“Andikpon N̄kan Ke Otu Mmọ Edi Ima”
“Ntem ke mbuọtidem, ye idotenyịn, ye ima ẹsụk ẹdu, mmọ mbita; edi andikpon n̄kan ke otu mmọ edi ima.”—1 CORINTH 13.13.
1. Nso ke ekpepn̄kpọ kiet mban̄a ekpụk ubonowo eketịn̄ aban̄a ima?
KIET ke otu mme ọwọrọetop ekpepn̄kpọ mban̄a ekpụk ubonowo inikiet ọkọdọhọ ete: “Nnyịn imọfiọk ke akpa ini ke mbụk aban̄ade uduot nnyịn nte ke ata akpan n̄kpọ ke ofụri n̄kpọ ẹmi ubonowo oyomde ke n̄kan̄ eke ekikere edi ufọn ima. Enye edi iwụk n̄kpọ emi ofụri ubonowo oyomde kpasụk nte utịn nnyịn edide iwụk ebiet ke ndutịm ekondo nnyịn ye mme ekondo ẹmi ẹsan̄ade ẹkanade enye. . . . Eyenọwọn̄ oro owo mîmaha esikpụhọde ata etieti ye enyeoro ẹmade ke edinam, ikpọkidem, ye ekikere. Idem ọkọride isio isio ọkpọn̄ enyeoro ẹmade. Se nnyịn ifiọkde idahaemi edi nte ke owo amana man odu uwem nte n̄kpọ eke edidu uwem ye ima edide kiet. Emi, nte ededi, idịghe obufa n̄kpo, emi edi ndisọn̄ọ Ukwọrọikọ oro ke Obot.”
2. (a) Didie ke apostle Paul okowụt nte ima edide akpan n̄kpọ? (b) Mme mbụme ewe idahaemi ẹdot edikere mban̄a?
2 Ih, nte ọfiọkn̄kpọ owo ererimbot emi onyịmede, akpanikọ emi aban̄ade ima ndidi akpan n̄kpọ nnọ mfọnọn̄kpọ ubonowo idịghe obufa n̄kpọ. Ekeme ndidi idahaemi kpọt ke mme ọfiọkn̄kpọ owo ererimbot edifiọk, edi enye ama odu ke Ikọ Abasi ke se iwakde ikan isua ikie 19 ẹmi ẹkebede. Oro edi ntak apostle Paul ekekemede ndiwet ete: “Ntem ke mbuọtidem, ye idotenyịn, ye ima ẹsụk ẹdu, mmọ mbita; edi andikpon n̄kan ke otu mọ edi ima.” (1 Corinth 13:13) Ndi afo ọmọfiọk ntak emi ima okponde akan mbuọtidem ye idotenyịn? Ntak ẹkemede ndidọhọ nte ke ima edi andikpon n̄kan ke otu mme edu Abasi ye mbun̄wụm spirit esie-e?
Orụk Ima Inan̄
3. Mme Itien̄wed Abasi ewe ẹdu ẹban̄ade ima ntụk?
3 Ukeme owo ndiwụt ima edi uyarade ọniọn̄ Abasi ye ima ima edikere mban̄a ubonowo. Nte enemde, mbon Greek eset ẹma ẹnyene ikọ inan̄ ẹnọ “ima.” Kiet ekedi eʹros, adade ọnọ ima ntụk oro asan̄ade ye edidemede udọn̄ idan̄. Mme andiwet N̄wed Abasi eke mme Christian usem Greek ikenyeneke idaha ndomokiet ndida eʹros, okposụkedi Septuagint adade mbiet esie ke Mme N̄ke 7:18 ye 30:16, ndien mme itie efen ẹdu ẹmi ẹtịn̄de ẹtụk ima ntụk ke N̄wed Abasi eke usem Hebrew. Ke uwụtn̄kpọ, nnyịn ikot ite Isaac “onyụn̄ ama” Rebekah. (Genesis 24:67) Ẹkụt ata n̄wọrọnda uwụtn̄kpọ ke orụk ima emi ke se iban̄ade Jacob, emi nte an̄wan̄ade akamade ediye Rachel ke akpa edikụt. Ke akpanikọ, “Jacob anam n̄kpọ ke Rachel ke isua itiaba; enye onyụn̄ ese mmọ ke ekpri ini, koro amade enye.” (Genesis 29:9-11, 17, 20) Ikwọ Solomon n̄ko etịn̄ n̄kpọ aban̄a ima ntụk ke ufọt ekpemerọn̄ ye n̄kaiferi kiet. Edi owo ikemeke ndisọn̄ọ ntịn̄ ọkpọsọn̄ ọkpọsọn̄ n̄kaha nte ke ẹkpenyene ndiwụt orụk ima emi, emi ekemede ndida ekese uyụhọ ye idatesịt ndi, n̄kukụre ke n̄kemuyo ye ndinen edumbet Jehovah. Bible asian nnyịn ete ke edi ye ima oro owo amade n̄wanndọ esie kpọt nte ibet onyịmede ke enye ekeme ‘ndikop uyụhọ.’—Mme N̄ke 5:15-20.
4. Didie ke ẹnọ uwụtn̄kpọ ima ubon ke N̄wed Abasi?
4 Ndien ọkpọsọn̄ ima ubon odu, m̀mê ndammana ima, oro ọkọn̄ọde ke ebuana iyịp, emi mbon Greek ẹkenọde ikọ emi, stor·geʹ. Enye esinam ẹtịn̄ ikọ oro, “Iyịp odobi akan mmọn̄.” Nnyịn imenyene eti uwụtn̄kpọ aban̄ade emi ke ima oro nditọeka oro Mary ye Martha ẹkenyenede ẹnọ eyeneka mmọ Lazarus. Nte ke enye ama enen̄ede enyene se ọwọrọde ọnọ mmọ edi se ẹkemede ndikụt ke nte mmọ ẹketuade ọkpọsọn̄ ọkpọsọn̄ ẹban̄a mbabuat n̄kpa esie. Ye nte mmọ ẹkedarade ke ini Jesus akanamde edima Lazarus mmọ afiak edidu uwem! (John 11:1-44) Ima oro eka esimade eyen esie edi uwụtn̄kpọ efen kaban̄a orụk ima emi. (Men 1 Thessalonica 2:7 domo.) Ntem, man owụt nte ima esie okokponde ọnọ Zion, Jehovah ọkọdọhọ ke enye ama akam okpon akan enyeoro eka enyenede ọnọ eyen esie.—Isaiah 49:15.
5. Didie ke unana ima uduot owo owụt idem mfịn?
5 N̄kpọ kiet oro owụtde ke nnyịn idu uwem ke “ukperedem ini” ye “ndiọkeyo” mmọ edi unana “ima uduot owo.” (2 Timothy 3:1, 3) Koro ima ubon ananade, ndusụk uyen ẹsifehe ẹkpọn̄ ufọk, ndien ndusụk nditọ oro ẹkọride ẹwọrọ owo ẹsisịn mme ete ye eka mmọ oro ẹsọn̄de (Men Mme N̄ke 23:22 domo.) Ẹkụt n̄ko unana ima uduot owo ke n̄kọri ukama nditọ ke idiọk usụn̄—ndusụk ete ye ẹka ẹmiade nditọ mmọ ata idiọk idiọk tutu eyedi se oyomde ẹda mmọ ẹka ufọkibọk. Ẹkụt unana ima ke n̄kan̄ ete ye eka n̄ko, ke emi ediwak ete ye eka ẹkpude nditụnọ nditọ mmọ. Ndiyak nditọ nnọ usụn̄ idemmọ idịghe uyarade ima edi ada osụn̄ọ ke editiene usụn̄ unana ukpan. Ete oro enen̄erede ama nditọ esie eyetụnọ mmọ ke ini odotde.—Mme N̄ke 13:24; Mme Hebrew 12:5-11.
6. Nọ mme uwụtn̄kpọ N̄wed Abasi aban̄ade ima ke ufọt mme ufan.
6 Ndien ikọ Greek oro phi·liʹa, odu, adade ọnọ ima (ye unana ekikere idan̄) ke ufọt mme ufan, nte ke ufọt irenowo m̀mê iban iba oro ẹkọride ẹsịm ọyọhọ idaha. Nnyịn imenyene eti uwụtn̄kpọ iban̄a emi ke ima oro David ye Jonathan ẹkenyenede ẹnọ kiet eken. Ke ini ẹkewotde Jonathan ke ekọn̄, David ama atua enye, ọdọhọde ete: “Esịt ayat mi aban̄a fi, eyenete mi Jonathan; afo ama enem mi etieti: ima oro afo akamade mi edi utịbe, akan ima iban.” (2 Samuel 1:26) Nnyịn imọfiọk n̄ko nte ke Christ ama enyene san̄asan̄a ima ọnọ apostle John emi ẹkediọn̄ọde nte mbet “emi Jesus amade.”—John 20:2.
7. Nso uduot ke a·gaʹpe enyene, ndien didie ke ẹkewụt ima emi?
7 Ewe ikọ Greek ke Paul akada ke 1 Corinth 13:13, ke ebiet oro enye asiakde mbuọtidem, idotenyịn, ye ima onyụn̄ ọdọhọde ete ke “andikpon n̄kan ke otu mmọ edi ima”? Mi ikọ oro edi a·gaʹpe, kpa ukem ikọ oro apostle John akadade ke ini enye ọkọdọhọde ete: “Abasi edi ima.” (1 John 4:8, 16) Emi edi ima oro edumbet ekpemede m̀mê akarade. Enye ekeme ndibuana, ekeme ndinyụn̄ ntre ndibuana uma ye ntụk, edi enye edi udọn̄ m̀mê ekikere unana ibụk ndinam nti n̄kpọ nnọ mmọ efen inamke n̄kpọ m̀mê mme ufọn ewe edi eke andibọ mîdịghe m̀mê udori ewe osịm andinọ. Orụk ima emi akanam Abasi ọnọ n̄kpọuto oro esịt esie amade akan, kpa ikpọn̄îkpọn̄ Eyen esie, Jesus Christ, “man owo ekededi eke ọbuọtde idem ye enye okûtak, edi enyene nsinsi uwem.” (John 3:16) Nte Paul otịmde eti nnyịn mfọn mfọn: “Ọsọn̄ etieti owo ndikpa ke ibuot edinen owo; ndusụk, owo ekpekeme ndinyịme ndikpa ke ibuot owo mfọnido. Edi Abasi otịm ayarade ima eke amade nnyịn ke emi Christ akpade ke ibuot nnyịn ke adan̄aemi nnyịn isụk idide mme anamidiọk kan̄a.” (Rome 5:7, 8) Ih, a·gaʹpe, ananam se ifọnde ọnọ mmọ efen inamke n̄kpọ m̀mê nso idi idaha mmọ ke uwem m̀mê se itakde owo oro owụtde ima oro.
Ntak Okponde Akan Mbuọtidem ye Idotenyịn-e?
8. Ntak emi a·gaʹpe okponde akan mbuọtidem-e?
8 Edi ntak emi Paul ọkọdọhọde nte ke orụk ima emi (a·gaʹpe,) ama okpon akan mbuọtidem-e? Enye ekewet ke 1 Corinth 13:2: “N̄kponyụn̄ nnyene ukeme ndisiak uduak Abasi, ndinyụn̄ mfiọk kpukpru ndịbe ndịbe n̄kpọ ye kpukpru ifiọk; n̄kponyụn̄ nnyene ọyọhọ mbuọtidem, tutu n̄keme ndimen ikpọ obot ke itie nduọk, ndien nnyeneke ima, ndịghe baba n̄kpọ kiet.” (Men Matthew 17:20 domo.) Ih, edieke nnyịn ikesịnde ukeme ndikọ ifiọk nnyụn̄ n̄kọri ke mbuọtidem ye ibụk ibụk uduak, emi ikpadaha ufọn Abasi ndomokiet isọk nnyịn. Ukem ntre, Jesus ama owụt ete ke ndusụk owo ‘ẹyetịn̄ prọfesi ke enyịn̄ imọ, ẹda enyịn̄ imọ ẹduọn̄ọ mme demon, ẹnyụn̄ ẹnam ediwak utom odudu ke enyịn̄ imọ,’ edi ke idinyeneke unyịme imọ.—Matthew 7:22, 23.
9. Ntak emi ima okponde akan idotenyịn-e?
9 Ntak emi orụk ima a·gaʹpe, n̄ko okponde akan idotenyịn-e? Koro idotenyịn ekeme ndiwụhọ ke idemowo, owo ekerede akpan akpan aban̄a ufọn idemesie, ke adan̄aemi ima ‘mîyomke ufọn esiemọ.’ (1 Corinth 13:4, 5) Akande oro, idotenyịn—utọ nte eke edidu uwem mbe “akwa ukụt” ndụk obufa ererimbot—etre ke ini ẹkụtde se ẹkedoride enyịn ẹban̄a. (Matthew 24:21) Nte Paul ọdọhọde: “Ẹma ẹnyan̄a nnyịn ke idotenyịn emi: edi idotenyịn eke owo okụtde ke enyịn idịghe idotenyịn: koro anie odori enyịn aban̄a se enye okụtde? Edi edieke nnyịn idoride enyịn iban̄a se nnyịn mîkwe, adan̄aoro nnyịn itie ke ime ibet n̄kpọ oro.” (Rome 8:24, 25) Ima ke idemesie ememe kpukpru n̄kpọ, idinyụn̄ ibehe ifep ke nsinsi. (1 Corinth 13:7, 8) Ntem, ima unana ibụk (a·gaʹpe,) okpon akan mbuọtidem ye idotenyịn.
Okpon Akan Ọniọn̄, Unenikpe, ye Odudu?
10. Ntak ekemede ndidọhọ ke ima edi andikpon n̄kan ke otu mme n̄wọrọnda edu Abasi inan̄-a?
10 Eyak nnyịn idahaemi ikere iban̄a mme n̄wọrọnda edu Jehovah Abasi inan̄: kpa ọniọn̄, unenikpe, odudu, ye ima. Nte ẹkeme ndidọhọ n̄ko nte ke ima okpon akan ke otu mmọemi? Ke akpanikọ ẹkeme? Ntak-a? Koro ima edi se inụkde Abasi ndinam se enye anamde. Ntak edi oro apostle John ekewetde ete: “Abasi edi ima.” Ih, Jehovah edi mfọnmma uwụtn̄kpọ ima. (1 John 4:8, 16) Idụhe ebiet ndomokiet ke N̄wed Abasi oro nnyịn ikotde ite ke Abasi edi ọniọn̄, unenikpe, m̀mê odudu. Utu ke oro, ẹsian nnyịn ke Abasi enyenyene mme edu emi. (Job 12:13; Psalm 147:5; Daniel 4:37) Ye enye, mme edu inan̄ ẹmi ẹda ukem ukem ke mfọnmma usụn̄. Ke ima onụkde, Jehovah ama ọyọhọ uduak esie ebe ke ndida mme edu ita eken nnam n̄kpọ m̀mê ke ndida mmọ nsịn ke edinam.
11. Nso ikonụk Jehovah ndibot ekondo ye mme edibotn̄kpọ ẹdide spirit ye owo?
11 Ntre, ndien, nso ikonụk Jehovah ndibot ekondo ye mme enyene ifiọk edibotn̄kpọ ẹdide spirit ye owo? Nte ekedi ọniọn̄ m̀mê odudu? Baba. Koro Abasi akadada ọniọn̄ ye odudu esie ndibot n̄kpọ. Ke uwụtn̄kpọ, nnyịn ikot ite: “Jehovah akada eti ibuot [“ọniọn̄,” NW] onịm ererimbot ke itie esie.” (Mme N̄ke 3:19) Adianade do, edu unenikpe esie ikoyomke ite enye obot mbon oro ẹbierede n̄kpọ ẹnọ idemmọ. Ima Abasi ama onụk enye ndibuana idara edidu uwem ye mmọ efen. Ekedi ima okoyom usụn̄ ọnọ edimen ubiomikpe n̄kpa oro unenikpe okodoride ubonowo ke idem ke ntak idiọkn̄kpọ Adam mfep. (John 3:16) Ih, onyụn̄ edi ima okonụk Jehovah ndiduak nte mme okopitem ubonowo ẹkpedu uwem ke Paradise isọn̄ oro edide.—Luke 23:43.
12. Didie ke nnyịn ikpanam n̄kpọ iban̄a odudu, unenikpe, ye ima Abasi?
12 Ke ntak ata ọkpọsọn̄ odudu Abasi, nnyịn idehedei idemede enye ndifụbe ufụp. Paul okobụp ete: “Nte nnyịn inanam Ọbọn̄ [“Jehovah,” NW] ofụbe ufụp? Nte imenyene odudu ikan enye?” (1 Corinth 10:22) Ke akpanikọ, Jehovah edi “Abasi ufụp,” idịghe ke idiọk usụn̄, edi ke “ndiyom san̄asan̄a utuakibuot.” (Exodus 20:5; New World Translation) Nte mme Christian, nnyịn imesidu ke n̄kpaidem iban̄a ekese uyarade ntotụn̄ọ ọniọn̄ Abasi. (Rome 11:33-35) Akwa ukpono oro inyenede inọ unenikpe esie akpana anam ida nsannsan ikpọn̄ edikokoi nnam idiọkn̄kpọ. (Mme Hebrew 10:26-31) Edi ima nte mbụme mîdụhe edi n̄kpon n̄kan ke otu n̄wọrọnda edu Abasi inan̄. Onyụn̄ edi unana ibụk Jehovah odụri nnyịn ọsọk enye onyụn̄ anam nnyịn iyom ndinem enye esịt, ndituak ibuot nnọ enye, nnyụn̄ mbuana ke ndinam edisana enyịn̄ esie asana—Mme N̄ke 27:11.
Andikpon N̄kan ke Otu Mbun̄wụm Spirit
13. Ẹnịm ima ke ewe itie ke otu mme mbun̄wụm spirit Abasi?
13 Didie ke ẹnịm ima ke otu mbun̄wụm spirit Abasi usụkkiet, oro ẹsiakde ke N̄wed Mbon Galatia 5:22, 23? Mmọemi ẹdi “Ima, ye idatesịt, ye emem, ye ime [“anyanime,” NW], ye mfọnido, ye eti ido, ye edinam akpanikọ [“mbuọtidem,” NW], ye ifụre ifụre ido, ye mfara ke idem.” Ye eti ntak Paul asiak ima akpa. Nte ima okpon akan idatesịt, kpa udiana edu oro enye asiakde? Ih okpon akan, koro ndiyọ idara idara ikemeke ndidu ke ima mîdụhe. Ke akpanikọ, idatesịt anana etieti ke ererimbot ke ntak ibụk, kpa unana ima. Edi Mme Ntiense Jehovah ẹnyene ima ke otu idemmọ, mmọ ẹnyụn̄ ẹnyene ima ẹnọ Ete mmọ eke heaven. Ntre nnyịn ikpodori enyịn mmọ ndinyene idatesịt, ndien ẹma ẹbemiso ẹtịn̄ ẹte ke mmọ “ẹyekwọ ke idatesịt.”—Isaiah 65:14.
14. Ntak ekemede ndidọhọ ke ima okpon akan mbun̄wụm spirit Abasi edide emem-e?
14 Ima okpon n̄ko akan mbun̄wụm spirit edide emem. Ke ntak unana ima, ererimbot ọyọhọ ye ntuaha ye en̄wan. Edi ikọt Jehovah ẹdu ke emem ye kiet eken ke ofụri ererimbot. Ikọ andiwet psalm emi edi akpanikọ ke n̄kan̄ mmọ: “Jehovah eyeda emem ọdiọn̄ ikọt esie.” (Psalm 29:11) Mmọ ẹnyene emem emi koro mmọ ẹnyenede idiọn̄ọ ẹdade ẹfiọk mme Christian akpanikọ, oro edi, ima. (John 13:35) Ima ikpọn̄ ekeme ndikan kpukpru ntak ubahade, edide mmọ ẹdi eke orụk, idụt, m̀mê ẹkpụk. Enye edi “se ibọpde uwem adiana inam ọfọn ama.”—Colossae 3:14.
15. Didie ke ẹkụt akakan idaha ima ke ẹmende ẹdomo ye mbun̄wụm spirit edide anyanime?
15 Ekụt akakan idaha ima n̄ko ke ini ẹmende enye ẹdomo ye anyanime, kpa ime ime ediyọ ndudue m̀mê iyatesịt. Ndinyene anyanime ọwọrọ ndime ime ye nditre ndisọp iyatesịt. Nso isinam mme owo ẹnana ime ẹnyụn̄ ẹsọp iyatesịt? Nte idịghe unana ima? Nte ededi, Ete nnyịn eke heaven enyene anyanime inyụn̄ “isọpke iyatesịt.” (Exodus 34:6, NW; Luke 18:7) Ntak-a? Koro enye amade nnyịn, inyụn̄ “iyomke baba owo kiet atak.”—2 Peter 3:9.
16. Didie ke ẹmen ima ẹdomo ye mfọnido, eti ido, ifụre ifụre ido, ye mfara ke idem?
16 Nnyịn ima ibemiso ikụt ntak emi ima okponde akan mbuọtidem, ndien ntak emi ẹnọde abuana mme mbun̄wụm spirit eken ẹsụhọde, oro edi, mfọnido, eti ido, ifụre ifụre ido, ye mfara ke idem. Kpukpru ẹdi edu ẹmi ẹyomde, edi mmọ ididorike nnyịn udori ke ima mîdụhe, idem nte Paul owụtde ke 1 Corinth 13:3, ke ebiet enye ekewetde ete: “N̄kponyụn̄ nyak ofụri inyene mi nnọ ẹda ẹbọk nditọ ubuene, n̄kponyụn̄ nda ikpọkidem mi nnọ ẹfọp ke ikan̄, ndien nnyeneke ima, idorike mi baba n̄kpọ kiet.” Ke n̄kan̄ eken, edi ima osion̄o utọ edu nte mfọnido, eti ido, mbuọtidem, ifụre ifụre ido, ye mfara ke idem edi. Ntem, Paul akaiso ndidọhọ ke ima ọfọn ido ye nte ke “ememe kpukpru n̄kpọ, ononịm se ifọnde ke akpanikọ kpukpru ini, ododori enyịn aban̄a kpukpru n̄kpọ, ememe ime ke kpukpru n̄kpọ.” Ih, ndien “ima idibehe ifep nsinsi.” (1 Corinth 13:4, 7, 8) Ẹma ẹkụt mfọn mfọn ete ke mbun̄wụm spirit eken edi uyarade, m̀mê nsio nsio ikpehe ima, kpa enyeoro ẹsibemde iso ẹsiak. Ke akpanikọ, emi ọwọrọ ete ke otu ofụri mbun̄wụm spirit usụkkiet, ima ke akpanikọ edi andikpon n̄kan.
17. Ikọ Itien̄wed Abasi ewe ọsọn̄ọ ubiere oro nte ke ima edi andikpon n̄kan ke otu mbun̄wụm spirit?
17 Mme ikọ Paul ẹmi ẹsọn̄ọ ubiere oro nte ima edi andikpon n̄kan ke otu mbun̄wụm spirit Abasi: “Ẹkûkama owo isọn̄ ebe ndima kiet eken. Koro owo eke amade owo efen ama onịm ibet ama. Koro uyo emi ẹnọde . . . esịne ke ikọ kiet, emi ẹtemede ẹte, Ma mbọhọidụn̄ fo nte amade idemfo. Ima inamke mbọhọidụn̄ idiọk; ntem ima edi edinịm ibet mma.” (Rome 13:8-10) Nte otịmde odot, mbet oro, James, etịn̄ otụk ibet owo ndima mbọhọidụn̄ esie nte idemesie nte “ewụhọ Edidem.”—James 2:8.
18. Ewe n̄kaiso uyarade odu nte ke ima edi n̄kpon n̄kan edu?
18 Nte ikọ ntiense en̄wen ẹsụk ẹdodu ndiwụt nte ke ima edi edu oro okponde akan? Ih, odu. Kere ban̄a se ikotịbede ke ini scribe kiet okobụpde Jesus ete: “Ewe edi ebeiso item ke ofụri ibet?” Ekeme ndidi enye ama odori enyịn Jesus ndikot nto kiet ke otu Ibet Duop. Edi Jesus okokot oto Deuteronomy 6:4, 5, onyụn̄ ọdọhọ ete: “Ebeiso edi, Ẹkop O Israel, Jehovah Abasi nnyịn, edi Jehovah kiet. Afo nyụn̄ ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo, ye ke ofụri odudu fo.” Ndien Jesus ama adian do ete: “Udiana akpa edi emi, Ma mbọhọidụn̄ fo nte idemfo. Ibet en̄wen eke okponde akan emi idụhe.”—Mark 12:28-31.
19. Nso idi ndusụk n̄wọrọnda mbun̄wụm a·gaʹpe?
19 Ke akpanikọ, Paul ikanamke n̄kponinua ke ini enye akasiakde mbuọtidem, idotenyịn, ye ima onyụn̄ ọdọhọde ete: “Andikpon n̄kan ke otu mmọ edi ima.” Ndiwụt ima osụn̄ọ ke eti itie ebuana ye Ete nnyịn eke heaven ye ekemmọ owo, esịnede mbon oro ẹdude ke esop ye mbonubon nnyịn. Ima enyene odudu ndibọp nnyịn ikọri. Ndien udiana ibuotikọ eyewụt nte ata ima ekemede ndinọ utịp.
Didie ke Afo Ọkpọbọrọ?
◻ Didie ke ima okpon akan mbuọtidem ye idotenyịn?
◻ Nso idi a·gaʹpe, ndien didie ke ẹwụt utọ ima oro?
◻ Ntak emi ima edide andikpon n̄kan ke otu mme n̄wọrọnda edu Abasi inan̄-a?
◻ Ke mme usụn̄ ewe ke ima okpon akan mme mbun̄wụm spirit eken?
[Ndise ke page 13]
Ima okonụk Abasi ndibot ubonowo nnọ uwem ke paradise isọn̄. Ndi afo omodori enyịn ndidu do?