Sọn̄ọ Du ke Esop Jehovah

JAMES emi ekedide mbet Jesus ekewet ete: “Ẹsan̄a ẹkpere Abasi, ndien enye ayasan̄a ekpere mbufo.” (Jas. 4:8) Kpa ye oro Jehovah okon̄de etieti, enye iyomke usụn̄ ikpọn̄ nnyịn owo kiet kiet. Enye esikop akam nnyịn kpa ye oro nnyịn mîfọnke ima. (Utom 17:27) Didie ke ikeme ndisan̄a n̄kpere Abasi? Ndibọn̄ akam ke ofụri esịt nnọ Jehovah ayanam inen̄ede ikpere enye. (Ps. 39:12) N̄kpọ en̄wen emi edinamde inen̄ede ikpere Jehovah edi ndikpep Bible kpukpru ini. Emi ayanam ifiọk Jehovah Abasi, ifiọk uduak esie, ye se enye oyomde nnyịn inam. (2 Tim. 3:16, 17) Ndikpep Bible ayanam ifiọk nte ikpamade Jehovah ye nte ikemede ndikpono enye.—Ps. 25:14.

² Jesus Christ kpọt ekeme ndin̄wam nnyịn isan̄a ikpere Jehovah. (John 17:3; Rome 5:10) Jesus ikpọn̄ ekeme ndinam nnyịn ifiọk nte Jehovah Abasi esikerede n̄kpọ. Enye ama enen̄ede emehe ye Ete esie, ntak edi oro enye ọkọdọhọde ete: “Baba owo kiet ifiọkke enye emi Eyen edide ke mîbọhọke Ete; baba owo kiet inyụn̄ ifiọkke enye emi Ete edide ke mîbọhọke Eyen, ye enye emi Eyen enyịmede ndiyarade enye nnọ.” (Luke 10:22) Ntre, se ikpepde ke mme Gospel iban̄a nte Jesus ekesikerede onyụn̄ anamde n̄kpọ, anam nnyịn ifiọk nte Jehovah esikerede onyụn̄ anamde n̄kpọ. Emi anam nnyịn inen̄ede isan̄a ikpere Abasi nnyịn.

³ Jesus edi Ibuot esop Christian. Ntre, edieke afo ọsọn̄ọde odu ke esop emi, enye ayan̄wam fi ekpere Jehovah onyụn̄ anam uduak Esie. Matthew 24:45-47 ọdọhọ ke Jesus Christ emek “ofụn emi anamde akpanikọ onyụn̄ enyenede ọniọn̄,” ete ọnọ mbonufọk imọ “udia ke nnennen ini.” Mfịn, ofụn emi esinọ nnyịn ediwak n̄kpọ emi isidade ikpep Ikọ Abasi. Jehovah ada ofụn emi ọdọhọ nnyịn ete isikot Bible kpukpru usen, idụk mme mbono esop kpukpru ini, inyụn̄ isịn idem ikwọrọ “eti mbụk obio ubọn̄” imọ. (Matt. 24:14; 28:19, 20; Josh. 1:8; Ps. 1:1-3) Nnyịn ikpedehedei ifre ke ofụn emi ke Abasi ada ọnọ nnyịn ndausụn̄. Akpana isọn̄ọ idu ke esop Jehovah inyụn̄ inam se ẹdọhọde nnyịn. Emi ayanam nnyịn inen̄ede isan̄a ikpere Jehovah Abasi nnyịn, ọsọn̄ọ nnyịn idem, onyụn̄ ekpeme nnyịn ke ini isobode idomo.

NTAK EMI IDOMO AKADE ISO NDIWAK

⁴ Edieke edide omodu ke esop Jehovah ebịghi, anaedi ọmọyọ ediwak idomo. Edi ọkpọkọm ibịghike okodụk esop Jehovah, ọmọdiọn̄ọ ke Satan esibiọn̄ọ owo ekededi oro osụkde ibuot ọnọ ukara Jehovah. (2 Tim. 3:12) Edide ọmọyọ ediwak idomo m̀mê ọyọ esisịt, kûyak ndịk anam fi, kûnyụn̄ uyak idem emem fi. Jehovah ọn̄wọn̄ọ ke imọ idikpọn̄ke fi, ke iyanyan̄a fi inyụn̄ inọ fi nsinsi uwem.—Heb. 13:5, 6; Edi. 2:10.

⁵ Kpukpru nnyịn iyosobo idomo ke mme akpatre usen idiọk ererimbot Satan emi. Tọn̄ọ Obio Ubọn̄ Abasi ọkọtọn̄ọ ndikara ke heaven ke 1914, Jehovah iyakke Satan odụk heaven aba. Ẹma ẹsio enye ye ndiọi angel esie ẹduọn̄ọ ke isọn̄. Ediwak mfịna oro ẹdude ke isọn̄ mfịn ye ọkpọsọn̄ ukọbọ oro ẹkọbọde ikọt Jehovah ẹwụt ke Satan ayat esịt, onyụn̄ owụt ke nnyịn idu uwem ke mme akpatre usen idiọk ukara esie.—Edi. 12:1-12.

⁶ Satan enen̄ede ayat esịt ke ntak emi ẹkesiode enye ke heaven ẹduọk. Enye onyụn̄ ọfiọk ke ini imọ edi ibio. Enye ye mme demon esie ẹsịn ofụri ukeme ndinam nnyịn itre ndikwọrọ mban̄a Obio Ubọn̄ Abasi, ẹnyụn̄ ẹdomo ndinam ubahade odu ke otu ikọt Jehovah. Emi anam Bible ọdọhọ ke “imenyene en̄wan ndin̄wana, idịghe ye obụk ye iyịp, edi in̄wana ye mme ukara, ye mme odudu, ye mme andikara ekịm ererimbot emi, ye odudu ndiọi spirit ke enyọn̄.” Edieke anade ikan ke en̄wan emi man iwụt ke ida ke n̄kan̄ Jehovah, ana imen ofụri n̄kpọekọn̄ Abasi isịne, ‘isọn̄ọ ida in̄wana ye Devil.’ (Eph. 6:10-17) Oyom ime man ikeme ndinam emi.

SE IDIN̄WAMDE NNYỊN INYENE IME

⁷ Ime ọwọrọ ndikeme ndiyọ ukụt m̀mê afanikọn̄. Ke ini ẹtịn̄de ẹban̄a ndinam n̄kpọ Abasi, ime ọwọrọ ndisọn̄ọ nda nnam se inende ke ini ikụtde ukụt, ke ini isobode ubiọn̄ọ, ukọbọ m̀mê mme n̄kpọ efen oro ẹkemede ndinam ọsọn̄ nnyịn ndisọn̄ọ nda ye Abasi. Ana Christian ekpekpep ndinyene ime. Emi esida ini. Nte Ikọ Abasi enen̄erede an̄wan̄a nnyịn, ntre ke idinen̄ede inyene ime. Edieke iyọde n̄kpri idomo oro isobode ini idụkde esop obufa, iyekeme ndisọn̄ọ nda nyọ ikpọ idomo oro idisobode. (Luke 16:10) Ifọnke ibebet tutu isobo ikpọ idomo mbemiso ibierede ndisọn̄ọ nda. Ana inen̄ede ibiere ndisọn̄ọ nda mbemiso isobode idomo. Peter ama ọdọhọ ke oyom inyene nti edu en̄wen idian ye ime. Enye ekewet ete: “Mbufo ẹsịn ofụri ukeme ẹdian eti ido ke mbuọtidem mbufo, ẹdian ifiọk ke eti ido, ẹdian mfara ke idem ke ifiọk, ẹdian ukeme ediyọ ke mfara ke idem, ẹdian uten̄e Abasi ke ukeme ediyọ, ẹdian ima nditọete ke uten̄e Abasi, ẹdian ima ke ima nditọete.”—2 Pet. 1:5-7; 1 Tim. 6:11.

⁸ Se James ekewetde owụt ke enen̄ede oyom inyene ime. Enye ekewet ete: “Ẹbat ẹte edi n̄kpọ ọyọhọ idatesịt, nditọete, ke ini nsio nsio idomo ẹsịmde mbufo, sia ẹfiọkde ẹte orụk mbuọtidem mbufo emi ẹma ẹkedomo ẹse anam ẹnyene ime. Edi ẹyak ime anam utom esie ama, man mbufo ẹkpeyọhọ ẹkem ẹnyụn̄ ẹfọn ke kpukpru nde, inanake baba n̄kpọ kiet.” (Jas. 1:2-4) James ọdọhọ ke mme Christian ẹkpekam ẹkokop idatesịt ke ini idomo esịmde mmọ, koro idomo esinam owo enyene ime. Ndi afo onyụn̄ ekere ntre? James afiak owụt ke ndinyene ime ayanam itetịm inyene nti edu emi ẹdinamde inem Jehovah Abasi esịt. Ke ini ikande idomo ekededi oro isobode ke usen ke usen, emi ayanam itetịm inyene ime. Ime n̄ko esinam inyene nti edu en̄wen emi edin̄wamde nnyịn.

⁹ Jehovah esidat esịt ke ini iyọde idomo. Enye ọn̄wọn̄ọ ndinọ nnyịn nsinsi uwem edieke ikade iso iyọ idomo. James ọkọdọhọ ete: “Owo emi akade iso ọyọ idomo okop inemesịt, koro ke ini Abasi enyịmede ete enye ọfọn, enye ọyọbọ anyanya uwem, emi Jehovah ọkọn̄wọn̄ọde ndinọ mbon oro ẹmade enye.” (Jas. 1:12) Omokụt do ke iyodu uwem ke nsinsi edieke iyọde idomo. Owo emi mîyọhọ idomo ikemeke ndisọn̄ọ ndu ke esop Abasi. Utọ owo emi idinyeneke spirit Jehovah, idinyụn̄ inyeneke mme edu emi spirit Abasi esinamde owo enyene. Ntre, kûyak idem unọ idomo, sia utọ n̄kpọ oro ekeme ndinam owo afiak ọnyọn̄ ererimbot.

¹⁰ Man ika iso iyọ se isobode ke ndiọkeyo emi, inaha iyat esịt ke ini isobode idomo. Ti ke James ekewet ete: “Ẹbat ẹte edi n̄kpọ ọyọhọ idatesịt.” Ekeme ndidi idimemke utom ndikop idatesịt ke ini ẹtụhọrede nnyịn m̀mê ke ini ẹnamde esịt etịmede nnyịn. Edi ti ke se nnyịn inamde ke ini isobode idomo edibiere m̀mê iyodu uwem ke nsinsi. Uwụtn̄kpọ oro mme apostle ẹkenịmde an̄wam nnyịn ikụt nte ikemede ndikop idatesịt ke ini ikụtde ndutụhọ. Mbụk emi odu ke n̄wed Utom, ndien enye ọdọhọ ete: “Mmọ ẹnyụn̄ ẹkot mme apostle ẹdi, ẹmia mmọ, ẹnyụn̄ ẹwụk mmọ ẹte ẹtre nditịn̄ ikọ ke enyịn̄ Jesus, ndien ẹyak mmọ ẹnyọn̄ọ. Ke ntre, mmọ emi ẹwọn̄ọ ke iso Sanhedrin, ẹdara koro ẹbatde ẹte mmọ ẹdot ndibọ esuene ke ntak enyịn̄ esie.” (Utom 5:40, 41) Mme apostle ẹma ẹfiọk ke ndutụhọ oro mmimọ ikokụtde okowụt ke mmimọ imanam ewụhọ Jesus, n̄ko ke Jehovah enyịme se mmimọ inamde. Ke ediwak isua ama ekebe, ke ini Peter ekewetde akpa n̄wed esie, enye ama etịn̄ ntak emi ọfọnde iyọ ukụt ke ntak edinen ido.—1 Pet. 4:12-16.

¹¹ Uwụtn̄kpọ en̄wen edi eke Paul ye Silas. Ke ini mmọ ẹkenamde utom isụn̄utom ke Philippi, ẹma ẹmụm mmọ ẹnyụn̄ ẹdọhọ ke mmọ ẹtịmede obio ẹnyụn̄ ẹkwọrọ ido oro ibet mînyịmeke. Ntre, ẹma ẹnen̄ede ẹmia mmọ ẹnyụn̄ ẹtop mmọ ẹdọn̄ ke ufọk-n̄kpọkọbi. Bible ọdọhọ ke adan̄aemi mmọ ẹkesụk ẹdude ke ufọk-n̄kpọkọbi ye unan oro owo mîkọsọbọke, “ke ekperede ufọt okoneyo Paul ye Silas ẹbọn̄ akam ẹnyụn̄ ẹtoro Abasi ke ikwọ; ih, mbon n̄kpọkọbi ẹnyụn̄ ẹkop.” (Utom 16:16-25) Ndutụhọ oro Paul ye Silas ẹkekụtde ke ntak Christ ama anam mmọ ẹfiọk ke Abasi ye owo ẹkụt ke mmimọ imọsọn̄ọ ida. Mmọ ẹma ẹnyụn̄ ẹda ifet oro ẹkwọrọ ikọ ẹnọ mbon oro ẹkemade ndikpan̄ utọn̄ nnọ eti mbụk. Mmọ ẹma ẹfiọk ke oyom mmimọ ikwọrọ ikọ man ẹnyan̄a mme owo. Okoneyo oro, ekpeme ufọk-n̄kpọkọbi ye mbonufọk esie ẹma ẹkpan̄ utọn̄ ẹnyụn̄ ẹkabade ẹdi mbet Christ. (Utom 16:26-34) Paul ye Silas ẹma ẹbuọt idem ye Jehovah, mmọ ẹma ẹnyụn̄ ẹnịm ke Jehovah enyene odudu, ke enye oyonyụn̄ an̄wam mmimọ iyọ afanikọn̄ oro. Jehovah ama onyụn̄ an̄wam mmọ.

¹² Mfịn n̄ko, Jehovah ọnọ nnyịn kpukpru se iyomde man isọn̄ọ ida iyọ idomo. Enye oyom nnyịn iyọ idomo. Enye ọnọ nnyịn Ikọ esie man anam nnyịn inen̄ede ifiọk uduak esie. Emi anam nnyịn itetịm ibuọt idem ke Abasi. Imesikeme ndidu ye nditọete nnyịn n̄kpono Abasi. Nnyịn n̄ko ndisikeme ndibọn̄ akam nnọ Jehovah esinam inen̄ede ikpere enye. Enye esikpan̄ utọn̄ okop akam oro ibọn̄de ida itoro enye ye iben̄e oro iben̄ede enye ite an̄wam nnyịn idu eti uwem. (Phil. 4:13) N̄ko, ke ini itide se Abasi edinọde nnyịn ke ini iso, emi esinọ nnyịn odudu ndisọn̄ọ nda nyọ idomo.—Matt. 24:13; Heb. 6:18; Edi. 21:1-4.

YỌ NSIO NSIO IDOMO

¹³ Mme idomo oro nnyịn isobode mfịn ẹdi ukem ye se mme Christian eyo mme apostle ẹkesobode. Mfịn, ndusụk owo ẹsisụn̄i ẹnyụn̄ ẹtụhọde Mme Ntiense Jehovah ke ntak oro mmọ ẹnịmde nsu oro ẹsude ẹdian nnyịn. Kpa nte ekedide ke eyo mme apostle, mbon ido ukpono oro ẹnyenede idiọkesịt ẹsidi ntak ediwak ubiọn̄ọ emi sia idade Ikọ Abasi iyarade mme nsu oro mmọ ẹsikpepde ye se mmọ ẹsinamde. (Utom 17:5-9, 13) Se isin̄wamde ikọt Jehovah edi ndida ikọ mmọ n̄ka esop, sia ndusụk ini esop ẹsibiere ke mmọ ẹnyene unen ndika iso n̄kwọrọ ikọ. (Utom 22:25; 25:11) Ukara n̄ko ẹsidọhọ nnyịn itre ukwọrọikọ. (Ps. 2:1-3) Ke ini utọ n̄kpọ emi etịbede, nnyịn isitiene uwụtn̄kpọ mme apostle, emi ẹkedọhọde ẹte: “Nnyịn inyene ndikop uyo Abasi nte andikara utu ke uyo owo.”—Utom 5:29.

¹⁴ Nte mme owo ẹkade iso ndinen̄ede mma idụt mmọ, ntre n̄ko ke edinen̄ede ọsọn̄ mme asan̄autom Abasi ndika iso n̄kwọrọ eti mbụk. Kpukpru mme asan̄autom Abasi ẹnen̄ede ẹdiọn̄ọ se Ediyarade 14:9-12 etịn̄de aban̄a edituak ibuot nnọ “idiọk unam oro ye mbiet esie.” Nnyịn imọfiọk se ikọ John emi ọwọrọde: “Mi ke oyom ndisana owo, kpa mbon emi ẹnịmde mme ewụhọ Abasi ẹnyụn̄ ẹbuọtde idem ye Jesus, ẹyọ.”

¹⁵ Mme idomo oro osobode ke ntak ekọn̄, en̄wan ukpụhọ ukara, ukọbọ, ye ke ntak emi ukara ẹtrede utom nnyịn, ẹkeme ndinam ọsọn̄ fi ndinam n̄kpọ Abasi an̄wan̄wa. Ekeme ndisọn̄ fi ndidụk mme mbono esop. Ekeme ndisọn̄ ndinyene nneme ye n̄kọk itieutom. Ekeme ndisọn̄ mme esenyịn circuit ndika mme esop. Ekeme n̄ko ndisọn̄ ndinyene mme n̄wed. Edieke ndomokiet ke otu n̄kpọ emi etịbede, nso ke akpanam?

¹⁶ Nam se ededi oro afo ekemede ndinam ke utọ ini oro. Kpep n̄kpọ ke idemfo. Nditọete ẹkeme ndisop idem ke n̄kpri otu ndụk mbono esop ke ufọk owo. Ẹkeme ndida Bible ye mme n̄wed oro ẹma ẹkekpekpep nnịm mme mbono esop. Kûyak emi afịna fi, kûnyụn̄ uyat esịt. Otu Emi Ẹsede Ẹban̄a Utom Mme Ntiense Jehovah idibiatke ini ndinam mbiowo ẹdiọn̄ọ se ẹkpenamde.

¹⁷ Ọkpọkọm udụhe ukpere nditọete eken, ti ke Jehovah ye Jesus Christ ikpọn̄ke fi. Kûduọk idotenyịn. Jehovah edisụk ikokop akam fo, oyonyụn̄ ọnọ fi spirit esie man aka iso ọsọn̄ọ ada. Yak enye ada fi usụn̄. Ti ke edi asan̄autom Jehovah ye mbet Jesus Christ. Ntre, da ifet ekededi oro enyenede kwọrọ ikọ. Jehovah ọyọdiọn̄ utom fo. Se afo anamde akam ekeme ndinam mbon en̄wen ẹditiene ẹtuak ibuot ẹnọ Jehovah.—Utom 4:13-31; 5:27-42; Phil. 1:27-30; 4:6, 7; 2 Tim. 4:16-18.

¹⁸ Idem edieke ekerede ke ẹmọn̄ ẹwot fi nte mme apostle ye mbon eken ẹkekerede, nịm ke ‘Abasi ayanam mme akpan̄kpa ẹset.’ (2 Cor. 1:8-10) Emi ayan̄wam fi ọyọ ata ọkpọsọn̄ idomo. (Luke 21:19) Jesus Christ ama enịm uwụtn̄kpọ ọnọ nnyịn. Enye ama ọfiọk ke imọ ndisọn̄ọ nda nyọ idomo ayanam mbon en̄wen ẹsọn̄ọ ẹda ẹyọ n̄ko. Afo n̄ko emekeme ndinam nditọete fo ẹsọn̄ọ ẹda ẹyọ idomo.—John 16:33; Heb. 12:2, 3; 1 Pet. 2:21.

¹⁹ Idịghe ukọbọ ye ubiọn̄ọ kpọt ke idiyọ, mme n̄kpọ en̄wen ẹdu oro anade iyọ. Ke uwụtn̄kpọ, idem esimem ndusụk owo ke ntak oro mme owo ke efakutom mmọ mîmaha ndikpan̄ utọn̄ nnọ eti mbụk. Udọn̄ọ m̀mê editịmede esịt iyakke ndusụk owo ẹnam se mmọ ẹkpemade ndinam. Apostle Paul n̄ko ama ọyọ idomo emi mîkayakke enye anam n̄kpọ Abasi nte enye akpamade ndinam. (2 Cor. 12:7) Eyen Philippi emi ekekerede Epaphroditus ama ‘ofụhọ ke ini mme ufan esie ẹkekopde ke enye ọdọdọn̄ọ.’ (Phil. 2:25-27) Mfịna ekeme ndidu ke otu nnyịn sia idụhe eke ọfọnde ama. N̄kpri mfịna ẹkeme ndidu ke esop m̀mê ke ubon ke ntak emi kpukpru owo mîsinamke n̄kpọ ukem ukem. Edi mbon oro ẹnamde item Jehovah ẹkeme ndiyọ ẹnyụn̄ ẹkan mme utọ mfịna emi.—Ezek. 2:3-5; 1 Cor. 9:27; 13:8; Col. 3:12-14; 1 Pet. 4:8.

BIERE NDIYỌ TUTU ESỊM UTỊT

²⁰ Ana nnyịn isọn̄ọ ida ye Jesus Christ emi Jehovah emekde edi Ibuot esop. (Col. 2:18, 19) Mmọdo, bere ye “ofụn emi anamde akpanikọ onyụn̄ enyenede ọniọn̄,” ye mme esenyịn oro ẹmekde. (Heb. 13:7, 17) Edieke itienede ndutịm esop Abasi inyụn̄ isụkde ibuot inọ mbon oro ẹdade nnyịn usụn̄, ọwọrọ imenyịme ẹtịm nnyịn idem man inam uduak Jehovah. Sibọn̄ akam kpukpru ini. Ti ke ọkpọkọm idu ke ufọk-n̄kpọkọbi, ke oro ikemeke ndikpan nnyịn ndibọn̄ akam nnọ edima Ete nnyịn ke heaven m̀mê ndinam nnyịn itre ndidiana kiet ye nditọete nnyịn.

²¹ Ẹyak ibiere ndisọn̄ọ nda nsịn ifịk nnam utom ukwọrọikọ emi Jesus Christ ọkọdọn̄de mbet esie. Enye ọkọdọhọ mmọ ete: “Ẹka ẹkenam mme owo ke kpukpru idụt ẹdi mbet mi, ẹnịm mmọ baptism ke enyịn̄ Ete ye Eyen ye edisana spirit, ẹkpep mmọ ẹnam kpukpru n̄kpọ eke n̄ketemede mbufo.” (Matt. 28:19, 20) Ẹyak ika iso iyọ nte Jesus ọkọyọde inyụn̄ inịm ke Abasi iditreke ndinọ nnyịn nsinsi uwem ke Obio Ubọn̄ esie. (Heb. 12:2) Nnyịn emi idide mbet Christ oro ima ikana baptism imenyene ifet nditiene nnam utom emi Jesus ọkọdọhọde ke ẹyenam ke “akpatre ini editịm n̄kpọ emi.” Enye ọkọdọhọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt edidi.” (Matt. 24:3, 14) Edieke isịnde ifịk inam utom emi idahaemi, nnyịn iyetiene idu uwem ke nsinsi ke obufa ererimbot oro Jehovah ọn̄wọn̄ọde!