Nti Item Emi Ẹdinamde Odu ke Emem ye Mme Owo

Sifen Nọ Owo

“Ẹka iso . . . ẹfen kiet eken ke ofụri esịt edieke owo ekededi enyenede ntak nditọhọ ye owo.”—COLOSSAE 3:13.

Idụhe owo emi mîsinamke ndudue. Imesidue owo, mbon en̄wen ẹsinyụn̄ ẹdue nnyịn. Ntre, esiyom ifen inọ mme owo sia nnyịn n̄ko imesiyom mmọ ẹfen ẹnọ nnyịn. Ke ini ifende inọ owo, ọwọrọ nnyịn isịnke enye aba ke esịt. Nnyịn ‘ididaha idiọk isio enye usiene idiọk,’ idinyụn̄ ikaha iso iti enye ndudue esie. (Rome 12:17) Edi nso ke ikpanam edieke owo anamde n̄kpọ emi enen̄erede abiak nnyịn, ndien nnyịn ikemeke ndifre mban̄a? Do, ọfọn ika ibịne owo oro iketịn̄ ikọ ukpono ukpono ye enye iban̄a se iketịbede oro. Edi ifọnke inam emi ke itie emi mbon en̄wen ẹdude. Ti ke ika ndinam emem, idịghe ndiwụt owo emi eduede ye owo emi enende.—Rome 12:18.

Sụhọde Idem Nyụn̄ Kpono Owo

“Ẹda nsụhọdeidem ẹbat ẹte mbon en̄wen ẹfọn ẹkan mbufo.”—PHILIPPI 2:3.

Edieke isisụhọrede idem inyụn̄ ikponode owo, edisinenem mme owo ndidu ye nnyịn. Mmọ ẹdiọn̄ọ ke iyekpeme nte itịn̄de ikọ ye nte inamde n̄kpọ ye mmimọ, ke nnyịn idinyụn̄ ikohokoi inam n̄kpọ emi abiakde mmimọ. Edi edieke isikerede ke imọfọn ikan mbon en̄wen m̀mê isiyomde ẹnam n̄kpọ ẹsịn ke inemesịt nnyịn kpukpru ini, oro ekeme ndida utọk ndi. Mme owo idimaha ndidian idem ye nnyịn, ntre nnyịn idinyeneke nti ufan.

Kûsari Owo

“Abasi inamke asari, edi ke kpukpru idụt enye enyenyịme owo eke abakde enye onyụn̄ anamde edinen ido.”—UTOM 10:34, 35.

Abasi isisehe ebiet emi owo otode, usem emi owo esemde, m̀mê nte owo etiede. Enye amama kpukpru owo. Bible ọdọhọ ke enye akanam “kpukpru idụt ubonowo ẹwọn̄ọ ẹto owo kiet.” (Utom 17:26) Oro ọwọrọ ke kpukpru nnyịn idi nditọeka. Ke ini ikponode mme owo inyụn̄ ifọnde ido ye mmọ, esịt eyenem mmọ, esịt eyenem nnyịn n̄ko, onyụn̄ enem Abasi emi okobotde kpukpru nnyịn.

Nam N̄kpọ Sụn̄sụn̄ ye Mme Owo

‘Ẹmen ifụre ifụre ido ẹsịne.’—COLOSSAE 3:12.

Edieke isinamde n̄kpọ sụn̄sụn̄ ye mme owo, iyanam uwem enem mmọ. Ndịk idinamke mmọ ndineme nneme ye nnyịn m̀mê ndinen̄ede nnyịn sia mmọ ẹdiọn̄ọ ke idinam n̄kpọ sụn̄sụn̄ ye mmimọ. Ke ini owo ayatde esịt ye nnyịn, edieke ibọrọde enye ikọ sụn̄sụn̄, oro ekeme ndinam esịt osụhọde enye. Mme N̄ke 15:1 ọdọhọ ete: “Sụn̄sụn̄ ibọrọ osụk ifụtesịt, edi uyat uyat ikọ edemede iyatesịt.”

Sinọ Owo N̄kpọ Nyụn̄ Kọm Owo ke Se Ẹnamde Ẹnọ Fi

“Inemesịt odu ke ndinọnọ akan ke ndibọbọ.”—UTOM 20:35.

Ediwak owo mfịn ẹdiọk itọn̄, ẹsinyụn̄ ẹkere ẹban̄a idemmọ kpọt. Edi mbon oro ẹsimade ndinọ owo n̄kpọ ẹsinen̄ede ẹkop inemesịt. (Luke 6:38) Se isinamde mmọ ẹkop inemesịt edi ke mmọ ẹma mme owo ẹkan inyene. Oro esinyụn̄ anam mmọ ẹkọm mme owo ke ini ẹnamde n̄kpọ ẹnọ mmọ. (Colossae 3:15) Bụp idemfo ete, ‘Anie ke n̄kpama edi ufan mi—owo emi esifamde efam mîsinyụn̄ ikọmke owo ke ini ẹnamde n̄kpọ ẹnọ enye m̀mê owo emi esinọde owo n̄kpọ esinyụn̄ ọkọmde owo?’ Nso ke emi ekpep nnyịn? Ana idomo ndinam se ikpamade mbon en̄wen ẹnam ye nnyịn.—Matthew 7:12.