“Ini Emem” Emekpere!
“Ẹmenịm ini ẹnọ kpukpru n̄kpọ: . . . ini ekọn̄, ye ini emem.”—ECCLESIASTES 3:1, 8.
1. Nso ukpụhọde idaha odu ke ọyọhọ isua ikie 20 emi kaban̄a ekọn̄ ye emem?
ATA ediwak owo ẹnen̄ede ẹyom emem, kaban̄a eti ntak. Ọyọhọ isua ikie 20 okụt unana emem akan isua ikie ekededi ke mbụk. Enen̄ede edi ntre koro akananam owo inamke ekese n̄kpọ ntem man ẹnyene emem. Ke 1920 ẹma ẹtọn̄ọ Esop Ediomi Mme Idụt. Ke 1928 “ekpere ndidi kpukpru idụt ererimbot . . . ke ẹnyịmede nditre ndida ekọn̄ nnam n̄kpọ nte ido eke idụt,” ẹma ẹsịn ubọk ke Ediomi Kellogg ye Briand emi n̄wed ndụn̄ọde kiet okotde “akakan ke otu mme ukeme oro ẹnamde ndisịn emem ke Ekọn̄ Ererimbot I ama okokụre.” Ekem, ke 1945 ẹma ẹsio esop Edidiana Mme Idụt ẹdi man ada itie Esop Ediomi Mme Idụt oro mîkodụhe aba.
2. Nso ke ẹdọhọ nte edide utịtmbuba Edidiana Mme Idụt, ndien enye okụt unen adan̄a didie?
2 Ukem nte Esop Ediomi, ẹdọhọ ke utịtmbuba Edidiana Mme Idụt edi man ẹnyene emem ererimbot. Edi enye okụt esisịt unen. Edi akpanikọ, ekọn̄ idụhe ke ererimbot ke udomo ebietde ekọn̄ ererimbot iba oro. Kpa ye oro, ediwak n̄kpri ekọn̄ ke ẹbọ ediwak tọsịn owo ifụre ekikere mmọ, mme inyene mmọ, ndien ediwak ini idem uwem mmọ. Nte nnyịn ikpodori enyịn nte ke Edidiana Mme Idụt ekeme ndinam ọyọhọ isua ikie 21 akabade edi “ini emem”?
Isọn̄ Kaban̄a Ata Emem
3. Ntak emi ata emem mîkemeke ndidu ọtọkiet ye usua?
3 Emem ke ufọt mme owo ye mme idụt oyom se ikande ediyọ. Nte owo ekededi ekeme ndinen̄ede ndu ke emem ye owo emi enye asuade? Ikemeke nte ẹtịn̄de ke 1 John 3:15: “Kpukpru owo eke asuade eyen-ete esie edi obom.” Nte mbụk ndondo emi owụtde, ọkpọsọn̄ usua esikọri mmemmem mmemmem akabade edi mme edinam afai.
4. Mmanie ikpọn̄ ẹkeme ndinyene emem, ndien ntak-a?
4 Sia Jehovah edide “Abasi emi ọnọde emem,” sụk mme owo ẹmi ẹnyenede ima ẹnọ Abasi ẹnyụn̄ ẹnyenede ntotụn̄ọ ukpono ẹnọ ndinen edumbet esie ẹkeme ndinyene emem. Nte an̄wan̄ade, Jehovah inọhọ kpukpru owo emem. “Abasi mi ọdọhọ mme idiọk owo, Emem idụhe.” Emi edi koro mme idiọkowo ẹsịnde ndiyak edisana spirit Abasi, emi emem edide mbun̄wụm esie, ada mmọ usụn̄.—Rome 15:33, NW; Isaiah 57:21; Galatia 5:22.
5. Nso ke mîwụtke eti ibuot mme ata Christian ndinam?
5 Iwụtke eti ibuot mme ata Christian ndin̄wana ekọn̄ ye ekemmọ owo—nte mme inua-okot Christian ẹsiwakde ndinam, akpan akpan ke ọyọhọ isua ikie 20 emi. (James 4:1-4) Edi akpanikọ, mmọ ẹn̄wana ye mme ukpepn̄kpọ oro mîwụtke edu Abasi, edi ẹdiomi ekọn̄ emi man ẹn̄wam mme owo, idịghe man ẹnọ mmọ unan. Ndikọbọ mbon en̄wen ke ntak ukpụhọde ido ukpono m̀mê ndinọ ata ata unan ke mme ntak ufreidụt enen̄ede atuaha ye ata Ido Ukpono Christ. Paul eketeme mme Christian ke Rome ete: “Edieke usụn̄ odude, ẹn̄wana, nte mbufo ẹkekeme, ndidu ke emem ye kpukpru owo.”—Rome 12:17-19; 2 Timothy 2:24, 25.
6. Ke m̀mọ̀n̄ kpọt ke ẹkeme ndikụt ata emem mfịn?
6 Mfịn, ẹkeme ndikụt emem emi Abasi ọnọde ke otu mme ata andituak ibuot nnọ Jehovah Abasi kpọt. (Psalm 119:165; Isaiah 48:18) Ukpụhọde eke ukaraidem ndomokiet ifịnake edidianakiet mmọ, sia mmọ ẹdade san̄asan̄a ẹkpọn̄ ukaraidem ke kpukpru ebiet. (John 15:19; 17:14) Koro mmọ ‘ẹtịmde ẹdiana kiet ke edinyene esịt kiet ye ke ekikere kiet,’ ubahade eke ido ukpono idụhe ndisịn emem mmọ ke itiendịk. (1 Corinth 1:10) Emem emi Mme Ntiense Jehovah ẹnyenede edi utịben̄kpọ eke eyomfịn, enye emi Abasi ọnọde ke n̄kemuyo ye un̄wọn̄ọ esie: “Nyanam mbọn̄ fo ẹdi emem, nyonyụn̄ nnam mme andikara fi ẹdi edinen ido.”—Isaiah 60:17; Mme Hebrew 8:10.
Ntak Edide “Ini Ekọn̄”?
7, 8. (a) Kpa ye idaha emem mmọ, didie ke Mme Ntiense Jehovah ẹse ini emi? (b) Nso idi akpan n̄kpọekọn̄ mme Christian?
7 Kpa ye emem emem idaha mmọ, Mme Ntiense Jehovah ẹsụk ẹda nte ke ini emi enen̄ede edi “ini ekọn̄.” Nte ededi, idịghe ata ata ekọn̄, koro ndida n̄kpọekọn̄ nnyịk mme owo ẹnyịme etop Bible akpatuaha ye ikot oro Abasi ọnọde ete “owo eke amade, yak edi edibọ mmọn̄ uwem ke ikpîkpu.” (Ediyarade 22:17, sịghisịghi ubọkn̄wed edi eke nnyịn.) Owo inyịkke-nyịk owo ndikpụhọde ido ukpono mi! Ekọn̄ emi Mme Ntiense Jehovah ẹn̄wanade edi eke spirit kpọt. Paul ekewet ete: “Koro n̄kpọ-ekọn̄, eke idade in̄wana ekọn̄, idịghe n̄kpọ-ekọn̄ obụkidem, edi se ikopde idem ke enyịn Abasi ndiwụri n̄kpọsọn̄ ebiet.”—2 Corinth 10:4; 1 Timothy 1:18.
8 Akpan “n̄kpọ-ekọn̄” nnyịn edi “ofụt Spirit, emi edide ikọ Abasi.” (Ephesus 6:17) Ofụt emi okop odudu. “Ikọ Abasi enyene uwem, onyụn̄ ananam n̄kpọ, onyụn̄ ọsọp akan kpukpru ofụt iso iba, ekịm abahade ukpọn̄ ye spirit, ye ikek ye ndia; onyụn̄ enyene ukeme ndidụn̄ọde ekikere ye uduak esịt owo.” (Mme Hebrew 4:12) Ebede ke ndikama ofụt emi, mme Christian ẹkeme ndiwụri “ekikere esịt owo, ye kpukpru edikon̄ n̄kpọ eke ẹmenerede idem ke enyọn̄ ẹn̄wana ye ifiọk Abasi.” (2 Corinth 10:5) Enye anam mmọ ẹyarade mme nsunsu ukpepn̄kpọ, mme edinam oro ẹnọde unan, ye mme ukpepn̄kpọ akwaifiọk oro ẹwụtde ọniọn̄ owo utu ke ndiwụt eke Abasi.—1 Corinth 2:6-8; Ephesus 6:11-13.
9. Ntak emi nnyịn mîkemeke ndikpa mba ke ekọn̄ oro in̄wanade ye ikpọkidem idiọkn̄kpọ?
9 Orụk ekọn̄ eke spirit efen edi enye oro ẹn̄wanade ye ikpọkidem idiọkn̄kpọ. Mme Christian ẹtiene uwụtn̄kpọ Paul, emi ekenyịmede ete: “Ntọn̄ọ idem mi ita, nnam enye odụk ufịn, mbak, ke mma n̄kọkwọrọ nnọ owo en̄wen, ke usụn̄ ekededi ẹdisio mi ke idem mi ẹduọk.” (1 Corinth 9:27) Ẹkenọ mme Christian ke Colossae item ẹte “ẹwot mbak idem mbufo ẹmi ẹdude ke isọn̄. Ẹkpọn̄ use, ye ndek-ndek ido, ye idiọk udọn̄, ye idiọk itọn̄, ye edisịn esịt ke n̄kpọ owo, emi edide ukpono-ndem.” (Colossae 3:5) Ndien Jude andiwet Bible ama akpak mme Christian ete “ẹsọn̄ọ ẹn̄wana kaban̄a ikọ mbuọtidem, emi ẹma ẹkeyak ini kiet ko ẹsịn nti ikọt Abasi ke ubọk.” (Jude 3) Ntak anade nnyịn inam ntre? Paul ọbọrọ ete: “Edieke mbufo ẹdude uwem nte obụkidem etemede, mbufo ẹnyene ndikpa; edi edieke mbufo ẹdade spirit, mbufo ẹwot edinam eke obụkidem anamde, mbufo ẹyedu uwem.” (Rome 8:13) Ke ikerede iban̄a in̄wan̄în̄wan̄ ikọ emi, nnyịn ikemeke ndikpa mba ke ndin̄wana ekọn̄ ye mme ntụhọ unam idiọk.
10. Nso iketịbe ke 1914, edidade ekesịm nso ke n̄kpet n̄kpet ini iso?
10 Edi ntak efen oro ẹkemede ndida ini emi nte ini ekọn̄ edi nte ke “usen usiene Abasi nnyịn” emekpere. (Isaiah 61:1, 2) Ke 1914, edimek ini Jehovah ama edisịm ndiwụk Obio Ubọn̄ Messiah nnyụn̄ nnọ enye odudu ndin̄wana ọkpọsọn̄ ekọn̄ ye editịm n̄kpọ Satan. Ini oro ẹkenịmde ẹnọ mme owo ndidomo ukara owo nse ye unana Abasi ndisịbe ndụk ama okụre ini oro. Utu ke ndinyịme Andikara edide Messiah Abasi, ata ediwak owo ẹka iso ẹsịn enye, kpa nte ata ediwak owo ẹkenamde ke akpa isua ikie. (Utom 28:27) Mmọdo, ke ntak edibiọn̄ọ Obio Ubọn̄, ẹma ẹnyịk Christ ‘ndida ubọn̄ ke otu mme asua esie.’ (Psalm 110:2) Nte enemde, Ediyarade 6:2 ọn̄wọn̄ọ ete ke enye ‘ọyọdọdiọn̄ akan.’ Emi edidi ke ini “ekọn̄ akwa usen Abasi, Andikara kpukpru n̄kpọ . . . , emi ẹkotde ke usem Hebrew, ẹte, Har–Magedon.”—Ediyarade 16:14, 16.
“Ini eke Ẹtịn̄de Ikọ” Edi Emi
11. Ntak emi Jehovah enen̄erede enyene ime ntre, edi nso ididi ke akpatre?
11 Toto ke ini ukpụhọde ke mme edinam owo ke 1914, isua 85 ẹbe. Jehovah enen̄ede enyene ime ye ubonowo. Enye anam Mme Ntiense esie ẹfiọk ọyọhọ ọyọhọ nte idaha edide usọp usọp. Uwem ediwak miliọn owo ẹdu ke itiendịk. Oyom ẹnọ akwa udịm owo ẹmi ntọt koro “Ọbọn̄ . . . iyomke baba owo kiet atak, edi oyom kpukpru owo ẹtua n̄kpọfiọk ẹkabade esịt.” (2 Peter 3:9) Nte ededi, ke mîbịghike “Ọbọn̄ Jesus [oyoto] ke heaven ọbiọn̄ọde ke ikan̄ emi asakde, ye mme angel odudu Esie.” Adan̄aoro, kpukpru mbon oro ẹkoide-koi ẹsịn etop Obio Ubọn̄ Abasi ẹyekụt “usiene” oro Jesus edisiode “mmọ ẹmi mîfiọkke Abasi, mînyụn̄ isụkke ibuot inọ gospel Ọbọn̄ nnyịn Jesus.”—2 Thessalonica 1:6-9.
12. (a) Ntak emi edikere ini emi akwa ukụt ekemede nditọn̄ọ mînyeneke ufọn? (b) Nso n̄kpọndịk ke Jesus okodụri owo utọn̄ aban̄a ke afan̄ emi?
12 Ini ewe ke ime Jehovah edikụre ofụri ofụri? Ufọn idụhe ndinọ ekikere ekededi mban̄a ini emi “akwa ukụt” editọn̄ọde. Jesus ama etịn̄ in̄wan̄în̄wan̄ ete: “Baba owo kiet ifiọkke iban̄a usen oro m̀mê hour oro.” Ke n̄kan̄ eken enye ama ọnọ item ete: “Ẹkpeme ndien: koro mbufo mîfiọkke usen eke Ọbọn̄ mbufo edide. . . . Ẹben̄e idem; koro ke ini eke mbufo mîdorike enyịn, Eyen Owo eyedi.” (Matthew 24:21, 36, 42, 44) Ke nditịn̄ in̄wan̄în̄wan̄, emi ọwọrọ ete ke kpukpru usen nnyịn ikpenyene ndikpeme mme n̄kpọntịbe ererimbot nnyụn̄ n̄kere mban̄a ntọn̄ọ akwa ukụt. (1 Thessalonica 5:1-5) Edi n̄kpọndịk didie ntem ndikere ke nnyịn imekeme nditek ubọk, idude se ẹkotde inem uwem, ibetde ndise nte n̄kpọ ẹsan̄ade! Jesus ọkọdọhọ ete: “Ẹkpeme idem mbufo, mbak uyụhọ udia ye mmịn ye ekikere uwem emi ẹdinam esịt mbufo odobi, ndien usen oro edibuat mbufo nte ekpọ.” (Luke 21:34, 35) Nnyịn imekeme nditịm nnịm emi ke akpanikọ: Owo idimụmke “ofụm isọn̄ mbinan̄” eke nsobo emi Jehovah anamde “mme angel inan̄” ẹmụm, ikama ke nsinsi.—Ediyarade 7:1-3.
13. Nso ke se ikperede ndisịm owo miliọn itiokiet ẹdiọn̄ọ ẹban̄a?
13 Ke ikerede iban̄a usen unam ibat oro etịmde asan̄a ekpere, mme ikọ Solomon ẹban̄ade “ini eke ẹtịn̄de ikọ” ẹnyene san̄asan̄a se ẹwọrọde. (Ecclesiastes 3:7) Ke ẹfiọkde ẹte ke idahaemi enen̄ede edi ini eke ẹtịn̄de ikọ, se ikperede Mme Ntiense Jehovah miliọn itiokiet ke ẹtịn̄ ifịk ifịk ẹban̄a ubọn̄ itie edikara Abasi ẹnyụn̄ ẹdụri mme owo utọn̄ ẹban̄a usen usiene esie. Mmọ ẹnọ idemmọ unyịme unyịme ke usen ekọn̄ Christ emi.—Psalm 110:3; 145:10-12.
Mbon Oro Ẹtịn̄de Ẹban̄a ‘Ifụre, Ndien Ifụre Idụhe’
14. Mme nsunsu prọfet ewe ẹkedu ke ọyọhọ isua ikie itiaba M.E.N.?
14 Ke ọyọhọ isua ikie itiaba M.E.N., Jeremiah ye Ezekiel, mme prọfet Abasi, ẹma ẹtịn̄ mme etop ubiereikpe Abasi ẹban̄a Jerusalem ke ntak edinam ntụtutọn̄ esie ke ndisọn̄ ibuot ye Abasi. Nsobo oro mmọ ẹkebemde iso ẹtịn̄ ẹban̄a ama ada itie ke 607 M.E.N., idem okposụkedi se mme ọwọrọiso ye mme okopodudu adaiso ido ukpono ẹketịn̄de okokpụhọrede ye eke mme asan̄autom Abasi. Mmọ ẹma ẹkabade ẹdi “mme ndisịme prophet [ẹmi] . . . ẹyụtde ikọt [Abasi], ẹte, ‘Ifụre,’ ndien ifụre [idụhe].”—Ezekiel 13:1-16; Jeremiah 6:14, 15; 8:8-12.
15. Ndi mme ukem nsunsu prọfet oro ẹdu mfịn? Nam an̄wan̄a.
15 Ukem nte “mme ndisịme prophet” eyo oro, ata ediwak mme adaiso ido ukpono mfịn ẹkpu n̄ko ndidụri mme owo utọn̄ mban̄a usen ubiereikpe Abasi oro edide. Utu ke oro, mmọ ẹnam etie nte ke otu mme ebre mbre ukaraidem ẹyenam ẹnyene emem ye ifụre ke akpatre. Sia ẹnen̄erede ẹnyene udọn̄ ndinem mme owo esịt n̄kan Abasi, mmọ ẹsitịn̄ se mbon ufọkabasi mmọ ẹyomde ndikop utu ke ndinam an̄wan̄a nte ke ẹma ẹwụk Obio Ubọn̄ Abasi ye nte ke Edidem Messiah ọyọsọp ndinyene ọyọhọ edikan. (Daniel 2:44; 2 Timothy 4:3, 4; Ediyarade 6:2) Nte mme nsunsu prọfet, mmọ n̄ko ẹtịn̄ ẹban̄a ‘ifụre, ndien ifụre idụhe.’ Edi uko mmọ ayakabade mbabuat ọkpọsọn̄ ndịk ke ini emi mmọ ẹdisobode iyatesịt Enye Emi mmọ ẹdade ke ibuot esie ke idiọk usụn̄ ẹnyụn̄ ẹsuenede enyịn̄ esie ke usụn̄ oro inua mîkemeke nditịn̄. Mme adaiso ukara ererimbot eke nsunsu ido ukpono, emi ẹtịn̄de ẹban̄a ke Bible nte oburobụt an̄wan, ẹyewot mmọ ke adan̄aemi ẹfioride abian̄a abian̄a mfiori emem mmọ.—Ediyarade 18:7, 8.
16. (a) Ẹdiọn̄ọ Mme Ntiense Jehovah kaban̄a nso? (b) Didie ke mmọ ẹkpụhọde ye mbon oro ẹfioride ‘ifụre, ndien ifụre idụhe’?
16 Ata ediwak ikpọ mme adaiso ẹmi ẹnyụn̄ ẹnyenede odudu ndisọn̄ọ nyịre ke mbubịk mbubịk un̄wọn̄ọ emem mmọ isehekede mbuọtidem mbon oro ẹbuọtde idem ke un̄wọn̄ọ Abasi kaban̄a ata emem. Ke se ibede isua ikie, ẹdiọn̄ọ Mme Ntiense Jehovah nte mme anam-akpanikọ andin̄wana mban̄a Ikọ Abasi, mme uko uko andibiọn̄ọ nsunsu ido ukpono, ye mme andida nnọ Obio Ubọn̄ Abasi oro enyenede iwụk. Utu ke ndinam mme owo ẹyet idap ebe ke ikpîkpu ikọ nneminua aban̄ade emem, mmọ ẹsịn ifịk ẹdomo ndinam mmọ ẹdu ke edidemede kaban̄a ata idem n̄kpọ nte ke mfịn edi ini ekọn̄.—Isaiah 56:10-12; Rome 13:11, 12; 1 Thessalonica 5:6.
Jehovah Osioro Uyo
17. Nso ke Jehovah ndisioro uyo ke mîbịghike ọwọrọ?
17 Solomon ọkọdọhọ n̄ko ete: “Abasi oyodomo eti owo ye idiọk: koro ini anade ọnọ kpukpru se ẹyomde.” (Ecclesiastes 3:17) Ih, Jehovah emenịm ini ndisobo nsunsu ido ukpono ye ‘ndidem ererimbot ẹmi ẹdahade ẹda ẹdụk odu ẹban̄a Jehovah ye Messiah esie.’ (Psalm 2:1-6; Ediyarade 16:13-16) Ke ndondo oro ini oro ekemde, mme usen ‘ndopuyo’ Jehovah ẹyebe ẹfep. (Psalm 83:1; Isaiah 62:1; Jeremiah 47:6, 7) Ebede ke Jesus Christ, Edidem Messiah esie oro ẹdoride ke ebekpo, enye ‘eyetịn̄ ikọ’ ke n̄kukụre usem oro mme andibiọn̄ọ enye nte an̄wan̄ade ẹdikopde: “Jehovah ọyọwọrọ nte owo uko, eyedemede ufụp nte owo ekọn̄: enye oyofiori, oyofiori akamba; ọyọsọn̄ọ idem akan mme asua esiemmọ. Mma ndop uyo tutuko; (nte) ndisioroke uyo, nyomụm idem mi n̄kama: nyofiori nte n̄wan uman; esịt eyekịbe mi, nyonyụn̄ n̄kot ibifịk ini kiet. Nyosobo ikpọ obot ye n̄kpri, nnyụn̄ nnam kpukpru ikọn̄ mmọ asat; nnyụn̄ n̄kabade mme akpa mmọn̄ ẹdi isuo, nnyụn̄ nnam n̄kpọdiọhọ-mmọn̄ ẹsat. Ndien nyanam mme nnan ẹsan̄a ke usụn̄ eke mmọ mîfiọkke; nnyụn̄ nnam mmọ ẹdịghi ke ọkpọ-usụn̄ eke mmọ mîfiọkke: nnyụn̄ nnịm ekịm ke un̄wana, ye mme n̄kwan̄a n̄kpọ ke se inende. Mmọ ẹmi ẹdi n̄kpọ eke ndinamde nnọ mmọ nnyụn̄ n̄kpọn̄ke mmọ.” (Sịghisịghi ubọkn̄wed edi eke nnyịn.)—Isaiah 42:13-16.
18. Ke nso usụn̄ ke ikọt Abasi ‘ẹdidop uyo’ ke mîbịghike?
18 Ke ini Jehovah ‘editịn̄de ikọ’ ndiwụt itie esie nte Abasi, idiyomke ikọt esie ẹtịn̄ ikọ unyan̄a idem aba. Edidi ini mmọ ‘ndidop uyo.’ Nte ẹkedide ye mme asan̄autom Abasi ke eset, mme ikọ ẹmi ẹyesu: “Idiyomke mbufo ẹn̄wana isan̄ enye emi. Ẹda ke itie mbufo, ẹsọn̄ọ ẹda ẹnyụn̄ ẹkụt edinyan̄a Jehovah ke ibuot mbufo.”—2 Chronicles 20:17, NW.
19. Nso ifet ke nditọete Christ eke spirit ẹdinyene ke mîbịghike?
19 Nso idiọk edikan ke emi edidi ntem ọnọ Satan ye esop esie! Nditọete Christ oro ẹnọde ubọn̄ ẹyebuana ke ndinam n̄kpọ mban̄a n̄wọrọnda edikan kaban̄a edinen ido, ke n̄kemuyo ye un̄wọn̄ọ emi: “Ibịghike bịghi Abasi emem eyedịghi Satan anuak ke idak ikpat mbufo.” (Rome 16:20) Ini emem oro ẹkebetde ke anyan ini emekpere ke akpatre.
20. Ini edikem ọnọ nso ke mîbịghike?
20 Edidi edidiọn̄ didie ntem ọnọ kpukpru owo ke isọn̄ ẹmi ẹdibọhọde akwa ediwụt odudu Jehovah emi! Idibịghike ke oro ebede mme anam-akpanikọ iren ye iban oro ini ediset mmọ edikemde ẹyediana ye mmọ. Tọsịn Isua Ukara Christ edinen̄ede edi “ini eke ẹtọde ke isọn̄ . . . , ini eke ẹkọkde (unan) . . . , ini eke ẹdiọn̄de . . . ; ini eke ẹsakde . . . ; ini eke ẹnekde . . . ; ini eke ẹfatde . . . ; ini eke ẹmade.” Ih, enye edidi “ini emem” ke nsinsi!—Ecclesiastes 3:1-8; Psalm 29:11; 37:11; 72:7.
Nso Idi Ibọrọ Fo?
◻ Nso idi isọn̄ kaban̄a nsinsi emem?
◻ Ntak emi Mme Ntiense Jehovah ẹdade ini emi nte “ini ekọn̄”?
◻ Ini ewe ke ikọt Abasi ẹnyene ‘nditịn̄ ikọ,’ ndien ini ewe ke mmọ ẹnyene ‘ndidop uyo’?
◻ Didie ndien ini ewe ke Jehovah edisioro uyo?
Ẹwet mme n̄kpọntịbe ẹmi ẹtiene nte ẹtịn̄de ẹban̄a mmọ ke N̄wed Abasi. Nnyịn imekeme nditịm nnịm nte ke n̄kpọntịbe ition ẹmi ẹditịbe ẹtiene nte Jehovah ebierede ye ke nnennen ini oro enye enịmde.
[Ekebe/Ndise ke page 13]
Jehovah Emek Ini Enịm
◻ ndinam Gog an̄wana ye ikọt Abasi.—Ezekiel 38:3, 4, 10-12
◻ ndinam mme andikara ẹdide owo ẹsobo Akwa Babylon.—Ediyarade 17:15-17; 19:2
◻ ndidian ndọ Eyenerọn̄.—Ediyarade 19:6, 7
◻ nditọn̄ọ ekọn̄ Har–Magedon.—Ediyarade 19:11-16, 19-21
◻ ndikọbi Satan nnyụn̄ ntọn̄ọ Tọsịn Isua Ukara Jesus.—Ediyarade 20:1-3
[Mme ndise ke page 15]
Tọsịn Isua Ukara Christ edinen̄ede edi ini . . .
eke ẹsakde . . .
eke ẹfatde . . .
eke ẹmade . . .
eke ẹtọde ke isọn̄ . . .
eke ẹnekde . . .
eke ẹdiọn̄de . . .