Uwem ye Utom Jesus

Ndinyene Mbuọtidem ke Utịt Eyo

NTE Tuesday, Nisan 11, asan̄ade ekpere utịt, Jesus odu ye mme apostle esie ke Obot Olive. Mmọ ndisụk n̄kpọn̄ n̄kann̄kụk temple edi oro, emi mmọ ẹkemede ndida n̄kụt ke idak idak, ndien Jesus ke eneme ye mmọ aban̄a idiọn̄ọ edidu esie ke odudu Obio Ubọn̄ ye eke utịt editịm n̄kpọ emi.

Ke akadeiso ke utịn̄ikọ esie, Jesus odụri mmọ utọn̄ aban̄a edibịne mme christ nsu. Enye ọdọhọ ke mmọ ẹyesịn ukeme “man, edieke mmọ ẹkpekemede, ẹda ndimek ikọ Abasi ẹwaha ẹkpọn̄ usụn̄.” Edi, nte mme ntrukpom oro ẹdade ẹkụt n̄kpọ ke ata anyan usụn̄, ndimek ikọt Abasi ẹmi ẹyesop idem ke ebiet emi ata udia eke spirit odude, oro edi, ye ata Christ ke edidu esie oro enyin mîkwe. Owo ididaha mmọ iwaha ikpọn̄ usụn̄ inyụn̄ itan̄ ibok ọtọkiet ye christ nsu.

Mme christ nsu ẹkeme ndiwụt idem ke usụn̄ oro ẹkụtde ke enyịn kpọt. Edi, ke edide isio ye oro, owo idikwe edidu Jesus. Enye edida itie ke enyene-ndịk ini ke mbụk ubonowo, nte Jesus ọdọhọde ete: “Utịn eyekabade okịm, ọfiọn̄ idinyụn̄ inọhọ un̄wana esie.” Ih, emi edidi ikpehe ini ata ekịm ke edidu owo. Enye editie nte n̄kpọ eke utịn okịmde ke uwemeyo, ye nte n̄kpọ eke ọfiọn̄ mînọhọ un̄wana ke okoneyo.

Jesus akaiso ete, “Ẹyenyen̄e mme odudu ikpaenyọn̄.” Enye ke ntre owụt ke ata ikpaenyọn̄ eyebemiso ọnọ idiọn̄ọ. Ikpaenyọn̄ ididịghe ebietidụn̄ inuen ikpọn̄îkpọn̄, edi mmọ ẹyeyọhọ ye mme ubomofụm ekọn̄, rocket, ye mme n̄kpọ uda ndụn̄ọde ikpaenyọn̄. Ndịk ye afai eyekpon akan n̄kpọ ekededi oro ẹkesobode ke mbemiso mbụk ubonowo.

Nte utịp, Jesus ọdọhọ ke “editịmede esịt eyenyụn̄ omụm mme idụt . . . , oto ke nnanenyịn aban̄a ediyomo emi inyan̄ ye mbufụt ẹyomode; idem eyeyemede owo oto ke ndịk ye edikama enyịn nse mme n̄kpọ eke ediwọrọde ẹnọ ekondo.” Ke akpanikọ, ikpehe ini ata ekịm emi ke edidu owo eyeda okosịm ini emi Jesus ọdọhọde ke “idiọn̄ọ Eyen Owo eyewụt idem ke enyọn̄: adan̄aoro ke kpukpru mme idụt isọn̄ ẹyenyụn̄ ẹfụhọ.”

Edi idịghe kpukpru owo ediseme ke ini ‘Eyen Owo edidide ke odudu’ ndisobo idiọk editịm n̄kpọ emi mfep. “Ndimek ikọt Abasi,” kpa owo 144,000 ẹmi ẹdibuanade ye Christ ke Obio Ubọn̄ eke heaven esie, idisemeke, m̀mê nsan̄a mmọ, kpa mbon oro Jesus ke mbemiso okokotde “mme erọn̄ enwen” esie. Kpa ye oro ẹdude uwem ke ikpehe ini oro okịmde akan ke mbụk ubonowo, mmọemi ẹmenam n̄kpọ ẹban̄a nsịnudọn̄ Jesus oro: “Ke ini mme n̄kpọ ẹmi ẹtọn̄ọde ndiwọrọ, ẹmenede enyin ke enyọn̄, ẹnyụn̄ ẹmenede ibuot mbufo ke enyọn̄, koro edifak mbufo ke asan̄a ekpere.”

Man mme mbet esie oro ẹdude uwem ke utịt eyo emi ẹdiọn̄ọ ke utịt asan̄a ekpere, Jesus ọnọ uwụtn̄kpọ emi: “Ese eto fig ye kpukpru eto; ke ini mmọ ẹsiahade ikon̄, mbufo ẹkụt

ẹnyụn̄ ẹfiọk ke idem mbufo ikpọn̄ ẹte ndaeyo ke ekpere. Kpasụk ntre mbufo n̄ko, ke ini mbufo ẹkụtde nte mme n̄kpọ ẹmi ẹtịbede, ẹfiọk ẹte Ubọn̄ Abasi ke ekpere. Ke akpanikọ ke ndọhọ mbufo nte, Emana emi idibehe tutu kpukpru n̄kpọ ẹmi ẹwọrọ ẹsu.”

Ntre, ke ini mme mbet esie ẹkụtde ediwak nsio nsio ikpehe idiọn̄ọ oro nte osude, mmọ ẹkpenyene ndidiọn̄ọ nte ke utịt editịm n̄kpọ emi asan̄a ekpere ye nte ke ibịghike Obio Ubọn̄ Abasi eyesio kpukpru idiọkido efep. Ke akpanikọ, utịt edidi ke ini mbon oro ẹkụtde edisu eke kpukpru n̄kpọ oro Jesus ekebemde iso etịn̄ aban̄a ẹsụk ẹdude uwem! Ke ọnọde mme mbet oro ẹdidude uwem ke onịm-mbụk utịt eyo oro item, Jesus ọdọhọ ete: “Ekpeme idem mbufo, mbak uyụhọ udia ye mmịn ye ekikere uwem emi edinam esịt mbufo odobi, ndien usen oro edibuat mbufo nte ekpọ; koro usen oro eyesịm kpukpru mmọemi ẹdụn̄de ke iso isọn̄. Edi mbufo ẹtaba idap kpukpru ini, ẹnyụn̄ ẹkpe ubọk, man mbufo ẹkpekeme ndibọhọ kpukpru n̄kpọ oro ediwọrọde, nnyụn̄ nda ke iso Eyen Owo.” Matthew 24:23-51; Mark 13:21-37; Luke 21:25-36; Ediyarade 14:1, 3; John 10:16.

◆ Nso mme idaha ererimbot onịm edidu Christ idiọn̄ọ?

◆ Ini ewe ke ‘kpukpru mme idụt isọn̄ edifụhọ,’ edi nso ke mme anditiene Christ edinam?

◆ Nso uwụtn̄kpọ ke Jesus ọnọ ndin̄wam mme mbet esie eke ini isọ ndidiọn̄ọ ini emi utịt asan̄ade ekpere?

◆ Nso item ke Jesus ọnọ mme mbet esie ẹmi ẹdidude uwem ke utịt eyo?