“Inemesịt Edi eke Mmọ Oro Ẹkerede Ẹban̄a Unana Mmọ ke N̄kan̄ eke Spirit”

KE INI mme inuen ẹdemerede ke usenubọk, mmọ ẹsiwak ndinam uyom ke esisịt ini ndien ekem ẹfe ẹyom udia. Mmọ ẹsife ẹdidụk efọk mmọ ke mbubịteyo, ẹnam uyom esisịt, ndien ekem ẹde. Ke ndusụk ini ke isua, ayara esidoro uman, ndien uman esịn nsen onyụn̄ ọbọk nditọ esie. Mme unam eken ẹsinam kpa ntre.

Edi nnyịn mme owo itiehe nte unam. Edi akpanikọ ke nnyịn imesidia udia, ide idap, inyụn̄ inyene nditọ, edi ata ediwak nnyịn ikopke iyụhọ ndinam mme n̄kpọ emi kpọt. Esidọn̄ nnyịn ndifiọk ntak emi nnyịn idude uwem ye se idide uduak uwem. Ọdọn̄ nnyịn ndifiọk n̄ko m̀mê ini iso editie didie. Nnyịn ndinen̄ede nyom ndifiọk mme n̄kpọ emi owụt edu oro owo kpọt enyenede—edinyene udọn̄ mban̄a mme n̄kpọ eke spirit.

Ẹkebot Nnyịn ke Mbiet Abasi

Bible anam an̄wan̄a ntak emi owo enyenede ndammana udọn̄ aban̄a n̄kpọ eke spirit, enye ọdọhọ ete: “Abasi obot owo esịn ke mbiet esiemmọ, ke mbiet Abasi ke obot enye; eren ye n̄wan ke obot mmọ.” (Genesis 1:27) Sia ẹbotde nnyịn ke “mbiet Abasi,” emi ọwọrọ ke okposụkedi nnyịn idade-da idiọkn̄kpọ ye unana mfọnmma imana, ke nnyịn imenyene ukeme ndinyene ndusụk edu Abasi. (Rome 5:12) Ke uwụtn̄kpọ, nnyịn imenyene ukeme ndibot mme n̄kpọ. Nnyịn imenyene n̄ko ndusụk udomo eti ibuot, m̀mê ọniọn̄, ukeme ndikpe edinen ikpe, ye ukeme ndiwụt kiet eken ima n̄waidem. Akan oro, nnyịn imekeme nditi se iketịbede ke ini edem inyụn̄ inam ndutịm inọ ini iso.—Mme N̄ke 4:7; Ecclesiastes 3:1, 11; Micah 6:8; John 13:34; 1 John 4:8.

Ndammana udọn̄ oro inyenede ndituak ibuot nnọ Abasi enen̄ede owụt ke imenyene udọn̄ ke n̄kpọ eke spirit. Edieke nnyịn mînen̄ekede iyụhọ udọn̄ nnyịn ndinyene itie ebuana ye Andibot nnyịn, nnyịn idikemeke ndinyene ata inemesịt oro ebịghide. Jesus ọkọdọhọ ete: “Inemesịt edi eke mmọ oro ẹkerede ẹban̄a unana mmọ ke n̄kan̄ eke spirit.” (Matthew 5:3) Nte ededi, ana nnyịn ikụt ite ke imada akpanikọ eke spirit—akpanikọ aban̄ade Abasi, mme edumbet esie, ye uduak esie kaban̄a ubonowo—iyụhọ udọn̄ oro. M̀mọ̀n̄ ke nnyịn ikeme ndikụt akpanikọ eke spirit? Edi ke Bible.

“Ikọ Fo Edi Akpanikọ”

Apostle Paul ekewet ete: “Abasi ọkọnọ odudu ẹda ẹwet ofụri N̄wed Abasi ndien enye ọfọn ndida nnọ ukpep, nsua nnọ owo, nnen̄ede mme n̄kpọ.” (2 Timothy 3:16) Ikọ Paul emi odu ke n̄kemuyo ye ikọ akam oro Jesus ọkọbọn̄de ọnọ Abasi ete: “Ikọ fo edi akpanikọ.” Mfịn, nnyịn imọfiọk ke Ikọ oro edi Edisana Bible, ndien oyowụt eti ibuot nnyịn ndidụn̄ọde nse m̀mê se inịmde ke akpanikọ ọkọrọ ye mme edumbet oro idade idu uwem ekekem ye se Bible ekpepde.—John 17:17.

Ke ini imende se inịmde ke akpanikọ idomo ye Ikọ Abasi, nnyịn ikpebe mbon Beroea eset, emi ẹkedụn̄ọrede se Paul ekekpepde ẹte ise m̀mê ẹkem ye N̄wed Abasi. Utu ke Luke ndikasua nnọ mbon Beroea, enye ama otoro mmọ ke edu oro mmọ ẹkenyenede. Enye ekewet ete: “Mmọ [ẹkebọ] ikọ ye ata ọkpọsọn̄ udọn̄, ẹnen̄ede ẹdụn̄ọde N̄wed Abasi ke usen ke usen ẹte ise m̀mê mme n̄kpọ emi ẹdi ntre.” (Utom 17:11) Ọfọn ndikpebe uwụtn̄kpọ mme enyene-ido mbon Beroea emi, koro mme enyene-ntuaha ukpepn̄kpọ ido ukpono ye eke ido uwem ẹyọyọhọ ererimbot mfịn.

Usụn̄ en̄wen ndida mfiọk akpanikọ eke spirit edi ndise nte enye okpụhọrede uwem mme owo. (Matthew 7:17) Ke uwụtn̄kpọ, ndidu uwem ekekem ye akpanikọ Bible ekpenyene ndinam owo edi eti ebe, eti ete, eti n̄wan, m̀mê eti eka, ntem anamde ubon enen̄ede okop inemesịt ye uyụhọ. Jesus ọkọdọhọ ke inemesịt “edi eke mbon oro ẹkopde ikọ Abasi ẹnyụn̄ ẹkpemede ndinam enye!”—Luke 11:28.

Ikọ Jesus eti nnyịn se Ete esie eke heaven eketịn̄de ye nditọ Israel eset ete: “Ami ndi Jehovah Abasi fo, emi n̄kpepde fi usụn̄ udori, nda fi usụn̄ eke afo edisan̄ade. Afo akpakam akpan̄ utọn̄ ke mbet mi! ndien emem fo ekpebiet akpa mmọn̄, edinen ido fo ekpebiet mbufụt inyan̄.” (Isaiah 48:17, 18) Ke akpanikọ, ima ima nsịnudọn̄ emi oyonụk kpukpru mbon oro ẹmade eti ido ye edinen ido ndinam n̄kpọ!

Ndusụk Owo Ẹma Ndikop “Se Utọn̄ Mmọ Ẹmade”

Abasi ọkọnọ nditọ Israel ima ima nsịnudọn̄ emi, koro nsunsu ukpepn̄kpọ ido ukpono ama otụn mmọ usụn̄. (Psalm 106:35-40) Ana nnyịn n̄ko ikpeme idem ye nsu. Paul ekewet aban̄a mme inua-okot Christian, ete: “Ini eyedi eke mmọ mîdibọhọ eti ukpepn̄kpọ, edi, mmọ ẹyekọ mme andikpep ẹnọ idemmọ man ẹkop se utọn̄ mmọ ẹmade ndikop, nte ekemde ye mme udọn̄ idemmọ; ẹyenyụn̄ ẹwọn̄ọde utọn̄ ẹkpọn̄ akpanikọ.”—2 Timothy 4:3, 4.

Mme adaiso ido ukpono ẹnam mme owo ẹkop se utọn̄ mmọ ẹmade ndikop ebe ke ndinyịme mme edinam oro ẹyụhọde ndiọi udọn̄ obụkidem, utọ nte use, efịbe, idan̄ ukemuduot, ye ukpammịn. Bible etịn̄ in̄wan̄-in̄wan̄ ete ke mbon oro ẹnyịmede mme utọ edinam oro ọkọrọ ye mbon oro ẹnamde mmọ “ididaha obio ubọn̄ Abasi inyene.”—1 Corinth 6:9, 10; Rome 1:24-32.

Ke nditịm ntịn̄, oyom uko man ida mme edumbet Bible isịn ke edinam, akpan akpan ke ini ẹsakde nnyịn nsahi, edi imekeme ndinam emi. Ediwak owo oro ẹdide Mme Ntiense Jehovah mfịn ẹkedi mme enyene-mbumehe uda n̄kpọsọn̄ ibọk, mme akpammịn, mme anam use, mme esịn ntịme ke efak, mme inọ, ye mme osu nsu. Edi, mmọ ẹma ẹda Ikọ Abasi ẹsịn ke edinam ndien edisana spirit ama an̄wam mmọ ẹnam mme ukpụhọde ke uwem mmọ man otodo “ẹsan̄a nte odotde Jehovah.” (Colossae 1:9, 10; 1 Corinth 6:11) Sia mmọ ẹma ẹkenam emem ye Abasi, mmọ ẹnyene n̄ko emem esịtidem, ndien nte nnyịn idikụtde, mmọ ẹnyene ata idotenyịn kaban̄a ini iso.

Idotenyịn Obio Ubọn̄

Obio Ubọn̄ Abasi ayanam okopitem ubonowo enyene nsinsi emem oro Bible ọkọn̄wọn̄ọde. Jesus ọkọdọhọ ke akam uwụtn̄kpọ esie ete: “Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.” (Matthew 6:10) Ih, Obio Ubọn̄ Abasi kpọt edinam ẹnam uduak Abasi ke isọn̄. Ntak-a? Koro Obio Ubọn̄ eke heaven—ukara oro Jesus Christ akarade—ke Abasi edida owụt unen oro imọ inyenede ndikara ofụri isọn̄.—Psalm 2:7-12; Daniel 7:13, 14.

Nte Edidem Obio Ubọn̄ eke heaven, Jesus Christ oyosio okopitem ubonowo ke kpukpru ufụn, esịnede ufụn idiọkn̄kpọ Adam ọkọrọ ye utịp esie emi ẹdide udọn̄ọ ye n̄kpa. Ediyarade 21:3, 4 ọdọhọ ete: “Sese! Ebietidụn̄ Abasi omodu ye owo, . . . Ndien [Jehovah Abasi] ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. Mme akpa n̄kpọ ẹma ẹbe ẹfep.”

Nsinsi emem oyodu ke ofụri isọn̄. Ntak emi nnyịn ikemede ndinịm oro ke akpanikọ? Isaiah 11:9 ọbọrọ ete: “Mmọ [mme andidu ke idak Obio Ubọn̄] idinamke idiọk, idinyụn̄ ibiatke n̄kpọ ke ofụri edisana obot mi: koro ifiọk Jehovah ọyọyọhọ ererimbot, kpa nte mmọn̄ ofụkde inyan̄.” Ih, kpukpru mme andidụn̄ isọn̄ ẹyenyene nnennen ifiọk Abasi ẹnyụn̄ ẹsụk ibuot ẹnọ enye. Ndi inemke fi esịt ndidori enyịn mban̄a utọ ini emi? Edieke edide enem, do ini edi emi nditọn̄ọ n̄kọ ọsọn̄urua “ifiọk Jehovah.”

Ndi Afo Ayakpan̄ Utọn̄ Ọnọ Etop Obio Ubọn̄?

Abasi ayada Obio Ubọn̄ eke heaven abiat kpukpru utom Satan onyụn̄ ekpep mme owo ndinen usụn̄ Esie. Ntem, idịghe n̄kpọ n̄kpaidem Obio Ubọn̄ emi ekedide akpan ibuot ukpepn̄kpọ Jesus. Enye ọkọdọhọ ete: “Ana ntan̄a eti mbụk obio ubọn̄ Abasi nnọ mme obio en̄wen n̄ko, koro ẹkesio mi ẹdọn̄ ẹte ndinam emi.” (Luke 4:43) Christ ama owụk mme mbet esie ete ẹtan̄a etop emi ẹnọ mbon en̄wen. (Matthew 28:19, 20) Enye ama ebem iso etịn̄ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt eyedi.” (Matthew 24:14) Utịt oro enen̄ede ekpere. Ke ntre, edi akpan n̄kpọ didie ntem nte mbon oro ẹnyenede esịt akpanikọ ẹkop eti mbụk oro ekemede ndinyan̄a owo mi!

Albert oro iketịn̄de iban̄a ke ibuotikọ oro ekebemde iso, ama okop etop Obio Ubọn̄ ke ini n̄wan esie ye eyen esie ẹketọn̄ọde ndikpep Bible ye Mme Ntiense Jehovah. Ke akpa, Albert ama enyene eyịghe aban̄a ukpepn̄kpọ emi. Enye ama akam ọdọhọ pastọ ke n̄kann̄kụk esie edi ediwụt n̄wan ye eyen imọ ke Mme Ntiense ẹdi mme osu nsu. Edi pastọ oro ikamaha ndidi. Ntre Albert ama ebiere ndikpan̄ utọn̄ n̄kop nneme Bible man okụt ndudue ọnọ se Mme Ntiense ẹkpepde. Ke ama akakpan̄ utọn̄ ini kiet kpọt okop se ẹkenemede, enye ama etiene abuana ke ukpepn̄kpọ oro ini en̄wen, enen̄erede enyene udọn̄ ndikpep n̄kpọ efen efen. Ke ukperedem, enye ama etịn̄ ntak emi imọ ikokpụhọde edu imọ. Enye ọkọdọhọ ete: “Se n̄kesiyomde edi emi.”

Ke akpatre, Albert ama ọtọn̄ọ ndiyụhọ udọn̄ esie ke n̄kan̄ eke spirit, ndien enye ituaha n̄kpọfiọk ndikanam emi. Akpanikọ Bible ama anam enye enyene se enye okoyomde ke ofụri eyouwem esie—usọbọ kaban̄a ukwan̄ikpe ye n̄wo oro ẹyọhọde ke n̄kaowo ọkọrọ ye idotenyịn kaban̄a ini iso. Akpanikọ Bible ama anam enye enyene emem esịtidem. Ndi ẹyụhọ udọn̄ fo ke n̄kan̄ eke spirit? Ntak mûdaha ini ukot mme mbụme oro ẹbụpde ke page 6? Edieke ọdọn̄de fi ndinyene ntọt efen efen, Mme Ntiense Jehovah ẹyedat esịt ndin̄wam fi.

[Ekebe/Mme ndise ke page 6]

NDI ẸYỤHỌ UDỌN̄ FO KE N̄KAN̄ EKE SPIRIT?

Ndi udia eke spirit oro afo esidiade esiyụhọ fi? Nnyịn idọhọ fi okot mme mbụme oro ẹtienede mi onyụn̄ esịn idiọn̄ọ ke mbon oro afo ekemede ndibọrọ nte enende.

□ Anie edi Abasi, ndien nso idi enyịn̄ esie?

□ Anie edi Jesus Christ? Ntak emi akanade enye akpa? Didie ke n̄kpa esie ekeme ndinyene ufọn nnọ fi?

□ Ndi Devil odu? Edieke odude, enye okoto m̀mọ̀n̄?

□ Nso isitịbe inọ nnyịn ke ini ikpade?

□ Nso idi uduak Abasi kaban̄a isọn̄ ye ubonowo?

□ Nso idi Obio Ubọn̄ Abasi?

□ Abasi ada eti ido uwem didie?

□ Nso utom ke Abasi ọnọ ebe ye n̄wan? Nso idi ndusụk edumbet Bible oro ẹnamde ẹnen̄ede ẹkop inemesịt ke ubon?

Edieke mûtịmke ufiọk ibọrọ ndusụk mbụme emi, emekeme ndidọhọ ẹnọ fi ediye uduot ekpri n̄wed Nso ke Abasi Oyom Oto Nnyịn? Mme Ntiense Jehovah ẹsio ediye uduot ekpri n̄wed emi ke se ikperede ndisịm usem 300, ndien enye eneme akpan ibuotikọ Bible 16 onyụn̄ ada N̄wed Abasi ọbọrọ kpukpru mbụme oro ibụpde ke enyọn̄ emi.

[Mme ndise ke page 4]

Sia mîbietke mme unam, mme owo ẹnyene udọn̄ ẹban̄a n̄kpọ eke spirit

[Ndise ke page 5]

“Mmọ ẹyekọ mme andikpep ẹnọ idemmọ man ẹkop se utọn̄ mmọ ẹmade ndikop.”—2 Timothy 4:3

[Ndise ke page 7]

Obio Ubọn̄ Messiah Abasi ayada nsinsi emem edi