Nte Jehovah Oforide Utom Esie
KE MME isua ndondo emi Mme Ntiense Jehovah ẹmekụt utịbe utịbe n̄kọri. Ke n̄kpasịp isua duop ẹmi ẹkebede, mmọ ẹmekọri ke esop 42,600 ẹkesịm ofụri ibat esop 60,192 ke idụt 212. Ye emi ke ekikere, ndusụk owo ẹma ẹbụp ẹte: Didie ke ẹn̄wam utom Mme Ntiense ke n̄kan̄ okụk? Watch Tower Society emenem esịt ndibọrọ mbụme emi ye mmọ eken ẹmi ẹnyenede ebuana ke ibuotikọ emi.
Ndi Mme Ntiense Jehovah ẹsinọ ọyọhọ ubak duop?
Baba. Ke Israel, ẹkedọhọ ẹnọ ọyọhọ ubak duop ke idak Ibet Moses man ẹda ẹn̄wam mme anamutom ke temple Abasi, mme Levite ye mme oku. (Numbers 18:21, 24-29) Mmọemi ikenyeneke isọn̄ oro ẹkebaharede ẹnọ esien mmọ ke mîbọhọke ndusụk obio, ntre mmọ ẹma ẹyom san̄asan̄a un̄wam emi. Adianade do, mme anam-akpanikọ nditọ Israel ẹma ẹnyene ifụre ndinọ ẹnọ imaesịt kaban̄a mme asan̄asan̄a utom, utọ nte edibọp ataya ye, nte ini akade, temple.—Exodus 25:1-8; 1 Chronicles 29:3-7.
Nte ededi, ke Jesus akpade, Bible ọdọhọ ete ke “enye amabiat ibet emi esịnede ke mme ewụhọ [efep].” (Ephesus 2:15; Colossae 2:13, 14) Ke ikọ en̄wen, ke enyịn Abasi Ibet oro ikọbọpke mme Jew m̀mê mme Christian aba. Edi, ke adianade ye mme ikpehe ibet eken, utọ nte edifọp uwa kpukpru ini ke temple, owo ikoyomke aba ọyọhọ ubak duop ito mme andinịm ke akpanikọ.
Ke otu mme Christian, edi ima anam ẹnọ enọ, idịghe ibet. Apostle Paul ama anam edumbet oro an̄wan̄a ke ini akanamde ndutịm ubọ etịbe kaban̄a mme Christian oro ẹkedude ke unana ke Judea. Enye ọkọdọhọ ete: “Yak kpukpru owo kiet kiet ọnọ nte enye akaduakde ke esịt esie: okûnọ ye mfụhọ-esịt, okûnyụn̄ ọnọ oto ke edinyenyịk; koro Abasi amama owo eke ọnọde ke inemesịt.” (2 Corinth 9:7) Mme Ntiense Jehovah ẹnam ido N̄wed Abasi eke edinọ ke unyịmesịt.
Nte ẹmesinam edinam ukọ-okụk, unọ efọkn̄wed, usuanetop nyom okụk, ye ukem usụn̄ ukọ-okụk ntre?
Baba, owo inyeneke ndinyenyịk m̀mê ndinọ mme ata Christian ubọkedem man ẹnọ enọ ebe ke ndimen ekọmurua nnịm mmọ ke iso. Mme otu ido ukpono ẹmi ẹwọn̄ọrede ẹbịne ubre kad ke okụk, unyam n̄kpoduoho ke mmemurua, edinyam tiket mbre mfọniso, usọrọ ukọ-okụk, udep itie, m̀mê edimen usan etịbe nsan̄a n̄kanade ayarade nte ke mmọ inọhọ ikọt mmọ udia eke spirit, ndien ke ntre spirit Abasi inụkke mbon ufọkederi mmọ nditịp okụk ifụre ifụre. Ekeme nditịn̄ ukem oro mban̄a mbon oro ẹwọn̄ọrede ẹbịne edibọ ọyọhọ ubak duop emi ama akakabade edi n̄kpọ eset.—Matthew 10:8.
Mbufo ẹsida okụk ke m̀mọ̀n̄ ẹnam mme utọ utom nte edibọp mbufa Ufọkmbono Obio Ubọn̄ ye mme n̄kọk itieutom, ọkọrọ ye editat ibuot itieutom ofụri ererimbot ke Brooklyn ye ke Patterson, New York?
Jehovah esin̄wan̄a edisana spirit esie ofụk Mme Ntiense esie, anamde mmọ “ẹfọn ido, ẹnyụn̄ ẹnam nti utom uwak uwak, ẹnyụn̄ ẹtat ubọk, ẹnyịme ndinọ owo n̄kpọ; ẹn̄wana ẹyom eti isọn̄ ẹnọ idemmọ ke ini iso, man mmọ ẹkpemụm uwem eke edide ata uwem ẹkama.” (1 Timothy 6:18, 19) Spirit emi esinụk Mme Ntiense Jehovah ndin̄wam utom Obio Ubọn̄ ke kpukpru usụn̄.
Ke uwụtn̄kpọ, ke 1989, Mme Ntiense 3,787,188 ke idụt 212 ẹma ẹyak hour 835,426,538 ẹsịn ke ndikpep mbon en̄wen Ikọ Abasi. Ndien mmọ ẹma ẹnịm ukpepn̄kpọ Bible 3,419,745 kpukpru ini ke ufọk owo ẹmi ẹnyenede udọn̄. Mme andinam utom emi kiet kiet ẹkekpe kpukpru okụk ẹkebiatde ke utom emi. Jehovah ama ọdiọn̄ utom imaesịt emi ye n̄kọri ke ibat mbufa Mme Ntiense 263,855 oro ẹkenade baptism.
Ukem edu unọ enọ emi esinụk Mme Ntiense ye mbon oro ẹnyenede udọn̄ ndin̄wam utom emi ke n̄kan̄ okụk. Ke ẹsiode edin̄wam esop n̄kann̄kụk mmọ ke okụk kpukpru ini ẹfep, mmọ ẹsin̄wam utom ubọp ufọk ekededi oro oyomde ẹnam, utọ nte edidiọn̄ m̀mê editat Ufọkmbono Obio Ubọn̄ mmọ m̀mê Ufọk Mbono m̀mê edibọp obufa. Ke isua kiet kiet, ke ntak usọp usọp n̄kọri, ẹsinyene ndibọp uwak ibat Ufọkmbono Obio Ubọn̄, ndusụk ẹkam ẹkpade ediwak tọsịn naira. Okụk ẹbiatde ke n̄kpọ emi edi se Mme Ntiense n̄kann̄kụk ẹsikpede ke enọ ye utom unyịmesịt mmọ.
N̄ko, ke ediwak idụt ẹkenyene nditat mme itie umịn̄-n̄wed ye mme n̄kpọutom ọfis ọkọrọ ye mme ufọkidụn̄ ke n̄kọk itieutom—mîdịghe ẹbọp mbufa—man ufan̄ odu ekem mbonutom oro ibat mmọ ọkọride-kọri ye mme n̄kpọutom oro esop ẹmi ọkọride-kọri mi oyomde. Eda enọ ye utom imaesịt ẹn̄wam emi n̄ko, ukem nte ẹn̄wamde utom edibọp ye edidiọn̄ ufọk ke Brooklyn ye ke Patterson, New York. Ke edide mmemmem, Mme Ntiense n̄kann̄kụk ẹsin̄wam utom ubọp ufọk emi ke n̄kan̄ okụk. Ke ndusụk idaha, Watch Tower Society esidiomi mme n̄kọk itieutom ndibọ un̄wam—ke n̄kan̄ okụk ye ke uduot mbonutom oro ẹnyenede usọ—nto idụt efen. Ntem, ke idak ndausụn̄ N̄ka ‘edida ukem ukem’ esida itie.—2 Corinth 8:14.
Ntak emi mbufo mîsiakke ufọkibọk inyụn̄ ibuana ke utom unọ un̄wam ye mme utom ufọn obio eken nte ediwak otu ido ukpono ẹnamde-e?
Mme Ntiense Jehovah ẹsinam n̄kpọ usọp usọp ẹban̄a mme mbabuat idaha oro ke ini ekọn̄ okụrede m̀mê n̄kpọntịbe oro otode obot ke ini mmọ ẹkekeme. Ke akpanikọ, mmọ ẹsisịne ke otu akpa mbon oro ẹsịmde itie unọmọ oro ye udia, ọfọn̄, ye mbon unyịmesịt man ẹn̄wam ke ndifiak mbọp mme ufọk. Nte ededi, Mme Ntiense Jehovah isiakke ufọkibọk, m̀mê mmọ ndisiak ufọkutom unịme ikan̄ m̀mê ndinyene mme borisi, ẹmi ẹdide ke ntak unyan̄a uwem n̄ko.
Mmọ ẹdi mme asan̄autom oro ẹyakde idem ẹnọ kaban̄a gospel, ndien utom mmọ edi ndikwọrọ nnyụn̄ n̄kpep eti mbụk Obio Ubọn̄ Abasi ke ofụri ererimbot nte ntiense mbemiso utịt edide. (Matthew 24:14) Nte Jesus ọkọdọhọde, idọk okpon edi mme anamutom iwakke. Edidi n̄kpọ emi owo mîdifenke owo edieke ẹfụmide utom emi edide akpan n̄kpọ akan mi man ẹnam utom efen, ọkpọkọm enye enyene eti etop nte enyenyene.—Matthew 9:37, 38.
Nte ededi, ediwak Mme Ntiense Jehovah ẹdi dọkta, nọs, ye mme ọnọ un̄wam ke ufọkibọk. Edi mmọ ẹda utom ẹmi nte udiana akpa utom mmọ, kpa utom ukwọrọikọ Christian.
Ndi mme akamautom Watch Tower Society m̀mê mme andibuana ẹsinam okụk ke ntatara utom umịn̄-n̄wed mbufo?
N̄wan̄ansa-o, ye nsọn̄uyo! Ke ibet, N̄ka emi edi n̄ka oro mîkọhọ udori. Idụhe mme etịp-okụk unyam urua nsịn, idụhe mme andibọ udori, m̀mê idem okụk ọfiọn̄. Asan̄autom kiet kiet ke ibuot itieutom, esịnede etieibuot ye mme andida N̄ka usụn̄, ẹmen̄wọn̄ọ ndidi ubuene nte ekemde ye ibet. Ẹnọnọ enye udia, ebiet udak ibuot, ye ndutịm usọbọidem oro ẹyomde, ọkọrọ ye ekpri okụk ekpatọfọn̄ oro owo abiatde san̄asan̄a. Edieke owo Ntiense akade mbubehe N̄ka, ẹsifiak ẹkpọn̄ okụk oro enye abiatde ke ukpeusụn̄ ẹnọ enye.
Ke adianade do, idụhe ebiet ndomokiet ke ererimbot emi mme asan̄autom nnyịn ẹsibọde okụk udian ndọ, unịm baptism, m̀mê edinam ubụkowo. Owo inyụn̄ ibọhọ okụk usịn enyịn̄ m̀mê ndimen usan nsan̄a mbọ okụk ke utịn̄ikọ an̄wa m̀mê mbono.
Sia owo mîsimenke usan etịbe isan̄a n̄kanade, didie ke esop n̄kann̄kụk esibọ enọ man ẹnyene okụk oro ẹbiatde?
Ẹsibon ekebe etịbe ke Mme Ufọkmbono Obio Ubọn̄ man mme owo ẹkpesịn mme enọ imaesịt nte mmọ ẹmade. (2 Ndidem 12:9) Ẹdadara kpukpru enọ, ekpedi awak m̀mê ekpri nte ekpekpri. (Mark 12:42-44) Inikiet ke ọfiọn̄, asan̄autom emi esede aban̄a okụk esop esikot ibio ibio ntọt ibatokụk ọnọ esop, anamde mmọ ẹfiọk ofụri se ẹketịpde, se ẹbiatde, ye se esop ọnọde ẹsọk Watch Tower Society man ẹda ẹn̄wam utom ukwọrọikọ eke ofụri ererimbot ye utom eken.
Ke ini ndutịm emi an̄wan̄ade kpukpru owo mmọ ẹyenyene ifụre ndibuana edieke mmọ ẹmade, owo kiet kiet “ke udori eke ẹkụtde.” (1 Corinth 16:2) Emi edi se ẹnamde ke esop kiet kiet emi awakde ebe 60,000 ke ofụri ererimbot.
Ke Pentecost mme akpa Christian ẹkebabuana kpukpru n̄kpọ. Ndi Mme Ntiense Jehovah ẹnam emi?
Mbabuat idaha akadaha ada ke etienede Pentecost eke 33 CE. ke ini mme Jew ẹtode anyan ebiet, ẹmi ẹkekabarede esịt ndondo oro ẹdụk Ido Ukpono Christ ẹkesụk ẹdude ke Jerusalem ndibọ n̄kaiso ukpep ke n̄kan̄ eke spirit. Mmọ ẹma ẹyom ufọk ye udia ke ibio ibio ini; ntre, nditọete n̄kann̄kụk oro ẹma ẹnyam inyene mmọ ke unyịmesịt ẹnyụn̄ ẹbuana n̄kpọ ẹmi man ẹda ẹse ẹban̄a ntatara ikpehe ini oro mmọ ẹkedude ọtọkiet. (Utom 2:1, 38-47; 4:32-37) Owo ikenyịkke owo ndomokiet ndinyam m̀mê nditịp n̄kpọ nsịn. (Utom 5:1-4) Edibuana n̄kpọ ọtọkiet emi ikedịghe ukara communism, nte ndusụk owo ẹkerede. Enye ekedi sụk ndutịm ibio ini. Enye ama etre ke ini mme Christian oro ẹkefiakde ẹnyọn̄ ebietidụn̄ mmọ.
Nte mbufo ẹmekpep ẹte ke enọ n̄kpọ obụkidem edi isọn̄ usio isop idiọkn̄kpọ?
N̄wan̄ansa-o! Bible ọdọhọ ete: “Sia ẹfiọkde ẹte, ikadaha mbiara n̄kpọ, kpa silver ye gold, ifak mbufo isio ke ndisịme eduuwem oro okotode mme ete ebe osịm mbufo; edi ẹkeda iyịp eke ọsọn̄de urua ẹfak mbufo, nte iyịp eyenerọn̄ eke ananade ndo onyụn̄ ananade ntọi, kpa eke Christ.”—1 Peter 1:18, 19.
Mme Ntiense Jehovah ẹkọn̄ mbuọtidem ke uwa ufak Jesus man ẹbọ edinyan̄a. Mmọ inọhọ enọ imaesịt ye idotenyịn nte ke oro eyeda edinyan̄a ọsọk mmimọ. Kpa ye oro, mmọ ẹfiọk ẹte ke ẹyom uwak okụk man ẹsuan eti mbụk edinen obufa ererimbot Abasi. (2 Peter 3:13) Ndien mmọ ẹbat ẹte ke nditịp n̄kpọ nsịn ke utom usuanetop emi edi ifet oro Jehovah ọnọde.
Ke ini okotịpde n̄kpọ uwak uwak esịn ke temple oro Solomon eyen esie ekenyenede ndibọp, Edidem David ọkọbọn̄ akam ete: “O Jehovah, ubom, ye odudu, ye ubọn̄, ye akakan, ye uten̄e edi okuommọ: koro kpukpru n̄kpọ ke enyọn̄ ye ke isọn̄ ẹmenyene fi. . . . Edi ami ndi anie, ikọt mi ẹnyụn̄ ẹdi mmanie, eke nnyịn ikemede nditat ubọk ntem? N̄kọm kpukpru n̄kpọ ẹto fi, nnyịn inyụn̄ inọ fi se itọde fi ke ubọk.”—1 Chronicles 29:11, 14.
Mfịn, Mme Ntiense Jehovah ye mme owo eken ẹmi ẹmade edinen ido ẹkere n̄kpọ ke ukem usụn̄ oro David ekekerede. Mmọ ẹkop inemesịt ndinyene ifet editịp n̄kpọ nsịn man ẹn̄wam utom editoro Jehovah, ẹfiọkde ẹte ke kpukpru n̄kpọ oro mmọ ẹnọde ke utom esie ẹkam ẹto enye. Jehovah esidiọn̄ edu emi, ndien emi edi nte enye oforide utom esie.
[Ekebe ke page 23]
NTE NDUSỤK OWO ẸNỌDE ETỊBE KABAN̄A UTOM OBIO UBỌN̄
◻ MME ENỌ: Ẹkeme ndinọ enọ imaesịt eke okụk nnennen ẹsọk Watch Tower Bible and Tract Society of Pennsylvania, 25 Columbia Heights, Brooklyn, New York 11201, m̀mê n̄kọk itieutom N̄ka ke n̄kann̄kụk. Ẹkeme n̄ko ndinọ inyene utọ nte isọn̄ ye ufọk, mme n̄kpọuto m̀mê mme ọsọn̄urua n̄kpọ eken. Utọ enọ oro ekpenyene ndisan̄a ye ibio ibio leta oro etịn̄de nte ke emi edi enọ.
◻ ENỌ ẸSỊNDE KE UBIỌN̄: Ẹkeme ndinọ okụk ẹsọk Watch Tower Society ndikama nte ebuọt, ye ndutịm nte ndusụk edieke owo odude ke unana, ẹkeme ndifiak n̄kpọn̄ nnọ andinọ.
◻ INSURANCE: Ẹkeme ndiwet enyịn̄ Watch Tower Society nte andibọ ufọn insurance m̀mê okụk ukpọn̄ utom. Ẹkpenyene ndinam N̄ka ọdiọn̄ọ aban̄a mme utọ ndutịm oro.
◻ EBUỌT: Ẹkeme ndiyak okụk oro ẹsịnde ke ban̄k nnọ N̄ka ke ebuọt. Ke anamde emi, mbọk nam N̄ka ọdiọn̄ọ aban̄a. Ẹkeme n̄ko ndinọ inyene, mbubehe, ye isọn̄ ke idak ndutịm oro andinọ ọbọde ufọn ke eyouwem esie. Edinam emi emen ubiatokụk ye eyịghe efep kaban̄a n̄kpọ ntiense, ke adan̄aemi ọsọn̄ọde nte ke N̄ka edibọ inyene emi ada ke owo emi akpade.
◻ UNEN N̄KPỌ AKPA: Ẹkeme ndiyak inyene m̀mê okụk nnọ Watch Tower Society ke ndinọ enye unen ndidia n̄kpọ akpa eke asan̄ade ye ibet. Ẹkpenyene ndinọ n̄wed unen emi ẹsọk N̄ka.
Ke oyomde ntọt ye item efen efen kaban̄a mme utọ n̄kpọ ntre, wet nọ ẹsọk Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201, m̀mê n̄kọk itieutom N̄ka ke n̄kann̄kụk.
[Ndise ke page 24]
Ubak iwụk ebiet unọ ukpep Bible eke Mme Ntiense Jehovah oro ẹsụk ẹbọpde ke ubọk ke Patterson, New York
[Mme ndise ke page 25]
Jehovah omofori utom edibọp ebe ke ikọt esie ẹmi ẹnọde enọ imaesịt