Didie Ke Nnyịn Ikpọbọn̄ Akam Inọ Abasi?
KE INI mbet kiet okobụpde oyom item kaban̄a akam, Jesus ikesịnke ndinọ enye. Nte ekemde ye Luke 11:2-4, enye ọkọbọrọ ete: “Ke ini mbufo ẹbọn̄de akam, ẹdọhọ ẹte, Ete, yak ikpono enyịn̄ Fo. Yak Ubọn̄ Fo edi. Nọ nnyịn udia eke ekemde nnyịn ke usen ke usen. Nyụn̄ dahado ke mme idiọk-n̄kpọ nnyịn, koro nnyịn ke idem nnyịn idahadedo inọ kpukpru owo ẹmi ẹkamade nnyịn isọn. Kûnyụn̄ uda nnyịn usịn ke idomo.” Kpukpru owo ẹdiọn̄ọ emi nte Akam Ọbọn̄. Enye esịne ata ekese ntọt.
Ke ntọn̄ọ ntọn̄ọ, ata akpa ikọ oro asian nnyịn enyeemi anade ibọn̄ akam nnyịn inọ—Ete nnyịn. Tịm fiọk ete ke Jesus ikonịmke ufan̄ inọ ndibọn̄ akam nnọ owo efen, edisọi mbiet, “edisana owo,” m̀mê enye ke idemesie ke idaha ekededi. Kamse, Abasi ama ọdọhọ ete: “Ami ndinọhọ owo efen ubọn̄ mi, m̀mê ndinọ ndisọi n̄kpọ itoro mi.” (Isaiah 42:8, Douay Version eke Catholic) Ke ntre Ete nnyịn eke heaven ikopke mme akam oro ẹbọn̄de ẹnọ n̄kpọ ekededi m̀mê owo efen ekededi ke ebede enye, inamke n̄kpọ m̀mê andituak ibuot oro enyene esịt akpanikọ adan̄a didie. Ke Bible, Jehovah Abasi ikpọn̄ ke ẹkot ‘Enyeemi okopde akam.’—Psalm 65:2.
Ndusụk owo ẹkeme ndidọhọ ẹte ke “ndisana owo” ẹnam n̄kpọ n̄kukụre nte mme andinam n̄kpeubọk nnọ Abasi. Edi Jesus ke idemesie eketeme ete: “Ami ndi usụn̄ ye akpanikọ ye uwem: owo baba kiet itieneke Ete, ibọhọke ebe ke Ami. Nyenyụn̄ nnam n̄kpọ ekededi eke mbufo ẹdiben̄ede ke enyịn̄ Mi, man Ete enyene ubọn̄ ke Eyen.” (John 14:6, 13) Jesus ke ntem ama abiat ekikere oro nte ke owo ekededi oro ẹkotde edisana owo ekeme ndinam n̄kpọ nte andinam n̄kpeubọk efep. Fiọk n̄ko se apostle Paul eketịn̄de aban̄a Christ: “Idịghe enye ndikpa nnọ nnyịn kpọt—enye ama eset ke n̄kpa, ndien ada do ke ubọk nnasia Abasi anam n̄kpeubọk ọnọ nnyịn.” “Enye odu uwem ke nsinsi man anam n̄kpeubọk ọnọ kpukpru mbon oro ẹdide ẹbịne Abasi ebe ke enye.—Rome 8:34; Mme Hebrew 7:25, Jerusalem Bible eke Catholic.
Enyịn̄ Oro Anade Ẹkpono
Mme ikọ efen oro ẹketienede ke akam Jesus ẹkedi: “Yak ikpono enyịn̄ Fo.” Didie ke owo ekpekeme ndikpono, oro edi, ndinam enyịn̄ Abasi asana, m̀mê ndinịm enyịn̄ Abasi san̄asan̄a ke mîbọhọke owo ọdiọn̄ọ enye onyụn̄ okot enye? Ke se ibede utịm ike 6,000 ke “Akani Testament,” ẹwụt Abasi ebe ke ọkpọkpọ enyịn̄ oro Jehovah.
Ikọ idakisọn̄ ke Exodus 6:3 ke Douay Version eke Catholic etịn̄ aban̄a enyịn̄ Abasi ete: “Edi ndusụk mbon eyomfịn ẹtịbi enyịn̄ oro Jehovah ẹdi . . . , koro nnennen usụn̄ nte ẹkekotde enyịn̄ [Abasi], emi odude ke uwetn̄kpọ Hebrew, emi ẹma ẹketre ndikot ke anyanini osop ofụri ofụri.” New Jerusalem Bible eke Catholic ke ntre ada enyịn̄ oro Yahweh. Okposụkedi ndusụk nditọ ukpepn̄kpọ ẹnyịmede usụn̄ edikot enyeoro, “Jehovah” edi nnennen usụn̄ edikot enyịn̄ Abasi oro ke Ikọmbakara emi ẹma ẹkeda ke anyanini. Mme usem eken ẹnyene usụn̄ emi mmọ ẹkotde enyịn̄ Abasi. Akpan n̄kpọ edi nte yak nnyịn ikot enyịn̄ emi man otodo ikpono enye. Nte ufọkabasi fo ekpep fi ndikot enyịn̄ oro Jehovah ke akam?
Nnennen N̄kpọ Ndibọn̄ Akam Mban̄a
Ekem Jesus ama ekpep mme mbet esie ndibọn̄ akam nte: “Yak Ubọn̄ Fo edi.” Gospel Matthew adian mme ikọ ẹmi: “Yak ẹnam uduak fo ke isọn̄ nte ẹnamde ke heaven.” (Matthew 6:10, Dy) Obio Ubọn̄ Abasi edi ukara ke ubọk Jesus Christ. (Isaiah 9:6, 7) Nte ekemde ye prọfesi Bible, enye eyesọp ada itie ukara eke owo onyụn̄ ada ini emem edi ke ofụri ererimbot. (Psalm 72:1-7; Daniel 2:44; Ediyarade 21:3-5) Mme ata Christian ke ntre ẹtịn̄ ẹban̄a edidi Obio Ubọn̄ oro ndien ndien ke akam mmọ. Ndi ufọkabasi fo ekpep fi ndinam ntre?
Nte enemde, Jesus ama owụt n̄ko ete ke mme akam nnyịn ẹkeme ndisịne mme ọkpọkpọ mbubehe oro ẹfịnade nnyịn. Enye ọkọdọhọ ete: “Nọ nnyịn udia eke ekemde nnyịn ke usen ke usen. Nyụn̄ dahado ke mme idiọk-n̄kpọ nnyịn, koro nnyịn ke idem nnyịn idahadedo inọ kpukpru owo ẹmi ẹkamade nnyịn isọn. Kûnyụn̄ uda nnyịn usịn ke idomo.” (Luke 11:3, 4) Mme ikọ Jesus ẹwọrọ ẹte ke nnyịn imekeme ndiyom uduak Abasi ke mbubehe ofụri usen, nte ke nnyịn imekeme ndika mbịne Jehovah kaban̄a n̄kpọ ekededi oro ekemede ndifịna m̀mê nditịmede emem ke esịt nnyịn. Ndikpe Abasi ubọk ke usụn̄ emi kpukpru usen an̄wam nnyịn ndiwụt esịtekọm mban̄a ibetedem oro nnyịn iberide ke enye. Ntem ke nnyịn itịm ifiọk odudu esie ke uwem nnyịn. Ufọn odu n̄ko ndiben̄e Abasi kpukpru usen ndidahado ke mme ndudue nnyịn. Ntem ke nnyịn itịm ifiọk mme mmeme nnyịn—inyụn̄ inen̄ede iyọ mme ndudue mbon efen. Item oro Jesus ọkọnọde ete ibọn̄ akam iben̄e edinyan̄a nsio ke idomo odot n̄ko, akpan akpan ke ikerede iban̄a mbiara ido uwem oro akade-ka iso ke ererimbot emi. Ke n̄kemuyo ye akam oro, nnyịn iyewụt ukpeme ndifep mme itie ye mme idaha oro ẹkemede ndida nnyịn n̄kesịn ke edinam idiọkn̄kpọ.
Eyịghe ndomokiet idụhe, ndien, nte ke Akam Ọbọn̄ etịn̄ ekese ọnọ nnyịn aban̄a ndibọn̄ mme akam oro ẹnemde Abasi esịt. Edi ndi Jesus okoyom ete nnyịn n̄kukụre imen akam emi inyụn̄ itịn̄ enye ke ibuot kpukpru ini?
Item Efen Efen Kaban̄a Akam
Jesus ama ọnọ mme item efen efen kaban̄a akam. Ke Matthew 6:5, 6, nnyịn ikot ite: “Ke ini mbufo ẹnyụn̄ ẹbọn̄de akam, ẹkûbiet mbon mbubịk: koro mmọ ẹma ndida ke mme synagogue ye ke mme [inụk] efak mbọn̄ akam, ẹte iwụt owo idem. . . . Edi ama edi afo, ke ini ọbọn̄de akam, dụk ke esịt ubet fo, beri usụn̄, bọn̄ akam nọ Ete fo emi odude ke ndịbe, ndien Ete fo emi okụtde ke ndịbe eyenọ fi usiene.” Mme ikọ ẹmi ẹkpep nnyịn ẹte ke owo ikpenyeneke ndibọn̄ akam ke an̄wan̄wa usụn̄ n̄wụtidem, man otodo enem owo esịt. Nte afo emesin̄wan̄a esịt ọnọ Jehovah ke ndịbe, nte Bible etemede?—Psalm 62:8.
Jesus ama ọnọ ntọt emi: “Ke akam fo kûtịn̄ ediwak ikọ nte mme okpono ndem ẹnamde, koro mmọ ẹkerede ẹte ke ẹdikop akam mmimọ ebe ke nditịn̄ ediwak ikọ.” (Matthew 6:7, JB) Nte an̄wan̄ade, Jesus ikonyịmeke ite ẹmomụm akam ẹsịn ke ibuot—man eketịn̄ ẹban̄a ndikokot nto mme n̄wed. Mme ikọ esie n̄ko ẹbiọn̄ọ edikama n̄kwa akam.
N̄wed akam Catholic kiet onyịme ete: “Mfọnn̄kan akam nnyịn ekeme ndidi mme ekikere nnyịn oro itịn̄de ke ndammana usụn̄ ke ini nnyịn iwọn̄ọrede ibịne enye ye esịtekọm m̀mê ke ini iyomde n̄kpọ, ke mme ini mfụhọ, m̀mê ke ukpono oro inọde enye kpukpru ini ke usen ke usen.” Mme akam Jesus ẹkedi ke ndammana usụn̄, ikokotke-kot idọn̄ ke ibuot. Ke uwụtn̄kpọ, kot akam Jesus oro ẹwetde ke John ibuot 17. Enye asan̄a ukem ye akam uwụtn̄kpọ oro, ọsọn̄ọde owụt udọn̄ Jesus ndikụt ẹnamde enyịn̄ Jehovah asana. Akam Jesus ekedi ke ndammana usụn̄ okonyụn̄ oto ntotụn̄ọ esịtekọm.
Mme Akam Oro Abasi Okopde
Edieke ẹkekpepde fi ndibọn̄ mme akam oro ẹkotde-kot ẹsịn ke ibuot, ndibọn̄ akam nnọ “ndisana owo” m̀mê ndisọi n̄kpọ, m̀mê ndikama mme n̄kpọ ido ukpono, utọ nte n̄kwa akam, ekikere edibọn̄ akam ke usụn̄ oro Jesus eketemede ekeme ndinam fi ndịk ke akpa ini. Edi, ukpọhọde edi ndidi ndifiọk Abasi—enyịn̄ esie, mme uduak esie, edu esie. Afo ekeme ndinam emi ebe ke ndikpep Bible ntotụn̄ọ ntotụn̄ọ. (John 17:3) Mme Ntiense Jehovah ẹben̄e idem ẹnyụn̄ ẹnyịme ndin̄wam fi ke afan̄ emi. Kamse, mmọ ẹn̄wam ediwak miliọn owo ke ofụri ererimbot ‘nditabi nse nte Jehovah ọfọnde’! (Psalm 34:8) Adan̄a nte afo ọfiọkde Abasi, ntre ke edidemede fi ke esịt nditoro enye ke akam. Ndien adan̄a nte afo asan̄ade ekpere Jehovah ke ukpono ukpono akam, ntre ke itie ebuana fo ye enye editụn̄ọ akan.
Ke ntre ẹkpak kpukpru mme ata andituak ibuot nnọ Abasi ẹte “ẹkûdop akam.” (1 Thessalonica 5:17) Kụt ete ke mme akam fo ẹnen̄ede ẹdu ke n̄kemuyo ye Bible, esịnede mme item Jesus Christ. Ke usụn̄ emi afo eyekụt ete ke Abasi eyenyịme mme akam fo.
[Ndise ke page 7]
Adan̄a nte nnyịn ikpepde n̄kpọ iban̄a Jehovah, ntre ke edidemede nnyịn ndibọn̄ akam nnọ enye nto esịt