Uyakidem Ye Ifụre Edimek
“Christ okosio nnyịn ke itie ufụn.”—GALATIA 5:1.
1. Mme ikọ usem Hebrew ye Greek oro ẹkabarede “edinam asana” m̀mê ‘edinịm nnọ’ ẹbuana nso akpan akpan?
MME andiwet Bible ẹkeda nsio nsio ikọ Hebrew ye Greek ndiwụt ekikere edidi se ẹbaharede, m̀mê ẹsiode ẹnịm san̄asan̄a, ndinam edisana uduak. Ke Bible Ikọ Efịk ẹda mme ikọ nte “edinam asana” m̀mê ‘edinịm nnọ’ ẹkabade mme ikọ ẹmi. Ndusụk ini ẹsida mme ikọ ẹmi nditịn̄ mban̄a mme n̄kpọ oro ẹbọpde—ke ofụri ofụri temple Abasi ke Jerusalem eset ye utuakibuot oro ẹkenamde do. Owo iwakke ndida mme ikọ ẹmi ntịn̄ mban̄a mme n̄kpọ ererimbot.
Ediyak Nnọ “Abasi Israel”
2. Ntak emi ẹkemede nte enende ndikot Jehovah “Abasi Israel”?
2 Ke 1513 M.E.N., Abasi ama anyan̄a nditọ Israel osio ke ufụn Egypt. Esisịt ini ke oro ebede, enye ama osio mmọ enịm nte akpan ikọt esie, adade mmọ esịn ke itie ebuana ediomi ye idemesie. Ẹma ẹsian mmọ ẹte: “Edieke mbufo mîditreke ndikop uyo mi, nnyụn̄ nnịm ediomi mi, mbufo ẹyedi ndien akpan inyene mi ẹkan kpukpru obio: koro ofụri ererimbot edide okịm.” (Exodus 19:5; Psalm 135:4) Ke ama akanam nditọ Israel ẹdi akpan inyene esie, nte enende ẹma ẹkeme ndikot Jehovah “Abasi Israel.”—Joshua 24:23.
3. Ntak emi Jehovah mîkanamke asari ke ndimek Israel nte ikọt esie?
3 Ke ndinam nditọ Israel ẹdi ikọt esie oro ẹyakde idem ẹnọ, Jehovah ikanamke asari, koro enye ama enyene n̄ko ima ima edikere mban̄a ọnọ mbon oro mîkedịghe nditọ Israel. Enye ama eteme ikọt esie ete: “Ke adan̄aemi esen owo odụn̄de ye afo ke isọn̄ mbufo, mbufo ẹkûtụk enye. Ẹbat esen eke odụn̄de ye mbufo nte amana ke otu mbufo, nyụn̄ ma enye nte idemfo: koro mbufo ẹkedide isen ke isọn̄ Egypt: ami ndi Jehovah Abasi mbufo.” (Leviticus 19:33, 34) Ediwak isua ikie ke ukperedem, ẹma ẹnen̄ede ẹnam apostle Peter ọfiọk idaha ekikere Abasi, emi ọkọdọhọde ete: “Ke akpanikọ mmokụt nte Abasi iten̄eke owo enyịn: edi ke kpukpru idụt Enye adadara owo ekededi eke abakde Enye onyụn̄ anamde nti ido.”—Utom 10:34, 35.
4. Nso ikedi mme idaha kaban̄a itie ebuana ke ufọt Abasi ye Israel, ndien nte nditọ Israel ẹma ẹdu uwem ẹkekem ye mmọ?
4 Tịm fiọk, n̄ko, ete ke ndidi ikọt Abasi oro ẹyakde idem ẹnọ ọkọkọn̄ọ ke n̄kpọ. N̄kukụre edieke mmọ ẹkpekenamde uyo Abasi ketket ẹnyụn̄ ẹnịmde ediomi esie ke mmọ ẹkpekedi “akpan inyene” esie. Ke mfụhọ, nditọ Israel ẹma ẹkpu ndinam mme n̄kpọ oro ẹkeyomde mi. Ke ẹma ẹkesịn Messiah oro Abasi okosiode ọdọn̄ ke akpa isua ikie E.N., mmọ ẹma ẹtaba idaha ifetutom mmọ. Jehovah ikedịghe aba “Abasi Israel.” Ndien nditọ Israel eke obụk ikedịghe aba ikọt Abasi oro ẹyakde idem ẹnọ.—Men Matthew 23:23 domo.
Uyakidem eke “Israel Abasi”
5, 6. (a) Nso ke mme ntịn̄nnịm ikọ Jesus oro ẹkewetde ẹnịm ke Matthew 21:42, 43 ọkọwọrọ? (b) Ini ewe ndien didie ke “Israel Abasi” ekedi edidu?
5 Nte emi ọkọwọrọ ete ke Jehovah idahaemi ikenyeneke ikọt oro ẹyakde idem ẹnọ? Baba-o. Ke okotde oto andiwet psalm, Jesus Christ ama ebem iso etịn̄ ete: “Nte akanam mbufo ikotke n̄wed, ẹte, Itiat emi mme ọbọp ufọk ẹsịnde amakabade edi etubom inụk: emi oto Jehovah, nnyịn inyụn̄ ise enye ke utịbe? Mmọdo ndọhọ mbufo nte, Ẹyebọ mbufo Obio Ubọn̄ Abasi, ẹyak ẹnọ idụt emi edin̄wụmde mfri esie.”—Matthew 21:42, 43.
6 ‘Idụt emi on̄wụmde mfri esie’ edi esop Christian. Ke esisịt ini oro enye okodude ke isọn̄, Jesus ama emek mme akpa andibuana ke enye. Edi ke usen Pentecost 33 E.N., ekedi Jehovah Abasi ke idemesie ọkọtọn̄ọ esop Christian ebe ke ndin̄wan̄a edisana spirit esie nduọk mme akpa andibuana ke enye, ẹkedide n̄kpọ nte owo 120. (Utom 1:15; 2:1-4) Nte apostle Peter ke ukperedem ekewetde, esop oro ẹketọn̄ọde obufa obufa mi ama akabade ndien edi “ubon eke ẹmekde, edi mme oku edidem, edi edisana obio, edi ikọt eke Abasi enịmde ọnọ Idem Esie.” Ẹkemek kaban̄a nso ntak? Man mmọ “ẹka ẹketan̄a mme utịbe edinam Esie, emi okokotde [mmọ] osio ke ekịm, esịn ke utịbe un̄wana Esie.” (1 Peter 2:9) Mme anditiene Christ, oro ẹyetde aran ke spirit Abasi, ẹkedi idụt oro ẹyakde idem ẹnọ ke emi, kpa “Israel Abasi.”—Galatia 6:16.
7. Nso ke akana mme andibuana ke Israel Abasi ẹdara, ndien ke ntre nso ke ẹkedọhọ mmọ ẹfep?
7 Okposụkedi mme andibuana ke edisana idụt oro ẹkedide “ikọt eke Abasi enịmde ọnọ Idem Esie,” mmọ ikenyeneke ndidụk ufụn. Ke edide isio, mmọ ẹkenyene ndidara ifụre oro okponde akan enye oro idụt Israel eke obụk oro ẹkeyakde idem ẹnọ ekenyenede. Jesus ama ọn̄wọn̄ọ ọnọ mbon oro ẹkenyenede ndidi mme andibuana ke obufa idụt emi ete: “Mbufo ẹyefiọk akpanikọ, akpanikọ oyonyụn̄ anam mbufo ẹwọrọ ufụn.” (John 8:32) Apostle Paul ama osio owụt ete ke ẹma ẹnam mme Christian ẹbọhọ ufụn mme n̄kpọ oro Ibet ediomi okoyomde. Ke afan̄ emi enye ama ọnọ mme ekemmọ andinịm ke akpanikọ ke Galatia item ete: “Christ okosio nnyịn ke itie ufụn, ete idi nditọisọn̄; ẹsọn̄ọ ẹda ndien, ẹkûyak ẹtọn̄ọ ntak ẹkọmọ mbufo ke ọkpọnọ itie ufụn.”—Galatia 5:1.
8. Ke nso usụn̄ ke ndutịm Christian ọnọ mme owo ifụre oro okponde akan enye oro ẹkenyenede ke idak Ibet ediomi?
8 Ke mîbietke Israel eke obụk eset, tutu esịm usen mfịn Israel Abasi anam se uyakidem esie oyomde ketket. Emi ikpenyeneke ndikpa owo idem koro mme andibuana ke enye ẹmek ndisụk ibuot ke unyịmesịt. Ke adan̄aemi mme andikabuana ke Israel eke obụk ẹkekabarede ẹdi mme andiyak idem nnọ ke ntak emana, mme andibuana ke Israel Abasi ẹkabade ẹdi oro ebe ke edimemek. Ndutịm Christian ke ntem ama okpụhọde ye Ibet ediomi mme Jew, emi ekenyịkde-nyịk uyakidem odori mme owo ke idem ye unana ediyak mmọ ẹnyene ifụre edimek.
9, 10. (a) Didie ke Jeremiah okowụt ke ukpụhọde oyodu kaban̄a uyakidem? (b) Ntak emi afo ekemede ndidọhọ ke idịghe kpukpru mme Christian mfịn oro ẹma ẹkeyak idem ẹnọ ẹdi mme andibuana ke Israel Abasi?
9 Prọfet Jeremiah ama ebem iso etịn̄ aban̄a ukpụhọde ke ebuana ye uyakidem ke ini enye ekewetde ete: “Jehovah ọdọhọ, ete, Sese, mme usen ke ẹdi eke ndinamde obufa ediomi ye ufọk Israel, ye ufọk Judah; idibietke ediomi oro n̄kodiomide ye mme ete mmọ, ke usen oro n̄komụmde mmọ ubọk, nnyụn̄ nsion̄o mmọ ke isọn̄ Egypt; kpa ediomi mi oro mmọ ẹkebiatde, ndien ami n̄kenyene mmọ: Jehovah ọdọhọ: koro emi edide ediomi eke ndidiomide ye ufọk Israel, ke mme usen oro ẹma ẹbe, Jehovah ọdọhọ: nyesịn mmọ mbet mi ke esịt, nnyụn̄ n̄wet mmọ ke ọwọn̄ esịt; nyonyụn̄ ndi Abasi mmọ, ndien mmọ ẹyedi ikọt mi.”—Jeremiah 31:31-33.
10 Ndinyene mbet Abasi “ke esịt,” ẹwetde, yak idọhọ, ‘ke ọwọn̄ esịt mmọ,’ onụk mme andibuana ke Israel Abasi ndidu uwem ekekem ye uyakidem mmọ. Se inụkde mmọ ẹnam n̄kpọ okop odudu akan eke nditọ Israel eke obụk, ẹkeyakde idem ẹnọ ke emana, idịghe ke edimemek. Mfịn, se ibede ekemmọ mme andituak ibuot miliọn ition ke ofụri ererimbot ẹtiene ẹnyene ọkpọsọn̄ udọn̄ edinam uduak Abasi oro Israel Abasi owụtde. Mmọ kpasụk ntre ẹma ẹyak uwem mmọ ẹnọ Jehovah Abasi ndinam uduak esie. Okposụkedi mme owo ẹmi mînyeneke idotenyịn uwem eke heaven nte mbon oro ẹnamde Israel Abasi ẹnyenede, mmọ ẹdat esịt ke idotenyịn edidu uwem ke nsinsi ke isọn̄ ke idak ukara Obio Ubọn̄ Abasi eke heaven. Mmọ ẹwụt esịtekọm ẹban̄a Israel eke spirit ebe ke ndisịn ifịk n̄n̄wam ibat ibat nsụhọ mme andibuana ke enye ke ndinam utom mmọ ‘nditan̄a mme utịbe edinam enye emi okokotde mmọ osio ke ekịm, esịn ke utịbe un̄wana esie.’
Ndida Ifụre Emi Abasi Ọnọde Nnam N̄kpọ ke Eti Ibuot
11. Ẹkebot owo ye nso ukeme, ndien didie ke ẹkpeda emi ẹnam n̄kpọ?
11 Abasi okobot mme owo ndida ifụre ke n̄kpọuto. Enye ama ọnọ mmọ ukeme ndinam ubiere. Akpa owo iba ẹma ẹda ifụre mmọ ndinam edimek ẹnam n̄kpọ. Nte ededi, mmọ ke unana eti ibuot ye unana ima ẹma ẹnam edimek oro akadade afanikọn̄ ọsọk mmọ ye nditọ mmọ. Edi, emi owụt in̄wan̄în̄wan̄ nte ke Jehovah akananam inyịkke mme enyene-ifiọk edibotn̄kpọ ndinam n̄kpọ ke usụn̄ oro atuahade ye mme uduak ye udọn̄ esịtidem mmọ. Ndien sia “Abasi [amade] owo eke ọnọde ke inemesịt,” n̄kukụre uyakidem oro enye enyịmede edi enye oro ọkọn̄ọde ke ima, enye oro ẹnamde ke unyịmesịt ye inemesịt, kiet oro ọkọn̄ọde ke ifụre edimek. (2 Corinth 9:7) Owo inyịmeke orụk efen ekededi.
12, 13. Didie ke Timothy edi uwụtn̄kpọ kaban̄a nnennen edinọ eyen ukpep, ndien uwụtn̄kpọ esie ada ediwak n̄kparawa owo ekesịm nso?
12 Ke ẹdiọn̄ọde se ẹyomde emi ọyọhọ ọyọhọ, Mme Ntiense Jehovah ẹtoro owo ndiyak idem nnọ Abasi, edi mmọ idehede inyịk owo ekededi isịn ke edinam utọ uyakidem oro, idem ọkpọkọm nditọ mmọ. Ke edide isio ye ediwak ufọkabasi, Mme Ntiense inịmke nditọ mmọ baptism ke ini ẹdide nsek nditọ, nte n̄kpọ eke ẹdọhọde ke ẹkeme ndinyịk mmọ nsịn ke uyakidem ye unana ọkpọkpọ edimek. Uwụtn̄kpọ N̄wed Abasi nditiene edi enye oro akparawa oro Timothy eketienede. Nte akwa owo, apostle Paul ama asian enye ete: “Yịre ke se afo ekekpepde, onyụn̄ etịmde ọfiọk ete edi akpanikọ; koro ọmọdiọn̄ọ owo emi ekekpepde fi, omonyụn̄ ọfiọk ete, toto ke uyen afo ama ọfiọk Edisana N̄wed Abasi, emi ekemede ndinam fi ọwọrọ ọniọn̄ ọbọ edinyan̄a ke edibuọt idem ye Christ Jesus.”—2 Timothy 3:14, 15.
13 Odot ẹtịm ẹfiọk nte ke Timothy ọkọfiọk edisana n̄wed Abasi koro ẹkekpepde enye toto ke uyen. Eka ye eka eka esie ẹma ẹnam enye etịm ọfiọk—owo ikenyịkke-nyịk enye—ndinịm mme ukpepn̄kpọ Christian. (2 Timothy 1:5) Nte utịp, Timothy ama okụt ọniọn̄ oro odude ke ndikabade ndi anditiene Christ ndien ke ntem ama anam ọkpọkpọ edimek kaban̄a uyakidem Christian. Ke eyomfịn, ediwak tọsịn n̄kparawa iren ye iban ke mme itie duop ẹmi mme ete ye eka mmọ ẹdide Mme Ntiense Jehovah ẹmetiene uwụtn̄kpọ emi. (Psalm 110:3) Mbon eken itieneke. Enye edi n̄kpọ ẹnyenede ndinam ọkpọkpọ edimek.
Ndimek Ndidi Ofụn Anie?
14. Nso ke Rome 6:16 asian nnyịn aban̄a ọyọhọ ifụre?
14 Baba owo kiet ibọhọke ufụn ofụri ofụri. Mbet obot, utọ nte mbet aban̄ade odudu oro odụride n̄kpọ aka isọn̄, emi owo mîkemeke ndifụmi ye unana edida unan, enịm adan̄a ke ifụre oro kpukpru owo ẹnyenede. N̄ko ke usụn̄ifiọk eke spirit, baba owo kiet ibọhọke ufụn ofụri ofụri. Paul ọkọkọk ibuot ete: “Nte mbufo ifiọkke ite mme imọ idi ifịn inọ n̄kpọ ekededi eke mme imọ iyakde idem inọ ndisụk ibuot nnọ enye, ye enye edide idiọkn̄kpọ eke osụn̄ọde ke n̄kpa, ye enye edide nsụkibuot eke osụn̄ọde ke edinen ido.”—Rome 6:16.
15. (a) Didie ke mme owo ẹkere ẹban̄a edidi ifịn, edi nso ke ata ediwak owo ẹnam ke akpatre? (b) Mme mbụme ewe ẹmi ẹdotde ke nnyịn ikpobụp idem nnyịn?
15 Ata ediwak owo imaha ekikere edidi ofụn owo en̄wen. Edi, ke ererimbot mfịn akpanikọ edi nte ke mme owo ẹwak ndiyak ẹkara ẹnyụn̄ ẹnyene odudu ke idemmọ ke ata ediwak n̄kari n̄kari usụn̄ tutu mmọ ye unana edikokoi nnyịme ẹnam se mbon en̄wen ẹyomde mmọ ẹnam. Ke uwụtn̄kpọ, usiakifia usuanetop ye ererimbot unọ idem inemesịt ẹdomo ndifịk mme owo nsịn ke usụn̄ kiet, ẹnịmde mme idaha ẹnọ mmọ nditiene. Mme n̄ka ukaraidem ye eke ido ukpono ẹnam mme owo ẹnọ mme ekikere ye mme utịtmbuba mmọ ibetedem, ibehe ke mme mfan̄a ẹnamde ẹnịm kpukpru ini, edi awak ndibe ke ndidemede ekikere edidianakiet m̀mê ima nsọn̄ọnda. Sia Paul okowụtde ete ke ‘nnyịn idi ifịn inọ owo ekededi eke nnyịn isụkde idem inọ,’ ọfọn owo nnyịn kiet kiet obụp idemesie, ‘Ami ndi ofụn anie? Anie enyene n̄kponn̄kan odudu ke mme ubiere mi ye usụn̄ uwem mi? Nte edi mme ọkwọrọ ederi ido ukpono, mme adaiso ukaraidem, ikpọ mme enyene okụk, m̀mê mbon edinam unọ idem inemesịt? Anie ke ami nsụk ibuot nnọ—Abasi m̀mê owo?’
16. Ke nso usụn̄ifiọk ke mme Christian ẹdi ifịn Abasi, ndien nso idi nnennen ekikere kaban̄a utọ itie ofụn oro?
16 Mme Christian isehe nsụkibuot nnọ Abasi nte edibiat ọkpọkpọ ifụre nte mînenke. Mmọ ẹwụt ifụre mmọ ke unyịmesịt ke usụn̄ ebietde eke Uwụtn̄kpọ mmọ, Jesus Christ, ẹnamde mme ọkpọkpọ udọn̄ ye mme ebeiso n̄kpọ ẹdu ke n̄kemuyo ye uduak Abasi. (John 5:30; 6:38) Mmọ ẹkọri “ekikere Christ,” ẹsụkde idem ẹnọ enye nte Ibuot esop. (1 Corinth 2:14-16; Colossae 1:15-18) Emi enen̄ede etie nte n̄wan oro ọdọde ndọ onyụn̄ eberede ye eren oro enye amade ke unyịmesịt. Ke akpanikọ, ẹtịn̄ ẹban̄a otu mme Christian oro ẹyetde aran nte edisana eyenan̄wan emi mîfiọkke eren oro ẹn̄wọn̄ọde ndida nnọ Christ ke ndọ.—2 Corinth 11:2; Ephesus 5:23, 24; Ediyarade 19:7, 8.
17. Nso ke kpukpru Mme Ntiense Jehovah ẹmek ndikabade ndi?
17 Owo kiet kiet ke otu Mme Ntiense Jehovah, edide enye enyene idotenyịn eke heaven m̀mê eke isọn̄, ama anam ọkpọkpọ uyakidem ọnọ Abasi ndinam uduak esie nnyụn̄ nsụk ibuot nnọ enye nte Andikara. Ye Ntiense kiet kiet, uyakidem edi ọkpọkpọ edimek ndikabade ndi ofụn Abasi utu ke ndika iso ndi ofụn owo. Emi odu ke n̄kemuyo ye item apostle Paul: “Ẹkedep mbufo ke ekọmurua; ẹkûdụk ufụn ẹnọ owo.”—1 Corinth 7:23.
Ndifiọk Usụn̄ Udori
18. Ini ewe ke owo emi oyomde ndidi Ntiense odot ndina baptism?
18 Mbemiso owo odot ndikabade ndi kiet ke otu Mme Ntiense Jehovah, ana enye esịm mme n̄kpọ N̄wed Abasi oro ẹnamde owo odot. Mbiowo ẹsiwụt ukpeme ke ndibiere m̀mê owo oro oyomde ndidi Ntiense enen̄ede ọfiọk se uyakidem Christian ọwọrọde. Nte enye enen̄ede oyom ndidi kiet ke otu Mme Ntiense Jehovah? Nte enye eben̄e idem ndidu uwem ekekem ye se emi abuanade? Edieke mîdịghe ntre, enye idotke ndina baptism.
19. Ntak emi ntak mîdụhe ndikụt ndudue nnọ owo oro ebierede ndikabade ndi asan̄autom Abasi oro ayakde idem ọnọ?
19 Nte ededi, edieke owo esịmde kpukpru se ẹyomde, ntak ẹkpekụtde ndudue ẹnọ enye ke ndinam ọkpọkpọ ubiere ke unyịmesịt ndiyak Abasi ye Ikọ Esie eke odudu spirit enyene odudu ke idemesie? Nte ọdiọk owo ndiyak Abasi utu ke mme owo enyene odudu ke idemesie? Mîdịghe nte emi enyene esisịt udori? Mme Ntiense Jehovah ikereke ntre. Mmọ ke ofụri esịt ẹnyịme ye mme ikọ Abasi ẹmi Isaiah ekewetde ete: “Ami ndi Jehovah Abasi fo, emi n̄kpepde fi usụn̄ udori, nda fi usụn̄ eke afo edisan̄ade.”—Isaiah 48:17.
20. Ke mme usụn̄ ewe ke akpanikọ Bible osio mme owo ke ufụn?
20 Akpanikọ Bible osio mme owo ke ufụn edinịm mme ukpepn̄kpọ nsunsu ido ukpono ke akpanikọ, utọ nte nsinsi ndutụhọ ke ikan̄ ikan̄ hell. (Ecclesiastes 9:5, 10) Utu ke oro, enye ọyọhọ esịt mmọ ye esịtekọm kaban̄a ata idotenyịn emi mme akpan̄kpa ẹnyenede—ediset ke n̄kpa oro ẹnamde odu ke isọn̄ uwa ufak Jesus Christ. (Matthew 20:28; Utom 24:15; Rome 6:23) Akpanikọ Bible anam mme owo ẹbọhọ mme edikpu ẹtode edibuọt idem ke mme un̄wọn̄ọ ukaraidem oro ẹsikpude ndien ndien. Utu ke oro, enye anam esịt mmọ ọyọhọ ọduọhọ ye idatesịt ke ndidiọn̄ọ nte ke Obio Ubọn̄ Jehovah amakakara ke heaven ndien ke mîbịghike ayakara ofụri isọn̄. Akpanikọ Bible osio mme owo ke ufụn mme edinam oro ẹdide, okposụkedi ẹdide se inemde mmeme ikpọkidem, idaha ukpono isọk Abasi ẹnyụn̄ ẹnọ akamba unan ke uduot ediduọk itie ebuana, udọn̄ọ, ye n̄kpa nsek. Ke ibio ibio, ndidi ofụn Abasi enen̄ede ọnọ ufọn akan edidi ofụn owo. Ke akpanikọ, uyakidem nnọ Abasi akama ufọn “ke ini emi . . . ye nsinsi uwem ke eyo emi edidide.”—Mark 10:29, 30.
21. Didie ke Mme Ntiense Jehovah ẹse uyakidem nnọ Abasi, ndien ọdọn̄ mmọ ndinam nso?
21 Mme Ntiense Jehovah mfịn ikakabakede idi ubak idụt oro ayakde idem ọnọ ke emana nte nditọ Israel eset ẹkedide. Mme Ntiense ẹdi ubak esop mme Christian oro ẹyakde idem ẹnọ. Ntiense kiet kiet oro ama akana baptism akabade edi utọ owo oro ebe ke enye ke idemesie ndida ifụre edimek nnam uyakidem. Ke akpanikọ, ye Mme Ntiense Jehovah, uyakidem osụn̄ọ ke inem inem ọkpọkpọ itie ebuana ye Abasi oro utom unyịmesịt oro ẹnamde ẹnọ enye enịmde idiọn̄ọ. Ọdọn̄ mmọ ndimụm idara idara itie ebuana emi n̄kama ke ofụri esịt, ẹsọn̄ọde ẹyịre ke ifụre oro Jesus Christ akanamde mmọ ẹwọrọ ufụn ke nsinsi.
Didie ke Afo Ọkpọbọrọ?
◻ Ntak emi Abasi mîkanamke asari ke ndimek Israel ndikabade ndi “akpan inyene” esie?
◻ Ntak emi afo ọkpọdọhọde ke uyakidem Christian ibuanake editaba ifụre?
◻ Nso idi mme ufọn ediyak idem nnọ Jehovah Abasi?
◻ Ntak emi ọfọnde ndidi asan̄autom Jehovah akan ndidi ofụn owo?
[Ndise ke page 15]
Ke Israel eset, uyakidem nnọ Abasi ekedi ke emana
[Ndise ke page 16]
Uyakidem Christian edi ke edimemek