UKPEPN̄KPỌ 11

Tịn̄ Ikọ Sịn Uwem

Rome 12:11

SE AKPANAMDE: Tịn̄ ikọ sịn uwem man enem mme owo onyụn̄ anam mmọ ẹnam se afo etịn̄de.

Nam enye nte afo ekewet. Ke ini oyomde ndinam se ẹkenọde fi anam, kere ban̄a ufọn emi mme andikop ẹdidiade. Nen̄ede tịm idem tutu enye emehe fi. Edieke anamde oro, edinam enye nte afo ekewet.
Kere ban̄a mbon emi editịn̄de ikọ inọ. Kere nte se afo edikotde m̀mê se afo edikpepde edin̄wamde mme owo. Kere nte afo edinamde emi ke usụn̄ oro edinamde mme owo ẹnen̄ede ẹkpep n̄kpọ.
Kûnam enye etie idap idap. Tịn̄ ikọ sịn uwem. Nịm iso ye ubọk nte esinịmde ke ini enemede nneme ye owo nyụn̄ tịn̄ ikọ ke ofụri esịt.

Kûdi ama ososioro uyo, afo emenede ubọk ke enyọn̄. Mme owo ẹkeme ndikere ke udiọn̄ọke se anamde. Menede ubọk m̀mê iso ke ini oyomde nditịn̄ akpan n̄kpọ emi oyomde mme owo ẹnam. Kpa ye oro ọfọnde etịn̄ ikọ esịn uwem, ifọnke anam enye nte owo esịn ikan̄ ke ndak tọn̄ọ ke ntọn̄ọ tutu esịm utịt mbak utịn̄ikọ fo idikakak mme owo.