UKPEPN̄KPỌ 11
Nso Idinam Enenem Fi Ndisikot Bible?
Ndi akananam emenyene akamba utom ndinam, ndien afo ekere m̀mê iditọtọn̄ọ ke m̀mọ̀n̄? Ekeme ndidi ama abahade enye n̄kpri n̄kpri anam man emem fi utom. Ndikot Bible ekeme nditie nte akamba utom. Emekeme ndikere: ‘Nditọtọn̄ọ ke m̀mọ̀n̄?’ Ke ukpepn̄kpọ emi, iyeneme n̄kpri n̄kpọ ifan̄ oro afo ekemede ndinam man esinenem fi ndikot Bible nnyụn̄ n̄kpep Bible.
1. Ntak emi ọfọnde ima ndisikot Bible?
Owo emi esimade ndikot Bible, m̀mê “ibet Jehovah,” oyokop inemesịt; se enye anamde oyonyụn̄ ọwọrọ usụn̄. (Kot Psalm 1:1-3.) Nam ntem, siyom minit ifan̄ ke usen kot Bible. Ama okot n̄kpri n̄kpri onyụn̄ ọtọn̄ọ ndidiọn̄ọ nsio nsio n̄kpọ ke Bible, edisinenem fi ndikot.
2. Nso idinam se okotde ke Bible enyene ufọn ọnọ fi?
Edieke iyomde se ikotde ke Bible enyene ufọn ọnọ nnyịn, ana isituak ida ikere se ikotde, ikûkot enye ntre ube. Ọfọn isikot Bible ke “nsụhọde uyo,” inyụn̄ itie ikere se ikotde. (Joshua 1:8) Nte osụk okotde Bible, bụp idemfo ete: ‘Nso ke itie emi ekpep mi aban̄a Jehovah Abasi? Didie ke se n̄kotde emi ekeme ndin̄wam mi? Didie ke n̄keme ndida se n̄kotde emi n̄n̄wam mbon en̄wen?’
3. Nso ke akpanam man enyene ini esikot Bible?
Ndi esisọn̄ fi ndinyene ini n̄kot Bible? Esisọn̄ ediwak nnyịn. ‘Dedep ifet nọ idemfo.’ (Ephesus 5:16) Emi ọwọrọ ke ọfọn enyene ini emi edisidade ikot Bible kpukpru usen. Ndusụk owo ẹsibak ẹdemede ẹkot usenubọk. Ndusụk owo ẹsikot uwemeyo, utọ nte ke ini nduọkodudu uwemeyo ke itieutom. Mbon en̄wen ẹsikot eke mmọ mbubreyo mbemiso ẹdụkde idap. Ini ewe idinen̄ede ifọn ye afo?
SỊN IDEM KPEP
Se se akpanamde man esinenem fi ndikot Bible, ye nte ekpesiben̄ede idem man ukpepn̄kpọ emi enem fi.
Kpa nte ikemede ndikpep ndima utọ udia emi nnyịn mîkesimaha, imekeme ndikpep ndima ndisikot Bible
4. Se akpanamde man esinenem fi ndikot Bible
Ekeme ndisọn̄ fi nditọn̄ọ ndisikot Bible. Edi emekeme nditọn̄ọ sụn̄sụn̄ ama ndisikot Bible, kpa nte ndusụk owo ẹsitọn̄ọde sụn̄sụn̄ ẹma udia emi mmọ mîkesimaha. Kot 1 Peter 2:2, ekem ẹbọrọ mbụme emi ẹnyụn̄ ẹneme ẹban̄a enye:
Ndi emekere ke okpokot Bible kpukpru usen, ke oro ekeme ndinam fi ama ndikot Bible akan nte esikotde idahaemi?
Se VIDIO emi man okụt se ikanamde ndusụk owo ẹtọn̄ọ ẹma ndisikot Bible. Ekem ẹbọrọ mbụme oro ẹtienede ẹnyụn̄ ẹneme ẹban̄a mmọ.
N̄kparawa ye n̄kaiferi ke vidio oro ẹkedọhọ ke nso ikesinam ọsọn̄ mmimọ ndikot Bible?
Nso ikan̄wam mmọ ẹtọn̄ọ ẹma ndisikot Bible kpukpru ini?
Nso ikanam esinenem mmọ ndikot Bible?
Nte ọkpọtọn̄ọde ndikot Bible:
Mek Bible emi ẹkabarede ọfọn, emi ememde utom ndikot onyụn̄ ọsọpde an̄wan̄a owo. Emekeme ndimek Edikabade Eke Obufa Ererimbot, ekpedi odu ke usem mbufo.
Tọn̄ọ ye utọ mbụk emi afo esinen̄erede ama. Chart emi, “Tọn̄ọ Ndisikot Bible,” ayan̄wam fi.
Siwet itie emi okotde etre. Chart emi, “Itie N̄kotde Ntre,” ayan̄wam fi.
Kot ke JW Library®. Okposio jw library esịn ke fon m̀mê ke tablet fo, oro ekeme ndin̄wam fi okot Bible ke ebiet ekededi, m̀mê akpan̄ utọn̄ okop enye emi ẹkotde ẹdọn̄ ke usem ekededi.
Sise se idude ke Se Idin̄wamde Fi Ekpep Ikọ Abasi. Ẹdọn̄ utọ n̄kpọ nte map ye chart oro ekemede ndinam se okotde enen̄ede an̄wan̄a fi onyụn̄ enem fi.
5. Sitịm idem nọ ukpepn̄kpọ emi
Kot Psalm 119:34, ekem ẹbọrọ mbụme emi ẹnyụn̄ ẹneme ẹban̄a enye:
Ntak emi ekpesibọn̄de akam mbemiso okotde Bible m̀mê etịmde idem ọnọ ukpepn̄kpọ Bible?
Nso ke akpanam man enen̄ede ọbọ ufọn ini ekededi emi ekpepde n̄wed emi? Nam se itienede emi ini ekededi oro etịmde idem ọnọ ukpepn̄kpọ emi:
Sikot kpukpru ikpehe ke ntọn̄ọ ukpepn̄kpọ kiet kiet.
Sikot itie Bible ke ikpehe kiet kiet, nyụn̄ se m̀mê itie Bible oro kiet kiet asan̄a nso ye se ẹtịn̄de ke ikpehe oro.
Sisịn idiọn̄ọ ke ibọrọ mbụme kiet kiet, sia oro ayan̄wam fi ke ini afo ye owo emi esikpepde fi n̄wed emi ẹnemede n̄kpọ ke n̄wed emi.
Ndi ọmọdiọn̄ọ?
Mme Ntiense Jehovah ẹsikama nsio nsio Bible ẹkpep ikọ Abasi. Edi enye emi mmọ ẹmade ẹkan edi Edisana N̄wed Abasi—Edikabade Eke Obufa Ererimbot, sia ẹkabade Bible oro enen̄ede ọfọn onyụn̄ an̄wan̄a owo; enyịn̄ Abasi onyụn̄ ọdọn̄ọ.—Ka jw.org kese ibuotikọ emi “Ndi Mme Ntiense Jehovah Ẹnyene Bible Mmọ?”
NDUSỤK OWO ẸSIDỌHỌ ẸTE: “Nnyeneke ini ukot Bible ye ibifịk ukpep Bible. Bible esisọn̄ akaha.”
Ndikot Bible ye ndikpep Bible esitie fi didie?
SE IKPEPDE
Okpoyom Bible enen̄ede an̄wam fi, nyene ini emi esikotde enye, sibọn̄ akam ben̄e Abasi ete anam enye an̄wan̄a fi, sinyụn̄ tịm idem nọ ukpepn̄kpọ emi.
Se M̀mê Emeti
Nso ke akpanam man Bible enen̄ede enyene ufọn ọnọ fi?
Ini ewe edifọn fi ndisida n̄kot Bible nnyụn̄ n̄kpep Bible?
Ntak emi ọfọnde esitịm idem ọnọ ukpepn̄kpọ emi?
KPEP N̄KPỌ EN̄WEN
Se n̄kpọ en̄wen oro edin̄wamde fi okot Bible ke usụn̄ emi edinyenede ufọn ọnọ fi.
“Nte Okpokotde Bible Man Enen̄ede Adia Ufọn” (Enyọn̄-Ukpeme No. 1 2017)
Se utọ usụn̄ ita emi ekemede ndikot Bible.
“Didie ke Bible Ekeme Ndin̄wam Mi?—Ikpehe 1: Diọn̄ọ Nte Okpokotde Bible” (Odu ke jw.org)
Se se ikemede ndinam esinenem fi ndikot Bible.
“Didie ke Bible Ekeme Ndin̄wam Mi?—Ikpehe 2: Kot ke Usụn̄ Oro Edinemde Fi” (Odu ke jw.org)
Se se ekemede ndikpep nto mbon emi ẹma ẹkekpep Bible ke ediwak isua, ye nte oro edin̄wamde fi ke ini ekpepde Bible.