Nte Edisio Usiene Akwan̄a?

Ke ntatara ọkpọusụn̄ kiet ke United States, moto kiet ama anam ubịghi ke ndinọ moto efen usụn̄ man awat ebe. Andiwat ọyọhọ moto iba oro ama osio usiene ke nditop n̄kpọisan̄ oro ekeduede, owotde akaisan̄ kiet oro mîduehe.

Eyenan̄wan kiet ama akan ekpri eyenan̄wan efen ke ikpehe kiet ke mbre ufọkn̄wed. Enye ama osio usiene ke ndisian ufan eren eyenan̄wan oro nte ke eyenan̄wan oro ama aka ekese eyeneren kiet ke ufọkn̄wed efen. Enye ke ntre ama abiat itie ebuana eyenan̄wan oro ye ufan eren emi.

EDIWAK owo ẹkere ke imenen ke ndisio usiene ke ini mmọ ẹkerede ke ẹma ẹnam mmimọ idiọkn̄kpọ. Ke usụn̄ kiet m̀mê eken, mmọ ẹsitiene ufiet oro: “Kûyat esịt, kam sio usiene.” Mfịn, ima mbọhọidụn̄ omosụhọde ubọk, ndien edu usio usiene ọmọdọk.—Matthew 24:12.

Didie ke afo, nte ededi, ese edisio usiene? Edieke afo onịmde Bible ke akpanikọ, eyedi afo ekere ete ke edisio usiene ke ofụri ofụri akwan̄a. Edi sia nnyịn idude uwem ke ererimbot oro mînyeneke edu Abasi, afo emekeme ndikere nte ke edifen nnọ, kpa se idide isio n̄kpọ ye edisio usiene, isiwakke ndidi ata idem n̄kpọ. Didie ke afo akpanam n̄kpọ edieke ẹkpetụkde m̀mê ẹkpewode fi? Nte afo emesiyom ndisio usiene edieke owo ofụmide fi mîdịghe etịn̄de ikọ esuene adian fi ọnọ mmọ efen? Nte afo emesisio usiene m̀mê emesifen ọnọ?

Edu Usio Usiene Esinọ Unan

Ke akpanikọ, ndudue enyene udomo. Edi owo ikowoho m̀mê mme abiatibet ndisuene n̄wakn̄kan owo oro ẹyomde ndisio usiene. “Mme ndudue” oro ẹkotde ẹto ke ntọn̄ọ ibuotikọ emi ekedi ata n̄kpri, okposụkedi mmọ ẹketiede nte ẹkponi ke ekikere mbon oro ẹkebierede ndisio usiene.

Bible ọdọhọ ete ke nnyịn ikpenyeneke ndikọri edu usio usiene. Mme N̄ke 24:29 ọnọ item ete: “Kûdọhọ ete, ‘Nyenam enye kpa nte enye anamde mi: nyenọ owo oro kpa nte utom esie edide.’” Ntak emi mînaha ọdọhọ? N̄kpọ kiet edi, utọ edu oro esinọ unan ke ntụk ye ke ikpọkidem. Mme ekikere usio usiene ẹsibọ owo emem eke ekikere onyụn̄ ọbiọn̄ọ eti n̄kọkibuot. Kere ban̄a mbụk n̄kpọntịbe emi: “Ọtọin̄wan̄ iba ẹsịnede ke moto mbiomo mmọ ẹtop ikan̄ ẹma ẹwot kiet eken ke itie unịm moto, ẹtrede usua isua-40 oro ọkọtọn̄ọde ke ini mmọ ẹkedide nditọn̄wọn̄.” Kam kere, ke ofụri uwem mmọ ekikere iren iba ẹmi ama abiara oto idiọk, edu usio usiene!—Mme N̄ke 14:29, 30.

Ntak efen nditre ndikọri edu usio usiene edi nte ke mbon oro ẹduede—idem mbon oro ẹnen̄erede ẹdue—ẹkeme ndikpụhọde. Apostle Paul, ke uwụtn̄kpọ, ini kiet ‘ama onyịme ẹwot’ mbet stephen onyụn̄ “ofịme ikọ ndịghe ye ikọ nsobo adian mbet Ọbọn̄.” Edi enye ama okpụhọde. Ke ediwak isua ke ukperedem apostle Peter—emi uwem esie okodude ke itiendịk ke ubọk Paul ke ntọn̄ọ ntọn̄ọ ini oro—okokot enye “edima eyenete nnyịn Paul.” (Utom 8:1; 9:1; 2 Peter 3:15) Mme Christian ẹkpekedomo ndisio Paul usiene akpan akpan ke ini enye ekebetde, ọdọn̄ọde nnan, ke Damascus. (Utom 9:3-15) Nso akama-mfụhọ ndudue ke oro ekpekedi ntem!

Ke ntre Paul nte odotde ama ekeme ndinọ item ke N̄wed Mbon Rome 12:20 ete: “Edieke usua fo okopde biọn̄, nọ enye udia adia; edieke enye okopde nsatitọn̄, nọ enye mmọn̄ ọn̄wọn̄.” Ntak-a? Koro edieke nnyịn isiode asua usiene ke idem nnyịn, nnyịn inam edu esie ọsọsọn̄ akan inyụn̄ inam usua oro odude ke ufọt nnyịn ọsọn̄ ubọk akan. Edi edieke nnyịn inamde owo oro eduede m̀mê ọnọde nnyịn unan eti n̄kpọ, nnyịn imekeme ndinam edu esie emem inyụn̄ inam akani owo usua oro akabade edi ufan.

Nditi mme mmeme nnyịn n̄ko esin̄wam ke ndikan iyatesịt oro esidade okosụn̄ọ ke udọn̄ edisio owo usiene. Andiwet psalm ama obụp ete: “O Jehovah, afo ekpese mme idiọkido, O Ọbọn̄, anie ekpekeme ndida?” (Psalm 130:3) Kpukpru nnyịn ima idue m̀mê inọ mmọ en̄wen unan. Nte nnyịn ikokopke inemesịt edieke mmọ mîkodomoke ndisio usiene? Nte nnyịn, ndien, ikpanamke n̄kpọ ye ukem mfaraidem oro? Jesus ama ọnọ item ete: “Sededi mbufo ẹyomde owo ẹnam ye mbufo, ẹnam kpa ntre ye mmọ.”—Matthew 7:12.

Edi akpanikọ, Bible ọdọhọ ete: “Ẹsua idiọkido.” (Psalm 97:10; Amos 5:15) Edi enye idọhọke nnyịn isua owo oro anamde idiọk ido. Ke akpanikọ, Jesus okowụk nnyịn ete: “Ẹma mme asua mbufo, ẹnyụn̄ ẹbọn̄ akam ẹyom ufọn mmọ eke ẹnamde mbufo isịnenyịn.” (Matthew 5:44) Edieke nnyịn isiode usiene, nnyịn ikpebe edu anamidiọk. N̄ke eset ọdọhọ ete: “Kûdọhọ ete, Nyenam usiene idiọkn̄kpọ: bet Jehovah, ndien enye eyen̄wam fi.” (Mme N̄ke 20:22) Nso ọniọn̄ ọniọn̄ edu ke emi edi ntem! Ọfọn didie akan ndiwụt idem nnyịn nte mme andikan ebe ke ndibiọn̄ọ idomo edikpebe mme anamidiọk.—John 16:33; Rome 12:17, 21.

Ufen—Anie Ọnọ?

Ke akpanikọ, ndusụk edinam ẹsitịm ẹdiọk ẹkan ọkpọkpọ esuene mme unan. Nso edieke nnyịn idide owo unọmọ ubiatibet? Nte ido edide, nnyịn iyekere ite ke ntak unenikpe, akpana ẹnam n̄kpọ ẹban̄a. Edi ẹkpenam nso? Ke ndusụk n̄kaowo idịghe esen n̄kpọ owo ndise mban̄a mme n̄kpọ idemesie nnyụn̄ nsio usiene. Edi mme utọ n̄kaowo oro ẹsiwak ndida n̄kosịm ubahade otode usua ke ufọt mme owo. Mfịn, ibet Abasi m̀mê ibet owo ke ekese idaha inyịmeke mme owo ẹsio usiene ubiatibet ke idemmọ, ndien ye eti ntak. Utọ ọkpọkpọ afai oro n̄kukụre esinam afai efen efen odu.

Nte owo unọmọ ubiatibet, ndien, ekpenyene ndikịbi inua nnyụn̄ mbọ esuene ke ndopuyo? Inen̄ekede idi ntre. Ke ini ẹsịnde ntịme ye owo m̀mê inyene nnyịn, mme enyene-odudu ẹdu ndika mbịne. Afo emekeme ndiyom ndikot borisi. Ke itieutom, ka bịne eseutom. Ke ufọkn̄wed, afo emekeme ndiyom ndikụt akwa etubom. Oro edi ntak kiet emi mmọ ẹdude do—ndikpe unen. Bible asian nnyịn ete ke mbon ukara ẹdi “mme anamutom Abasi, andisio usiene ndiyarade iyatesịt ye enyeemi anamde idiọk.” (Rome 13:4) Unenikpe oyom ete ukara owụt odudu esie, etre unam idiọkn̄kpọ, onyụn̄ amia mme anamidiọk ufen.

Edi akpanikọ, ke ndusụk ini unenikpe esibịghi ndiwụt idem. Ewetn̄wed kiet oro okopde mfekuwem ọkọdọhọ ete: “Unenikpe etie nte tren oro kpukpru ini esiwakde ndidisịm ke idiọk ini.” Ke akpanikọ, ndusụk ini tren oro isidịghe idisịm tutu amama. Mme anam ukwan̄n̄kpọ ẹkeme nditịm nsọn̄ odudu tutu mbon ukara ikemeke ndikara mmọ. Edi, ọniọn̄ ọniọn̄ usụn̄ edi ndimụm idem n̄kama. Bible ọdọhọ ete, “Ndisịme owo ayarade ofụri iyatesịt esiemmọ: edi amanam, enyene-ibuot owo eyesụk enye.”—Mme N̄ke 29:11.

Usiene—Anie Osio?

Ndikpan idem nnyịn ndisio usiene ke ntre eyeda ufọn ọsọk nnyịn, ndien nnyịn imekeme ndibet ke ndopuyo, ifiọkde ite ke edieke owo mînamke unenikpe, Abasi eyenam enye ke nnennen ini. Jehovah ọfiọk ete ke ndiọi edinam oro owo mîkpanke esida okosụn̄ọ ke idiọkn̄kpọ. (Ecclesiastes 8:11) Enye idiyakke mme ọsọn̄esịt ndiọi owo ẹfịk ubonowo ke nsinsi. Oro edi ntak apostle Paul ọkọnọde item ete: “Ẹkûsio usiene ẹnọ idem mbufo, ndima mme ufan mi, edi ẹbọk idem ke usụn̄ ẹnọ iyatesịt Abasi: koro ẹwet ẹte, Jehovah ete, Usiene enyene Mi, Ami nyesio usiene.” (Rome 12:19) Ke akpanikọ, Bible etịn̄ aban̄a usen usiene Andibot. Nso ke usen usiene emi edidi? Ndien anie edidi ebiet ntịn̄enyịn ke usiene Abasi? Nnyịn iyeneme emi ke ibuotikọ efen.

[Ekebe ke page 4]

Man akara ntụk usio usiene, ti ete ke

□ Abasi enyene ọkpọsọn̄ udọn̄ aban̄a unenikpe

□ ndinyene edu usio usiene esinọ unan

□ ndiwụt mfọnido esiwak ndisụhọde mme mfịna oro ẹnyenede ye mmọ en̄wen

□ ẹma ẹfụmi ediwak ndudue nnyịn

□ mme anamidiọk ẹkeme ndikpụhọde

□ nnyịn ikan ererimbot ebe ke ndibiọn̄ọ mme usụn̄ esie