Mme Ete Ye Eka—Ẹn̄wam Nditọ Mbufo Ẹnyene “Ọniọn̄ Emi Adade Esịm Edinyan̄a”

1, 2. Nso ikeme ndinam esịt etịmede ndusụk ete ye eka ke ini nditọ mmọ ẹyomde ndiyak idem nnọ Jehovah nnyụn̄ nna baptism?

EDIWAK tọsịn owo oro isikpepde n̄kpọ ẹsidiyak idem ẹnọ Jehovah ẹnyụn̄ ẹna baptism. Ediwak ke otu mmọ ẹdi mme uyen emi mme ete ye eka ẹketọn̄ọde toto ke edet iba ẹkpep mmọ Ikọ Abasi. Mmọ ẹnyụn̄ ẹmek ke idemmọ ndikpono Jehovah. (Ps. 1:​1-3) Ekpedi emenyene eyen, anaedi enen̄ede ọdọn̄ fi ndikụt usen emi enye edinade baptism.​—Men 3 John 4 domo.

² Edi esịt osụk ekeme nditịmede fi edieke okụtde ndusụk uyen emi ẹkenade baptism edi ekem ẹtọn̄ọ ndikere m̀mê ufọn osụk odu ndidu uwem nte Jehovah ọdọhọde. Ndusụk mmọ ẹma ẹkam ẹkpọn̄ esop. Emi ekeme ndinam fi ekere m̀mê eyen fo oyosụk aka iso ama Jehovah nte enye amade idahaemi. Emekeme ndikere m̀mê enye eyeditie nte nditọete ke esop Ephesus eyo mme apostle, emi Jesus ọkọdọhọde ke ‘ẹkpọn̄ akpa ima emi mmọ ẹkenyenede.’ (Edi. 2:4) Nso ke akpanam mbak utọ n̄kpọ oro idiwọrọ eyen fo? Didie ke ekeme ndin̄wam enye aka iso anam n̄kpọ Abasi man ‘enyene edinyan̄a’? (1 Pet. 2:2) Se idinemede iban̄a Timothy ayan̄wam nnyịn ibọrọ mbụme emi.

“AFO AMA ỌFIỌK NDISANA UWETN̄KPỌ”

3. (a) Timothy akasan̄a didie edi Christian? (b) Siak n̄kpọ ita emi Paul eketide Timothy.

³ Etie nte Timothy akakabade edi Christian akpa ini emi Paul akakade Lystra ke isua 47 eyo mme apostle. Kpa ye oro etiede nte Timothy ekedi uyen ini oro, enye ama esisịn idem anam se enye ekpepde. Ke isua iba ẹbede, enye ama ọtọn̄ọ ndisan̄a ye Paul n̄kwọrọ ikọ. Ke n̄kpọ nte isua 16 ama ekebe, Paul ama ewet ọnọ Timothy ete: “Ka iso ke se afo ekekpepde, ẹkenyụn̄ ẹkpekde fi enịm ke akpanikọ, sia ọfiọkde mbon emi afo ekekpepde mmọ oto ye nte ke toto ke nsek afo ama ọfiọk ndisana uwetn̄kpọ, emi ẹkemede ndinam fi enyene ọniọn̄ emi adade esịm edinyan̄a ebe ke edibuọt idem ye Christ Jesus.” (2 Tim. 3:​14, 15) Kûfre ke Paul ama etịn̄ aban̄a (1) ndifiọk ndisana uwetn̄kpọ, (2) ndikpek owo enịm ke se enye ekpepde edi akpanikọ, ye (3) ndinyene ọniọn̄ emi adade esịm edinyan̄a ebe ke ndibuọt idem ye Christ Jesus.

4. Mme n̄kpọ ewe ẹsin̄wam fi ekpep nditọ fo Bible? (Se akpa ndise ibuotikọ emi.)

⁴ Afo n̄ko omoyom eyen fo ọfiọk ndisana uwetn̄kpọ. Mfịn, ndisana uwetn̄kpọ ẹdi N̄wed Abasi Usem Hebrew ye N̄wed Abasi Christian Usem Greek, oro edi, ofụri Bible. Ata n̄kpri nditọwọn̄ ẹkeme ndifiọk ndusụk mbụk Bible ye mme owo oro ẹsiakde ke Bible. Esop Jehovah osion̄o ediwak n̄kpọ emi ẹkemede ndin̄wam mme ete ye eka ẹkpep nditọ mmọ Bible. Ifan̄ ke otu n̄kpọ emi idu ke usem mbufo? Ti ke eyen fo ama ọfiọk se Bible ekpepde, oro ayanam enye enen̄ede ekpere Jehovah.

“ẸKENYỤN̄ ẸKPEKDE FI ENỊM KE AKPANIKỌ”

5. (a) Nso ke ọwọrọ ‘ndikpek owo enịm se enye ekpepde’? (b) Isan̄a didie ifiọk ke ẹma ẹkpek Timothy enen̄ede enịm se enye ekekpepde aban̄a Jesus?

⁵ Ọfọn nditọ fo ẹfiọk ndisana uwetn̄kpọ. Ndikpep nditọwọn̄ Ikọ Abasi ikụreke ke ndinam mmọ ẹfiọk mbụk Bible ye mme owo oro ẹsiakde ke Bible. Ẹma ‘ẹkpek’ Timothy enịm se enye ekekpepde. Ikọ Greek oro ẹkabarede “ẹkpekde” ọwọrọ “ndinam owo enịm ke n̄kpọ edi akpanikọ” m̀mê “ndinen̄ede nnịm ke n̄kpọ edi akpanikọ.” Timothy ama ọfiọk N̄wed Abasi Usem Hebrew toto ke nsek. Nte ini akakade, se enye ekedikpepde ama anam enye enen̄ede enịm ke Jesus edi Messiah. Timothy ama enen̄ede enịm se enye ekekpepde tutu enye ana baptism onyụn̄ etiene Paul anam utom isụn̄utom.

6. Didie ke afo ekeme ndikpek nditọ fo ẹnịm se mmọ ẹkpepde ke Bible?

⁶ Didie ke afo ekeme ndikpek nditọ fo ẹnen̄ede ẹnịm se Bible ekpepde kpa nte Timothy ekenịmde? Ọfọn enyene ime ke ini ekpepde nditọ fo n̄kpọ. Kûkere ke eyen fo edida usen kiet inịm se ekpepde enye, kûnyụn̄ ukere ke sia afo enịmde se Bible ekpepde ke idisọn̄ke eyen fo ndinịm. Ana eyen kiet kiet etie ekere m̀mê se imọ ikpepde ke Bible edi akpanikọ. (Kot Rome 12:1.) Emekeme ndin̄wam eyen fo etie ekere m̀mê se enye ekpepde ke Bible edi akpanikọ, akpan akpan ke ini enye obụpde fi mbụme. Yak ise uwụtn̄kpọ kiet ise.

7, 8. (a) Didie ke Brọda kiet esinyene ime ekpep eyen esie n̄kpọ? (b) Tịn̄ se iketịbede emi okoyomde fi enyene ime ye eyen fo.

⁷ Thomas emi adiaha esie edide isua 11 ọdọhọ ete: “Adiaha mi esibụp mi ete, ‘Ndi Jehovah akanam mme odu-uwem n̄kpọ ke isọn̄ ẹfoforo? Ntak emi nnyịn mîsitieneke imek owo man itiene inam ererimbot emi ọfọn?’ Ndusụk ini mmesimụm idem n̄kama mbak nditeme enye se ekpenịmde. Mmọdiọn̄ọ ke idịghe n̄kpọ kiet kpọt esinam owo enịm n̄kpọ ke akpanikọ, edi nsio nsio n̄kpọ oro owo odụn̄ọrede ọfiọk esinam owo enịm.”

⁸ Thomas ọfiọk ke oyom imọ inyene ime man ikeme ndikpep adiaha imọ enịm se Bible ekpepde. Ọfọn kpukpru ikọt Abasi ẹnyene ime n̄ko. (Col. 3:12) Thomas onyụn̄ ọfiọk ke ekeme ndiyom imọ ineme n̄kpọ kiet ediwak ini, inyụn̄ ida ini inam se Ikọ Abasi etịn̄de an̄wan̄a eyen imọ man enye ekeme ndinịm se enye ekpepde. Enye ọdọhọ ete: “Ke ini ikpepde ndusụk n̄kpọ, ami ye n̄wan mi imesiyom ndifiọk m̀mê eyen nnyịn enen̄ede enịm se enye ekpepde oro, m̀mê enye onyụn̄ okụt ke ọfọn ndinanam se enye ekpepde. Esinem nnyịn ke ini enye obụpde mbụme. Akpafịna mi edieke enye ekpenyịmede kpukpru se ikpepde enye, ibụpke mbụme.”

9. Didie ke ekeme ndin̄wam eyen fo enịm se Bible ekpepde?

⁹ Ke ini mme ete ye eka ẹnyenede ime ẹkpep nditọ mmọ n̄kpọ, nditọ mmọ ẹyedifiọk “ubom ye uniọn̄ ye ukon̄ ye utụn̄ọ” Ikọ Abasi. (Eph. 3:18) Mbufo ẹmekeme ndikpep nditọ mbufo se mîkponke ikan isua emana mmọ mînyụn̄ isọn̄ke ikan mmọ. Ke ini nditọ mbufo ẹnịmde se mmọ ẹkpepde, mmọ ẹyekeme nditịn̄ se mmọ ẹnịmde nnọ mbon en̄wen, esịnede nditọ ufọkn̄wed mmọ. (1 Pet. 3:15) Ke uwụtn̄kpọ, ndi eyen fo ekeme ndida Bible nnam an̄wan̄a owo se isitịbede ke ini owo akpade? Ndi enye enịm se Bible ekpepde aban̄a n̄kpọ emi?a Imọdiọn̄ọ ke ndikpep eyen fo enịm se Bible ekpepde idịghe ifia ubọk kiet, edi edieke enyenede ime ekpep, eyen fo ọyọbọ ufọn.​—Deut. 6:​6, 7.

10. Nso en̄wen idin̄wam nditọ fo ẹnịm se Bible ekpepde?

¹⁰ N̄kpọ en̄wen edi ndinam nditọ fo ẹkụt ke afo emenịm se Bible ekpepde. Stephanie, n̄wan emi enyenede nditọiban ita, ọdọhọ ete: “Toto ke ini nditọ mi ẹkedide ata n̄kpri, mmesibụp idemmi nte, ‘Ndi mmesitịn̄ nnọ mmọ ntak emi ami nnịmde ke Jehovah odu, ke enye ama mi, ke se enye onyụn̄ ọdọhọde inam ọfọn? Ndi mmọ ẹkụt ke ami mmenen̄ede mma Jehovah?’ Ọyọsọn̄ nditọ mi ndinịm se Bible ekpepde edieke ami mmennịmke.”

NYENE “ỌNIỌN̄ EMI ADADE ESỊM EDINYAN̄A”

11, 12. Nso idi ọniọn̄, ndien ntak emi idọhọde ke ọniọn̄ idịghe n̄kpọ isua emana kpọt?

¹¹ Timothy ama ọfiọk (1) ndisana uwetn̄kpọ onyụn̄ (2) enen̄ede enịm se enye ekekpepde. Edi nso ke ikọ Paul ọkọwọrọ ini enye ọkọdọhọde ke ndisana uwetn̄kpọ ekeme ndinam Timothy “enyene ọniọn̄ emi adade esịm edinyan̄a”?

¹² Insight on the Scriptures, ọyọhọ Eboho 2, ọdọhọ ke ọniọn̄ emi ẹtịn̄de ẹban̄a ke Bible esịne owo ndida ifiọk ye mbufiọk n̄kọk mfịna, mfep afanikọn̄, nnam se enye akaduakde, mîdịghe ada an̄wam mbon en̄wen ẹtiene ẹnam ntre. Owo emi enyenede ọniọn̄ isinamke n̄kpọ nte ndisịme. Bible ọdọhọ ke “ndisịme ido eyịre ke esịt eyenọwọn̄.” (N̄ke 22:15) Sia owo emi enyenede ọniọn̄ mîsinamke n̄kpọ nte ndisịme, do ọniọn̄ edi n̄kpọ kiet emi owụtde ke owo ọdiọn̄ọ idem. Idịghe isua emana kpọt ke ẹsida ẹdiọn̄ọ ke owo enyene ọniọn̄ onyụn̄ ama n̄kpọ Abasi, akam edi nte owo oro enen̄erede abak Abasi onyụn̄ amade ibet esie.​—Kot Psalm 111:10.

13. Didie ke uyen ekeme ndiwụt ke imenyene ọniọn̄ emi adade esịm edinyan̄a?

¹³ Mme uyen emi ẹmade Abasi isiyakke se idọn̄de mmọ ye se ubọkn̄ka mmọ ẹyomde mmọ ẹnam eberi mmọ aka iso afiak edem nte mmọn̄ ubom. (Eph. 4:14) Utu ke oro, mmọ ẹsinọ “ukeme ufiọk n̄kpọ mmọ ukpep ke ndida enye nnam n̄kpọ man ẹdiọn̄ọ se inende ye se ikwan̄ade.” (Heb. 5:14) Emi esin̄wam mmọ ẹnam se ifọnde idem ke ini ete ye eka mmọ m̀mê ikpọ owo mîdụhe ye mmọ. Emi esiwụt ke mmọ ẹdiọn̄ọ idem. (Phil. 2:12) Ndinam n̄kpọ ntem ayan̄wam mmọ ẹnyene ọniọn̄ emi adade esịm edinyan̄a. (Kot N̄ke 24:14.) Didie ke afo ekeme ndin̄wam nditọ fo ẹnyene utọ ọniọn̄ emi? Yak mmọ ẹkụt ke afo udaha se Bible ekpepde ubre mbre. Yak se afo esitịn̄de ye nte afo odude uwem anam mmọ ẹkụt ke amasua se Abasi asuade.​—Rome 2:​21-23.

14, 15. (a) Nso ke uyen oro oyomde ndina baptism ekpenen̄ede etie ekere? (b) Didie ke afo ekeme ndin̄wam nditọ fo ẹtie ẹkere ufọn oro mmọ ẹdibọde edieke mmọ ẹnịmde ibet Abasi?

¹⁴ Ndin̄wam nditọ fo ẹnịm se Bible ekpepde ikụreke ke ndinyụn̄ ndọhọ mmọ nam emi, kûnam oko. Ọfọn an̄wam mmọ ẹtie ẹkere mme utọ mbụme nte: ‘Nso inam Bible ọdọhọ ikûnam ndusụk n̄kpọ oro ẹsidọn̄de nnyịn? Nso inam nnịm ke ibet Abasi edi ke ufọn mi?’​—Isa. 48:​17, 18.

¹⁵ Ọkpọfọn n̄ko ẹn̄wam uyen emi ọdọhọde ke iyom ndina baptism etie ekere nte enye adade mme n̄kpọ oro Abasi ọdọhọde mbon oro ẹnade baptism ẹnam. Nso ufọn ke enye edidia edieke enye anade baptism? Nso ke enye ediyak atak? Didie ke ufọn oro enye edidiade okpon akan se enye ayakde atak? (Mark 10:​29, 30) Ọfọn uyen oro enen̄ede etie ekere mme n̄kpọ emi, sia mme n̄kpọ emi ẹyebehe enye, enye ama anam baptism. Mme ete ye eka, ẹn̄wam nditọ mbufo ẹnen̄ede ẹtie ẹkere ufọn oro mmọ ẹdibọde edieke mmọ ẹnịmde ibet Abasi, ye ufen oro mmọ ẹdibọde edieke mmọ mînịmke. Emi ayanam mmọ ẹdikụt ke ndinam se Bible ekpepde edi ke ufọn mmimọ.​—Deut. 30:​19, 20.

KE INI UYEN ORO AMA AKANA BAPTISM ỌTỌN̄ỌDE NDIYỊK SE BIBLE EKPEPDE

16. Nso ke akpanam edieke eyen fo oro ama akana baptism ọtọn̄ọde ndiyịk se Bible ekpepde?

¹⁶ Nso ke akpanam edieke eyen fo oro ama akana baptism ọtọn̄ọde ndiyịk se Bible ekpepde? Ke uwụtn̄kpọ, enye ekeme nditọn̄ọ ndima ererimbot mîdịghe ekere m̀mê ufọn osụk odu ndidu uwem nte Bible ọdọhọde. (Ps. 73:​1-3, 12, 13) Nte afo anamde n̄kpọ ekeme ndinam enye aka iso anam n̄kpọ Jehovah m̀mê etre ofụri ofụri. Kûyak utọ n̄kpọ emi anam fi otop ekọn̄ ye eyen fo, ekpededi enye edi ekpri eyen m̀mê ọtọn̄ọ ndikpon owo. Utu ke oro, nam enye okụt ke amama enye, ke onyụn̄ oyom ndin̄wan̄wam enye.

17, 18. Didie ke afo ekeme ndin̄wam eyen fo oro ọtọn̄ọde ndiyịk se Bible ekpepde?

¹⁷ Uyen oro anade baptism ama anam akpan un̄wọn̄ọ ọnọ Jehovah. Enye ama ọn̄wọn̄ọ ke imọ iyama Jehovah inyụn̄ ida ndinam n̄kpọ esie nte ata akpan n̄kpọ ke uwem imọ. (Kot Mark 12:30.) Jehovah isidaha utọ un̄wọn̄ọ oro ke n̄kpọ mbubru, nnyịn ikponyụn̄ idaha. (Eccl. 5:​4, 5) Ntre yom ini oro ọfọnde neme n̄kpọ emi sụn̄sụn̄ ye eyen fo. Edi bem iso kot mme n̄wed nyụn̄ se mme vidio oro esop Abasi osion̄ode ọnọ mme ete ye eka. Oro ayan̄wam fi ekeme ndinam eyen fo okụt ke enye ndikebiere ndiyak idem nnọ Jehovah nnyụn̄ nna baptism idịghe n̄kpọ mbubru, ke Jehovah ọyọdiọn̄ enye edieke enye akade iso anam n̄kpọ esie.

¹⁸ Ke uwụtn̄kpọ, emekeme ndikụt se idin̄wamde fi ke Se Ẹwetde Ẹdian ke n̄wed N̄kparawa Owo Ẹbụp, Eboho 1, ke ibuotikọ emi, “Mme Mbụme Oro Mme Ete ye Eka Ẹbụpde.” Se Ẹwetde Ẹdian ke page 317 ọdọhọ ete: “Kûsọsọp udọhọ ke eyen fo esịn ido ukpono fo. Ke ediwak idaha, enyene se isifịnade enye.” Ekeme ndidi ubọkn̄ka esie esịn enye mfịna ke idem, onyụn̄ ekeme ndidi enye inyeneke ufan ke esop, m̀mê ekere ke mme uyen eken ẹnam ọfọn ke esop ẹkan imọ. Ntak edi oro Se Ẹwetde Ẹdian ke page 318 ọdọhọde ete: “Mme orụk n̄kpọ emi inen̄ekede inyene n̄kpọ ndinam ye se afo enịmde ke akpanikọ. . . . Mmọ ẹkam ẹnyene n̄kpọ ndinam ye mme idaha oro ẹnamde ọsọn̄ ndinanam se owo enịmde ke akpanikọ.” Ẹsiak mme n̄kpọ en̄wen ke page 318 oro, emi ete m̀mê eka akpanamde man an̄wam eyen esie emi ọtọn̄ọde ndiyịk se Bible ekpepde.

19. Didie ke mme ete ye eka ẹkeme ndin̄wam nditọ mmọ ẹnyene “ọniọn̄ emi adade esịm edinyan̄a”?

¹⁹ Mme ete ye eka, ẹfiọk ke ẹmenyene akamba utom ye akwa ifet ndibọk nditọ mbufo “ke ntụnọ ye ke item Jehovah.” (Eph. 6:4) Emi ọwọrọ ke ana mbufo ẹkpep nditọ mbufo Bible ẹnyụn̄ ẹn̄wam mmọ ẹnịm se mmọ ẹkpepde ke Bible. Edieke mmọ ẹnen̄erede ẹnịm se mmọ ẹkpepde ke Bible, oro ayanam mmọ ẹyak idem ẹnọ Jehovah ẹnyụn̄ ẹnam n̄kpọ esie ke ofụri esịt. Akam nnyịn edi yak Ikọ Abasi, spirit esie, ye ukeme oro mbufo ẹsịnde an̄wam nditọ mbufo ẹnyene “ọniọn̄ emi adade esịm edinyan̄a.”