Nsinsi Inemesịt ke Ana Ebet Mbon Oro Ẹnọde Enọ Nte Abasi
“Abasi akamama ererimbot ntem, tutu Enye osio ikpọn̄îkpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.”—JOHN 3:16.
1, 2. (a) Anie edi n̄kponn̄kan Andinọ enọ, ndien nso idi n̄kponn̄kan enọ oro enye ọnọde ubonowo? (b) Ke ndinọ n̄kponn̄kan enọ esie, nso edu ke Abasi okowụt?
JEHOVAH ABASI edi n̄kponn̄kan Andinọ oro ọnọde owo n̄kpọ akan. Ekedi kaban̄a enye, kpa Andibot enyọn̄ ye isọn̄ ke Christian mbet James ekewet ete: “Kpukpru eti edinọ ye kpukpru enọ eke ẹfọnde ẹma ẹto ke enyọn̄, ẹto ke ubọk Ete mme un̄wana ẹsụhọde ẹdi; emi mîkemeke ndikpụhọde, ukpụhọde itie mînyụn̄ ikemeke ndimen Enye nsịn ke mfụt.” (James 1:17) Jehovah edi n̄ko Andinọ n̄kponn̄kan enọ oro akanam ẹnọde. Kaban̄a n̄kponn̄kan enọ oro enye ọnọde ubonowo, ẹketịn̄ ẹte: “Abasi akamama ererimbot ntem, tutu Enye osio ikpọn̄îkpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.”—John 3:16.
2 Anditịn̄ ikọ oro ikedịghe owo efen ikan ikpọn̄îkpọn̄ edibon Eyen Abasi ke idemesie. Ikpọn̄îkpọn̄ edibon eyen emi ete enyenede okpowụt esịtekọm nte ido edide onyụn̄ ama utọ ete oro nte ntọn̄ọ uwem esie ye kpukpru n̄kpọ oro ẹnọde man enye okop inemesịt ke uwem. Edi ima Abasi ikokụreke ke Eyen kiet emi kpọt. Man anam utọ enọ oro atara osịm mme edibotn̄kpọ esie eken okpoyom Abasi owụt ima ke n̄kponn̄kan udomo. (Men Rome 5:8-10 domo.) Emi edi ofụri uyarade oro odude ke ini nnyịn idụn̄ọrede se ikọ oro “ọnọ” enen̄erede ọwọrọ ke udọn̄ikọ emi.
Enọ Abasi eke “Eyen Ima Esie”
3. Ke ẹsiode “Eyen Ima Esie” ẹfep, mmanie efen ẹdara ima oro otode Ete eke heaven?
3 Ke ikpehe ini oro owo mîsiakke, Abasi ama enyene ọkpọkpọ ebuana ye ikpọn̄îkpọn̄ edibon Eyen emi—kpa “Eyen Ima Esie”—ke ebietidụn̄ eke heaven. (Colossae 1:13) Ke ofụri ini oro, Ete ye Eyen ẹma ẹkọri ke ima ye edikere mban̄a kiet eken tutu idụhe ima owo iba ekededi oro ebietde eke mmọ. Mme edibotn̄kpọ eken emi Abasi okobotde ebe ke ikpọn̄îkpọn̄ edibon Eyen esie ẹdi se ẹkemade n̄ko nte mme andibuana ke ubon Jehovah Abasi. Ntre, ima ama akara ke ofụri ubon Abasi. Ẹtịn̄ nte enende ke edisana N̄wed Abasi nte ke “Abasi edi ima.” (1 John 4:8) Ubon Abasi, ke ntre, ama esịne mbon oro Ete, kpa Jehovah Abasi, amade.
4. Didie ke Abasi ndikọnọ Eyen esie abuana se ikponde ikan editaba ọkpọkpọ itie ebuana, ndien ke ibuot mmanie?
4 Mbọbọ oro odude ke ufọt Abasi ye akpa Eyen esie enen̄ede ọsọn̄ tutu editaba utọ n̄kpet n̄kpet itie ebuana oro ekpedi ata ntakurua ke idemesie. (Colossae 1:15) Edi ‘edinọ’ ikpọn̄îkpọn̄ edibon Eyen emi ama ọwọrọ se ikponde ikan Abasi nditre idemesie ọkpọkpọ ebuana ye “Eyen Ima Esie.” Enye ama akam okosịm udomo oro Jehovah okonyịmede Eyen esie akpa ndien ke ntre ẹnamde enye etre ndidu uwem ke ibio ini nte andibuana ke ubon Abasi eke ofụri ererimbot. Emi ekedi n̄kpa ke ibuot mbon oro akananam mîdịghe mme andibuana ke ubon Abasi. Jehovah ikpọnọhọ enọ emi okponde akan oro ke ibuot ubonowo oro oyomde un̄wam akan ikpọn̄îkpọn̄ edibon Eyen esie, emi N̄wed Abasi n̄ko anamde ẹdiọn̄ọ enye nte “ebeiso ke kpukpru se Abasi obotde.”—Ediyarade 3:14.
5. (a) Nso ikedi nnanenyịn nditọ Adam, ndien nso ke unenikpe Abasi okoyom oto kiet ke otu mme anam-akpanikọ nditọ Esie? (b) Nso ke n̄kponn̄kan enọ Abasi okoyom ke n̄kan̄ esie?
5 Akpa owo iba oro, Adam ye Eve, ẹma ẹkpu ndimụm idaha mmọ n̄kama nte mme andibuana ke ubon Abasi. Oro edi idaha emi mmọ ẹkekụtde idemmọ ke ẹma ẹkebịn mmọ ẹsio ke in̄wan Eden ke ntak ẹkenamde idiọkn̄kpọ ye Abasi. Idịghe mmọ nditre ndidi mme andibuana ke ubon Abasi ikpọn̄îkpọn̄, edi mmọ n̄ko ẹma ẹdidu ke idak ubiereikpe n̄kpa. Ke ntre, mfịna ikedịghe sụk edifiak nda nditọ esie nsịn ke mfọn Abasi nte mme andibuana ke ubon esie edi n̄ko edimen ubiereikpe n̄kpa oro Abasi ekebierede mfep ke idem mmọ. Nte ekemde ye nte unenikpe Abasi anamde n̄kpọ, emi eyeyom kiet ke otu mme anam-akpanikọ nditọ Jehovah Abasi akpa nte ukpụhọ, m̀mê ufak. Ntem, akwa mbụme ekedi: Nte owo oro ẹdimekde eyenyịme ndikpa utọ n̄kpa edida n̄kpụhọ oro ke ibuot mme anamidiọk owo? Akande oro, ndinam emi eyeyom utịben̄kpọ ke n̄kan̄ Ata Ọkpọsọn̄ Abasi. Enye n̄ko eyeyom ẹwụt ima Abasi ke usụn̄ oro mînyeneke udomo.—Rome 8:32.
6. Didie ke Eyen Abasi ekekeme ndidot ye mme udọn̄ abuanade idaha oro aban̄ade anamidiọk ubonowo, ndien nso ke enye eketịn̄ aban̄a emi?
6 Edi akpa Eyen Jehovah ikpọn̄îkpọn̄ ekekeme ndidot ye san̄asan̄a udọn̄ oro abuanade idaha emi aban̄ade anamidiọk ubonowo. Enye edi ata mbiet Ete esie eke heaven ke ndiwụt mme andibuana ke ubon Abasi ima tutu eyedi se enye mînyeneke n̄ka ke otu nditọ Abasi. Sia ẹkebotde kpukpru enyene-ifiọk edibotn̄kpọ eken ẹto ke enye, ima oro enye enyenede ọnọ mmọ ke akpanikọ awak. N̄ko-n̄ko, ima edi akakan edu ikpọn̄îkpọn̄ edibon Eyen Jehovah, kpa Jesus Christ, koro “enyeoro edi uyama ubọn̄ Abasi, ye ata mbiet Idemesie.” (Mme Hebrew 1:3) Ke owụtde unyịme esie ndiwụt ima emi ke n̄kponn̄kan udomo ebe ke ndinọ uwem esie ke ibuot anamidiọk ubonowo, Jesus ama asian apostle 12 esie ete: “Eyen Owo ke Idemesie ikedịghe man ẹnam n̄kpọ ẹnọ Enye, edi man Enye anam n̄kpọ ọnọ owo, onyụn̄ ọnọ uwem Esie ndifak ediwak owo.”—Mark 10:45; se n̄ko John 15:13.
7, 8. (a) Nso ikedi uduak Jehovah ke ndidọn̄ Jesus Christ edi ererimbot ubonowo? (b) Nso orụk utom ke Abasi ọkọdọn̄ ikpọn̄îkpọn̄ edibon Eyen esie?
7 Jehovah Abasi ama enyene san̄asan̄a ntak ke ndidọn̄ Jesus edi ebịne ubuene ubuene ererimbot ubonowo emi. Ima Abasi ekedi n̄kpọ oro okonụkde ẹnam emi, koro Jesus ke idemesie ọkọdọhọ ete: “Abasi akamama ererimbot ntem, tutu Enye osio ikpọn̄îkpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem. Koro Abasi ikọdọn̄ke Eyen Esie ke ererimbot ete ekpe ikpe ererimbot, edi ọkọdọn̄, man ẹnyan̄a ererimbot oto ke Enye.”—John 3:16, 17.
8 Ekedi utom unyan̄a uwem ke Jehovah ke ima ọkọdọn̄ ikpọn̄îkpọn̄ edibon Eyen esie aka. Abasi ikọdọn̄ke Eyen esie edi mi man edikpe ikpe ererimbot. Edieke ẹkpedọn̄de Eyen Abasi edi utọ utom ukpe ikpe oro, idaha ofụri ubonowo ikpenyeneke idotenyịn. Ọkpọsọn̄ ubiereikpe oro Jesus Christ akpatan̄ade odori ekpụk ubonowo ke idem ekpedi ubiomikpe n̄kpa. (Rome 5:12) Ntem, otode ke n̄wọrọnda uwụt ima Abasi emi, Abasi ama osio ubiereikpe n̄kpa efep man ọyọhọ ọyọhọ unenikpe oro ẹyomde okpodu.
9. Didie ke David andiwet psalm ekekere aban̄a Jehovah ndinọ enọ?
9 Ke kpukpru n̄kpọ, Jehovah Abasi emenyene onyụn̄ owụt ima nte akakan ikpehe edu esie. Ndien ẹkeme nditịn̄ nte enende nte ke Abasi ke ima ọnọ mme anam-akpanikọ andituak ibuot nnọ enye ke isọn̄ se ikande n̄kpọ oro ẹyomde, adan̄a nte nti n̄kpọ ẹbuanade. David andiwet psalm ama enyene ukem ekikere oro aban̄a n̄kpọ oro ke ini enye ọkọdọhọde Abasi ete: “Ufọn fo okpon didie emi afo onịmde ọnọ mmọ eke ẹbakde fi, onyụn̄ anamde ọnọ mmọ eke ẹbuọtde idemmọ ye afo ke iso nditọ owo!” (Psalm 31:19) Ke ini ukara David ke idụt Israel—ih, ke ofụri uwem esie nte owo idụt oro Abasi ekemekde san̄asan̄a—enye ama esiwak ndikụt eti ido Jehovah. Ndien David ama okụt nte emi edide uwak uwak.
Israel Ataba Akwa Enọ Otode Abasi
10. Ntak emi Israel eset mîkebietke idụt efen ekededi ke isọn̄-ọ?
10 Ke ndinyene Jehovah nte Abasi esie, Israel eset ikebietke idụt efen ekededi ke isọn̄. Ebede ke prọfet Moses nte esịne-ufọt, Jehovah ama ada mme andito ubon Abraham, Isaac, ye Jacob edisịn ke itie ebuana ye enye. Enye ikanamke n̄kpọ ye idụt efen ekededi ke utọ usụn̄ emi. Ke ntre, andiwet psalm eke odudu spirit ama ekeme nditịn̄ ete: “Emi etịn̄de ikọ esie ọnọ Jacob; etịn̄ mme ewụhọ esie ọnọ Israel. Enye ikanamke ntem ye baba idụt kiet: ndien amaedi mme ikpe esie, mmọ ifiọkke mmọ. Mbufo ẹtoro Jehovah.”—Psalm 147:19, 20.
11. Tutu osịm ini ewe ke Israel ekenyene idaha mfọn esie ye Abasi, ndien didie ke Jesus okowụt ukpụhọde ke itie ebuana mmọ?
11 Idụt Israel eke obụk ama akaiso ndidu ke itie mfọn emi ye Abasi tutu osịm ini emi enye ekesịnde Jesus Christ nte Messiah ke isua 33 eke Eyo Nnyịn. Emi ke akpanikọ ekedi usen mfụhọ ọnọ Israel ke ini Jesus okofioride eseme eseme mfiori emi ete: “O Jerusalem, Jerusalem, emi owotde mme prọfet, onyụn̄ ọtọn̄ọde mmọemi ẹdọn̄de ẹtiene fi ke itiat. Adan̄a ediwak ini didie ke n̄koyom ndibon nditọ fo ọtọkiet, kpa nte unen obonde nditọ esie ke idak mba esie, ndien mbufo ikonyịmeke. Sese, ẹyak ufọk mbufo ẹkpọn̄ ẹnọ mbufo nte ndon.” (Matthew 23:37, 38) Mme ikọ Jesus ẹkewụt ẹte ke idụt Israel oro, okposụkedi ke akpa ekenyenede mfọn Jehovah, ama ataba san̄asan̄a enọ oro otode Abasi. Didie ke ekedi ntre?
12. Mmanie ẹkedi ‘nditọ Jerusalem,’ ndien Jesus ndibon mmọ ọtọkiet ọkọwọrọ nso?
12 Ke ndida ikọ oro “nditọ,” Jesus n̄kukụre eketịn̄ aban̄a mme Jew eke obụk oro ẹkenade mbobi, ẹmi ẹkedụn̄de ke Jerusalem ẹnyụn̄ ẹdade ke ibuot ofụri idụt mme Jew oro. Man Jesus atan̄ ‘nditọ Jerusalem’ obon ọtọkiet, emi ọkpọwọrọ enye ndida “nditọ” emi ndisịn ke obufa ediomi ye Abasi, ye enye ke idemesie anamde n̄kpọ nte Esịne-ufọt ke ufọt Jehovah ye mme Jew eke obụk ẹmi. (Jeremiah 31:31-34) Emi okpokosụn̄ọ ke edifen mme idiọkn̄kpọ, koro oro ekedi nte ima Abasi atarade okosịm. (Men Malachi 1:2 domo.) Emi ke akpanikọ ekedi akwa enọ.
13. Israel ndisịn Eyen Abasi okosụn̄ọ ke nditaba nso, edi ntak emi idatesịt Jehovah mîkebịtke?
13 Ke n̄kemuyo ye ntịn̄nnịm Ikọ esie, Jehovah ama ebet ke adan̄a anyanini oro ekekemde mbemiso anamde enọ edikabade ndi mme andibuana ke obufa ediomi atara osịm mbon oro mîdịghe mme Jew. Edi ke ndisịn Eyen Abasi, kpa Messiah, idụt Israel eke obụk ama ataba akwa enọ emi. Jehovah ke ntre ama anam edisịn oro ẹsịnde Eyen esie mi ada ukem ukem ke ndinam enọ emi atara osịm mbon oro ẹwọrọde ẹkpọn̄ idụt Jew. Ke usụn̄ oro, idatesịt oro Jehovah enyenede nte Akwa Andinọ ama akaiso ye unana editre.
Inemesịt ke Ndinọ
14. Ntak emi Jesus Christ edide edibotn̄kpọ oro adatde esịt akan ke ofụri ekondo?
14 Jehovah edi “Abasi inemesịt.” (1 Timothy 1:11, NW) Ndinọ mbon en̄wen n̄kpọ edi n̄kpọ kiet oro anamde enye okop inemesịt. Ndien ke akpa isua ikie E.N., (C.E.) ikpọn̄îkpọn̄ edibon Eyen esie ama ọdọhọ ete: “Ọfọn [inemesịt odu ke,” NW] ndinọ akan ndibọ.” (Utom 20:35) Ke n̄kemuyo ye edumbet emi, Jesus ama akabade edi edibotn̄kpọ Andibot oro enemde esịt akan ke ofụri ekondo. Didie ke ekedi ntre-e? Ọfọn, ke edide udiana ọnọ Jehovah ke idemesie, Jesus Christ ọmọnọ n̄kponn̄kan enọ oro akanam ẹnọde ke ndinọ uwem esie ke ufọn ubonowo. Ke akpanikọ, enye edi ‘okop-inemesịt Andikara.’ (1 Timothy 6:15) Jesus ke ntre anam owụt se enye eketịn̄de aban̄a inemesịt oro okponde akan ke ndinọnọ.
15. Uwụtn̄kpọ nso ke Jehovah mîditreke ndidi tutu amama, ndien didie ke mme enyene-ifiọk edibotn̄kpọ esie ẹkeme ndinyene udomo inemesịt esie?
15 Ebede ke Jesus Christ, Jehovah Abasi tutu amama iditreke ndidi atat-ubọk Andinọ kpukpru enyene-ifiọk edibotn̄kpọ esie enọ, eyenyụn̄ edi mfọnn̄kan uwụtn̄kpọ ọnọ mmọ kpukpru ini ke ndinọ enọ. Idem kpa nte Abasi okopde inemesịt ke ndinọ mbon en̄wen nti enọ, ntre enye emesịn edu ntatubọk ke esịt mme enyene-ifiọk edibotn̄kpọ esie ke isọn̄. Ke usụn̄ oro mmọ ẹyebiet ẹnyụn̄ ẹkpebe edu esie ẹnyụn̄ ẹnyene udomo inemesịt oro enye enyenede. (Genesis 1:26; Ephesus 5:1) Nte odotde, Jesus ama asian mme anditiene enye ete: “Ẹnọ, ndien ẹyenọ mbufo; ẹyedomo ọyọhọ udomo eke ẹmịn̄de osụhọde, eke ẹnyen̄ede, onyụn̄ ọyọhọde ọduọhọ, ẹsịn mbufo ke ọfọn̄.”—Luke 6:38.
16. Nso enọ ke Jesus eketịn̄ aban̄a ke Luke 6:38?
16 Jesus ama ọnọ mme mbet esie mfọnn̄kan uwụtn̄kpọ ke ndinam edu unọ ẹnọ edi usụn̄ edinam. Enye ama ọdọhọ ete ke mme andibọ utọ enọ oro ke n̄kan̄ mmọ ẹyenam n̄kpọ ke eti usụn̄ ẹban̄a oro. Ke Luke 6:38, Jesus iketịn̄ke san̄asan̄a iban̄a edinọ mme n̄kpọ obụkidem. Enye ikọdọhọke mbet esie ẹbịne usụn̄ edinam oro akpanamde mmọ ẹbuene ke n̄kan̄ obụkidem. Utu ke oro, enye ọkọnọ mmọ item aban̄a usụn̄ edinam oro ọkpọnọde mmọ ekikere unyene uyụhọ ke n̄kan̄ eke spirit.
Ẹn̄wọn̄ọ Ndinọ Nsinsi Inemesịt
17. Nso utịbe utịbe enọ ke Abasi ọnọ Mme Ntiense esie ke mme akpatre usen ẹmi?
17 Nso utịbe utịbe enọ ke Jehovah, kpa Ibuot kpukpru edibotn̄kpọ, ọkọnọ Mme Ntiense esie ntem ke mme akpatre usen ẹmi! Enye ọmọnọ nnyịn eti mbụk Obio Ubọn̄ esie. Nnyịn imenyene akwa ifet ndidi mme anditan̄a Obio Ubọn̄ Abasi oro ẹma ẹkewụk ke ubọk Eyen esie, Jesus Christ, oro akarade. (Matthew 24:14; Mark 13:10) Ndinam idi Mme Ntiense Ata Edikon̄ Abasi oro itịn̄de ikọ ke uyo edi enọ oro mînyeneke mbiet, ndien mfọnn̄kan usụn̄ oro nnyịn ikemede ndinọ enọ ke ndikpebe Abasi edi ndibuana etop Obio Ubọn̄ oro ye mbon en̄wen mbemiso utịt idiọk editịm n̄kpọ emi edide.
18. Nte Mme Ntiense Jehovah, nso ke ana nnyịn inọ mbon en̄wen?
18 Apostle Paul ama etịn̄ otụk nsọn̄ọn̄kpọ oro enye okosobode ke ini akatan̄ade etop Obio Ubọn̄ ọnọ mbon en̄wen. (2 Corinth 11:23-27) Mme Ntiense Jehovah eyomfịn n̄ko ẹsobo nsọn̄ọn̄kpọ ẹnyụn̄ ẹkpọnọde ọkpọkpọ n̄kpọ oro mmọ ẹmade ẹnịm n̄kan̄ kiet ke ukeme ndinọ mbon en̄wen idotenyịn Obio Ubọn̄. Ekeme ndidi nnyịn ikpamaha ndiwaha ke enyịnusụn̄ mme owo, akpan akpan edieke ikopde bụt. Edi nte mme anditiene Christ, nnyịn ikemeke ndifụmi, m̀mê ndifehe n̄kpọn̄, ifet edinọ mbon en̄wen mme n̄kpọ eke spirit ebe ke ndikwọrọ “gospel Ubọn̄ Abasi emi.” (Matthew 24:14) Oyom nnyịn inyene ukem edu oro Jesus ekenyenede. Ke ini okosobode n̄kpa, enye ama ọbọn̄ akam ete: “O Ete Mi, . . . yak okûdi nte Ami nnyịmede; edi yak edi nte Afo onyịmede.” (Matthew 26:39) Ke n̄kpọ aban̄ade edinọ mbon en̄wen eti mbụk Obio Ubọn̄, ana mme asan̄autom Jehovah ẹnam uduak Abasi, idịghe eke mmọ—se enye oyomde, idịghe se idemmọ ẹyomde.
19. Mmanie ẹdi Mme Andinyene “nsinsi idụn̄,” ndien didie ke nnyịn ikeme ndinam ufan ye mmọ?
19 Utọ edinọ oro eyebuana ini ye inyene nnyịn, edi ke ndidi mbon oro ẹnọde ẹnọ nte Abasi, nnyịn iyekụt ite ke inemesịt nnyịn edidi ke nsinsi. Ntak-a? Koro Jesus ọkọdọhọ ete: “Ẹda mammon ukwan̄ido [“inyene ererimbot,” New International Version] ẹkọ mme ufan ẹnịm ẹnọ idem mbufo; man ke ini oro ẹbede ẹfep, mmọ oro ẹkpeda mbufo ẹdụk ke nsinsi idụn̄.” (Luke 16:9) Ekpedi ubieresịt nnyịn ndida “mammon ukwan̄ido” nnam ufan ye Mme Andinyene “nsinsi idụn̄.” Nte Andibot, Jehovah enyene kpukpru n̄kpọ, ndien akpa edibon Eyen esie etiene abuana ke inyene oro nte Adia-akpa kpukpru n̄kpọ. (Psalm 50:10-12; Mme Hebrew 1:1, 2) Man inam ufan ye mmọ, ana nnyịn ida inyene inam n̄kpọ ke usụn̄ oro enyenede unyịme mmọ. Emi abuana edinyene nnennen edu ke ndida mme n̄kpọ obụkidem nnam n̄kpọ ke ufọn mbon en̄wen. (Men Matthew 6:3, 4; 2 Corinth 9:7 domo.) Nnyịn imekeme ndida okụk nnam n̄kpọ ke nnennen usụn̄, ke ndisọn̄ọ itieufan nnyịn ye Jehovah Abasi ye Jesus Christ. Ke uwụtn̄kpọ, nnyịn inam emi ke ndida se nnyịn inyenede ye idatesịt n̄n̄wam mme owo oro ẹnen̄erede ẹdu ke unana ye ke ndinọ inyene nnyịn ke ndimenede mme ufọn n̄kpọ Obio Ubọn̄ Abasi.—Mme N̄ke 19:17; Matthew 6:33.
20. (a) Ntak emi Jehovah ye Jesus ẹkemede ndida nnyịn ndụk ke “nsinsi idụn̄,” ndien m̀mọ̀n̄ ke mme itie ẹmi ẹkeme ndidi? (b) Nso ifet ididi eke nnyịn ke nsinsi nsinsi?
20 Ke ntak oro mmọ mîkemeke ndikpa, Jehovah Abasi ye Jesus Christ ẹkeme ndidi ufan nnyịn ke nsinsi ẹnyụn̄ ẹkeme ndida nnyịn ndụk ke “nsinsi idụn̄.” Emi edi ntre, edide mmọemi ẹdidu ke heaven ye kpukpru ndisana angel m̀mê ke isọn̄ emi ke Paradise oro ẹfiakde ẹwụk. (Luke 23:43) Ima ima enọ oro Abasi ọnọde Jesus anam kpukpru emi ekeme ndidu. (John 3:16) Ndien Jehovah Abasi eyeda Jesus Christ ndikaiso nnọ kpukpru edibotn̄kpọ enọ, adade osịm n̄wọrọnda inemesịt Esie. Ke akpanikọ, ke nsinsi nsinsi nnyịn ke idem nnyịn iyenyene ifet edinọ enọ ke idak itie edikara ofụri ekondo Jehovah Abasi ye itie edidem ikpọn̄îkpọn̄ edibon Eyen esie, kpa Ọbọn̄ ye Andinyan̄a nnyịn, Jesus Christ. Emi eyesụn̄ọ ke nsinsi inemesịt ọnọ kpukpru mbon oro ẹnọde enọ nte Abasi.
Nte Afo Emeti?
◻ Nso ke n̄kponn̄kan enọ Abasi okoyom ke n̄kan̄ esie?
◻ Nso utọ utom ke Abasi ọkọdọn̄ Eyen esie?
◻ Anie edi edibotn̄kpọ oro okopde inemesịt akan ke ofụri ekondo, ndien ntak-a?
◻ Didie ke mbon oro ẹnọde enọ nte Abasi ẹdinyene nsinsi inemesịt?
[Ndise ke page 10]
Nte afo omowụt esịtekọm aban̄a enọ oro Abasi ọnọde Eyen esie nte uwa ufak?
[Mme Ndise ke page 12]
Nte afo emebem iso oyom Obio Ubọn̄ Abasi ke ndikwọrọ eti mbụk ye ke ndida inyene fo n̄n̄wam utom oro?