Nam N̄kpọ Jehovah ke Edinam Akpanikọ
“Afo [Jehovah] anam ke ima ye mbonima.”—2 SAMUEL 22:26.
1. Didie ke Jehovah anam n̄kpọ ye mbon oro ẹnamde akpanikọ ẹnọ enye?
OWO ikemeke ndinọ Jehovah usiene ke kpukpru se enye anamde ọnọ ikọt esie. (Psalm 116:12) Mme enọ eke spirit ye eke obụk ye ima ima mbọm esie ẹdi utịbe didie ntem! Edidem David eke Israel eset ama ọfiọk ete ke Abasi n̄ko esinam n̄kpọ ke edinam akpanikọ ye mbon oro ẹnamde akpanikọ ẹnọ enye. David ọkọdọhọ ntre ke ikwọ kiet oro enye okotịmde “ke usen oro Jehovah okosiode enye ke ubọk kpukpru mme asua esie, ye ke ubọk [Edidem] Saul.”—2 Samuel 22:1.
2. Nso idi ndusụk n̄kpọ ẹmi ẹwụtde ke ikwọ David oro ẹwetde ke 2 Samuel ibuot 22?
2 David ama ọtọn̄ọ ikwọ esie (oro ebietde Psalm 18) ke nditoro Jehovah nte ‘Andinọ ubọhọ’ ke ibọrọ akam. (2 Samuel 22:2-7) Etiede ke temple esie eke heaven, Abasi ama anam n̄kpọ ndinyan̄a anam-akpanikọ asan̄autom esie nsio ke ubọk n̄kpọsọn̄ asua. (2Sa 22 Ufan̄ikọ 8-19) Ke ntem ẹma ẹdiọn̄ David ke ndibịne edinen usụn̄ nnyụn̄ n̄kpeme mme usụn̄ Jehovah. (2Sa 22 Ufan̄ikọ 20-27) N̄kpọ efen oro enye akasiakde ekedi mme edinam oro ẹkenamde ebe ke ukeme oro Abasi ọnọde. (2Sa 22 Ufan̄ikọ 28-43) Ke akpatre, David ama etịn̄ aban̄a edinyan̄a oro ẹkenyan̄ade enye ẹsio ke ubọk mme andikụt ndudue ke ufọk ye mbon usua ẹtode esenidụt onyụn̄ ọnọ Jehovah ekọm nte “[Enyeemi] ọfọnde mfọn ye owo esie emi eyerede aran.” (2Sa 22 Ufan̄ikọ 44-51) Jehovah ekeme ndinyan̄a nnyịn n̄ko edieke nnyịn ibịnede edinen usụn̄ inyụn̄ iberide edem ke enye kaban̄a ukeme.
Se Ọwọrọde Ndinam Akpanikọ
3. Ke ekikere N̄wed Abasi, nso ke ọwọrọ ndinam akpanikọ?
3 Ikwọ edinyan̄a David ọnọ nnyịn un̄wọn̄ọ ndọn̄esịt emi: “Afo [Jehovah] anam ke ima ye mbonima.” (2 Samuel 22:26) Nsan̄a ikọenyịn̄ Hebrew oro cha·sidhʹ ada ọnọ “mbonima,” m̀mê “owo ima-mfọnido.” (Psalm 18:25, ikọ idakisọn̄ NW) Ikọenyịn̄ oro cheʹsedh esịne ekikere mfọnido oro ke ima adiande idemesie ke n̄kpọ tutu ẹyọhọ uduak esie ke ebuana ye n̄kpọ oro. Jehovah owụt mme asan̄autom esie orụk mfọnido oro, kpa nte mmọ ẹwụtde enye edu emi. Ẹkabade edinen, edisana edinam akpanikọ emi “ima-mfọnido” ye “ima akpanikọ.” (Genesis 20:13, NW; 21:23, NW) Ke N̄wed Abasi usem Greek, “edinam akpanikọ” akama ekikere edisana idaha ye ukpono, oro ẹwụtde ke ikọenyịn̄ oro ho·si·oʹtes ye nsan̄a ikọenyịn̄ oro hoʹsi·os. Utọ edinam akpanikọ oro esịne edinam akpanikọ ye utuakibuot onyụn̄ ọwọrọ ndisịn esịt nnyụn̄ ndu ke ukpeme ndinam kpukpru utom Abasi. Ndinam akpanikọ nnọ Jehovah ọwọrọ ndidiana ye enye ke utuakibuot oro ọsọn̄de idem etieti tutu emi anam n̄kpọ nte okopodudu n̄kpọ oro omụmde n̄kpọ adian.
4. Didie ke ẹwụt edinam akpanikọ Jehovah?
4 Ẹwụt edinam akpanikọ Jehovah ke ediwak usụn̄. Ke uwụtn̄kpọ, enye esibiere ikpe ọnọ ndiọi owo ke ntak ima akpanikọ oro enyenede ọnọ ikọt esie ye edinam akpanikọ nnọ unenikpe ye edinen ido. (Ediyarade 15:3, 4; 16:5) Edinam akpanikọ nnọ ediomi esie ye Abraham ama onụk enye ndinyene anyanime ye nditọ Israel. (2 Ndidem 13:23) Mbon oro ẹnamde akpanikọ ẹnọ Abasi ẹkeme ndiberi edem ke un̄wam esie tutu osịm akpatre usụn̄uwem edinam akpanikọ mmọ ẹnyụn̄ ẹkeme ndinịm ke akpanikọ nte ke enye eyeti mmimọ. (Psalm 37:27, 28; 97:10) Ifiọk oro nte ke sia idide akpan “owo ima” Abasi, owo idikpọn̄ke ukpọn̄ imọ ke Sheol ama ọsọn̄ọ Jesus idem.—Psalm 16:10; Utom 2:25, 27.
5. Sia Jehovah edide anam akpanikọ, nso ke enye oyom oto mme asan̄autom esie, ndien ewe mbụme ke ẹdineme ẹban̄a?
5 Sia Jehovah Abasi edide anam akpanikọ, enye oyom edinam akpanikọ oto mme asan̄autom esie. (Ephesus 4:24) Ke uwụtn̄kpọ, ana irenowo ẹnam akpanikọ man ẹdot ndidi se ẹmekde nte mbiowo esop. (Titus 1:8) Mme n̄kpọ ewe ẹkpenụk ikọt Jehovah ndinam n̄kpọ esie ke edinam akpanikọ?
Esịtekọm ke Mme N̄kpọ Oro Ikpepde
6. Didie ke nnyịn ikpekere iban̄a mme n̄kpọ N̄wed Abasi oro nnyịn ikekpepde, ndien nso ke nnyịn ikpeti iban̄a ifiọk oro?
6 Esịtekọm ke mme n̄kpọ N̄wed Abasi oro nnyịn ikekpepde ẹkpenyene ndinụk nnyịn ndinam n̄kpọ Jehovah ke edinam akpanikọ. Apostle Paul ama akpak Timothy ete: “Yịre ke se afo ekekpepde, onyụn̄ otịmde ọfiọk ete edi akpanikọ; koro ọmọdiọn̄ọ owo emi ekekpepde fi, omonyụn̄ ọfiọk ete, toto ke uyen afo ama ọfiọk Edisana N̄wed Abasi, emi ekemede ndinam fi ọwọrọ ọniọn̄ ọbọ edinyan̄a ke edibuọt idem ye Christ Jesus.” (2 Timothy 3:14, 15) Ti ete ke utọ ifiọk oro okoto Abasi ebe ke “asan̄autom emi anamde akpanikọ, onyụn̄ enyenede ọniọn̄.”—Matthew 24:45-47.
7. Didie ke mbiowo ẹkpekere ẹban̄a udia eke spirit oro Abasi ọnọde ebe ke ofụn emi anamde akpanikọ?
7 Mbiowo oro ẹmekde akpan akpan ẹkpenyene ndiwụt esịtekọm ke eti udia eke spirit oro Abasi ọnọde ebe ke ofụn emi anamde akpanikọ. Ediwak isua ko ke edem ibat ibat mbiowo ẹma ẹnana utọ esịtekọm oro. Andida nse kiet ọkọdọhọ ete ke irenowo ẹmi “ẹma ẹsisụk mme ibuotikọ Enyọn̄-Ukpeme uyo, iyomke ndinyịme enye nte . . . usụn̄ akpanikọ Abasi, kpukpru ini ẹdomode ndikara mbon efen ke usụn̄ ukere n̄kpọ mmọ.” Nte ededi, mbiowo oro ẹnamde akpanikọ akananam idomoke ndinam mbon efen ẹsịn udia eke spirit ekededi oro Abasi ọnọde ebe ke ofụn emi anamde akpanikọ.
8. Nso edieke nnyịn mîwụtke esịtekọm ọyọhọ ọyọhọ ke ndusụk n̄kpọ N̄wed Abasi oro ofụn emi anamde akpanikọ, onyụn̄ enyenede ọniọn̄ ọnọde?
8 Nte Mme Ntiense Jehovah oro ẹma ẹkeyak idem ẹnọ, ana kpukpru nnyịn inam akpanikọ inọ enye ye esop esie. Nnyịn ikpakam idehede ikere ndiwọn̄ọde n̄kpọn̄ utịbe utịbe un̄wana Abasi, ibịnede usụn̄uwem nsọn̄ibuot oro ekemede ndisụn̄ọ ke n̄kpa eke spirit idahaemi ndien ke akpatre nsobo. (Jeremiah 17:13) Edi nso edieke edide ọkpọsọn̄ n̄kpọ ọnọ nnyịn ndinyịme m̀mê ndiwụt esịtekọm ọyọhọ ọyọhọ ke ndusụk akpan n̄kpọ N̄wed Abasi oro ofụn emi anamde akpanikọ owụtde? Do ẹyak nnyịn ke nsụhọdeidem ifiọk ebiet emi nnyịn ikekpepde akpanikọ inyụn̄ ibọn̄ akam iyom ọniọn̄ ke ndinam n̄kpọ ye idomo emi tutu enye osịm akpatre ye ndusụk edinam mme n̄kpọ an̄wan̄a oro ẹmịn̄de-mịn̄.—James 1:5-8.
Wụt Esịtekọm ke Otu Nditọete Christian
9. Didie ke 1 John 1:3-6 owụt ete ke ana mme Christian ẹnyene edu ebuana ọtọkiet?
9 Ediwụt ntotụn̄ọ esịtekọm ke edu ebuana ọtọkiet emi odude ke otu nditọete Christian nnyịn ọnọ ntak efen ndinam n̄kpọ Jehovah ke edinam akpanikọ. Ke akpanikọ, ke edu emi mîdụhe itie ebuana nnyịn ye Abasi ye Christ ikemeke ndidi eti ke n̄kan̄ eke spirit. Apostle John ama asian mme Christian oro ẹyetde aran ete: “Se nnyịn ikokụtde inyụn̄ ikopde, ke nnyịn isian mbufo, man mbufo nde ẹdụk ndụk [“ẹnyene ebuana,” Diaglott] ye nnyịn; ndien ke akpanikọ nnyịn idụk ndụk ye Ete, ye ye Eyen Esie Jesus Christ; . . . Edieke idọhọde ite, idụk ndụk ye Enye, ndien nnyịn isan̄a ke ekịm, nnyịn isosu, inyụn̄ inamke se idide akpanikọ.” (1 John 1:3-6) Edumbet emi abuana kpukpru Christian, edide idotenyịn mmọ ẹdi eke heaven m̀mê eke isọn̄.
10. Okposụkedi Euodia ye Syntyche nte an̄wan̄ade ẹkekụtde nte ọsọn̄de ndikọk ọkpọkpọ mfịna, didie ke Paul ekese iban ẹmi?
10 Oyom ukeme man ẹmụm edu ebuana ọtọkiet ẹkama. Ke uwụtn̄kpọ, iban Christian oro Euodia ye Syntyche nte an̄wan̄ade ẹma ẹkụt nte ọsọn̄de ndikọk mfịna emi okodude ke ufọt mmọ. Paul ke ntem ama eteme mmọ ete “ẹnyene esịt kiet ke Ọbọn̄.” Enye ama adian do ete: “Mmonyụn̄ nsọn̄ọ mben̄e fi, ata nsan̄autom mi, nte an̄wam iban oro, koro mmọ ekesan̄ade ye ami ẹn̄wana en̄wan ẹban̄a gospel, ẹnyụn̄ ẹdiana ye Clement nde, ye mme nsan̄autom mi eken, emi ẹnyịn̄ mmọ ẹdude ke n̄wed uwem.” (Philippi 4:2, 3) Iban oro ẹten̄ede Abasi mi ẹma ẹsan̄a ye Paul ye mbon en̄wen ẹn̄wana en̄wan “ẹban̄a gospel,” ndien enye ama ọfiọk ete ke mmọ ẹkedu ke otu mbon oro “ẹnyịn̄ mmọ ẹdude ke n̄wed uwem.”
11. Edieke anam-akpanikọ Christian osobode mfịna ke n̄kan̄ eke spirit, nso okpodot ndikere mban̄a?
11 Mme Christian isisịneke kad idiọn̄ọ ndiwụt se ẹnọde mmọ ifet ndinam ke esop Jehovah ye nte mmọ ẹnamde n̄kpọ esie ke edinam akpanikọ. Edieke mmọ ẹnyenede mfịna ke n̄kan̄ eke spirit, okpowụt unana ima didie ntem ndifụmi mme isua utom akpanikọ oro mmọ ẹkenamde ẹnọ Jehovah! Anaedi, enyeemi ẹkekotde “ata nsan̄autom” ekedi anam-akpanikọ eyenete oro ekenyenede udọn̄ ndin̄wam mmọ efen. Edieke afo edide ebiowo, nte afo edi “ata nsan̄autom,” eben̄ede idem ndin̄wam ke ima ima usụn̄? Kpukpru nnyịn ikpakam ikere iban̄a eti n̄kpọ oro ekemmọ mme andinịm ke akpanikọ ẹnamde, kpa nte Abasi anamde, ndien ke ima in̄wamde mmọ ndibiom mbiomo mmọ.—Galatia 6:2; Mme Hebrew 6:10.
Ebiet Efen Ndomokiet Idụhe Ndika
12. Ke ini ikọ Jesus akanamde ‘ediwak mbet ẹfiak edem,’ nso idaha ke Peter akada?
12 Eyenụk nnyịn ndinam n̄kpọ Jehovah ke edinam akpanikọ ye esop esie edieke nnyịn itide ite ke ebiet efen ndomokiet idụhe ndika kaban̄a uwem nsinsi. Ke ini ikọ Jesus akanamde ‘ediwak mbet ẹfiak edem,’ enye ama obụp mme apostle esie ete: “Nte ke ọdọn̄ mbufo n̄ko ndidianade nnyọn̄?” Peter ama ọbọrọ ete: “Ọbọn̄, nnyịn iditiene anie? Afo enyene ikọ uwem nsinsi. Nnyịn imonyụn̄ inịm ke akpanikọ inyụn̄ ifiọk ite, Afo edi Edisana Eyen Abasi.”—John 6:66-69.
13, 14. (a) Ntak emi Ido Ukpono mme Jew eke akpa isua ikie akananade mfọn Abasi? (b) Nso ke owo kiet emi ama ekedi Ntiense Jehovah ke anyanini eketịn̄ aban̄a esop Abasi oro ẹkụtde ke enyịn?
13 Owo ikekwe “ikọ uwem nsinsi” ke Ido Ukpono mme Jew eke akpa isua ikie E.N. Akpan idiọkn̄kpọ esie ekedi edisịn Jesus nte Messiah. Idụhe uduot oro enye okodude emi Ido Ukpono mme Jew ọkọkọn̄ọde san̄asan̄a ke N̄wed Abasi usem Hebrew. Mme Sadducee ẹma ẹfan̄a ẹdidu eke mme angel ikonyụn̄ inịmke ediset ke n̄kpa ke akpanikọ. Okposụkedi mme Pharisee mîkonyịmeke ye mmọ ke afan̄ ẹmi, mmọ ke idiọkn̄kpọ mmọ ẹma ẹnam Ikọ Abasi akabade edi ikpîkpu ke ntak mme item owo ẹmi mîkemke ye N̄wed Abasi. (Matthew 15:1-11; Utom 23:6-9) Mme item owo ẹmi ẹma ẹsịn mme Jew ke ufụn onyụn̄ anam edi ọkpọsọn̄ n̄kpọ ọnọ mmọ ndinyịme Jesus Christ. (Colossae 2:8) Ifiopesịt kaban̄a ‘mme item mme ete esie’ ama anam Saul (Paul) ke unana ifiọk esie edi idiọk andikọbọ mme anditiene Christ.—Galatia 1:13, 14, 23.
14 Ido Ukpono mme Jew ama anana mfọn Abasi, edi Jehovah ama ọdiọn̄ esop oro mme anditiene Eyen esie ẹkenamde—kpa ‘ikọt ẹmi ẹsịnde esịt ẹnam nti utom.’ (Titus 2:14) Esop oro osụk ododu, ndien kaban̄a enye owo kiet emi edide Ntiense Jehovah ke anyanini ọkọdọhọ ete: “Edieke edide odu n̄kpọ kiet oro ekedide ata akpan n̄kpọ ọnọ mi, enye edi n̄kpọ aban̄ade edisịk n̄kpere esop Jehovah oro ẹkụtde ke enyịn. Ntọn̄ọ ntọn̄ọ ifiọk eyouwem mi ama ekpep mi nte mîfọnke ndiberi edem ke ekikere owo. Ke ndondo oro mma n̄kanam ubiere ke ekikere mi kaban̄a n̄kpọ oro, mma mbiere ndidu ke esop akpanikọ. Ke nso usụn̄ efen ke owo ekeme ndibọ mfọn ye edidiọn̄ Jehovah?” Ebiet efen ndomokiet idụhe ndika kaban̄a mfọn Abasi ye uwem nsinsi.
15. Ntak emi adianade kiet ye esop Jehovah oro ẹkụtde ke enyịn ye mbon oro ẹbiomde mbiomo ke enye?
15 Esịt nnyịn ekpenyene ndinụk nnyịn ndidiana kiet ye esop Jehovah koro nnyịn imọfiọk ite ke enye ikpọn̄ ke spirit esie ada usụn̄ onyụn̄ anam ẹdiọn̄ọ enyịn̄ ye mme uduak esie. Nte ededi, mbon oro ẹbiomde mbiomo ke enye ẹdi unana mfọnmma. (Rome 5:12) Edi “Jehovah [ama] ayat esịt” ye Aaron ye Miriam ke ini mmọ ẹkekụtde ndudue ẹnọ Moses ẹnyụn̄ ẹfrede ẹte ke enye, idịghe mmimọ, ke ẹkenọ mbiomo oro Abasi ọnọde. (Numbers 12:7-9) Mfịn, mme Christian oro ẹnamde akpanikọ ẹdiana kiet ye ‘mme andida usụn̄’ koro oro edi se Jehovah oyomde. (Mme Hebrew 13:7, 17) Uyarade edinam akpanikọ nnyịn esịne edidụk mme mbonoesop Christian kpukpru ini nnyụn̄ mbọrọ mme mbụme oro ‘ẹdemerede kiet eken ọnọ ima ye nti utom.’—Mme Hebrew 10:24, 25.
Nam N̄kpọ Ndibọbọp
16. Udọn̄ ndinam nso nnọ mbon efen okponụk nnyịn n̄ko ndinam n̄kpọ Jehovah ke edinam akpanikọ?
16 Udọn̄ ndinam mbon efen ẹkọri ẹkpenyene n̄ko ndinụk nnyịn ndinam n̄kpọ Jehovah ke edinam akpanikọ. Paul ekewet ete: “Ifiọk anam owo okohode idem, edi ima ọbọp owo ọkọri.” (1 Corinth 8:1) Sia ndusụk orụk ifiọk ẹsinamde mme andinyene enye ẹkohode idem, anaedi ikọ Paul ọkọwọrọ ete ke ima n̄ko esinam mbon oro ẹwụtde edu oro ẹkọri. N̄wed kiet oro Prọfesọ Weiss ye Prọfesọ English ẹwetde ọdọhọ ete: “Nte ido edide ẹsima owo oro enyenede ukeme ndima ima ke usiene. Ukeme ndinam eti uduak ye edikere mban̄a atara osịm kpukpru ikpehe uwem . . . ẹnyene akpan ọnọ-ufọn odudu ke idem owo oro owụtde mme utọ edu ẹmi ọkọrọ ye owo oro ọbọde mmọ ndien ke ntem ada inemesịt ọsọk mmọ mbiba.” Ke ndiwụt ima, nnyịn inam n̄kpọ ndibọbọp mmọ en̄wen ye idem nnyịn, nte ikọ Jesus owụtde ete: “Ọfọn ndinọ akan ndibọ.”—Utom 20:35.
17. Didie ke ima ọbọbọp, ndien nso ke enye edikpeme nnyịn ọbiọn̄ọ ndinam?
17 Ke 1 Corinth 8:1, Paul ama ada ikọ Greek oro a·gaʹpe, oro owụtde ima edumbet. Enye ọbọbọp, koro enye emenyene anyanime onyụn̄ ọfọn ido, ọyọ onyụn̄ eme ime ke kpukpru n̄kpọ, ndien idibehe ifep. Ima emi osio mme ntụk emi ẹnọde unan efep, utọ nte ntan̄idem ye ufụp. (1 Corinth 13:4-8) Utọ ima oro idiyakke nnyịn isụk nditọete nnyịn uyo, oro ẹdide unana mfọnmma kpa nte nnyịn idide. Enye eyekpeme nnyịn ọbiọn̄ọ edikabade mbiet mbon “eke mîten̄eke Abasi” oro “[ẹkedọn̄de] ikpat ndịbe ndịbe ẹdụk” otu mme ata Christian eke akpa isua ikie. Irenowo ẹmi ẹma “ẹsịn mme andikara ke ndek, ẹnyụn̄ ẹsụn̄i mme akama ikpọ itie,” nte an̄wan̄ade ẹtịn̄de idiọk ẹdian mme utọ owo oro nte mme esenyịn Christian oro ẹyetde aran oro ẹkenọde mmọ ndusụk ubọn̄. (Jude 3, 4, 8) Ke ndinam akpanikọ nnọ Jehovah, ẹyak nnyịn ikûdede iyak idem inọ idomo ndinam n̄kpọ ekededi eke etiede ntre.
Biọn̄ọ Devil!
18. Nso ke Satan akpama ndinam ye ikọt Jehovah, edi ntak emi enye mîkemeke ndinam ntre?
18 Ndifiọk nte ke Satan oyom ndibiat edidianakiet nnyịn nte ikọt Abasi ẹkpenyene ndisọn̄ọ ubiere nnyịn ndinam n̄kpọ Jehovah ke edinam akpanikọ. Satan ẹyekam oyom ndisobo kpukpru ikọt Abasi, ndien mme asan̄autom Devil eke isọn̄ ẹsiwot mme ata andituak ibuot ndusụk ini. Edi Abasi idiyakke Satan owot kpukpru mmọ. Jesus akakpa man “[okposobo] enyeemi akamade odudu n̄kpa, oro edi Satan.” (Mme Hebrew 2:14) Ebiet emi Satan akamade odudu emenyene adan̄a akpan akpan tọn̄ọ nte ẹkesio enye ke heaven ẹduọk ke Christ ama akakabade edi Edidem ke 1914. Ndien ke edikem ini Jehovah, Jesus eyesobo Satan ye esop esie efep.
19. (a) Nso ntọt kaban̄a mme ukeme Satan ke n̄wed emi ọkọnọ ediwak isua ko ke edem? (b) Man ifep mme afia Satan, nso ukpeme ke nnyịn ikpowụt ke nte inamde n̄kpọ ye ekemmọ mme andinịm ke akpanikọ?
19 N̄wed emi inikiet ama odụri owo utọn̄ ete: “Edieke Satan, kpa devil, ekemede ndisịn ndutịme ke otu ikọt Abasi, ekemede ndinam mmọ ẹtọhọ ẹnyụn̄ ẹn̄wana ke otu idemmọ, m̀mê ẹwụt enyụn̄ ẹkọri edu ibụk oro adade okosịm edibiat ima nditọete, enye ke ntre okpokụt unen ke ndita mmọ.” (Enyọn̄-Ukpeme [Ikọmbakara], May 1, 1921, page 134) Ẹyak nnyịn ikûyak Devil osobo edidianakiet nnyịn, ndusụk ke ndinụk nnyịn ndidọk edidọk, m̀mê ndin̄wana ye, kiet eken. (Leviticus 19:16) Akpakam Satan tutu amama idaha n̄kari ikan nnyịn ke utọ usụn̄ oro anamde nnyịn ke idem nnyịn inọ mbon oro ke edinam akpanikọ ẹnamde n̄kpọ Jehovah unan mîdịghe inam uwem ototịm ọsọn̄ ye mmọ. (Men 2 Corinth 2:10, 11 domo.) Utu ke oro, ẹyak nnyịn ida ikọ Peter ẹmi isịn ke edinam: “Ẹfara ke idem ẹnyụn̄ ẹkpeme; asua mbufo, kpa Satan, ke oyoyo nte lion eke okunide, oyom se editade. Ẹsọn̄ọ ẹda ke mbuọtidem ẹn̄wana ye enye.” (1 Peter 5:8, 9) Ke ndisọn̄ọ nda n̄n̄wana ye Satan, nnyịn imekeme ndimụm edidianakiet nnyịn oro ẹdiọn̄de n̄kama nte ikọt Jehovah.—Psalm 133:1-3.
Beri Edem ke Abasi ke Ndibọn̄ Akam
20, 21. Didie ke ibetedem ke Jehovah ke ndibọn̄ akam enyene ebuana ye edinam n̄kpọ esie ke edinam akpanikọ?
20 Ndiberi edem ke Abasi ke ndibọn̄ akam eyen̄wam nnyịn ndikaiso nnam n̄kpọ Jehovah ke edinam akpanikọ. Ke ini nnyịn ikụtde ite ke enye ke ọbọrọ mme akam nnyịn, nnyịn itotịm isịk ikpere enye ikan. Ẹma ẹkpak ẹte ẹberi edem ke Jehovah Abasi ke ndibọn̄ akam ke ini apostle Paul ekewetde ete: “Nyom irenowo ndien ẹbọn̄ akam ke kpukpru ebiet, ẹmenede ndisana ubọk ke enyọn̄, ẹkûnyene iyatesịt ye eneni.” (1 Timothy 2:8) Ke uwụtn̄kpọ, edi akpan n̄kpọ didie ntem nte mbiowo ẹberi edem ke Abasi ke ndibọn̄ akam! Utọ uyarade edinam akpanikọ oro nnọ Jehovah ke ini ẹsopde idem ndineme mme mbubehe esop eyen̄wam ndibiọn̄ọ anana-utịt eneni ye ibụmede iyatesịt oro ekemede nditịbe.
21 Ediberi edem ke Jehovah Abasi ke ndibọn̄ akam an̄wam nnyịn ndise mban̄a mme ifetutom ke utom esie. Owo oro ama akanam n̄kpọ Jehovah ke ediwak isua ama ekeme ndidọhọ ete: “Nnyịn ndinyịme ndibọ utom ekededi oro ẹnọde nnyịn ke esop Abasi eke ofụri ererimbot, ye nnyịn ndisọn̄ọ ndu ke itieutom nnyịn, isehekede, ada unyịme Abasi ọsọk mme ukeme ofụri esịt nnyịn. Idem ọkpọkọm utom oro ẹnọde ekpetie nte usụhọde utom, esiwak ndidi nte ke owo mînamke enye ye ntịn̄enyịn owo ikemeke ndinam ediwak akpan utom efen. Ntem edieke nnyịn isụhọrede idem inyụn̄ inyenede udọn̄ nnennen nnennen ke ndinọ enyịn̄ Jehovah ubọn̄ idịghe eke nnyịn, do nnyịn imekeme ndinịm ke akpanikọ nte ke nnyịn kpukpru ini ‘iyesọn̄ọ ida, isehekede, iyọhọ kpukpru ini ke utom Jehovah.’”—1 Corinth 15:58.
22. Didie ke ediwak edidiọn̄ Jehovah okpotụk edinam akpanikọ nnyịn?
22 Nte ededi, inamke n̄kpọ se nnyịn inamde ke utom Jehovah, nnyịn ikemeke ndinọ enye usiene kaban̄a se enye anamde ọnọ nnyịn. Nnyịn inyene ifụre didie ntem ke esop Abasi, emi mbon oro ẹdide mme ufan esie ẹkande nnyịn ẹkụk! (James 2:23) Jehovah ọmọdiọn̄ nnyịn ye edidianakiet emi otode ima nditọete oro otịmde enyene orụn̄ tutu Satan ke idemesie ikemeke ndiwụri enye. Ẹyak nnyịn ke ntre isọn̄ọ ida ye anam-akpanikọ Ete nnyịn eke heaven inyụn̄ inam utom ọtọkiet nte ikọt esie. Idahaemi ye ke nsinsi nsinsi, ẹyak nnyịn inam n̄kpọ Jehovah ke edinam akpanikọ.
Didie ke Afo Ọkpọbọrọ?
◻ Nso ke ọwọrọ ndinam akpanikọ?
◻ Nso idi ndusụk n̄kpọ oro okponụkde nnyịn ndinam n̄kpọ Jehovah ke edinam akpanikọ?
◻ Ntak anade nnyịn in̄wana ye Devil?
◻ Didie ke akam ekeme ndin̄wam nnyịn ndidi mme anam-akpanikọ asan̄autom Jehovah?
[Ndise ke page 23]
Mme anam-akpanikọ asan̄autom Jehovah iyakke Asua mmọ oro ebietde lion, kpa Devil, otịmede edidianakiet mmọ