Nte Afo Ọkpọbọn̄ Akam Ọnọ Jesus?

NDUSỤK owo ẹkere ke edi nnennen n̄kpọ ndibọn̄ akam nnọ Jesus. Ke Germany ẹmekpep ediwak nditọwọn̄ ẹte mbemiso mmọ ẹdiade udia mmọ ẹkpenyene ndidian ubọk mmọ nnyụn̄ n̄kọm Jesus Christ.

Nte Bible etịn̄de, Jesus ke akpanikọ enyene ata n̄kokon̄ itie ke heaven. Nte oro, nte ededi, ọwọrọ ke nnyịn ikpenyene ndibọn̄ akam nnọ enye? Ekeme ndidi afo edi kiet ke otu mbon oro, emi ke ntak ima ẹnyenede ẹnọ Jesus, ẹbọn̄de akam ẹnọ enye, edi nso ke Jesus ke idemesie ekere aban̄a mme utọ akam oro?

Akpa, ntak mbụme emi akam edemerede? Koro Bible ọdọhọ ke Jehovah Abasi edi “Andikop akam.” Ikpaha owo idem, ndien, nte ke mme asan̄autom Abasi ke eset, utọ nte nditọ Israel, ẹkebọn̄ akam ẹnọ Jehovah Abasi, kpa Ata Ọkpọsọn̄, ikpọn̄îkpọn̄.​—⁠Psalm 5:1, 2; 65:2, NW.

Nte mme n̄kpọ ẹma ẹkpụhọde ke ini Jesus, Eyen Abasi, ekedide isọn̄ ndifak ubonowo nsio ke idiọkn̄kpọ ye n̄kpa? Baba, ẹkesụk ẹbọn̄ akam ẹnọ Jehovah. Ke ini okodude ke isọn̄ Jesus ke idemesie ama ọbọn̄ akam ndien ndien ọnọ Ete esie eke heaven, onyụn̄ ekpep mbon en̄wen ndinam kpa ntre. Kam kere ban̄a akam uwụtn̄kpọ oro, emi ndusụk ini ẹkotde Akam Ọbọn̄ m̀mê Ete Nnyịn, emi edide kiet ke otu akam oro ẹdiọn̄ọde ẹkan ke ererimbot. Jesus ikekpepke nnyịn ite ibọn̄ akam inọ imọ; enye ama ọnọ nnyịn uwụtn̄kpọ emi: “Ete nnyịn emi odude ke heaven: yak ikpono enyịn̄ Fo.”​—⁠Matthew 6:6, 9; 26:39, 42.

Idahaemi ẹyak nnyịn ise ibuot nneme emi ata ọyọhọ ọyọhọ ebe ke ndidụn̄ọde se akam enen̄erede edi.

Nso ke Akam Edi?

Kpukpru akam edi orụk utuakibuot. The World Book Encyclopedia ọsọn̄ọ emi, ọdọhọde ete: “Akam edi orụk utuakibuot emi owo ekemede ndinọ utuakibuot, ekọm, ndiyarade ndudue, m̀mê ndinam n̄kpeubọk nnọ Abasi.”

Ini kiet Jesus ama ọdọhọ ete: “Ẹma ẹwet ẹte, Tuak ibuot nọ Jehovah Abasi fo, nyụn̄ nam n̄kpọ nọ Enye ikpọn̄îkpọn̄.” Jesus ama ọsọn̄ọ eyịre ke isọn̄ akpanikọ oro nte ke utuakibuot​—⁠ntre ye mme akam⁠—​ẹnyene ndika mbịne Ete esie, Jehovah Abasi, ikpọn̄îkpọn̄.​—⁠Luke 4:8; 6:12.

Ndidiọn̄ọ Jesus ke Mme Akam Nnyịn

Jesus akakpa nte uwa ufak ọnọ ubonowo, Abasi anam enye eset, onyụn̄ emenede enye onịm ke itie oro okponde akan. Nte afo ekemede ndikere, kpukpru emi ama ada ukpụhọde edi kaban̄a akam oro ẹnyịmede. Ke nso usụn̄?

Apostle Paul etịn̄ aban̄a ọkpọsọn̄ odudu oro itie Jesus enyenede ke akam nte etienede mi ete: “Ke ntak oro Abasi ekemenede Enye onịm ke enyọn̄, onyụn̄ ọnọ Enye enyịn̄ emi okon̄de akan kpukpru enyịn̄; man ke enyịn̄ Jesus kpukpru edọn̄ ẹkpetọn̄ọ ẹnọ Abasi, ye eke mme andidu ke heaven, ye eke mme andidu ke isọn̄, ye eke mme andidu ke idak isọn̄; kpukpru edeme ẹkponyụn̄ ẹnyịme ẹte Jesus Christ edi Ọbọn̄, ẹnọ Abasi Ete ubọn̄.”​—⁠Philippi 2:​9-⁠11.

Nte mme ikọ oro “ke enyịn̄ Jesus kpukpru edọn̄ ẹkpetọn̄ọ” ọwọrọ ke nnyịn inyene ndibọn̄ akam nnọ enye? Baba. Ubak udịmikọ usem Greek oro ẹdade mi “owụt enyịn̄ oro mbon oro ẹtọn̄ọde edọn̄ ẹdianade kiet, emi akadiande kpukpru (πᾶν γόνυ) utuakibuot ọtọkiet. Enyịn̄ oro Jesus ọkọbọde onụk kpukpru owo esịn ke utuakibuot oro adianade kiet.” (A Grammar of the Idiom of the New Testament, eke G. B. Winer) Ke akpanikọ, man ẹnyịme akam, ana ẹbọn̄ “ke enyịn̄ Jesus,” edi, kpa ye oro, enyene ndinam enye aka ebịne Jehovah Abasi ndien anam n̄kpọ kaban̄a ubọn̄ esie. Ke ntak emi, Paul ọdọhọ ete: “Ke kpukpru n̄kpọ, ẹsan̄a ye akam ye n̄kpeubọk ye ekọm, ẹsian Abasi se mbufo ẹyomde.”​—⁠Philippi 4:6.

Kpa nte afan̄usụn̄ adade okosịm ebiet ẹkade, ntre Jesus edi “usụn̄” oro adade osịm Abasi Ata Ọkpọsọn̄. Jesus ekekpep mme apostle esie ete: “Ami ndi usụn̄ ye akpanikọ ye uwem: owo baba kiet itieneke Ete, ibọhọke ebe ke Ami.” (John 14:6) Ntem, nnyịn ikpenyene ndibọn̄ akam nnyịn nnọ Abasi ebe ke Jesus idịghe ndibọn̄ nnọ Jesus ke idemesie.a

‘Edi,’ ndusụk owo ẹkeme ndibụp ẹte, ‘nte Bible itọtke ite ke owo mbet oro Stephen ye apostle John ẹma ẹtịn̄ ikọ ye Jesus ke heaven?’ Oro edi akpanikọ. N̄kpọntịbe ẹmi, nte ededi, ikabuanake akam, sia owo mmọ kiet kiet Stephen ye John ẹkekụtde Jesus ke n̄kukụt ẹnyụn̄ ẹtịn̄ ikọ ye enye nnennen nnennen. (Utom 7:​56, 59; Ediyarade 1:17-⁠19; 22:20) Ti ete ke ikpîkpu editịn̄ ikọ ye Abasi ikam inamke oro ke idemesie edi akam. Adam ye Eve ẹma ẹtịn̄ ikọ ye Abasi, ẹnọde mme ntak akwa idiọkn̄kpọ mmọ, ke ini Enye ekekpede ikpe ọnọ mmọ etienede idiọkn̄kpọ mmọ ke Eden. Mmọ ndiketịn̄ ikọ ye enye ke usụn̄ oro ikedịghe akam. (Genesis 3:​8-⁠19) Ntre, ikpenenke ndisiak Stephen m̀mê John ndiketịn̄ ikọ ye Jesus nte uyarade nte ke nnyịn ke akpanikọ ikpenyene ndibọn̄ akam nnọ enye.

Didie ke ‘Ẹkot’ Enyịn̄ Jesus?

Nte afo ke osụk enyene eyịghe, ekerede ke enen ndibọn̄ akam nnọ Jesus? N̄wan kiet ama ewet ọnọ ọfis n̄kọk itieutom Watch Tower Society ete: “Ke ndiọkiso, ami nsụk nnịmke ke akpanikọ nte ke mme akpa Christian ikọbọn̄ke akam inọ Jesus.” Enye ekenyene mme ikọ Paul ke 1 Corinth 1:2 (NW) ke ekikere, emi enye akasiakde “kpukpru owo ẹmi ke kpukpru ebiet ẹkotde enyịn̄ Ọbọn̄ nnyịn, Jesus Christ.” Nte ededi, owo ekpenyene nditịm mfiọk nte ke akpasarade usem, ikọ oro “ndikot” ekeme ndiwọrọ n̄kpọ efen n̄kan akam.

Didie ke ‘ẹkekot’ enyịn̄ Christ ke kpukpru ebiet? Usụn̄ kiet ekedi nte ke mme anditiene Jesus eke Nazareth ẹma ẹdiọn̄ọ enye in̄wan̄în̄wan̄ nte edide Messiah ye “Andinyan̄a ererimbot,” ẹnamde ediwak utịbe utom ke enyịn̄ esie. (1 John 4:14; Utom 3:6; 19:5) Ke ntre, The Interpreter’s Bible ọdọhọ ete ke ubak udịmikọ oro “ndikot enyịn̄ Ọbọn̄ nnyịn . . . ọwọrọ nditịn̄ an̄wan̄wa mban̄a itie ubọn̄ esie utu ke ndibọn̄ akam nnọ enye.”

Ndinyịme Christ nnyụn̄ n̄wụt mbuọtidem ke iyịp esie oro ẹkeduọkde, emi anamde ẹkeme ndinyene edifen mme idiọkn̄kpọ, n̄ko abuana ‘edikot enyịn̄ Ọbọn̄ nnyịn, Jesus Christ.’ (Men Utom Mme Apostle 10:43 domo ye Ut 22:16.) Ndien nnyịn ke ataata usụn̄ imesisiak enyịn̄ Jesus ini ekededi oro nnyịn ibọn̄de akam inọ Abasi ebe ke enye. Ntre, ke adan̄aemi owụtde nte ke imekeme ndikot enyịn̄ Jesus, Bible iwụtke ke nnyịn ikpenyene ndibọn̄ akam nnọ enye.​—⁠Ephesus 5:20; Colossae 3:17.

Se Jesus Ekemede Ndinam Nnọ Nnyịn

Jesus nte an̄wan̄ade ama ọn̄wọn̄ọ ọnọ mme mbet esie ete: “Edieke mbufo ẹben̄ede n̄kpọ ke enyịn̄ Mi, nyenam.” Nte emi oyom ẹbọn̄ akam ẹnọ enye? Baba. Eben̄e oro ebịne Jehovah Abasi​—⁠edi ke enyịn̄ Jesus. (John 14:13, 14; 15:16) Nnyịn iben̄e Abasi ite Eyen Esie, Jesus, ada akwa ukeme ye odudu esie anam n̄kpọ ke ibuot nnyịn.

Didie ke Jesus enyene nneme ye mme ata anditiene enye mfịn? Nte Paul eketịn̄de aban̄a esop mme Christian oro ẹyetde aran ekeme ndinam n̄kpọ nte uwụtn̄kpọ. Enye ama emen enye odomo ye idem ndien Jesus Christ nte ibuot. “Ibuot” ọnọ mme andibuana eken ke idem eke spirit emi se mmọ ẹyomde ebe ke “ikek ye osịp,” m̀mê ebe ke ndutịm ẹnamde ndinọ esop esie udia ye ndausụn̄ eke spirit. (Colossae 2:19) Ke ukem usụn̄ oro, Jesus mfịn amada “enọ [ke] owo,” m̀mê irenowo oro ẹdotde ke n̄kan̄ eke spirit anam n̄kpọ, ndida usụn̄ ke esop, idem ọnọde edinen̄ede ke edide se ẹyomde. Ndutịm idụhe inọ mme andibuana ke esop ndinyene nneme nnennen nnennen ye Jesus m̀mê ndibọn̄ akam nnọ enye, edi mmọ ke akpanikọ ẹkpenyene​—⁠ih, ana⁠—​ẹbọn̄ akam ẹnọ Ete Jesus, Jehovah Abasi.​—⁠Ephesus 4:​8-⁠12.

Didie ke Afo Okpono Jesus?

Kaban̄a edinyan̄a ubonowo, nso akpan udeme ke Jesus enyene ntem! Apostle Peter ama ọdọhọ ete: “Edinyan̄a inyụn̄ itoho ke baba owo kiet efen: koro enyịn̄ baba kiet efen inyụn̄ idụhe eke ẹnọde ke otu owo ke idak ikpaenyọn̄, eke enyenede ndida nnyan̄a nnyịn.” (Utom 4:12) Nte afo ọmọfiọk nte enyịn̄ Jesus edide akpan n̄kpọ?

Ke nditre ndibọn̄ akam nnọ Jesus ke idemesie, nnyịn isụhọkede enye itie. Utu ke oro, nnyịn inọ Jesus ukpono ke ini nnyịn ibọn̄de akam ke enyịn̄ esie. Ndien kpa nte nditọwọn̄ ẹkponode mme ete ye eka mmọ ebe ke ndikop item, nnyịn inọ Jesus Christ ukpono ebe ke ndinam mme ewụhọ esie, akpan akpan obufa ibet ndima kiet eken.​—⁠John 5:23; 13:34.

Akam Oro Ẹnyịmede

Nte afo omoyom ndibọn̄ akam oro ẹnyịmede? Do nam mmọ ẹka ẹbịne Jehovah Abasi, ndien nam oro ke enyịn̄ Eyen esie, Jesus. Diọn̄ọ ban̄a uduak Abasi, nyụn̄ yak akam fo owụt ifiọk oro enyenede do. (1 John 3:21, 22; 5:14) Bọ nsịnudọn̄ to mme ikọ Psalm 66:20: “Ẹkọm Abasi emi mînụkke n̄kpeubọk mi ifep, mînyụn̄ ibọhọ mi ima esie.”

Nte nnyịn ima ikokụt, akam ẹdi orụk utuakibuot oro enyenede Ata Ọkpọsọn̄ Abasi san̄asan̄a. Ebede ke ndinam kpukpru akam nnyịn ẹka ẹbịne Jehovah Abasi, nnyịn iwụt ite ke imanam n̄kpọ iban̄a ndausụn̄ oro Jesus ọkọnọde ke nte ẹkpebọn̄de akam: “Ete nnyịn emi odude ke heaven.”​—⁠Matthew 6:9.

[Mme Ikọ idakisọn̄]