Ẹsion̄o Mbufa Edibotn̄kpọ Ẹdi!
ENYENE-ỌNIỌN̄ Edidem Solomon ama etịn̄ inikiet ko ete: “Baba obufa n̄kpọ kiet idụhe ke idak utịn.” (Ecclesiastes 1:9) Oro edi akpanikọ aban̄a ererimbot oro ẹkụtde ke enyịn emi nnyịn idụn̄de, edi nso kaban̄a akwa ikpehe edibotn̄kpọ eke spirit oro Jehovah enyenede? Ke ikpehe oro, enyeemi okponde akan Solomon, ke akpanikọ, emi ekedide akakan owo oro akanam odude uwem, ama akabade edi n̄wọrọnda obufa edibotn̄kpọ. Didie ke emi okotịbe?
Ke isua 29 eke Eyo Nnyịn, mfọnmma owo oro, Jesus, ama aka ebịne John ke Akpa Jordan man onịm enye baptism. “Edi ke ini Jesus akanade baptism ama, kpa idahaoro Enye ọwọrọ ke mmọn̄ ọdọk: ndien sese, enyọn̄ eberede ọnọ Enye, Enye onyụn̄ okụt spirit Abasi osụhọrede nte ibiom edidoro Enye ke idem; ndien sese, uyo oto ke enyọn̄ ọdọhọ ete, Emi edi edima Eyen Mi, emi esịt enemde Mi etieti ye Enye.” (Matthew 3:16, 17) Ntem, owo oro Christ Jesus ekedi akpa obufa edibotn̄kpọ, emi ẹkeyetde aran ndinam uduak Abasi. Ekem, ke isọn̄ n̄kpa uwa ufak esie, Jesus ama akabade edi Esịne-ufọt obufa ediomi ke ufọt Abasi ye otu owo oro ẹmekde. Kiet kiet ke otu ẹmi amakabade edi ‘obufa edibotn̄kpọ,’ emi ẹbonde ke spirit Abasi enọ idotenyịn uwem eke heaven, ye idotenyịn edikara ye Jesus ke Obio Ubọn̄ esie eke heaven.—2 Corinth 5:17; 1 Timothy 2:5, 6; Mme Hebrew 9:15.
Ke ediwak isua ikie ẹmi ẹkebede, ẹmetan̄ mme Christian ẹmi ẹyetde aran mi, ẹmi ẹbonde ke spirit, ẹbok ọtọkiet ke Christ nte ata esop Christian, emi ke idemesie edide obufa edibotn̄kpọ. Abasi okokot enye osio ke ererimbot emi ye uduak, nte apostle Peter ewetde ete: “Mbufo ẹdi ubon eke ẹmekde, ẹdi mme oku edidem, ẹdi edisana obio, ẹdi ikọt eke Abasi onịmde ọnọ Idemesie, man mbufo ẹka ẹketan̄a mme utịbe edinam Esie, emi okokotde mbufo osio ke ekịm, esịn ke utịbe un̄wana Esie.” (1 Peter 2:9) Ukem nte Christ Jesus, akpa obufa edibotn̄kpọ Abasi, udiana obufa edibotn̄kpọ emi enyene akpan mbiomo ndikwọrọ eti mbụk. (Luke 4:18, 19) Nte owo kiet kiet, mme andibuana ke enye, ẹmi ẹdide 144,000 ke ibat, ana “ẹmen obufa owo ẹsịne, ẹmi ẹbotde ebiet Abasi ke edinen ido ye edisana ido akpanikọ.” (Ephesus 4:24; Ediyarade 14:1, 3) Emi oyom ete mmọ ẹkọri “mbun̄wụm spirit,” emi ẹtịn̄de ẹban̄a ke N̄wed Mbon Galatia 5:22, 23, ẹnyụn̄ ẹse ẹban̄a itie akama-ukpọhọde mmọ ke edinam akpanikọ.—1 Corinth 4:2; 9:16.
Nso kaban̄a obufa edibotn̄kpọ emi ke eyomfịn? Ke isua 1914, nte ubatini eke Bible owụtde, mme ikọ eke Ediyarade 11:15 ẹma ẹsu: “Obio ubọn̄ ererimbot emi amakabade edi Obio Ubọn̄ Ọbọn̄ [Jehovah] nnyịn ye Christ Esie. Enye eyenyụn̄ ada ubọn̄ ke nsinsi nsinsi.” Akpa n̄kpọ oro Christ nte obufa Edidem oro ẹdoride ke ebekpo akanamde ekedi ndisio Satan ye angel esie ẹdide mme demon ke heaven nduọk ke n̄kan̄ isọn̄. Emi ama ada ‘mbọm ọsọk isọn̄,’ ke uduot eke akpa ekọn̄ ererimbot ye mme afanikọn̄ esie oro ẹketienede.—Ediyarade 12:9, 12, 17.
Emi n̄ko ama anam n̄kpọ nte ntọt ọnọ nsụhọ ke otu obufa edibotn̄kpọ oro ẹdude ke isọn̄ nte ke ana mmọ ẹbuana ke ndisu prọfesi Jesus emi: “Ẹyenyụn̄ ẹkwọrọ gospel Ubọn̄ Abasi emi [ẹma ẹkewowụk] ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” Nso idi “utịt” oro? Jesus akaiso ndinam an̄wan̄a ete: “Ke ini oro akwa ukụt eyedu, orụk eke akanam mîdụhe toto ke editọn̄ọ ererimbot tutu osịm emi, eke mîdinyụn̄ idụhe aba. Ndien ke mîkpesịbeke mme usen oro ẹmụhọ, baba owo kiet ikpọbọhọke; edi kaban̄a ndimek ikọt Abasi ẹyesịbe mme usen oro ẹmụhọ.”—Matthew 24:3-14, 21, 22.
Spirit Jehovah ama onụk mbon oro ẹyetde aran kpa obufa edibotn̄kpọ esie ndisịn ifịk ke ntara-n̄kan ubịnikọt ukwọrọikọ oro akanam adade itie ke isọn̄ emi. Ọtọn̄ọde ke tọsịn ifan̄ ke 1919, ibat mme enyene-ifịk anditan̄a Obio Ubọn̄ emi ama ọkọri osịm n̄kpọ nte 50,000 ke ufọt iduọk isua 1930. Nte ẹketịn̄de ke prọfesi, “uyom mmọ ọmọwọrọ ke ofụri isọn̄, ikọ mmọ ẹnyụn̄ ẹsịm utịt ererimbot.”—Rome 10:18.
Nte nsụhọ obufa edibotn̄kpọ edidi n̄kukụre mmọemi ẹtan̄de ẹbok kaban̄a edinyan̄a? Baba, koro prọfesi ama etịn̄ ete ke mme angel Abasi ẹyemụm ofụm akwa ukụt ẹkama tutu ẹkụre editan̄ mbok idịghe ye nditọ Israel eke spirit ẹmi ẹdidude ke heaven kpọt edi n̄ko ye mmọ en̄wen, “akwa otuowo, eke baba owo kiet mîkemeke ndibat, eke ẹtode ke kpukpru obio ye esien ye idụt ye usem.” Ke m̀mọ̀n̄ ke mmọ ẹdidụn̄? Kamse, mmọ ẹyeto “ke akwa ukụt ẹwọn̄ọ” ye unana edibiomo ndo ndidara nsinsi uwem ke paradise isọn̄!—Ediyarade 7:1-4, 9, 14.
Ye inemesịt, akwa otuowo emi, oro ẹtan̄de ẹbok ke n̄kpọ nte isọn̄ 229, ẹmetara ẹkpere ndisịm ifịk ifịk Mme Ntiense 4,500,000. Ediwak efen efen ke ẹdedi, nte ẹwụtde ke ibat owo 11,431,171 ẹmi ẹkedụkde Editi n̄kpa Jesus ke April 17 isua oko. Ke otu ediwak miliọn ẹmi, n̄kpasịp 8,683, ẹmi ẹdọhọde nte idide nsụhọ ke otu obufa edibotn̄kpọ ke isọn̄, ẹkedia mme n̄kpọ idiọn̄ọ Editi. Mbon oro ẹbuanade ke ekpri otu emi ikemeke-keme, ke idemmọ ikpọn̄, ndinam akwa utom ukwọrọikọ oro ẹnamde mfịn. Ediwak miliọn oro ẹnamde akwa otuowo kemi ke ẹnam n̄kpọ ke esịt kiet ye mmọ ke ndinam utom emi mma. (Zephaniah 3:9) Akande oro, mbon eke akwa otuowo oro ẹtịmde ẹnọ ukpep idahaemi ke ẹnam utom utịm utom ye mme utom eken ọtọkiet ye Otu Ukara Israel eke spirit oro ẹyetde aran, ukem nte mme Nethinim oro mîkedịghe nditọ Israel ẹkenamde utom ye mme oku ke ndidiọn̄ ibibene Jerusalem.—Nehemiah 3:22-26.
Edibot “Mbufa Enyọn̄ ye Obufa Isọn̄”
Nso idara isan̄a ye editan̄ mbok emi ntem! Enye edi kpa nte Jehovah ọkọdọhọde ke eyedi: “Sese, mmọn̄ mbot mbufa enyọn̄ ye obufa isọn̄, ndien owo iditịghi aba akpa oro, idinyụn̄ idụkke owo ke esịt. Edi mbufo ẹdat esịt, ẹnyụn̄ ẹbre nsinsi ke se ami mbotde: koro, sese, ami mbot Jerusalem ke n̄kpọ inemesịt, mbot mbio esie ke n̄kpọ idatesịt. Ndien Jerusalem eyenem mi esịt, ikọt mi ẹyenyụn̄ ẹdat mi: ndien idikopke aba uyo eyet ye uyo eseme ke esịt.” (Isaiah 65:17-19) Mbufa enyọn̄ oro Jehovah obotde ke akpatre ẹyesịne Christ Jesus ye owo 144,000 ẹmi ẹdide mme andibuana ke obufa edibotn̄kpọ oro ẹnamde eset emi ẹkedepde ẹsio ke otu ubonowo ke se ibede isua ikie-19 ẹmi ẹkebede. Enye edi ata ubọn̄ ubọn̄ akan ukara eke isọn̄ ekededi oro ẹkekarade ke ata Jerusalem, idem ke eyo Solomon. Enye esịne Obufa Jerusalem, obio eke heaven, oro ẹtịn̄de ẹban̄a ofụri uyama uyai esie ke Ediyarade ibuot 21.
Obufa Jerusalem edi n̄wanndọ Christ eke spirit, mme anditiene enye ẹdide owo 144,000 oro ẹyetde aran, ẹmi ẹdianade ye Ebendọ mmọ ke heaven ke mmọ ẹma ẹkekpa ẹnyụn̄ ẹset ke spirit. Ẹwụt mmọ ke Ediyarade 21:1-4 nte ‘ẹtode ke Abasi ẹsụhọde ke heaven ẹdi,’ oro edi, enye ada mmọ anam n̄kpọ ke ndida edidiọn̄ nsọk ubonowo mi ke isọn̄. Ke usụn̄ emi ke prọfesi emi osu: “Sese, ebietidụn̄ Abasi omodu ye owo. Enye eyenyụn̄ odụn̄ ye mmọ; ndien mmọ ẹyedi ikọt Esie, Abasi ke Idemesie eyenyụn̄ odu ye mmọ, onyụn̄ edi Abasi mmọ. Enye eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep.”
Nnyịn ikeme ndiwụt esịtekọm didie ntem ke Abasi ndibot mbufa heaven oro! Ke mîbietke idiọk ukara oro ẹkpụhọrede kpukpru ini, oro ẹfịkde ubonowo ke anyanini, ndutịm ukara Abasi emi edidi ke nsinsi. Obufa edibotn̄kpọ ye nditọ mmọ eke spirit, kpa akwa otuowo, ẹdara ẹban̄a un̄wọn̄ọ Abasi efen efen: “Koro kpa nte mbufa enyọn̄ ye obufa isọn̄, emi ndinamde, ẹdade ke iso mi kpa ntre ke nditọ mbufo ye enyịn̄ mbufo ẹdida.”—Isaiah 66:22.
“Obufa isọn̄” ọtọn̄ọ ye nditọ mmọemi ẹyetde aran ẹmi ẹdide eke obufa edibotn̄kpọ. Enye edi obufa, n̄ka ubonowo oro abakde Abasi ke isọn̄. Usua, ubiatibet, afai, idiọkido, ye oburobụt ido ke n̄ka ubonowo mfịn ke akpanikọ owụt ufọn edikpụhọde ọyọhọ ọyọhọ ndụk obufa n̄ka eke isọn̄, oro anamde n̄kpọ ke idak ndausụn̄ ọnọ-ufọn obufa heaven. Oro edi se Jehovah aduakde. Kpa nte enye obotde mbufa heaven, ntre ke enye obot obufa isọn̄ ebe ke nditan̄ akwa otuowo mbok nte ntọn̄ọ emem emem obufa ererimbot n̄kaowo. N̄kaowo emi ikpọn̄ ke edinyan̄a ye uwem ‘ẹsio ke akwa ukụt.’—Ediyarade 7:14.
Nso ke nnyịn ikeme ndidori enyịn ndikụt ke akwa ukụt ebede? Ke etịn̄de ikọ ọnọ mme apostle esie, kpa akpa ke otu mme andinam mbufa heaven oro edikarade obufa isọn̄, Jesus ama ọn̄wọn̄ọ ete: “Ke akpanikọ ke ndọhọ mbufo nte, ke ini ẹdinamde n̄kpọ ẹkabade ẹdi mbufa, ke adan̄aemi Eyen Owo editiede ke ebekpo ubọn̄ Esie, mbufo, ẹmi ẹketienede Mi, ẹyenyụn̄ ẹtie ke ebekpo duopeba.” (Matthew 19:28) Kpukpru owo 144,000 eke Obufa Jerusalem emi ẹyebuana ye Jesus ke ndikpe ikpe nnọ ubonowo. Adan̄aoro ima eyeda itie ibụk ye usua nte itiat idakisọn̄ oro ẹdibọpde n̄ka ubonowo ẹdori. Ẹyesion̄o mme mfịna eke ekpụk, orụk, ye idụt ẹfep. Ediset ke n̄kpa eyekaiso ndida mbonima mfiak ndi. Anam-akpanikọ ubonowo emi edide ke ediwak itie biliọn eyekabade edi akamba ubon oro adianade kiet, oro ẹmenerede ẹsịm nsinsi uwem ke isọn̄ oro ẹnamde akabade edi paradise.
Emi eyefọn akan Ediye Obio oro ẹkerede-kere. Enye edidi nsinsi edibotn̄kpọ—‘mbufa enyọn̄ ye obufa isọn̄, emi nnyịn itiede ibet nte un̄wọn̄ọ Esie edide; ndien edi do ke edinen ido edidụn̄’! (2 Peter 3:13) Ke akpanikọ, emi edi utịbe utịbe idotenyịn, kpa n̄wọrọnda un̄wọn̄ọ enyeemi ọdọhọde ete, “Sese, mmanam kpukpru n̄kpọ ẹdi mbufa,” emi onyụn̄ adiande ikọ ẹmi ẹdemerede owo mbuọtidem ete: “Mme ikọ ẹmi ẹdi akpanikọ ye se owo okponịmde.”—Ediyarade 21:5.