‘Ọfọfọn Ọnọ Mmọemi Ẹmede Ime’
1. Ọtọn̄ọde ke 1914, nso idaha ke isọn̄ isu Matthew 24:3-8, ndien nso uduak Esop Ediomi M’idụt ye Esop Edidiana M’idụt ẹkpu?
KE N̄WED esie oro, The Present Age, Robert Nisbet etịn̄ aban̄a “Ekọn̄ Isua Ata-ye-Efụt oro akade iso, ye unana nduọkodudu, ọtọn̄ọde ke 1914.” Ih, “ekọn̄ ye etop ekọn̄,” esịnede mme ekọn̄ ererimbot—edi se Jesus Christ ekebemde iso etịn̄ aban̄a utịt ini emi. (Matthew 24:3-8) Ẹma ẹtọn̄ọ Esop Ediomi M’idụt ke 1920 “man etre ekọn̄ ke nsinsi.” Didie ke enye okokpu ntem ofụri ofụri! Ẹketịm Esop Edidiana M’idụt ke 1945 “man ẹnyan̄a emana emi editienede ẹsio ke unọmọ ekọn̄.” Edi n̄wed Max Harrelson, Fires All Around the Horizon obụk ete: “Ayak esisịt ndidi usen ndomokiet idụhe oro owo mîn̄wanake ekọn̄ ke ndusụk ebiet tọn̄ọ nte ẹketre Ekọn̄ Ererimbot II.”
2. Nso ke ndusụk owo ẹsibụp ẹban̄a mme idaha ererimbot, edi mme mbụme ewe ke nnyịn ikpesibụp?
2 Edinam oyomonsia ye afai, mbiara edinam ye ubuene, n̄kpọsọn̄ ibọk ye udọn̄ọ—kpukpru ẹmi ẹnam mfụhọ mfụhọ idaha odude ọdọdiọn̄ ọdiọk. Ndusụk owo ẹkeme ndibụp ẹte: ‘Didie ke ubonowo ekeme ndikaiso nyọ mme utọ mfịna mfịna idaha ẹmi?’ Ke edide akpan n̄kpọ akan, nte ededi, nnyịn ikpenyene ndibụp: ‘Didie ke Abasi eme edibiat oro ẹbiatde edibotn̄kpọ esie eke isọn̄? Adan̄a anyanini didie ke enye ediyak ndiọi owo ẹsobo isọn̄ ẹnyụn̄ ẹdori esuene ke ọsọn̄urua enyịn̄ esie?’
3. (a) Nso mbụme ke prọfet Isaiah okobụp, ndien ntak-a? (b) Nso ibọrọ ke Jehovah ọkọnọ, ndien nso ke emi owụt kaban̄a usen nnyịn?
3 Prọfet Isaiah ama obụp mbiet mbụme emi. Ẹma ẹnọ enye utom editan̄a etop otode Jehovah nnọ mbio obio esie. Edi ẹma ẹbem-iso ẹsian enye ẹte ke mmọ idikpan̄ke utọn̄ inọ enye m̀mê ndikpan̄ utọn̄ nnọ Abasi oro okosiode enye ọdọn̄. Ntre Isaiah ama obụp ete: “Ọbọn̄ [Jehovah] adan̄a didie?” Ih, adan̄a anyanini didie ke Isaiah edikwọrọ ikọ ọnọ mbon ntụtutọn̄ owo ẹmi, ndien adan̄a anyanini didie ke Jehovah ediyọ emiom emiom edisịn oro mmọ ẹsịnde ndikop etop esie? Jehovah ama ọbọrọ ete: “Tutu mme obio ẹwụre ẹnana mme andidụn̄, mme ufọk ẹnyụn̄ ẹbiara ẹnana owo, isọn̄ onyụn̄ abiara fap.” (Isaiah 6:8-11) Ukem oro mfịn, Abasi ke eme utọ esuene ntre tutu osịm ini enye edisobode ererimbot emi akpan abiatibet edide Christendom oro mînamke akpanikọ.
4. Nso idi utịp ime Job, ndien nso un̄wọn̄ọ ke emi ọnọ nnyịn mfịn?
4 Jehovah ke anyanini ọmọyọ isụn̄i Satan. Ke n̄kpọ nte isua 3,600 ẹmi ẹkebede, Job anam-akpanikọ ama ọyọ n̄ko, owụtde ke ata oro Satan akamiade nte ke imọ ikemeke ndimụm nsọn̄ọnda n̄kama ke idak idomo edi nsu. Emi akadat Jehovah esịt didie ntem! (Job 2:6-10; 27:5; Mme N̄ke 27:11) Nte James, eyeneka Jesus ekewetde ke ukperedem ete: “Sese, nnyịn idọhọ ite, ọfọfọn ye mmọemi ẹma ẹbiom ukụt: mbufo ẹmekop ẹban̄a ime Job, ẹmenyụn̄ ẹkụt se Ọbọn̄ anamde enye ke akpatre, nte Ọbọn̄ enyenede esịtmbọm, onyụn̄ atuade owo mbọm.” Ukem oro n̄ko, mbon oro ẹtienede Jehovah ẹme ime mfịn ẹyebọ eti utịp.—James 5:11.
5. Didie ke Jesus okowụt ete ke ẹyeyom ikọt Abasi ẹme ime mfịn, ndien ke adan̄aemi ẹnamde ewe utom ke ẹdiyom mmọ ẹme ime?
5 Jesus ama owụt in̄wan̄în̄wan̄ ete ke oyoyom ikọt Abasi ẹme ime ke eyo nnyịn. Ke ebemde iso etịn̄ aban̄a idiọn̄ọ “akpatre ini eyo emi,” enye ọkọdọhọ ete: “Ẹyenyan̄a owo eke edimede ime tutu osịm akpatre.” Edime ime ke adan̄aemi ẹnamde nso? Ikọ Jesus oro osụk etienede ọnọ ibọrọ ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt.” (Matthew 24:3, 13, 14) Adan̄aoro ndien ke ‘utịt edidi.’—Se n̄ko Mark 13:10, 13; Luke 21:17-19.
Ntak Jehovah Emede Ime
6. Ntak emi Jehovah edide n̄wọrọnda uwụtn̄kpọ ke edime ime, ndien nso idi ntak kiet oro anamde enye eme ime ntre?
6 Apostle Paul ama anam an̄wan̄a nte ke “Abasi, emi onyịmede ndiwụt iyatesịt Esie, ndinyụn̄ nnam owo ẹfiọk odudu Esie, [eme] anyanime ye mme eso iyatesịt ẹmi ẹnade ẹnọ nsobo.” (Rome 9:22) Ntak emi Jehovah emede ime ke ndiyak mme idiọkowo, kpa mme eso iyatesịt ẹmi ẹkaiso ẹdu-e? Ntak kiet edi emi: man owụt nte ke ukara owo, oro adade ke idem ọkpọn̄ Andibot owo, enyene ndikpu. (Jeremiah 10:23) Ibịghike, ẹyenọ ukara Abasi ubọn̄ nte enye owụtde ke imọ ikpọn̄îkpọn̄ ikeme ndida emem, edidianakiet, ye inemesịt nsọk ekpụk ubonowo, ebe ke ukara Obio Ubọn̄ Jesus.—Psalm 37:9-11; 45:1, 6, 7.
7. Nso ntak en̄wen inam Jehovah eme ime, ndien nso ufọn ke emi ada ọsọk ediwak million owo ọtọn̄ọde ke iduọk isua 1930?
7 N̄ko-n̄ko, Jehovah eme ime “man otodo Enye akpayarade uwak ubọn̄ Esie ke idem mme eso mbọm.” (Rome 9:23) Eso mbọm ẹmi ẹdi mbon ẹmi ẹyetde aran oro ẹmụmde nsọn̄ọnda ẹkama, oro ‘ẹkefakde ẹsio ke otuowo’ ndikara ye Christ Jesus ke Obio Ubọn̄ esie eke heaven. Edifịk oro ẹfịkde owo 144,-000 idiọn̄ọ akada itie ọtọn̄ọde ke eyo mme apostle. Enye amasan̄a ekpere utịt idahaemi. (Ediyarade 7:3; 14:1, 4) Ndien Sese! Ọtọn̄ọde ke iduọk isua 1930, Jehovah ndikaiso mme ime amayak ẹtan̄ ediwak million owo en̄wen ẹbok, kpa “akwa otuowo . . . eke ẹtode ke kpukpru obio,” oro ẹnyenede idotenyịn edibọhọ akpatre ukụt man ẹnyene nsinsi uwem ke paradise isọn̄. (Ediyarade 7:4, 9, 10, 13-17) Nte afo edi kiet ke otu akwa otuowo oro? Edieke edide ntre, nte afo ukopke idatesịt ke Jehovah ndiyọ edidu oro eso iyatesịt odude tutu osịm emi? Nte ededi, ana afo akaiso eme ime, kpa nte Jehovah emede ime.
Ẹnọ Utịp ke Ndime Ime
8. Ntak oyomde kpukpru nnyịn ime ime, ndien nso uwụtn̄kpọ aban̄ade ime ke nnyịn ikpekere ye ntịn̄enyịn iban̄a?
8 Oyom kpukpru nnyịn ime ime edieke anade nnyịn ibọ mme n̄kpọ ẹken̄wọn̄ọde. Ke ama eketịn̄ aban̄a isọn̄ akpanikọ emi ke Mme Hebrew 10:36, apostle Paul etịn̄ ọyọhọ ọyọhọ aban̄a ata mbuọtidem ye ime eke “otu ntiense” ini eset. Ekem enye ọnọ nnyịn item ete “ifehe mbuba eke anade nnyịn ke iso ye ime, iwụk enyịn ise Jesus, Anditọn̄ọ mbuọtidem nnyịn ye Andinam enye ọfọn ama; . . . ka-ban̄a idatesịt eke anade enye ke iso,” Jesus ama eme ime ke utom ofụri esịt, ikedehedei isio ekikere ikpọn̄ utịp oro. Uwụtn̄kpọ esie ọsọn̄ọ nnyịn n̄ko idem ndime ime didie ntem!—Mme Hebrew 12:1, 2.
9. Nso isụn̄ọ ito mme uwụtn̄kpọ eyomfịn aban̄ade ime?
9 Mme uwụtn̄kpọ eyomfịn ẹban̄ade edime ime ẹyọyọhọ n̄ko. Ekeme ndidi afo ọmọdiọn̄ọ, mîdịghe ama ọdiọn̄ọ nditọete iren ye iban oro ime mmọ ekedide n̄wọrọnda. Edinam akpanikọ mmọ ẹkedemerede nnyịn didie ntem! Ndien ke isua kiet kiet, nte Mme Ntiense Jehovah ẹsinọde ibatutom mmọ eke ofụri ererimbot ẹsọk Watch Tower Society, ẹsibọ inem inem mbụk efen efen ẹban̄ade ime ye edimụm nsọn̄ọnda n̄kama. Mme n̄kpọ ẹwetde ke page inan̄ ẹmi ẹtienede mi ẹwụt ke ibio ibio usụn̄ akwa utom oro ẹkenamde ke 1989 nte Mme Ntiense ẹmi ‘ẹdiande ime ke mbuọtidem mmọ.’—2 Peter 1:5, 6.
Mfọn N̄kan Isua Nnyịn
10. (a) Idụt ye isuo ifan̄ ẹkebuana ke ndikwọrọ eti mbụk Obio Ubọn̄ ke 1989, ndien owo ifan̄ ẹkebuana ke utom emi? (b) Mme asiakusụn̄ ifan̄ ẹkenọ ibatutom ke ọfiọn̄ oro akawakde owo akan, ndien nso ikedi ofụri ibat hour oro ẹkebiatde ke an̄wautom?
10 Nte mme n̄kpọ ẹwetde oro ẹwụtde, idụt ye isuo 212 ẹma ẹbuana ke ndikwọrọ Obio Ubọn̄ Jehovah oro edide. Edima andikot Enyọn̄-Ukpeme, nte afo ama enyene ifet edidi kiet ke otu owo 3,787,188 oro ẹkebuanade ke ata eti utom emi? Nte afo ekedi kiet ke otu owo 808,184 ẹmi ẹkenọde ibatutom nte mme asiakusụn̄ ke ọfiọn̄ n̄wakn̄kan ibat ke utom oro? Sededi emi afo okotịpde esịn ke ofụri ibat hour 835,426,538 oro ẹkebiatde ke ofụri ererimbot ke an̄wautom ke 1989, afo eme-nyene ntak ndikop idatesịt.—Psalm 104:33, 34; Philippi 4:4.
11. (a) Ibat owo ifan̄ ikodụk usọrọ Editi eke March 22 isua oko emi edide n̄kpọ idara, ndien ntak-a? (b) Owo ifan̄ ke ẹkenịm baptism, ndien idụt ewe ke uwetn̄kpọ emi ẹkedi n̄wọrọnda ke afan̄ emi?
11 Dat esịt, n̄ko, ke n̄wọrọnda ofụri ibat owo 9,479,064 oro ẹkedụkde usọrọ Editi n̄kpa Jesus ke ofụri ererimbot ke March 22 emi ekebede! Emi owụt ke owo 5,691,-876 efen efen ẹkeme ndikabade ndi mme anditan̄a Obio Ubọn̄, ke ẹkpekam ẹdade mbon mbieterọn̄ oro ẹnyenede udọn̄ mi usụn̄ ke ima ima usụn̄ ẹdisịn ke ufọkerọn̄, man ẹnyene ebuana kpukpru ini ke ndinam n̄kpọ Jehovah. Nte nnyịn imekeme ndin̄wam mmọ ke emi? (John 10:16; Ediyarade 7:9, 15) Ediwak owo ẹma ẹyeyere ikot, nte ẹwụtde ke ofụri ibat mbufa Ntiense 263,855 oro ẹkenịmde baptism ke isua utom 1989.
12. Nso idi ndusụk n̄kpọ oro uwetn̄kpọ emi mîsioho iwụt (a) se iban̄ade mme ufọk umịn̄-n̄wed Watch Tower Society? (b) se iban̄ade magazine ẹkenịmde ye etịbe ẹkebọde?
12 Ndusụk n̄kpọ ẹdu oro uwetn̄kpọ emi mîsioho iwụt. Owo ikọyụhọke nsatitọn̄ n̄wed—Bible, ikpọ n̄wed, n̄kpri n̄wed, magazine. Nte utịp, mme ufọk umịn̄-n̄wed Enyọn̄-Ukpeme ke New York ẹma ẹda babru oro odobide ke ton 25,999 ẹmịn̄ Bible, ikpọ n̄wed, ye n̄kpri n̄wed 35,811,000, adade n̄kọri ke mbahade 101 eke ikie awak akan eke 1988. Ikpọ ufọk umịn̄-n̄wed Watch Tower Society eken, akpan akpan ke Germany, Italy, ye Japan, ẹma ẹnam utom ke iduọk ke iduọk ẹkan nte ẹkesinamde, ẹn̄wamde “asan̄autom emi anamde akpanikọ, onyụn̄ enyenede ọniọn̄” ke ndinọ udia eke spirit “ke edikem ini.” (Matthew 24:45) Ke April ye May, ẹma ẹnịm magazine ẹnyụn̄ ẹbọ etịbe ke n̄wọrọnda ibat ke ediwak idụt, ye akpan nsọn̄uyo ke edisuan mme nsiondi Enyọn̄-Ukpeme ẹban̄ade “Akwa Babylon.” (Ediyarade 17:5) Nte eyịghe mîdụhe, ke April edide mi, mme asiakusụn̄ unọ un̄wam ye Mme Ntiense eken ẹyefiọrọ ke an̄wautom ererimbot ke se ididide ata mfọn n̄kan ubịnikọt unọ ikọ ntiense nnyịn ke isua utom 1990.—Men Isaiah 40:31; Rome 12:11, 12 domo.
13. Mme idụt ewe ke ẹsiak ẹsịn ke uwetn̄kpọ emi, oro owo mîkasiakke isua oko? Nam an̄wan̄a.
13 Tọn̄ọ ntak se uwetn̄kpọ oro. Nte afo omokụt ndusụk idụt oro owo mîkewetke enyịn̄ isua oko? Kamse, ih! Hungary ye Poland, ẹmi ẹnọde utom nnyịn unyịme ndondo emi. Nnyịn imọkọm mme andikara idụt ẹmi ke mmọ ndikere ntre mban̄a Mme Ntiense Jehovah idahaemi. Ke ọtọ emi, ẹmeyere akam nditọete ofụri ererimbot, “man nnyịn idu uwem ifụre ye emem, ke kpukpru uten̄e ye eti ido.”—1 Timothy 2:1, 2.
14. Sio ndusụk akpan n̄kpọ wụt ke Mme Mbono District “Uten̄e Abasi” ke Poland.
14 “Uten̄e Abasi”! Kamse, ẹma ẹkam ẹnịm Mme Mbono District “Uten̄e Abasi” ke Poland, ke itie ita, ke August! Nditọete nnyịn mbon Poland owo 91,024 ẹkenam n̄kpọ utịbe utịbe didie ntem! (Mme Hebrew 13:1, 2, 16) Nte n̄kpọ eke edide utịben̄kpọ, ediwak tọsịn nditọete nnyịn—mbon Czechoslovakia, Germany, Russia, ye mbon en̄wen—ẹma ẹbọ n̄wed uka esenidụt ke bọs, tren, ye idem ke ukot ẹdi. Ediwak tọsịn mbon efen ẹma ẹsan̄a ke ubomofụm ẹto America, Edem Usoputịn Europe, ye nnyan ebiet nte mme isuo Pacific ye Japan. Ikpọ an̄wambre, oro nditọete nnyịn ẹkenịmde ata edisana edisana, ikakam ikponke ikem owo 65,710 ke Chorzów, 40,442 ke Poznan, ye 60,366 ke Warsaw—emi ofụri ibat owo 166,518 ẹkedụkde! Ke ebiet kiet kiet, edida nse nte ẹnịmde owo baptism ama anam mmọn̄eyet idatesịt asiaha owo ke enyịn. Ke Poznan owo isua-9 ye isua-90 ẹma ẹbụhọ ke mmọn̄, ndien ofụri ibatowo 6,093 oro ẹkebụhọde ke mmọn̄ ke mbono ita ẹmi ẹma ẹsịne ediwak n̄kpri owo, ediwak mmọ ẹtode idụt ẹmi ẹkesidọhọde ke ido ukpono eyesop ke n̄kani owo ẹkpade ẹwọrọ. Emi idịghe ntre ye ido ukpono akpanikọ oro ọkọn̄ọde ke Ikọ Abasi! (Men Psalm 148:12, 13; Utom 2:41; 4:4 domo.) Ime oro nditọete nnyịn ẹmede ke n̄kan̄ Edem Usiahautịn Europe enyene ndyọ ndyọ utịp didie ntem!
Edinam Akpanikọ oro Akade Iso ke Idak Idomo
15. Didie ke Mme Ntiense ke Lebanon ẹkeme ime ye nsọn̄ọnda, ndien ye nso nti utịp?
15 Ukem nte apostle Paul, ẹyom Mme Ntiense Jehovah ẹme ime ke ediwak ye ke nsio nsio idaha. (2 Corinth 11:24-27) Ke Lebanon, ekọn̄ mbio obio ke akaiso. Didie ke nditọete nnyịn ẹnam n̄kpọ? Ke nsọn̄ọnda ye ubiere. Ẹtop ikan̄ ẹnyụn̄ ẹduọn̄ọ bọm ọkpọsọn̄ ọkpọsọn̄ ke isua 1989, edi idem ke ebiet n̄kpọ emi ọkọsọn̄de ubọk akan, nditọete ẹma ẹbiere ẹte ke mmimọ iditehekede ube. Esop kiet ke Beirut ọtọt ete: “Ẹma ẹnam ndutịm otuowo ndika utom an̄wautom kpukpru mbubịteyo ke urua. Kpa ye oro ukpeme obio ọkọsọn̄de ubọk, nditọete iketekke ke ifịk. Nnyịn ima ikụre ediwak efakutom ikan nte ikesikụrede ke mbemiso. Ke April nnyịn ima inyene n̄wak-n̄kan ibat ke udịm mme asiakusụn̄. Ẹma ẹtọn̄ọ mbufa ukpepn̄kpọ Bible, ẹnyụn̄ ẹnịm magazine ye ikpọ n̄wed efen efen.”
16. Didie ke nditọete nnyịn ke Colombia ẹkeme ime ke ndida eti mbụk n̄ka mme obio oro Ntiense ndomokiet mîdụhe?
16 Colombia ọmọwọrọ etop ke ntak mbubịne n̄kpọsọn̄ ibọk ibet ye afai. Edi ime esịt akpanikọ eke mme Christian do ọwọrọ etop n̄ko. Ndondo emi, ẹma ẹnọ mme akpan asiakusụn̄ ẹka obio 31 oro mme andidụn̄ ẹdide tọsịn duop m̀mê awakde akan oro, ẹmi Ntiense ndomokiet mîdụhe man ẹkedu do ke ibio ini. Ke obio kiet, ke ini mbufa mbon oro ẹnyenede udọn̄ ẹkediọn̄ọde ẹte ke mme asiakusụn̄ oro ẹdidu do ke n̄kpasịp ọfiọn̄ ifan̄, mmọ ẹma ẹkpe mme asiakusụn̄ oro ubọk ndidu do. Ke ebiet efen, owo 18 oro ẹnyenede udọn̄ ẹma ẹsịn ubọk ke leta esịtekọm kaban̄a un̄wam eke spirit oro ẹkenọde ke ọfiọn̄ ita oro mme asiakusụn̄ oro ẹkedude ẹnyụn̄ ẹyom un̄wam efen efen. “Emi edi ata akpan mbubehe,” ntre ke mmọ ẹkedọhọ. Ufọn ndikpetetịn̄ idụhe, ẹma ẹnam ndutịm ke mbiba ẹmi ndikaiso nnam udọn̄ oro ọkọri. Ndinam utọ efakutom eke oyomde usụn̄ ntre ọkọri oyom ime, edi ẹnen̄ede ẹdiọn̄ ọkpọsọn̄ utom mme asiakusụn̄ oro ẹnamde.
17, 18. (a) Ke mme idaha ewe ke Mme Ntiense Jehovah ẹme ime ke Italy? (b) Didie ke Mme Ntiense ẹnam n̄kpọ kpa ye ikọ nsu oro ẹsuande ẹban̄a
17 Ke Italy, Mme Ntiense Jehovah ẹmesobo ikan̄ ikan̄ ubiọn̄ọ mme ọkwọrọ ederi, edi ye un̄wam Jehovah mmọ ẹbọ ke ime. Ke nsio nsio n̄kann̄kụk ufọkederi, mme ọkwọrọ ederi ẹma ẹsuan mme babru man ẹkpedian ke enyịnusụn̄ ufọk mbon ufọkederi mmọ, ẹdọhọde Mme Ntiense Jehovah ẹte ẹkûmia n̄kanika enyịnusụn̄. Ediwak oku ẹma ẹsion̄o n̄kpri nditọiren ẹdọn̄ ẹte ẹkedian babru ẹmi ke kpukpru enyịnusụn̄ ke n̄wọrọnda ebiet—idem ke ufọk Mme Ntiense! Nte ededi, imemke utom owo ndisịn Mme Ntiense ẹmi ndịk ke idem, ndien ke ediwak ini mmọ ẹsikama babru ẹmi ẹtọn̄ọ nneme. Akande oro, n̄wedmbụk n̄kpọntịbe ye television idụt oro ama eneme ntatara ntatara aban̄a n̄kpọ oro, asuade ọnọ unana-ime oro ufọkederi owụtde onyụn̄ ọsọn̄ọde etịn̄ ete ke utọ ido unam n̄kpọ nte enyeemi enen̄ede edi idiọn̄ọ mmemme oro ufọkederi enyenede. Andikpep ke ufọkn̄wed ntaifiọk kiet ama okop iyatesịt ata etieti oto babru ikọ mfan̄a oro ẹdiande ke enyịnusụn̄ ndibiọn̄ọ Mme Ntiense tutu eyedi se enye otobode Enyọn̄-Ukpeme ye Awake!
18 Ufọkederi Catholic ke Italy amakam ada mbon nsọn̄ibuot ndisuan ikọ nsu mban̄a ikọt Jehovah, edi emi inyeneke ufọn n̄ko koro ẹtịm ẹdiọn̄ọ ẹnyụn̄ ẹkpono mme asuanetop 172,382 do. Eren kiet ama etịn̄ ọnọ Mme Ntiense ẹkekade do ete ke imọ ima ikot idiọk mbụk iban̄a nnyịn ke n̄wed oro mbon oro ẹkedide Mme Ntiense ke mbemiso ẹkewetde. Ntre, ke ini eyeneka imọ eren akakabarede edi owo Ntiense Jehovah, imọ ima ibiọn̄ọ enye ata etieti. Nte ededi, ibio ibio ini ke oro ebede, imọ ima ikụt ke eyeneka imọ ndikpụhọ ido ukpono ama enyene eti utịp ke idemesie. Imọ ima iyịk ite: ‘Didie ke n̄kpọ oro ọdiọkde ntre ekeme ndision̄o utọ nti utịp ntre ndi?’ Ntem, imọ ima iben̄e Mme Ntiense ẹmi ite ẹnịm ukpepn̄kpọ Bible ye imọ.—Men Colossae 3:8-10 domo.
Ndiyọ Unana Udọn̄
19, 20. (a) Nso idaha ke Finland iyom Mme Ntiense ẹme ime, ndien nso inen̄ede idi n̄wọrọnda n̄kpọ iban̄a ndụn̄ọde oro ufọkederi akanamde? (b) Nso ifiọkutom iwụt nte edime ime edide akpan n̄kpọ ke ndikwọrọ eti mbụk?
19 Ke idụt ẹmi Mme Ntiense ẹsiwahade ndien ndien, mme owo ẹsiwụt unana udọn̄ ntatara ntatara ke eti mbụk. Emi ke akpanikọ edi se idude ke Finland. Ufọkederi ke idụt oro ama anam ndụn̄ọde onyụn̄ okụt ete ke mbio obio ke mbahade 70 eke ikie isimaha Mme Ntiense ẹwaha ufọk mmimọ. Nte ededi, mbahade 30 eke ikie inyeneke ọkpọsọn̄ mfan̄a, ndien ke otu ẹmi, mbahade 4 eke ikie ẹkedọhọ ke mmimọ imenen̄ede ima Mme Ntiense Jehovah. Emi edi n̄wọrọnda ibat. Mbahade inan̄ eke ikie ke ofụri ibat mbio obio Finland ẹdi owo 200,000. Men oro domo ye ibat mme asuanetop 17,303 oro ẹdude idahaemi!
20 Ẹma ẹdụri ntịn̄enyịn asuanetop kiet ke an̄wautom ẹwụt ndụn̄ọde emi ẹnyụn̄ ẹbụp ẹte: “Nte afo ufiọkke ute ke mbahade 70 eke ikie ke otu nnyịn iyomke mbufo? Ntak emi mbufo ẹsụk ẹkade iso ẹdi enyịnusụn̄ nnyịne?” Asuanetop oro ama ọbọrọ ete: “Ih, edi kpasụk ndụn̄ọde oro okowụt ete ke mbahade 4 eke ikie ke otu mbufo ẹmama nnyịn. Nnyịn idomo ndikụt mme owo ẹmi. Ọkpọkọm mmọ ẹdi mbahade 1 eke ikie, nnyịn iyesụk isan̄a ke ufọk ke ufọk man ikoyom mmọ.” Enyeneufọk oro ama ekere n̄kpọ ke esisịt ini onyụn̄ ọdọhọ ete: “Nte etop mbufo edi akpan n̄kpọ ntre ọnọ mmọ?” Asuanetop oro ama ọbọrọ ke ndibụp: “Nte afo akpama ndikop enye?” Ibịghike enyeneufọk emi ama owụt udọn̄ ke eti mbụk.
Se Ini Iso Akamade
21. (a) Nso utọ en̄wan ke ana nnyịn in̄wana ke editịm n̄kpọ emi, ndien ntak-a? (b) Nso ke nnyịn inyene ndiyọ, ndien nso ke prọfet Habakkuk ọsọn̄ọ ọnọ nnyịn?
21 Nso kaban̄a kpukpru nnyịn mfịn? Nte nnyịn imebiere nditiene Jehovah ye Christ Jesus mme ime tutu osịm utịt? Enye idibịghike ikaha, edi ana nnyịn ime ime! Ke editịm n̄kpọ Satan emi, ana nnyịn isọn̄ọ in̄wana kaban̄a ikọ mbuọtidem, nte oburobụt ido, mbiara edinam, ye usua ererimbot ẹkanarede nnyịn ẹkụk ke kpukpru edem. (Jude 3, 20, 21) Ekeme ndiyom nnyịn iyọ orụk ukọbọ kiet m̀mê eken. Idem idahaemi, ediwak tọsịn nditọete nnyịn ke ẹbọ ufen ke mme ufọk-n̄kpọkọbi, ndien ẹsimia ndusụk mmọ ibak ibak. Mmọemi ẹsiwụt esịtekọm ke akam nnyịn. (2 Thessalonica 3:1, 2) Ibịghike, editịm n̄kpọ odude kemi ọmọn̄ ebe efep! Nte Habakkuk ewetde ete: “Koro n̄kukụt anade kan̄a ọnọ ini emi ẹnịmde; ndien enye eyesioro uyo ke utịt, idinyụn̄ isụhe nsu: Enye ama ebịghi, bet enye; koro enye mîditreke ndidi, mîdinyụn̄ ibehe ini.”—Habakkuk 2:3.
22. Nso utịp ke nnyịn ye mbuọtidem ikeme ndidori enyịn ndibọ edieke nnyịn imede ime nte mme prọfet inyụn̄ iyọde nte Job?
22 James, owo mbet oro ke ima etịn̄ ọnọ nnyịn ete: “Nditọete, ẹda mme prọfet, ẹmi ẹketịn̄de n̄kpọ ke enyịn̄ Jehovah, nte uwụt-n̄kpọ ke edisọn̄ esịt mbiom ukụt.” Nnyịn mfịn oro itịn̄de n̄kpọ ke enyịn̄ Jehovah imekeme ndidi mbon nsọn̄ọnda ke ini ikan̄ ikan̄ idomo, nte Isaiah, Jeremiah, Daniel, ye mmọ en̄wen ẹkedide. Ukem nte Job, nnyịn ime keme ndime ime. Enye ọkọbọ utịbe utịbe edidiọn̄ didie ntem ke ntak ime esie! Mbọm ye ima-mfọnido Jehovah ẹyeda mme ukem edidiọn̄ oro ọsọk nnyịn—edieke nnyịn imede ime isịm utịt. Ndien ikọ James ẹkpakam ẹsu ẹnọ nnyịn owo kiet kiet: “Sese, nnyịn idọhọ ite, ọfọfọn ye mmọemi ẹma ẹbiom ukụt.”—James 5:10, 11; Job 42:10-13.
Didie ke Afo Ọkpọbọrọ?
◻ Nso ufọn edime ime ke Jesus ọkọsọn̄ọ etịn̄?
◻ Mme ntak ewe inam Jehovah eme ime?
◻ Nso idi ndusụk akpan n̄kpọ ke eti utom ẹkenamde ke 1989?
◻ Didie ke ẹkenọ ime nditọete nnyịn utịp ke Poland?
◻ Didie ke Mme Ntiense ke Lebanon, Colombia, ye Italy ẹwụt edinam akpanikọ ke idak idomo?
mmọ?
[Chart ke page 20-23]
IBATUTOM ISUA UTOM 1989 EKE MME NTIENSE JEHOVAH KE OFỤRI ERERIMBOT
(Se magazine)