Mme Ọnọ Un̄wana—Kaban̄a Nso Uduak?
“Mmonịm fi ke un̄wana mme idụt.”—UTOM 13:47.
1. Didie ke ewụhọ oro ẹtịn̄de ẹban̄a ke Utom Mme Apostle 13:47 okotụk apostle Paul ke idem?
APOSTLE Paul ọkọdọhọ ete, “Ọbọn̄ eteme nnyịn ntre ete, Mmonịm fi ke un̄wana mme idụt, man afo akpada edinyan̄a edi tutu osịm ke utịt ererimbot.” (Utom 13:47) Idịghe n̄kukụre enye ndiketịn̄ oro edi enye n̄ko ama ọfiọk nte utom oro edide akpan n̄kpọ. Ke ama akakabade edi Christian, Paul ama ayak uwem esie esịn ke ndinam ewụhọ oro. (Utom 26:14-20) Nte ewụhọ oro obiomo nnyịn n̄ko? Ke edide ntre, ntak emi enye edide akpan n̄kpọ ke usen nnyịn?
Ke Ini ‘Un̄wana Onịmede’ ọnọ Ubonowo
2. (a) Nte ererimbot akasan̄ade ekpere utịt esie, nso ikotịbe oro enen̄erede otụk idaha eke spirit ye eke ido uwem esie? (b) Didie ke owo ukara Britain akanam n̄kpọ aban̄a se enye okokụtde otịbede ke August 1914?
2 Mbemiso n̄wakn̄kan owo oro ẹdude mfịn ẹkemanade, ererimbot emi ama ododụk utịt ini esie. Ikpọ n̄kpọntịbe ẹma ẹda itie usọp usọp ke adiana ke adiana. Ẹma ẹsio Satan kpa Devil, kpa akpan anditọn̄ọ ekịm eke spirit ye eke ido uwem, ẹduọk ke isọn̄. (Ephesus 6:12; Ediyarade 12:7-12) Ubonowo ama ọdọduọ odụk akpa ekọn̄ ererimbot esie. Ntọn̄ọ ntọn̄ọ ke August 1914, ke ini akanade in̄wan̄în̄wan̄ nte ke ekọn̄ ọmọn̄ asiaha, Sir Edward Grey, ewetn̄wed ukara Britain kaban̄a mme mbubehe esenidụt, ama ada ke window ọfis esie ke London onyụn̄ ọdọhọ ete: “Un̄wana omonịme ke ofụri Europe; nnyịn idifiakke ikụt mmọ aba ke eyouwem nnyịn.”
3. Nso unen ke mme adaiso ererimbot ẹkenyene ke ndidomo ndinam ini iso ayama ọnọ ubonowo?
3 Ke ukeme ndifiak nnam un̄wana oro ayama, ẹma ẹtọn̄ọ Esop Ediomi M’idụt ke 1920. Edi nnyayama idotenyịn oro ikebịghike. Ke utịt ekọn̄ ererimbot ọyọhọ iba, mme adaiso ererimbot ẹma ẹfiak ẹdomo ukeme, isan̄ enyeemi ye esop Edidiana M’idụt. Inikiet efen, nnyayama idotenyịn ikenyeneke iwụk. Nte ededi, ke ndikere mban̄a mme n̄kpọntịbe eke ata ndondo emi, mme adaiso ererimbot ẹmetịn̄ ẹban̄a “ndutịm obufa ererimbot.” Edi ọsọsọn̄ ndidọhọ ke “obufa ererimbot” ekededi emi mmọ ẹnamde ọmọnọ ata emem ye ifụre. Ke edide isio, ekọn̄, mfịna eke ekpụk, ubiatibet, unana utom, unana, usabade n̄kann̄kụk, ye mme udọn̄ọ kpukpru ẹmekaiso ẹbiọn̄ọ mme owo ndidara uwem.
4, 5. (a) Ini ewe ndien didie ke ekịm okofụk ekpụk ubonowo? (b) Nso ke ẹyom man ẹnọ ubọhọ?
4 Ke ata idem n̄kpọ, nnyayama idotenyịn ubonowo ama ebe efep anyanini mbemiso 1914. Oro okotịbe ke n̄kpọ nte isua 6,000 ẹmi ẹkebede ke Eden, ke ini akpa ete ye eka nnyịn ẹkemekde ndinam ubiere idemmọ ye unana edikere mban̄a in̄wan̄în̄wan̄ uduak Abasi. Mfụhọ mfụhọ ifiọk n̄kpọntịbe eke ubonowo ọtọn̄ọde ke ini oro ẹdi sụk mme mfịna ẹmi ẹdude ke idak udịm udịm n̄kpọntịbe oro Bible etịn̄de aban̄a nte “odudu ekịm.” (Colossae 1:13) Ekedi ke idak odudu Satan kpa Devil ke akpa owo oro, Adam, akayak ererimbot esịn ke idiọkn̄kpọ; ndien otode ke Adam n̄kpa ebe osịm ofụri ubonowo. (Genesis 3:1-6; Rome 5:12) Ubonowo ke ntre ama ataba unyịme Jehovah, kpa Ebiet emi un̄wana ye uwem ẹtode.—Psalm 36:9.
5 N̄kukụre usụn̄ emi ẹkemede ndifiak nnam un̄wana oro ayama ọnọ owo ekededi ke otu ubonowo edidi edieke mmọ ẹnyenede unyịme Jehovah Abasi, kpa Andibot ubonowo. Adan̄aoro, ẹyekeme ndimen “ufụhọn̄kpọ emi ofụkde ofụri ekondo,” kpa ubiomikpe ke ntak idiọkn̄kpọ, mfep. Didie ke edikeme ndinam emi?—Isaiah 25:7.
Enyeoro Ẹnọde “ke Un̄wana Mme Idụt”
6. Nso akwa idotenyịn ke Jehovah anam edi mmemmem n̄kpọ ọnọ nnyịn ebe ke Jesus Christ?
6 Idem mbemiso ẹkebịnde Adam ye Eve ẹfep ke Paradise, Jehovah ama ebemiso etịn̄ aban̄a “mfri” oro edidide andinyan̄a mme andima edinen ido. (Genesis 3:15, NW) Ke etienede Mfri oro ẹken̄wọn̄ọde ndimana nte owo, Jehovah ama anam akanieren oro, Simeon, ke temple ke Jerusalem, anam ẹdiọn̄ọ enye nte “un̄wana eke ediyararede n̄kpọ ọnọ mme Gentile.” (Luke 2:29-32) Ebede ke mbuọtidem ke uwa mfọnmma uwem Jesus eke owo, ẹkeme ndinam mme owo ẹbọhọ ubiomikpe oro otode ndammana idiọkn̄kpọ. (John 3:36) Ke n̄kemuyo ye uduak Jehovah, mmọ ẹkeme idahaemi ndisak iso nse nsinsi uwem ke mfọnmma idaha nte ubak Obio Ubọn̄ eke heaven m̀mê nte mme andidu ke idak esie ke paradise isọn̄. Nso utịbe utịbe enọ ke oro edi ntem!
7. Ntak emi mme un̄wọn̄ọ eke Isaiah 42:1-4 ye edisu mmọ eke akpa isua ikie anamde nnyịn iyọhọ ye idotenyịn?
7 Jesus Christ ke idemesie edi ubiọn̄ ọnọ edisu ikpọ idotenyịn ẹmi. Ke ebuana ye Jesus ndikọkọk mbon udọn̄ọ, apostle Matthew ama ada se ẹwetde ke Isaiah 42:1-4 etịn̄ aban̄a enye. Itien̄wed oro ọdọhọ, ke ubak ubak ete: “Se owo mi, nyemụm enye n̄kama: se edimek owo mi emi adatde mi esịt; mmodori enye spirit mi ke idem: enye eyenam ikpe ọwọrọ ọnọ mme idụt.” Ndien nte emi idịghe se mme owo ẹtode kpukpru idụt ẹyomde? Prọfesi oro akaiso ete: “Enye idifiorike, idinyụn̄ imenekede uyo esiemmọ, inyụn̄ iyakke ẹkop uyo esie ke efak. Enye idibụn̄ke esan̄ eke anuahade, idinyụn̄ inịmeke ọfọn̄ utuenikan̄ eke etiede nnịme nnịme.” Ke n̄kemuyo ye emi, Jesus ikanamke n̄kpọ nsọn̄ido nsọn̄ido ye mme owo oro ẹma ẹkedodu ke nnanenyịn. Enye ama atua mmọ mbọm, ekpep mmọ mme uduak Jehovah, onyụn̄ ọkọk mmọ udọn̄ọ.—Matthew 12:15-21.
8. Ke nso usụn̄ ke Jehovah onịm Jesus nte “ediomi mbio obio” ye “un̄wana mme idụt”?
8 Andinọ prọfesi emi etịn̄ aban̄a idemesie ọnọ Jesus, Asan̄autom esie, onyụn̄ ọdọhọ ete: “Ami Jehovah mmokot fi ke edinen ido, nyenyụn̄ mmụm fi ubọk n̄kama, nnyụn̄ n̄kpeme fi, nnyụn̄ nnịm fi ke ediomi mbio obio, ye ke un̄wana mme idụt; man atat enyịn eke ẹkịmde, onyụn̄ osio mbon n̄kpọkọbi ke ufọk ukwak, osio mmọ eke ẹtiede ke ekịm efep ke ufọk ebuka.” (Isaiah 42:6, 7) Ih, Jehovah ọmọnọ Jesus Christ nte ediomi, nte ọkpọsọn̄ ubiọn̄ un̄wọn̄ọ ke un̄wọn̄ọ oro. Oro edi n̄kpọ nsịnudọn̄ didie ntem! Jesus ama owụt ubonowo ata edikere mban̄a ke ini enye okodude ke isọn̄; enye ama akam ọnọ uwem esie ke ibuot ubonowo. Enye edi owo emi Jehovah ayakde itie edikara kpukpru mme idụt esịn ke ubọk. Eyịghe idụhe Jehovah etịn̄de aban̄a enye nte un̄wana mme idụt. Jesus ke idemesie ọkọdọhọ ete: “Ami ndi un̄wana ererimbot.”—John 8:12.
9. Ntak emi Jesus mîkesịnke idem ke ndikpụhọde editịm n̄kpọ oro okodude ini oro?
9 Ke nso uduak ke Jesus akanam n̄kpọ nte un̄wana ererimbot? Emi ke akpanikọ ikedịghe kaban̄a uduak ererimbot m̀mê eke inyene obụkidem ekededi. Enye ama esịn ndinen̄ede ndutịm ukaraidem emi okodude adan̄aoro ikonyụn̄ inyịmeke ndibọ itie edidem otode Satan, kpa andikara ererimbot, m̀mê otode mme owo. (Luke 4:5-8; John 6:15; 14:30) Jesus ama owụt mbon oro ẹkedude ke nnanenyịn akwa mbọm, ndien enye ama ada ubọhọ ọsọk mmọ ke usụn̄ oro mbon efen mîkemeke. Edi enye ama ọfiọk ete ke nsinsi ubọhọ ikemeke ndito ndutịm n̄kaowo oro okodude ke idak ubiomikpe otode Abasi ke ntak ndammana idiọkn̄kpọ oro odudu idiọk spirit oro enyịn mîkwe okonyụn̄ akarade. Ye ikike oro Abasi ọnọde, Jesus ekesịn ofụri uwem esie ke ndinam uduak Abasi.—Mme Hebrew 10:7.
10. Ke mme usụn̄ ewe ye kaban̄a nso uduak ke Jesus akanam n̄kpọ nte un̄wana ererimbot?
10 Ke mme usụn̄ ewe n̄ko kaban̄a nso uduak, ndien, ke Jesus akanam n̄kpọ nte un̄wana ererimbot? Enye ama ayak idemesie esịn ke ndikwọrọ eti mbụk Obio Ubọn̄ Abasi. (Luke 4:43; John 18:37) Ebede ke nditie ntiense nnọ akpanikọ aban̄ade uduak Jehovah, Jesus n̄ko ama ọnọ enyịn̄ Ete esie eke heaven ubọn̄. (John 17:4, 6) Ke adianade do, nte un̄wana ererimbot, Jesus ama ayarade mme nsu eke ido ukpono ndien ke ntre ada ubọhọ-ufụn eke spirit ọsọk mbon oro ẹkesịnde ke ufụn ido ukpono. Enye ama ayarade Satan nte andikara oro enyịn mîkwe oro akarade mbon oro ẹyakde idem ẹnọ enye ada anam n̄kpọ. Jesus n̄ko ke in̄wan̄în̄wan̄ usụn̄ ama anam ẹdiọn̄ọ mme utom ekịm. (Matthew 15:3-9; John 3:19-21; 8:44) Ke n̄wọrọnda usụn̄, enye ama owụt ke idi un̄wana ererimbot ke ndinọ mfọnmma uwem esie eke owo nte ufak, ntem ebederede usụn̄ ọnọ mbon oro ẹwụtde mbuọtidem ke enọ emi ndinyene edifen mme idiọkn̄kpọ, kpa itie ebuana oro ẹnyịmede ye Abasi, ye idotenyịn nsinsi uwem nte ubak ubon Jehovah eke ofụri ekondo. (Matthew 20:28; John 3:16) Ndien ke akpatre, ke ndimụm mfọnmma uten̄e Abasi n̄kama ke ofụri eyouwem esie, Jesus ama ọsọn̄ọ omụm itie edikara Jehovah akama onyụn̄ owụt Devil nte osu nsu, ke ntem anamde nsinsi ufọn ekeme ndidu nnọ mme ama edinen ido. Edi nte Jesus ekenyene ndidi n̄kukụre ọnọ un̄wana?
“Mbufo Ẹdi Un̄wana Ererimbot”
11. Man mmọ ẹdi mme ọnọ un̄wana, nso ke mme mbet Jesus ẹkenyene ndinam?
11 Ke Matthew 5:14, Jesus ama asian mme mbet esie ete: “Mbufo ẹdi un̄wana ererimbot.” Mmọ ẹkenyene nditiene ndeikpat esie. Ke usụn̄ uwem mmọ ye ke ukwọrọikọ mmọ, mmọ ẹkenyene ndida mbon efen usụn̄ n̄wụt Jehovah nte Ebiet emi un̄wana akpanikọ otode. Ke ndikpebe Jesus, mmọ ẹkeyene ndinam ẹfiọk enyịn̄ Jehovah nnyụn̄ mmenede itie edikara Esie ke enyọn̄. Nte Jesus akanamde, ntre mmọ ẹkenyene nditan̄a Obio Ubọn̄ Abasi nte n̄kukụre idotenyịn ubonowo. Mmọ n̄ko ẹkenyene ndiyarade mme nsu ido ukpono, mme utom ekịm, ye andidiọk oro odude ke edem mme utọ edinam oro. Mme anditiene Christ ẹkenyene ndisian mme owo ke kpukpru ebiet mban̄a ima ima ndutịm Jehovah kaban̄a edinyan̄a ebe ke Jesus Christ. Ye nso ifiopesịt ke mme akpa Christian ẹkenam utom oro ntem, ẹbemde iso ẹtọn̄ọ ke Jerusalem ye Judea ndien ekem ẹbe ẹdụk Samaria, nte Jesus okowụkde!—Utom 1:8.
12. (a) Un̄wana eke spirit ekenyene nditara adan̄a didie? (b) Nso ke spirit Jehovah akan̄wam Paul ndidiọn̄ọ mban̄a Isaiah 42:6, ndien didie ke prọfesi oro okpotụk uwem nnyịn?
12 Nte ededi, ikanaha ẹtre edikwọrọ eti mbụk emi ke efakutom oro. Jesus ama eteme mme anditiene enye ete “ẹkenam kpukpru mme idụt ẹdi mbet.” (Matthew 28:19) Ke ini Saul eke Tarsus akakabarede esịt, Ọbọn̄ ama owụt san̄asan̄a ete ke ikanaha Saul (oro akakabarede edi apostle Paul) ọkwọrọ ikọ ọnọ mme Jew ikpọn̄ edi ọkwọrọ n̄ko ọnọ mme Gentile. (Utom 9:15) Ye un̄wam edisana spirit, Paul ama edifiọk se oro akabuanade. Ntre, enye ama ọfiọk ete ke prọfesi oro ke Isaiah 42:6, emi osude nnennen ke Jesus Christ, edi n̄ko udiana ewụhọ ọnọ kpukpru mbon oro ẹbuọtde idem ke Christ. Ntre, ke Utom Mme Apostle 13:47, ke ini enye okokotde oto Isaiah, Paul ama ọdọhọ ete: “Ọbọn̄ eteme nnyịn ntre ete, Mmonịm fi ke un̄wana mme idụt, man afo akpada edinyan̄a edi tutu osịm ke utịt ererimbot.” Nso kaban̄a fi? Nte afo emenen̄ede ekere aban̄a mbiomo edidi ọnọ un̄wana? Ukem nte Jesus ye Paul, nte afo amayak uwem fo esịn ke ndinam uduak Abasi?
Un̄wana ye Akpanikọ Ẹtode Abasi Ndida Nnyịn Usụn̄
13. Ke n̄kemuyo ye Psalm 43:3, nso idi akam ofụri esịt nnyịn, ndien emi ọnọ nnyịn ukpeme ọbiọn̄ọ nso?
13 Edieke ebede ke ekikere idem nnyịn nnyịn idomo ‘ndinam un̄wana oro afiak ayama,’ man edinam ini iso ubonowo ayama, nnyịn iyetaba se idide akpan n̄kpọ eke Ikọ odudu spirit Abasi idiọk idiọk. Inamke n̄kpọ se ededi oro ererimbot ke ofụri ofụri anamde, nte ededi, mme ata Christian ẹse Jehovah nte ata Ebiet emi un̄wana otode. Akam mmọ ẹbiet enyeoro ẹwetde ke Psalm 43:3, emi ọdọhọde ete: “O dọn̄ un̄wana fo ye akpanikọ fo utom; mmọ ẹyeda mi usụn̄; ẹyeda mi edi ke edisana obot fo, ye ke idụn̄ fo.”
14, 15. (a) Ke mme usụn̄ ewe ke Jehovah kemi ọdọn̄ un̄wana ye akpanikọ esie utom? (b) Didie ke nnyịn ikeme ndiwụt nte ke un̄wana ye akpanikọ Abasi ẹnen̄ede ẹda nnyịn usụn̄?
14 Jehovah ke akaiso ndibọrọ akam oro mme anam-akpanikọ asan̄autom esie ẹbọn̄de. Enye ọmọdọn̄ un̄wana utom ebe ke nditan̄a uduak esie, ebe ke ndinam enye an̄wan̄a mme asan̄autom esie, ndien ekem ke ndinam se enye akatan̄ade osu. Ke ini nnyịn ibọn̄de akam inọ Abasi, enye idịghe ikpîkpu edinam, oro ẹnamde n̄kukụre man ẹwụt edisana edu. Udọn̄ ofụri esịt nnyịn edi yak un̄wana oro otode Jehovah ada nnyịn usụn̄, nte psalm oro ọdọhọde. Nnyịn imonyịme ndibiom mbiomo oro asan̄ade ye edibọ un̄wana oro Abasi ọnọde. Ukem nte apostle Paul, nnyịn imọfiọk ite ke Ikọ Jehovah ndisu asan̄a ye udiana ewụhọ ọnọ mbon oro ẹbuọtde idem ke enye. Etie nnyịn ke idem nte imakama mbon efen isọn ibọhọke nnyịn inọ mmọ eti mbụk oro Abasi akayakde esịn nnyịn ke ubọk kaban̄a uduak oro.—Rome 1:14, 15.
15 Un̄wana ye akpanikọ oro Jehovah ọnọde ke eyo nnyịn ayarade nte ke Jesus Christ etie ke ebekpo esie ke heaven akara ifịk ifịk. (Psalm 2:6-8; Ediyarade 11:15) Jesus ama ebemiso etịn̄ ete ke ini ubọn̄ ubọn̄ edidu imọ, ke ẹyekwọrọ eti mbụk Obio Ubọn̄ emi ke ofụri isọn̄ nte ntiense. (Matthew 24:3, 14) Ke ẹnam utom oro idahaemi, ndien ẹnam enye ifịk ifịk, ke ofụri ererimbot. Edieke nnyịn inamde utom oro edi ata akpan n̄kpọ ke uwem nnyịn, do un̄wana ye akpanikọ Abasi ke ẹda nnyịn usụn̄, nte andiwet psalm ọkọdọhọde.
Ata Ubọn̄ Jehovah Ama Ayama
16, 17. Didie ke Jehovah akanam ubọn̄ esie ayama ọnọ esop esie emi ebietde n̄wan ke 1914, ndien nso ewụhọ ke enye ọkọnọ n̄wan oro?
16 Ke usem oro aduaide owo idem, N̄wed Abasi etịn̄ ido emi un̄wana Abasi asuanade osịm mme owo ke kpukpru ebiet. Isaiah 60:1-3, emi etịn̄de aban̄a “n̄wan” Jehovah, m̀mê esop esie eke heaven eke mme anam akpanikọ asan̄autom, ọdọhọ ete: “Daha ke enyọn̄! yama! koro un̄wana fo emedi, ubọn̄ Jehovah omonyụn̄ asiaha ọnọ fi. Koro, sese, ekịm eyefụk ererimbot, ọkpọsọn̄ ekịm eyenyụn̄ ofụk mme idụt: edi Jehovah ẹyesiaha ọnọ fi, ẹyenyụn̄ ẹkụt ubọn̄ esie eke odorode fi. Ndien mme idụt ẹyesan̄a ke un̄wana fo, ndidem ẹyenyụn̄ ẹsan̄a ke usiere fo.”
17 Ubọn̄ Jehovah ama ayama ọnọ esop mbiet-an̄wan eke heaven esie ke isua 1914 emi, ke enye ama ekebet ke anyanini, akamande Obio Ubọn̄ Messiah, ye Jesus Christ nte Edidem. (Ediyarade 12:1-5) Ubọn̄ ubọn̄ un̄wana Jehovah amayama ke ndinyịme ukara oro nte enyeoro enyenede unen ndikara ofụri isọn̄.
18. (a) Ntak emi ekịm ofụkde isọn̄, nte ẹkebemde iso ẹtịn̄ ke Isaiah 60:2? (b) Didie ke ẹkeme ndinyan̄a mme owo nsio ke ekịm eke isọn̄?
18 Ke edide isio ye oro, ekịm omofụk isọn̄, ọkpọsọn̄ ekịm omonyụn̄ ofụk mme idụt. Ntak-a? Koro mme idụt ẹsịnde ukara edima Eyen Abasi ẹmek ukara owo. Mmọ ẹkere ẹte ke ndikpụhọde orụk ukara kiet nnyụn̄ nda en̄wen, ke mmimọ iyekọk mfịna mmimọ. Edi emi idaha ubọhọ oro mmọ ẹkedoride enyịn ẹban̄a idi. Mmọ ẹkpu ndikụt enyeemi odude ke obio mme spirit akara mme idụt. (2 Corinth 4:4) Mmọ ẹsịn Ebiet emi ata un̄wana otode ndien ke ntre ẹdu ke ekịm. (Ephesus 6:12) Inamke n̄kpọ m̀mê nso ke mme idụt ẹnam, nte ededi, ẹkeme ndinyan̄a mme owo nsio ke ekịm oro. Ke ewe usụn̄? Ke ndikọn̄ ọyọhọ mbuọtidem ke Obio Ubọn̄ Abasi nnyụn̄ nsụk ibuot nnọ enye.
19, 20. (a) Ntak ndien didie ke ubọn̄ Jehovah ayama ọnọ mme anditiene Jesus oro ẹyetde aran? (b) Kaban̄a nso ntak ke Jehovah anam ikọt esie oro ẹyetde aran ẹdi mme ọnọ un̄wana? (c) Nte ẹkebemde iso ẹtịn̄, didie ke “ndidem” ye “mme idụt” ẹdi se ẹdụride ẹnọ un̄wana oro Abasi ọnọde?
19 Christendom ibuọtke idem ke Obio Ubọn̄ Abasi inyụn̄ isụkke ibuot inọ enye. Edi mme anditiene Jesus Christ oro ẹyetde aran ke spirit ẹmebuọt idem. Nte utịp, un̄wana Jehovah oro owụtde unyịme Abasi amayama ọnọ mme andida ke ibuot an̄wan esie eke heaven emi ẹkụtde ke enyịn, ndien ubọn̄ esie amayarade ke idemmọ. (Isaiah 60:19-21) Mmọ ẹdara un̄wana eke spirit oro baba ukpụhọde kiet ke edinam ukara m̀mê ndutịm uforo ererimbot mîkemeke ndimen mfep. Mmọ ẹmekụt nte Jehovah anyan̄ade mmọ osio ke Akwa Babylon. (Ediyarade 18:4) Mmọ ẹmenyene unyịme esie ke ntak oro mmọ ẹbọde ntụnọ esie ẹnyụn̄ ẹsọn̄ọde ẹda ye itie edikara esie ke edinam akpanikọ. Mmọ ẹnyene nyayama idotenyịn ẹban̄a ini iso, ndien mmọ ẹdat esịt ke idotenyịn oro enye onịmde mmọ ke iso.
20 Edi ye nso uduak ke Jehovah anam n̄kpọ ye mmọ ke usụn̄ emi? Nte enye ke idemesie ọkọdọhọde ke Isaiah 60:21, edi ntre man enye ‘akpada ubọn̄,’ man ẹkpono enyịn̄ esie, man ẹnyụn̄ ẹdụri mbon en̄wen ẹkpere enye nte ata Abasi kierakiet—ndien adade nsinsi ufọn ọsọk mmọ. Ke n̄kemuyo ye emi, ke 1931 mme andituak ibuot nnọ Abasi akpanikọ emi ẹma ẹda enyịn̄ oro Mme Ntiense Jehovah. Nte utịp ikọ ntiense mmọ, nte ẹma ẹdụri “ndidem” ẹwụt un̄wana oro akasiahade oto mmọ, nte Isaiah ekebemde iso etịn̄? Ih! Idịghe mme akara ukaraidem ke isọn̄, edi nsụhọ ibat mbon oro ẹdude ke udịm ndikara nte ndidem ye Christ ke Obio Ubọn̄ esie eke heaven. (Ediyarade 1:5, 6; 21:24) Ndien nso kaban̄a “mme idụt”? Nte un̄wana emi omodụri mmọ ada? Ke akpanikọ edi ntre! Owo idụrike idụt ukaraidem ndomokiet ida, edi akwa otuowo ẹmi ẹtode kpukpru idụt ẹmeda idaha mmọ ke n̄kan̄ Obio Ubọn̄ Abasi, ndien mmọ ye ọkpọsọn̄ udọn̄ ke ẹtie ẹbet edinyan̄a nsịn ke obufa ererimbot Abasi. Enye ke akpanikọ edidi obufa ererimbot oro edinen ido edidude.—2 Peter 3:13; Ediyarade 7:9, 10.
21. Didie ke nnyịn ikeme ndiwụt nte ke nnyịn itabake uduak mfọnido Jehovah emi owo mîdotke ke ndinam uduak esie an̄wan̄a nnyịn?
21 Nte afo edi kiet ke otu udịm mme ọnọ un̄wana oro ọkọride-kọri mi? Jehovah ọmọnọ nnyịn ifiọk uduak esie man nnyịn, ukem nte Jesus, ikpekeme ndidi mme ọnọ un̄wana. Ke ndiwụt ifịk ke utom oro Jehovah ayakde esịn mme asan̄autom esie ke ubọk ke eyo nnyịn, akpakam kpukpru nnyịn iwụt ite ke nnyịn itabake uduak mfọnido emi owo mîdotke oro Abasi anamde atara osịm nnyịn. (2 Corinth 6:1, 2) Idụhe utom ndomokiet oro edide akpan n̄kpọ akan oro ke eyo nnyịn emi. Inyụn̄ idụhe ifetutom oro okponde akan emi oro ekemede ndidi eke nnyịn akan ndinọ Jehovah ubọn̄ ke ndiwụt mbon efen ubọn̄ ubọn̄ un̄wana oro otode enye.
Didie ke Afo Ọkpọbọrọ?
◻ Nso ẹdi orụn̄ mfụhọ mfụhọ mfịna ubonowo?
◻ Ke nso mme usụn̄ ke Jesus ye mme mbet esie ẹdi “un̄wana ererimbot”?
◻ Didie ke un̄wana ye akpanikọ Jehovah ẹda nnyịn usụn̄?
◻ Didie ke Jehovah anam ubọn̄ esie ayama ọnọ esop esie?
◻ Kaban̄a nso uduak ke Jehovah anam ikọt esie ẹdi mme ọnọ un̄wana?
[Mme ndise ke page 9]
N̄kpọntịbe oro ke Eden an̄wam nnyịn ndidiọn̄ọ mme mfụhọ mfụhọ mfịna ubonowo mfịn
[Mme Ebiet Ẹdade N̄kpọ Ẹto]
Tom Haley/Sipa
Paringaux/Sipa