene ndiben̄e Abasi edisana spirit esie. Edieke enye adade nnyịn usụn̄, nnyịn ‘idisemeke iban̄a idaha nnyịn ke uwem’ idinyụn̄ isehe mme idomo ye edikpu nte otịmde ẹdi n̄kpọ unan ọnọ nnyịn. (Jude 16) Edi akpanikọ, “owo eke n̄wan amande omụhọ usen, onyụn̄ oyụhọ ukụt,” ndien ediwak owo idụhe uwem ikụt utịt mfịna m̀mê ubiakesịt mmọ. (Job 14:1) Edi ẹyak nnyịn ikûdedei ise idomo ẹmi ẹsịmde nnyịn nte mme itiat, urụkikọt, ye ikpeyen ẹmi Andikop akam ọnọde nnyịn ke usụn̄ ekededi. Enye edi ata uwụtn̄kpọ ima isinyụn̄ idaha idiọk domo owo ekededi. Utu ke oro, enye ọmọnọ nnyịn ‘kpukpru nti edinọ ye enọ eke ẹfọnde ẹma.’ Ke akpatre, enye eyenam kpukpru n̄kpọ ẹfọn ẹma ọnọ kpukpru mbon oro ẹmade ẹnyụn̄ ẹten̄ede enye. (James 1:12-17; 1 John 4:8) Mbon oro ẹdude ke akpanikọ ke ediwak isua ẹdiọn̄ọ ẹto ifiọk n̄kpọntịbe ẹte ke ndusụk n̄kpọsọn̄ idomo oro mmimọ ikosobode, ẹma ẹkabade ẹdi ke ufọn mmimọ ẹnyụn̄ ẹnam mbun̄wụm spirit Abasi ke uwem ẹkọri, ebe ke akam ye mbuọtidem. (3 John 4) Ke editịm ntịn̄, ke ewe mfọn n̄kan usụn̄ ke nnyịn ikpekpep ndiberi edem ye Ete nnyịn eke heaven inyụn̄ ibọ un̄wam ndikọri mbun̄wụm spirit ẹdide ima, idatesịt, emem, anyanime, mfọnido, eti ido, edinam akpanikọ, ifụre ifụre ido, ye mfara ke idem?—Galatia 5:22, 23.
20. Nso odudu ke ikọ Jesus ẹmi ẹwetde ke Luke 11:5-13 ẹnyene ke idem nnyịn?
20 Ikọ Jesus ẹmi ẹwetde ke Luke 11:5-13 ke ntre ọmọnọ nnyịn idara idara un̄wọn̄ọ aban̄a ima ye ukpeme Jehovah. Emi ekpenyene ndinam esịt nnyịn ọyọhọ ye ntotụn̄ọ esịtekọm ye ima. Enye ekpenyene ndisọn̄ọ mbuọtidem nnyịn nnyụn̄ n̄kọri udọn̄ nnyịn ndika udoriukot Nsinsi Edidem kpukpru ini nnyụn̄ mbịghi ke ima ima iso esie. Akande oro, ikọ Jesus ọsọn̄ọ ọnọ nnyịn ete ke enye idikpọn̄ke nnyịn ukpọk ukpọk. Ete nnyịn eke heaven esitịm okop inemesịt ndikụt nte nnyịn itopde mbiomo nnyịn idori enye ke idem. (Psalm 55:22; 121:1-3) Ndien ke ini nnyịn, nte mme anam-akpanikọ asan̄autom esie ẹmi ẹma ẹkeyak idem ẹnọ, iben̄ede enye edisana spirit, enye ọnọ nnyịn inyụn̄ imen̄eke. Emi edi ima ima Abasi nnyịn, ndien nnyịn imekeme ndinyene ọyọhọ mbuọtidem nte ke enye edi Andikop akam.
Nte Afo Emeti?
◻ Nnyịn ikpasan̄a ikpere Abasi ke akam ebe ke anie, ndien ntak-a?
◻ Ke nso usụn̄ ke akam edi ifet oro enyenede-nyene adan̄a?
◻ ‘Ndibọn̄ akam ke edisana spirit’ ọwọrọ nso?
◻ Didie ke afo ekeme ndiwụt ke N̄wed Abasi nte ke ẹsikop akam mme anam-akpanikọ Ntiense Jehovah oro ẹma ẹkenade baptism?
[Ndise ke page 14]
Nte mme efe ẹdide owo ẹsinọde nditọ mmọ nti enọ, Jehovah esiyak edisana spirit ọnọ mbon oro ẹben̄ede enye