Ẹsan̄a Nte Mbon Ọniọn̄
1 Ke ini Jesus ọkọdọhọde mme ọkọiyak inan̄ ẹdi mme anditiene imọ, mmọ ikabiatke ini ndinam ubiere, edi ‘kpa idaha oro, mmọ ẹma ẹtiene enye.’ (Matt. 4:18-22) Ke ini ẹkenamde Saul emi otode Tarsus akabade edi Christian, ndien ekem afiak okụt usụn̄, enye n̄ko ikabiatke ini, edi “kpa idaha oro ke synagogue enye ọtọn̄ọ ndikwọrọ Jesus.” (Utom 9:20) Ini isibetke owo; ke ndondo oro enye ebede, enye aka taktak. Ntak edi oro edide akpan n̄kpọ nnyịn ‘ndisan̄a nte mbon ọniọn̄’ ke nte idade ini nnyịn inam n̄kpọ.—Eph. 5:15, 16.
2 Unọmọ: Ifet oro inyenede ndinam n̄kpọ Jehovah mfịn ekeme ndibe mfep n̄kpọn̄. (Jas. 4:14) “Unọmọ” ekeme ndisịm owo ekededi. (Eccl. 9:11) Ke adianade do, kpukpru nnyịn ke ikpon owo, ndien ke editịm n̄kpọ emi owo ndomokiet ikemeke ndifehe mbọhọ “ini ukụt” oro isisobode ke ini usọn̄, emi esinyụn̄ anamde nnyịn ikemeke aba ndinam se ikesinamde ke utom Jehovah. (Eccl. 12:1) Mmọdo, iwụtke eti ibuot ndimen̄e ndiyak idem nnọ Abasi m̀mê ndibet tutu n̄kpọ ọfọn mbemiso itatde utom ukwọrọikọ nnyịn. (Luke 9:59-62) Sia Abraham akadade uwem esie anam n̄kpọ ọniọn̄ ọniọn̄ ebe ke ndisịn idem ofụri ofụri ke utom Jehovah, enye ama enyene emem ye ifụre ke mme isua usọn̄ esie, ndien enye akakpa “ke ata usọn̄, akani, onyụn̄ oyụhọ.”—Gen. 25:8.
3 Ini Iniọn̄ke Aba: Nnyịn n̄ko ikpenyene ndida ini nnyịn nnam n̄kpọ ọniọn̄ ọniọn̄ sia “ini emi osụhọde iniọn̄ke aba.” (1 Cor. 7:29-31) Ata esisịt ini ayak akani editịm n̄kpọ emi ndisịm utịt. Mme ifet edibuana ke akwa utom editan̄ mbon mbieterọn̄ mbok ke ini “mbun̄wụm isọn̄” eyetre. (Edi. 14:15) Ana nnyịn ikpeme mbak editịmede esịt uwem emi ye mme n̄kpọ oro ẹsiwọn̄ọrede owo ntịn̄enyịn ẹdida ini oro nnyịn ikpadade ikwọrọ ikọ. (Luke 21:34, 35) Nnyịn idikop inemesịt didie ntem nditi ke nnyịn ima ibuana ọyọhọ ọyọhọ ke ndidọk mbun̄wụm isọn̄!
4 Ana nnyịn idu ke ukpeme kpukpru ini mbak mme ifet oro ẹbererede ẹnọ nnyịn ndibuana ke inem inem utom ukwọrọikọ ẹdibe nnyịn. Ẹyak nnyịn ibiere ndinam ofụri se ikemede ke utom Jehovah “adan̄a nte edide ‘Mfịn.’” (Heb. 3:13) Ke inamde ntre, nnyịn iyowụt ke imenen̄ede inyene ọniọn̄, koro “owo eke anamde uduak Abasi ododu ke nsinsi.”—1 John 2:17.