N̄kukụre Usụn̄ Adade Esịm Nsinsi Uwem
“Ami ndi usụn̄ ye akpanikọ ye uwem.”—JOHN 14:6.
1, 2. Jesus ekemen usụn̄ adade esịm nsinsi uwem odomo ye nso, ndien nso ke uwụtn̄kpọ esie ọkọwọrọ?
KE ỌWỌRỌETOP Ukwọrọikọ esie oro ke Obot, Jesus ekemen usụn̄ adade esịm nsinsi uwem odomo ye usụn̄ oro owo otode inuaotop odụk. Tịm fiọk ete ke Jesus ama ọsọn̄ọ etịn̄ ete ke usụn̄ adade esịm uwem mi imemke, ọdọhọde ete: “Ẹbe ke mfafaha inua-otop ẹdụk: koro inua-otop emi adade owo aka nsobo atara, ọkpọusụn̄ onyụn̄ an̄wan̄a; mme andidụk ke esịt ẹnyụn̄ ẹwak. Koro inua-otop emi adade owo esịm [nsinsi] uwem afafaha, usụn̄ onyụn̄ esịre; ndien mme andikụt enye iwakke.”—Matthew 7:13, 14.
2 Nte afo ọmọfiọk se uwụtn̄kpọ emi ọwọrọde? Ndi enye iyarakede nte ke usụn̄, m̀mê ọkpọusụn̄, kiet kpọt odu, emi adade esịm uwem ye nte ke oyoyom ata ntịn̄enyịn oto nnyịn mbak idiyo ikpọn̄ usụn̄ adade esịm uwem do? Nso, ndien, idi n̄kukụre usụn̄ adade esịm nsinsi uwem?
Udeme Jesus Christ
3, 4. (a) Didie ke Bible owụt akpan udeme oro Jesus enyenede ke edinyan̄a nnyịn? (b) Ini ewe ke Abasi ekebem iso ayarade nte ke ubonowo ekeme ndinyene nsinsi uwem?
3 Nte an̄wan̄ade, Jesus enyene akpan udeme ke ebuana ye usụn̄ oro, nte apostle esie Peter ọkọdọhọde: “Edinyan̄a inyụn̄ itoho ke baba owo kiet efen: koro enyịn̄ baba kiet efen inyụn̄ idụhe [ke mîbọhọke eke Jesus] eke ẹnọde ke otu owo ke idak ikpa-enyọn̄, eke ẹnyenede ndida nnyan̄a nnyịn.” (Utom 4:12) Ukem ntre, apostle Paul ama ọdọhọ ete: “Enọ Abasi edi nsinsi uwem ke Christ Jesus Ọbọn̄ nnyịn.” (Rome 6:23) Jesus ke idemesie ama ayarade ete ke n̄kukụre usụn̄ adade esịm nsinsi uwem ebe ke imọ, koro enye ọkọdọhọ ete: “Ami ndi usụn̄ ye akpanikọ ye uwem.”—John 14:6.
4 Ntre edi akpan n̄kpọ nnyịn ndinyịme udeme oro Jesus enyenede ke ndinam ẹkeme ndidu nsinsi uwem. Ke ntre, ẹyak nnyịn itịm idụn̄ọde udeme esie ketket. Ke Adam ama akanam idiọkn̄kpọ, ndi afo ọmọfiọk ini emi Jehovah Abasi okowụtde nte ke ubonowo ekeme ndidara nsinsi uwem? Ekedi ke ndondo oro Adam akanamde idiọkn̄kpọ. Ẹyak nnyịn idụn̄ọde idahaemi nte ẹkebemde iso ẹtịn̄ ẹban̄a edinọ Jesus Christ nte Andinyan̄a ubonowo.
Mfri Oro Ẹken̄wọn̄ọde
5. Didie ke nnyịn ikeme ndidiọn̄ọ urụkikọt oro akabian̄ade Eve?
5 Jehovah Abasi ama ada ndamban̄a usem anam ẹdiọn̄ọ Andinyan̄a oro ẹken̄wọn̄ọde. Enye akanam emi ke ini enye eketịn̄de ubiereikpe esie ọnọ “urụkikọt” emi eketịn̄de ikọ ye Eve onyụn̄ esịnde enye ọsọn̄ ibuot ye Abasi ebe ke ndidia mfri oro ẹkekpande. (Genesis 3:1-5) Edi akpanikọ, urụkikọt oro ikedịghe ata urụkikọt. Enye ekedi okopodudu edibotn̄kpọ eke spirit emi ẹnamde ẹdiọn̄ọ ke Bible nte “akani urụkikọt oro ẹkotde enye ẹte, andidori ikọt Abasi ikọ ye Satan.” (Ediyarade 12:9) Satan akada usụhọde unam emi nte anditịn̄ ikọ ke ibuot esie nditap Eve. Ntem, ke ndibiere ikpe nnọ Satan, Abasi ama ọdọhọ enye ete: “Nyonyụn̄ nsịn usua ke ufọt fo ye n̄wan, ye ke ufọt [mfri, NW] fo ye [mfri] esie: enye [mfri n̄wan] ayanuak fi ibuot, afo oyonyụn̄ anuak enye nditịn̄-ikpat.”—Genesis 3:15.
6, 7. (a) Anie edi n̄wan oro amande “mfri” oro? (b) Anie edi Mfri oro ẹken̄wọn̄ọde, ndien nso ke enye anam?
6 Anie edi “n̄wan” emi Satan asuade mi? Kpa nte ẹyararede “akani urụkikọt oro” ke Ediyarade ibuot 12, ntre ke ẹyarade n̄wan emi Satan asuade. Fiọk ete ke ẹdọhọ ke Edi 12 ufan̄ikọ 1 ẹte ke n̄wan emi ‘esịne utịn ke idem, ọfiọn̄ onyụn̄ odu enye ke idak ikpat, anyanya ntantaọfiọn̄ duopeba onyụn̄ odoro enye ke ibuot.’ N̄wan emi ada aban̄a esop Abasi eke heaven emi mme anam-akpanikọ angel ẹnamde, ndien ‘eyeneren’ oro enye amande ada aban̄a Obio Ubọn̄ Abasi, emi Jesus Christ akarade nte Edidem.—Ediyarade 12:1-5, The Jerusalem Bible.
7 Anie, ndien, edi “mfri,” m̀mê eyen, n̄wan emi, oro ẹtịn̄de ẹban̄a ke Genesis 3:15, emi edinuakde Satan “ibuot,” ke ntem ọtọde enye ita n̄kpa? Edi enye emi Abasi okosiode ke heaven ọdọn̄ man edimana ke utịbe utịbe usụn̄ oto eyenan̄wan emi mîfiọkke erenowo, ih, Jesus. (Matthew 1:18-23; John 6:38) Ediyarade ibuot 12 ayarade ete ke nte Andikara eke heaven oro ẹnamde eset, Mfri emi, Jesus Christ, ayada usụn̄ ke ndikan Satan ndien, nte Ediyarade 12:10 ọdọhọde, oyowụk “ubọn̄ Abasi nnyịn ye odudu Christ Esie.”
8. (a) Nso obufa n̄kpọ ke Abasi ọkọnọ ke ebuana ye akpasarade uduak esie? (b) Mmanie ẹnam obufa ukara Abasi?
8 Obio Ubọn̄ emi ke ubọk Jesus Christ edi obufa n̄kpọ emi Abasi ọnọde ke ebuana ye akpasarade uduak esie kaban̄a ubonowo ndidara nsinsi uwem ke isọn̄. Ke Satan ama ọkọsọn̄ ibuot, Jehovah inikiet inikiet ama anam ndutịm ndisio kpukpru ndiọi utịp idiọkido mfep ebe ke obufa ukara Obio Ubọn̄ emi. Ke ini okodude ke isọn̄ Jesus ama ayarade ete ke imọ idikarake ukara emi ikpọn̄. (Luke 22:28-30) Ẹkenyene ndimek mbon en̄wen ke otu ubonowo, ndien mmọ ẹmi ẹyediana ye enye ke heaven ndibuana ke ndikara, ndien ke ntem mmọ ẹdinam udiana ubak mfri n̄wan oro. (Galatia 3:16, 29) Ke Bible ẹnọ ibat mbon oro ẹdidide mme ekemmọ andikara ye Jesus—ẹdade kpukpru ẹto mme anamidiọk ubonowo ke isọn̄—nte 144,000.—Ediyarade 14:1-3.
9. (a) Ntak okoyomde Jesus owụt idem ke isọn̄ nte owo? (b) Didie ke Jesus akabiat mme utom Devil?
9 Nte ededi, mbemiso Obio Ubọn̄ oro ọtọn̄ọde ndikara, ekedi akpan n̄kpọ nte akpan ubak mfri oro, Jesus Christ, owụt idem ke isọn̄. Ntak-a? Koro Jehovah Abasi ama emek enye nte Enye emi ‘edibiatde [m̀mê, edikande] mme utom Devil.’ (1 John 3:8) Mme utom Satan ẹma ẹsịne enye ndikatap Adam anam idiọkn̄kpọ, emi akadade ubiomikpe idiọkn̄kpọ ye n̄kpa ọsọk kpukpru nditọ Adam. (Rome 5:12) Jesus ama abiat utom Devil emi ebe ke ndinọ uwem Esie nte ufak. Ntem enye ama ọnọ isọn̄ kaban̄a edisio ubonowo ke ubiomikpe idiọkn̄kpọ ye n̄kpa onyụn̄ eberede usụn̄ ọnọ nsinsi uwem.—Matthew 20:28; Rome 3:24; Ephesus 1:7.
Se Ufak Anamde
10. Didie ke Jesus ye Adam ẹkedi ukem?
10 Sia ẹkesiode uwem Jesus ke heaven ẹdisịn ke idịbi n̄wan, enye akamana nte mfọnmma owo, idiọkn̄kpọ Adam ikeyetke enye ndek. Enye ama enyene ukeme ndidu uwem ke nsinsi ke isọn̄. Kpasụk ntre, ẹkebot Adam nte mfọnmma owo ye idotenyịn edidara nsinsi uwem ke isọn̄. Apostle Paul ekenyene nte owo iba ẹmi ẹdide ukem ke ekikere ke ini enye ekewetde ete: “Adam, akpa owo, akabade edi ukpọn̄ emi odude uwem: akpatre Adam [Jesus Christ] edi spirit emi ọnọde uwem. Akpa owo okoto isọn̄, eke ntan-isọn̄; udiana-akpa owo oto ke heaven.”—1 Corinth 15:45, 47.
11. (a) Nso utịp ke Adam ye Jesus ẹkenyene ke idem ubonowo? (b) Didie ke nnyịn ikpese uwa Jesus?
11 Nte owo iba ẹmi ẹdide ukem—n̄kukụre mfọnmma irenowo iba ẹmi akanam ẹdude uwem ke isọn̄—edi se ẹsọn̄ọde ke Bible ndidọhọ nte ke Jesus “ama ọnọ idemesie nte n̄kemn̄kem ufak kaban̄a kpukpru owo.” (1 Timothy 2:6, NW) Jesus ekedi n̄kemn̄kem ye anie? Kamse, ye Adam ke ini enye okosụk edide mfọnmma owo! Idiọkn̄kpọ akpa Adam ama ada ekesịm edibiom ofụri ekpụk ubonowo ikpe n̄kpa. Uwa “akpatre Adam” ọnọ isọn̄ kaban̄a edinyan̄a nsio ke idiọkn̄kpọ ye n̄kpa, man nnyịn ikpodu uwem ke nsinsi. Uwa Jesus ọsọn̄ urua didie ntem! Apostle Peter ama ewet ete: “Ikadaha mbiara n̄kpọ, kpa silver ye gold, ifak mbufo.” Utu ke oro, Peter ama anam an̄wan̄a ete: “Ẹkeda iyịp eke ọsọn̄de urua ẹfak mbufo, nte iyịp eyen-erọn̄ eke ananade ndo onyụn̄ ananade ntọi, kpa eke Christ.”—1 Peter 1:18, 19.
12. Didie ke Bible anam edibiat ubiomikpe n̄kpa nnyịn mfep an̄wan̄a?
12 Bible obụk ediye ediye aban̄a usụn̄ oro ẹdibiatde ubiomikpe n̄kpa ekpụk ubonowo ifep, ọdọhọde ete: “Otode ke ndudue kiet [eke Adam] ke ẹbiom kpukpru owo ikpe; kpa ntre n̄ko oto ke utom edinen ido kiet [ofụri edinam nsọn̄ọnda Jesus, adade ekesịm n̄kpa esie] ke ẹnọ mfọn esịm kpukpru owo, ẹtebe mmọ ikpe ke uwem. Koro nte ẹkedade nsọn̄ibuot owo kiet [eke Adam] ẹnam ediwak owo ẹkabade ẹdi mme idiọk owo, kpa ntre ke ẹyeda nsụk-ibuot owo kiet [eke Jesus] ẹnam ediwak owo ẹkabade ẹdi ndinen owo.”—Rome 5:18, 19.
Ubọn̄ Ubọn̄ Idotenyịn
13. Ntak emi ediwak owo ẹkerede nte mmọ ẹkerede ẹban̄a ndidu uwem ke nsinsi?
13 Enọ Abasi emi ekpenyene ndinam nnyịn inen̄ede ikop inemesịt! Ndi afo ukopke nduaidem nte ke ẹnọ Andinyan̄a? Ke ini ẹkebụpde inikiet ke ndụn̄ọde oro n̄wedmbụk n̄kpọntịbe kiet akanamde ke akwa obio United States kiet ẹte, “Ndi idotenyịn edidu uwem ke nsinsi edemede fi udọn̄?,” ke n̄kpaidem mbahade 67.4 eke ikie ke otu mbon oro ẹkenọde ibọrọ ẹkebọrọ, “Baba.” Ntak emi mmọ ẹkedọhọde ke mmimọ iyomke ndidu uwem ke nsinsi? Nte an̄wan̄ade edi koro uwem ke isọn̄ idahaemi ọyọhọ ye ata ediwak mfịna. Owo kiet ọkọdọhọ ete: “Mmaha ekikere editie nte owo isua 200.”
14. Ntak emi ndidu uwem ke nsinsi edinọde ọyọhọ inemesịt?
14 Edi, Bible itịn̄ke iban̄a ndidu uwem ke nsinsi ke ererimbot emi mme owo ẹsobode udọn̄ọ, usọn̄, ye mme n̄kpọ mmọn̄eyet eken. Baba, koro nte Andikara Obio Ubọn̄ Abasi, Jesus ayabiat kpukpru orụk mfịna oro Satan adade edi efep. Nte Bible ọdọhọde, Obio Ubọn̄ Abasi “ayanuak onyụn̄ ama kpukpru” ufịk ufịk ukara ererimbot emi. (Daniel 2:44) Ke ini oro, ke ibọrọ akam oro Jesus ekekpepde mme anditiene enye, “ẹyenam uduak Abasi ke isọn̄ kpa nte ẹnamde ke heaven.” (Matthew 6:9, 10, Today’s English Version) Ke obufa ererimbot Abasi, ke ẹma ẹkekpọri kpukpru idiọkido ẹfep ke isọn̄, ẹyeda mme ufọn ufak Jesus ẹnam n̄kpọ ọyọhọ ọyọhọ. Ih, ẹyenam kpukpru owo oro ẹdotde ẹfiak ẹnyene mfọnmma nsọn̄idem!
15, 16. Mme idaha ewe ẹdidu ke obufa ererimbot Abasi?
15 Itie Bible emi eyenyene ebuana ye mbon oro ẹdụn̄de ke obufa ererimbot Abasi: “Obụk-idem esie akabade nsek akan eke eyenọwọn̄; enye ayafiak ke mme usen uyen esie.” (Job 33:25) Un̄wọn̄ọ Bible efen oyosu n̄ko: “Enyịn ayan̄wan̄a mme nnan, utọn̄ oyonyụn̄ esịrede mbon inan. Ndien mbụn̄ọ eyenek nte edop, edeme imụm oyonyụn̄ ọkwọ.”—Isaiah 35:5, 6.
16 Kam kere: Inamke n̄kpọ m̀mê nnyịn idi isua ifan̄ ini oro, edide idi isua 80, 800, m̀mê akam akande oro, idem nnyịn ayaka iso enyene ata eti nsọn̄idem! Edidi nte Bible ọn̄wọn̄ọde ete: “Andidụn̄ ididọhọke ite, Ndọdọn̄ọ.” Ke ini oro un̄wọn̄ọ emi oyosu n̄ko: “[Abasi] ọyọkwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep.”—Isaiah 33:24; Ediyarade 21:3, 4.
17. Nso mme n̄kpọ ke nnyịn ikeme ndidori enyịn mme owo ndinam ke obufa ererimbot Abasi?
17 Ke obufa ererimbot oro, nnyịn iyekeme ndida utịbe utịbe mfre nnyịn nnam n̄kpọ ke usụn̄ oro Andibot akaduakde ke ini enye akanamde enye ye ukeme ubọ ukpep oro mînyeneke adan̄a. Ih, kam kere ban̄a mme utịbe utịbe n̄kpọ oro nnyịn ikemede ndinam! Mme anana-mfọnmma owo ẹmekam ẹda mme n̄kpatan̄a n̄kpọ isọn̄ ẹnam kpukpru n̄kpọ oro nnyịn ikụtde nte ẹkande nnyịn ẹkụk—mme urụk ukopikọ oro ẹkamade-kama ẹsan̄a, mme ukwak utịn̄ikọ, mme n̄kanika itọn̄ubọk, ekpri ukwak ubọ etop, kọmputa, ubomofụm, ih, n̄kpọ ekededi. Owo ikadaha mme n̄kpọ oro mmọ ẹdade ẹto ebiet oro oyomde usụn̄ ke ekondo ibot ndomokiet ke otu mmọ. Ye anana-utịt uwem anade ke iso ebet nnyịn, ukeme edisio n̄kpọ ndi idinyeneke adan̄a ke Paradise isọn̄ oro edide!—Isaiah 65:21-25.
18. Ntak emi uwem mîdidehede ifek owo ke obufa ererimbot Abasi?
18 Uwem idinyụn̄ ifekke owo. Idem idahaemi nnyịn imesidori enyịn ndidia udia nnyịn efen, idem okposụk ekemede ndidi nnyịn ima idia udia ediwak tọsịn ini. Ke mfọnmma eke owo, nnyịn iyenen̄ede idara ndinem n̄kpọ oro Paradise isọn̄ edision̄ode edi. (Isaiah 25:6) Nnyịn iyonyụn̄ inyene nsinsi inemesịt eke edise mban̄a akpakịp uwem unam ye edidara mme n̄wọrọnda usoputịn, ikpọ obot, mme akpa mmọn̄, ye mme itịghede. Ke akpanikọ, uwem ididehede inana inem ke obufa ererimbot Abasi!—Psalm 145:16.
Ndinam Se Abasi Oyomde
19. Ntak owụtde eti ibuot ndinịm ke akpanikọ nte ke odu se ẹyomde man ibọ enọ Abasi edide uwem?
19 Ndi afo okpodori enyịn ndibọ akwa enọ Abasi eke nsinsi uwem ke Paradise ye unana ukeme ekededi ke n̄kan̄ fo? Ndi iwụtke eti ibuot nte ke Abasi okpoyom n̄kpọ? Ke akpanikọ owụt. Ke nditịm ntịn̄, Abasi n̄kukụre itopke-top enọ oro inọ nnyịn. Enye anyanyan ọnọ nnyịn, edi ana nnyịn inyanade ibịne inyụn̄ ibọ enye. Ih, emi oyom ukeme. Afo emekeme ndibụp kpa mbụme oro ọbọn̄ owo inyene okobụpde Jesus: “Ndinam nso eti n̄kpọ man nnyene nsinsi uwem?” Mîdịghe afo emekeme ndibụp mbụme oro ke usụn̄ emi ekpeme ufọk-n̄kpọkọbi owo Philippi okobụpde apostle Paul ete: “Ndinam nso man ẹnyan̄a mi?”—Matthew 19:16; Utom 16:30.
20. Nso idi akpan n̄kpọ oro ẹyomde kaban̄a nsinsi uwem?
20 Ke okoneyo oro ekebemde n̄kpa esie iso, Jesus ama asiak n̄kpọ kiet oro ẹyomde ke akam oro enye ọkọbọn̄de ọnọ Ete esie ete: “Ndien nsinsi uwem oro edi ndifiọk Fi, ata Abasi kierakiet, ye Enye emi Afo ọkọdọn̄de, kpa Jesus Christ.” (John 17:3) Ndi iwụtke eti ibuot ndiyom nnyịn inyene ifiọk Jehovah, emi anamde nsinsi uwem ekeme ndidu, ye eke owo emi akakpade ọnọ nnyịn, Jesus Christ? Edi, ẹyom se ikande sụk edinyene utọ ifiọk oro.
21. Didie ke nnyịn iwụt nte ke imanam se ẹyomde emi edide ediwụt mbuọtidem?
21 Bible ọdọhọ n̄ko ete: “Owo eke ọbuọtde idem ke Eyen enyene nsinsi uwem.” Ekem enye adian ete: “Owo eke mîbuọtke idem ye Eyen idikwe uwem, edi iyatesịt Abasi osụk ọkọbọ enye.” (John 3:36) Afo emekeme ndiwụt ke ọmọbuọt idem ye Eyen ebe ke ndinam mme ukpụhọde ke uwem fo nnyụn̄ nda enye ndisịn ke n̄kemuyo ye uduak Abasi. Ana afo esịn ukwan̄ usụn̄ ekededi oro ekemede ndidi afo ama odụk onyụn̄ anam se inemde Abasi esịt. Oyom afo anam se apostle Peter okowụkde ete: “Ẹkabade esịt ndien, ẹnyụn̄ ẹfiak edem, man ẹsọhi mme idiọk-n̄kpọ mbufo ẹfep; man oto do ini edidemede edito ke iso Jehovah esịm mbufo.”—Utom 3:19.
22. Nso mme edinam isịne ke nditiene nde ikpat Jesus?
22 Ẹyak nnyịn ikûdede ifre ite ke nnyịn ikeme ndinyene nsinsi uwem n̄kukụre ebe ke ndibuọt idem ye Jesus. (John 6:40; 14:6) Nnyịn iwụt mbuọtidem oro inyenede ke Jesus ebe ke ‘nditiene nde ikpat esie ketket.’ (1 Peter 2:21, NW) Nso ibuana ke ndinam oro? Ọfọn, ke akam oro ọkọbọn̄de ọnọ Abasi, Jesus ọkọdọhọ ete: “Sese, mmedi . . . ndinam uduak Fo, O Abasi.” (Mme Hebrew 10:7) Edi akpan n̄kpọ ndikpebe Jesus ke ndinyịme ndinam uduak Abasi ye ke ndiyak uwem fo nnọ Jehovah. Ke oro ebede oyom afo ayarade uyakidem oro ebe ke baptism mmọn̄; Jesus n̄ko ama ana baptism. (Luke 3:21, 22) Ndinam mme utọ usio-ukot oro enen̄ede owụt eti ibuot. Apostle Paul ekewet ete ke “ima Christ onụk nnyịn.” (2 Corinth 5:14, 15, NW) Ke nso usụn̄? Ọfọn, ima okonụk Jesus ndinọ uwem esie ke ibuot nnyịn. Ndi ima ikponụkke nnyịn ndinam n̄kpọ mban̄a oro ebe ke ndiwụt mbuọtidem ke enye? Ih, ekpenyene ndinụk nnyịn nditiene ima ima uwụtn̄kpọ esie eke edinọ idemesie ke ndin̄wam mbon efen. Christ okodu uwem ọnọ edinam uduak Abasi; ana nnyịn inam ukem ntre, ikûdu uwem aba inọ idem nnyịn.
23. (a) Ana ẹdian mbon oro ẹbọde uwem ke nso? (b) Nso ke ẹyom ẹto mbon oro ẹdude ke esop Christian?
23 Ikụreke ke oro. Bible ọdọhọ ete ke ẹma ‘ẹdian’ owo 3,000 oro ẹkenade baptism ke usen Pentecost 33 E.N. Ẹdian ke nso? “Mmọ oro ẹnyụn̄ ẹdọdiọn̄ ẹsịn ifịk ke edikpep ye nsan̄a mme apostle,” ntem ke Luke anam an̄wan̄a. (Utom 2:41, 42) Ih, mmọ ẹma ẹsisop idem ọtọkiet kaban̄a ukpepn̄kpọ Bible ye ebuana ndien ke ntem ẹdiana ye, mîdịghe ẹkabade ẹdi ubak, esop Christian. Mme akpa Christian ẹma ẹsidụk mme mbono esop kpukpru ini kaban̄a ukpep eke spirit. (Mme Hebrew 10:25) Mme Ntiense Jehovah mfịn ẹsinam emi n̄ko, mmọ ẹyenyụn̄ ẹma ndisịn udọn̄ nnọ fi odụk mme mbono esop ẹmi ye mmọ.
24. Nso idi “ata uwem,” ndien didie n̄ko ini ewe ke ẹdinyene enye?
24 Ediwak miliọn owo idahaemi ke ẹdụk mfafaha usụn̄ emi adade esịm uwem. Ndisọn̄ọ ndu ke mfafaha usụn̄ emi oyom ata ukeme! (Matthew 7:13, 14) Paul ama owụt emi ke ima ima nsịnudọn̄ oro enye ọkọnọde ete: “N̄wana eti en̄wan mbuọtidem; sọn̄ọ mụm nsinsi uwem kama, emi ẹkekotde fi edida enyene.” Oyom ẹn̄wana en̄wan emi man “ẹkpemụm uwem eke edide ata uwem ẹkama.” (1 Timothy 6:12, 19) Uwem oro idịghe uwem idahaemi oro mbiakidem ye ubiak ye ndutụhọ emi idiọkn̄kpọ Adam akadade ọsọk nnyịn ẹdude. Utu ke oro, enye edi uwem ke obufa ererimbot Abasi, emi ẹdisọpde ẹnyene ke ini ẹdade uwa ufak Christ ẹnam n̄kpọ ke ufọn kpukpru mme andima Jehovah Abasi ye Eyen esie ke ẹma ẹkemen editịm n̄kpọ emi ẹfep. Kpukpru nnyịn ikpakam imek uwem—“ata uwem”—nsinsi uwem ke ubọn̄ ubọn̄ obufa ererimbot Abasi.
Didie ke Afo Ọkpọbọrọ?
◻ Mmanie ẹdi urụkikọt, n̄wan, ye mfri eke Genesis 3:15?
◻ Didie ke Jesus ekedi ukem ye Adam, ndien nso ke ufak akanam ẹkeme ndinyene?
◻ Nso ke afo asak iso ese oro edinamde fi okop inem obufa ererimbot Abasi?
◻ Nso mme n̄kpọ ke oyom nnyịn inam man idu uwem ke obufa ererimbot Abasi?
[Ndise ke page 10]
Jesus edi n̄kukụre usụn̄ adade esịm anana-utịt uwem ọnọ n̄kpri ye ikpọ
[Ndise ke page 11]
Ke edikem ini Abasi, mbon usọn̄ ẹyefiak ke mme usen uyen mmọ