Watchtower LIBRARY EKE INTANET
Watchtower
LIBRARY EKE INTANET
Efịk
Ẹ,Ê,Ị,Ọ,Ụ,Û,N̄
  • Ẹ
  • ẹ
  • Ê
  • ê
  • Ị
  • ị
  • Ọ
  • ọ
  • Ụ
  • ụ
  • Û
  • û
  • N̄
  • n̄
  • BIBLE
  • MME N̄WED
  • MBONO ESOP
  • od ib. 10 p. 105-115
  • Nsio Nsio Usụn̄ Emi Afo Ekemede Ndinam N̄kpọ Abasi

Vidio ndomokiet idụhe mi.

Kûyat esịt, n̄kpọ anam vidio emi okûbre.

  • Nsio Nsio Usụn̄ Emi Afo Ekemede Ndinam N̄kpọ Abasi
  • Ẹtịm Nnyịn Idem Man Inam Uduak Jehovah
  • N̄kpri Ibuotikọ
  • Ukem Ibuot Nneme
  • ASUANETOP ESOP
  • NDIKA EBIET EMI ẸYOMDE UN̄WAM
  • NDIKWỌRỌ IKỌ KE USEM EN̄WEN
  • UTOM USIAKUSỤN̄
  • MME ISỤN̄UTOM EMI MÎDỤN̄KE KE BETHEL
  • UTOM ESENYỊN CIRCUIT
  • MME UFỌKN̄WED ESOP ABASI
  • UTOM BETHEL
  • NDIBỌP N̄KPỌ NNỌ ESOP ABASI
  • NSO YE NSO KE ADUAK NDINAM NNỌ ABASI?
  • Ẹkûfre Nditọete Emi Ẹnamde Utom Uyọhọ Ini
    Enyọn̄-Ukpeme Ọnọ Ntọt Obio Ubọn̄ Jehovah—2014
  • Mme Esenyịn Ẹkpeme Otuerọn̄ Abasi
    Ẹtịm Nnyịn Idem Man Inam Uduak Jehovah
  • Mme Uyen—Nso ke Mbufo Ẹdida Uwem Mbufo Ẹnam?
    Mme Uyen—Nso ke Mbufo Ẹdida Uwem Mbufo Ẹnam?
  • Mme Ufọkn̄wed Ukara Abasi—Uyarade Ima Jehovah
    Enyọn̄-Ukpeme Ọnọ Ntọt Obio Ubọn̄ Jehovah—2012
Se En̄wen En̄wen
Ẹtịm Nnyịn Idem Man Inam Uduak Jehovah
od ib. 10 p. 105-115

IBUOT 10

Nsio Nsio Usụn̄ Emi Afo Ekemede Ndinam N̄kpọ Abasi

KE INI Jesus okosiode mbet esie ọdọn̄ ẹkekwọrọ etop Obio Ubọn̄ Abasi, enye ama ọdọhọ mmọ ete: “Idọk okpon, edi mme anamutom iwakke.” Utom emi edinamde ama okpon etieti, ntre enye ama adian do ete: “Ẹben̄e Enyene-idọk ẹte enye osio mme anamutom ọnọ ẹdi ke idọk esie.” (Matt. 9:37, 38) Jesus ama eteme mbet esie nte mmọ ẹdinamde utom emi. Edi nte enye eketịn̄de ikọ ama owụt ke ana ẹnam utom emi usọp usọp. Enye ọkọdọhọ ete: “Mbufo idisan̄ake ikanade ofụri obio ke n̄kann̄kụk Israel mbemiso Eyen owo edide.”—Matt. 10:⁠23.

2 Utom ukwọrọikọ emi anade inam mfịn okpon etieti n̄ko. Ini okụre ama, edi ana ẹkwọrọ eti mbụk Obio Ubọn̄ Abasi mbemiso utịt edi. (Mark 13:10) Sia edide idikwọrọ eti mbụk emi inọ mme owo ke ofụri ererimbot, utom nnyịn ebiet enye emi Jesus ye mbet esie ẹkenamde, edi eke nnyịn okpon akan eke mmọ. Ibat owo ke ererimbot enen̄ede awak akan ibat ikọt Abasi, edi imenịm ke Jehovah ayan̄wam nnyịn inam utom emi. Ẹyekwọrọ eti mbụk Obio Ubọn̄ emi ke ofụri ererimbot, ndien utịt eyedi ke ini emi Jehovah enịmde. Ndi iyayak Obio Ubọn̄ Abasi edi akpa n̄kpọ ke uwem nnyịn man ikeme ndisịn idem n̄kwọrọ ikọ? Nso ye nso ke ikpanam man ikeme ndinam emi?

3 Jesus ama etịn̄ se Jehovah oyomde oto mme asan̄autom esie emi ẹma ẹkeyak idem ẹnọ enye. Enye ọkọdọhọ ete: “Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo ye ke ofụri ukeme fo.” (Mark 12:30) Ana kpukpru nnyịn isịn ofụri esịt nnyịn inam utom Abasi. Emi ọwọrọ ke ana isịn ofụri ukeme nnyịn inam n̄kpọ Jehovah man iwụt ke imenen̄ede iten̄e enye, ke ikonyụn̄ iyak idem nnyịn inọ enye ke ofụri esịt. (2 Tim. 2:15) Nsio nsio usụn̄ odu emi asan̄autom Abasi kiet kiet ekemede ndinam emi, edi nte n̄kpọ etiede ye enye ye se enye ekemede ndinam edibiere se enye edinamde. Se nsio nsio n̄kpọ emi asan̄autom Abasi ekemede ndinam mi, nyụn̄ biere enye emi edikemede ndinam nnọ Abasi.

ASUANETOP ESOP

4 Utom emi Abasi ọnọde kpukpru owo ke esop edi ndikwọrọ eti mbụk. Akpan utom emi Jesus ọkọdọhọde mbet esie ẹnam edi oro. (Matt. 24:14; 28:19, 20) Mbet Jesus Christ isibiatke ini ndikwọrọ eti mbụk emi enye okopde nnọ mbon en̄wen. Se Andrew, Philip, Cornelius, ye mme mbet eken ẹkenamde edi oro. (John 1:40, 41, 43-45; Utom 10:1, 2, 24; 16:14, 15, 25-34) Ndi emi ọwọrọ ke owo ekeme ndikwọrọ ikọ nnọ mme owo idem mbemiso enye anade baptism? Ih! Ndondo oro ẹdọhọde owo ke enye odot ndidi asuanetop oro mînaha baptism, enye ekeme ndikwọrọ ikọ ke ufọk ke ufọk. Enye ekeme nditiene n̄kwọrọ ikọ ke nsio nsio usụn̄ en̄wen emi isikwọrọde onyụn̄ anam mme n̄kpọ en̄wen emi isinamde ke an̄wautom etiene nte n̄kpọ etiede ye enye ye se enye ekemede ndinam.

5 Ke asuanetop ama akana baptism, enye oyoyom ndinam se enye ekekeme man an̄wam mbon en̄wen ẹkop eti mbụk. Idịghe irenowo kpọt ke ẹdọhọ ẹkwọrọ ikọ, ẹdọhọ iban n̄ko ẹkwọrọ. Abasi ọdiọn̄ nnyịn etieti ke enye ndiyak nnyịn itiene inam n̄kpọ Obio Ubọn̄ esie, ọkpọkọm ikeme ndinam ekpri. Owo ekededi emi anamde se enye ekekeme man enye enyene ini anam n̄kpọ Abasi ke nsio nsio usụn̄ oyokop inemesịt etieti.

NDIKA EBIET EMI ẸYOMDE UN̄WAM

6 Edieke edide ẹmesisọp ẹkụre efakutom mbufo ẹnyụn̄ ẹnen̄ede ẹkwọrọ ikọ ẹnọ mme owo do, ekeme ndidọn̄ fi ndika ebiet emi ẹyomde-yom mme ọkwọrọikọ. (Utom 16:9) Edieke edide ebiowo m̀mê asan̄autom unamutom, ekeme ndidi odu esop en̄wen emi ẹkpemade fi edin̄wam mmimọ. Esenyịn circuit mbufo ekeme nditeme fi nte akpasan̄ade an̄wam esop en̄wen ke circuit mbufo. Edieke akpamade ndinam utom ke ebiet en̄wen ke idụt mbufo, n̄kọk itieutom ẹkeme ndinam fi ọdiọn̄ọ mme ebiet emi ẹyomde un̄wam.

7 Ndi akpama ndika n̄kan̄wam ke idụt en̄wen? Edieke edide akpama, nen̄ede tie kere kan̄a. Neme n̄kpọ emi ye mbiowo mbufo. Ọkpọfọn etie ye mbon emi oyomde ndisan̄a ntre n̄ka abat se iditakde mbemiso ẹdahade. (Luke 14:28) Edieke mûduakke ndidu ke idụt en̄wen mbịghi, ọkpọfọn akam ekere nte akpakade ebiet emi ẹyomde un̄wam ke idụt mbufo.

8 Ke ndusụk idụt, ediwak nditọete emi ẹdide mbiowo ibịghike ke esop. Mmọ ẹsisụhọde idem ẹyak mbiowo emi ẹbịghide ke esop ẹdi ẹdin̄wam mmimọ. Edieke edide ebiowo onyụn̄ amade ndiwọrọ n̄ka utọ idụt oro n̄kan̄wam, ti ke ukaha do ndikọbọ mmọ utom nnam, aka ndin̄wan̄wam mmọ. N̄wam nditọete do ẹnam n̄kpọ man ẹdot ndinam nsio nsio utom ke esop. (1 Tim. 3:1) Edieke mmọ mînamke ndusụk n̄kpọ nte ẹsinamde ke edem mbufo, mbọk nyene ime. Da ifiọk emi enyenede tọn̄ọ ekemek fi ebiowo n̄wam nditọete do. Edieke anamde oro, ndien ekem afo udụhe aba ye mmọ, mbiowo do ẹyekeme ndise mban̄a esop.

9 Ana Kọmiti Utom Esop mbufo ẹwet leta kan̄a ẹban̄a fi ẹnọ n̄kọk itieutom mbemiso n̄kọk itieutom ẹnọde fi enyịn̄ mme esop emi ekemede ndika n̄kan̄wam. N̄kọk itieutom ẹdọhọ ẹwet leta emi, edide afo edi ebiowo, asan̄autom unamutom, asiakusụn̄, m̀mê asuanetop. Kọmiti Utom Esop ẹyemen leta emi ẹdian ye enye emi afo ewetde ẹnọ ẹsọk n̄kọk itieutom idụt emi afo oyomde ndika n̄kan̄wam.

NDIKWỌRỌ IKỌ KE USEM EN̄WEN

10 Usụn̄ en̄wen emi owo ekemede ndinam n̄kpọ Abasi edi enye ndikpep usem en̄wen, esịnede usem idiọn̄ọ, man ada ọkwọrọ ikọ. Edieke ebierede ndikpep usem en̄wen nda n̄kwọrọ ikọ, tịn̄ nọ mbiowo mbufo ye esenyịn circuit mbufo. Mmọ ẹyeteme fi usem emi ekpekpepde ẹnyụn̄ ẹn̄wam fi. N̄kọk itieutom ẹnyịme ndusụk circuit ẹkpep mme asuanetop ye mme asiakusụn̄ obufa usem man ẹda ẹkwọrọ ikọ.

UTOM USIAKUSỤN̄

11 Ana kpukpru asuanetop ẹdiọn̄ọ se ẹyomde owo anam man enye odot ndidi asiakusụn̄ unọ un̄wam, asiakusụn̄ ofụri ini, akpan asiakusụn̄ m̀mê odot ndinam utom ke Bethel m̀mê utom ofụri ini en̄wen nnọ Abasi. Ana asiakusụn̄ edi owo emi ama akana baptism, owo odude eti uwem, onyụn̄ ekemede ndikwọrọ ikọ nsịm ibat hour oro ẹdọhọde. Kọmiti Utom Esop ẹsimek mme asiakusụn̄ unọ un̄wam ye mme asiakusụn̄ ofụri ini, n̄kọk itieutom ẹmek mme akpan asiakusụn̄.

12 Owo ekeme ndidi asiakusụn̄ unọ un̄wam ke ọfiọn̄ kiet ke nsụhọde n̄kaha, mîdịghe anam ke ediwak ọfiọn̄, mîdịghe aka iso anam ke ata anyan ini edieke enye ekemede. Ediwak mme asuanetop ẹsinam utom usiakusụn̄ unọ un̄wam ke ini Editi m̀mê ke ọfiọn̄ oro esenyịn circuit edide edise esop mmọ. Ndusụk owo ẹsinam ke ọfiọn̄ emi ẹnọde mmọ nduọkodudu ke itieutom. Mme asuanetop oro ẹma ẹkena baptism, emi ẹsụk ẹkade n̄wed ẹkeme ndinam utom usiakusụn̄ unọ un̄wam ke ọfiọn̄ emi ufọkn̄wed mîdụhe. Ẹsisụhọde ibat hour emi asiakusụn̄ unọ un̄wam ekemede ndinọ ke ọfiọn̄ March ye April, ye ke ọfiọn̄ emi esenyịn circuit edide edise esop; asuanetop ekeme ndibiere ndinam utom usiakusụn̄ ke mme ọfiọn̄ emi. Ntre, inamke n̄kpọ m̀mê afo esinam nso, edieke odude eti uwem, ekemede ndinọ ibat hour oro ẹyomde, onyụn̄ ekerede ke imekeme ndinam utom usiakusụn̄ unọ un̄wam ke ọfiọn̄ kiet m̀mê akande oro, mbiowo ẹyema ọbọ fọm etiene anam utom emi.

13 Mbemiso odotde ndidi asiakusụn̄ ofụri ini, ana ekeme ndinọ ibat hour oro ẹyomde mme asiakusụn̄ ofụri ini ẹsinọ kpukpru isua. Ana kpukpru asiakusụn̄ ofụri ini ẹdiana ye esop mmọ ẹnam utom. Mme asiakusụn̄ emi ẹsisịnde idem ẹkwọrọ ikọ ẹsin̄wam esop etieti, ẹnam nditọete ẹma ukwọrọikọ, ẹsinyụn̄ ẹn̄wam mbon en̄wen ẹdụk utom usiakusụn̄. Mbemiso ọbọde fọm usiakusụn̄ ofụri ini, ana edi asuanetop emi odude eti uwem; ana onyụn̄ ana baptism ọfiọn̄ itiokiet ke nsụhọde n̄kaha.

14 Mme asiakusụn̄ ofụri ini emi ẹnen̄erede ẹdiọn̄ọ utom ukwọrọikọ ke ẹsimek mme akpan asiakusụn̄. Ana mmọ ẹkeme ndinam utom ke ebiet ekededi oro n̄kọk itieutom ẹyomde ndinọ mmọ ẹka. Ẹsiwak ndinọ mmọ ẹka esịt-esịt obio man mmọ ẹkeyom mbon emi ẹmade Ikọ Abasi ẹnyụn̄ ẹtọn̄ọ mbufa esop. Ndusụk ini, ẹsinọ mme akpan asiakusụn̄ ẹka mme esop emi mîsikemeke ndikụre efakutom mmọ. Ẹsinyụn̄ ẹnọ ndusụk akpan asiakusụn̄ emi ẹdide mbiowo ẹken̄wam mme esop emi owo mîwakke, idem ekpededi mme esop emi ẹsikeme ndikụre efakutom mmọ. Ẹsinọ mme akpan asiakusụn̄ ekpri okụk ekpatọfọn̄ ẹda ẹse ẹban̄a idemmọ. Ẹsinyụn̄ ẹmek ndusụk mme asiakusụn̄ ofụri ini ẹte ẹdi mme akpan asiakusụn̄ ibio ini.

MME ISỤN̄UTOM EMI MÎDỤN̄KE KE BETHEL

15 Otu Emi Ẹsede Ẹban̄a Utom Mme Ntiense Jehovah ẹnyene kọmiti emi ẹkotde Kọmiti Utom. Kọmiti emi ẹsimek mme isụn̄utom emi mîdụn̄ke ke Bethel. Ekem Kọmiti N̄kọk Itieutom idụt emi isụn̄utom oro odude ẹsinọ enye aka obio emi mme owo ẹwakde. Mme isụn̄utom emi ẹsin̄wam esop ẹnyụn̄ ẹnam nditọete ẹma utom ukwọrọikọ. Ediwak isụn̄utom emi ẹma ẹka Ufọkn̄wed Mme Ọkwọrọ Obio Ubọn̄. Ẹsinọ mmọ ufọk ye ekpri okụk ekpatọfọn̄ ẹda ẹse ẹban̄a idemmọ.

UTOM ESENYỊN CIRCUIT

16 Otu Emi Ẹsede Ẹban̄a Utom Mme Ntiense Jehovah ẹsimek mme esenyịn circuit. Edi mbemiso ẹmekde owo, ẹsinọ enye akasan̄a ye esenyịn circuit ọbọ ukpep nte andida itie esenyịn circuit. Nditọete emi ẹma utom ukwọrọikọ ẹnyụn̄ ẹma nditọete mmọ. Mmọ ẹdi mme asiakusụn̄ emi ẹsịnde ifịk ẹkwọrọ ikọ, ẹsịnde ifịk ẹkpep Bible, ẹnyụn̄ ẹdiọn̄ọde ndinọ utịn̄ikọ nnyụn̄ n̄kpep owo n̄kpọ. Mmọ ẹnyene mme edu emi Bible okotde mbun̄wụm spirit, ẹnyene mbufiọk, ẹda ẹkụt n̄kpọ anyan usụn̄, ẹnyụn̄ ẹnyene ifiọk. Edieke esenyịn circuit ọdọde n̄wan, ana n̄wan esie edi asiakusụn̄ emi odude eti uwem onyụn̄ anamde n̄kpọ ukpono ukpono ye mme owo. Ana enye edi owo emi ọdiọn̄ọde ndikwọrọ ikọ, ọdiọn̄ọ ke ana isụk ibuot inọ ebe imọ, imenke se ebe ekpetịn̄de itịn̄, inyụn̄ idịghe ikọ ama ọwọwọrọ, enye emen kpukpru etịn̄. Utom emi esenyịn circuit ye n̄wan esie ẹsinamde idịghe ekpri utom, ntre utọ utom emi ifọnke ye owo udọn̄ọ. Mme asiakusụn̄ emi ẹyomde ndidi esenyịn circuit isisịnke-sịn n̄wed iyom utom emi, edi ẹsitịn̄ ẹnọ esenyịn circuit mmọ man eteme mmọ se ẹkpenamde.

MME UFỌKN̄WED ESOP ABASI

17 Ufọkn̄wed Mme Ọkwọrọ Obio Ubọn̄: Ẹnen̄ede ẹyom mme asuanetop emi ẹdikemede ndika n̄kan̄wam ke mme ebiet oro owo mîsisọpke ikwọrọ ikọ ye mbon oro ẹdikemede ndin̄wam mme esop. Ntre, nditọete irenowo ye iban, mbon emi ẹdọde ndọ ye mbon emi mîdọhọ ndọ, ẹkeme ndibọ fọm uka Ufọkn̄wed Mme Ọkwọrọ Obio Ubọn̄ man ẹkekpep mmọ nte ẹkpenamde emi. Ke mmọ ẹma ẹkekụre ufọkn̄wed emi, ẹsinọ mmọ ẹkenam utom usiakusụn̄ ofụri ini ke mme ebiet emi ẹyomde un̄wam ke idụt mmọ. Ẹkeme n̄ko ndinọ ndusụk mmọ ẹkenam utom en̄wen ke idụt mmọ m̀mê ke idụt en̄wen edieke mmọ ẹdọhọde ke iyekeme. Ẹsimek ndusụk mmọ akpan asiakusụn̄ m̀mê akpan asiakusụn̄ ibio ini. Mme asiakusụn̄ emi ẹkpemade ndika ufọkn̄wed emi ẹkeme ndidụk mbono emi ẹsinịmde ke akamba mbono ẹnọ mbon emi ẹyomde ndika ufọkn̄wed emi man mmọ ẹdiọn̄ọ se ẹyomde mmọ ẹnam.

18 Ufọkn̄wed Gilead: Nditọete iren ye iban emi ẹdiọn̄ọde Ikọmbakara, mbon ẹdọde ndọ ye mbon mîdọhọ, emi ẹnyụn̄ ẹnamde san̄asan̄a utom ofụri ini ẹnọ Abasi ke ẹsikot ufọkn̄wed emi. Utọ mbon emi ẹyekeme ndin̄wam nditọete ke esop m̀mê ke n̄kọk itieutom. Mmọ ẹwowụt ke imekeme ndin̄wam esop Abasi, ke imonyụn̄ ikeme ndin̄wam mme owo ẹnen̄ede ẹdiọn̄ọ Abasi. Se mmọ ẹnamde idahaemi owowụt ke enenem mmọ ndinam n̄kpọ nnọ nditọete mmọ, ke mmọ ẹnyụn̄ ẹkeme ndin̄wam mme owo ẹnam se N̄wed Abasi ye esop Abasi ẹdọhọde. Kọmiti N̄kọk Itieutom idụt kiet kiet ẹsimek mbon oro ẹkpesịnde n̄wed ẹka ufọkn̄wed emi. Ẹsinọ mbon emi ẹkụrede Ufọkn̄wed Gilead ẹka ẹkekwọrọ ikọ ke idụt mmọ m̀mê ke idụt en̄wen, mîdịghe ẹnọ mmọ ẹka ẹkenam utom ke n̄kọk itieutom idụt mmọ m̀mê eke idụt en̄wen.

UTOM BETHEL

19 Ndinam utom ke Bethel edi ata akwa n̄kpọ. Bethel ọwọrọ “Ufọk Abasi,” ndien enyịn̄ oro odot sia mme owo ẹdụn̄ do ẹnam utom Abasi. Nditọete irenowo ye iban emi ẹnamde utom ke Bethel ẹnam akpan utom. Do ke ẹsimịn̄ mme n̄wed Ikọ Abasi, do ke ẹsinyụn̄ ẹkabade mme n̄wed emi, ẹnyụn̄ ẹnọ mmọ ẹka nsio nsio itie. Mbon emi ẹnamde utom ke Bethel ẹn̄wam Otu Emi Ẹsede Ẹban̄a Utom Mme Ntiense Jehovah. Otu emi ẹse ẹban̄a kpukpru esop Mme Ntiense Jehovah ke ofụri ererimbot, mmọ ẹsinyụn̄ ẹteme nnyịn se ikpanamde. Ediwak mbon Bethel emi ẹdide mme akabade n̄wed ẹdụn̄ ke ebiet emi ẹsemde usem emi mmọ ẹkabarede man mmọ ẹsikop nte ẹsemde usem oro kpukpru usen. Emi esinam mmọ ẹdiọn̄ọ m̀mê se mmimọ ikabarede an̄wan̄a owo.

20 Ediwak utom emi ẹnamde ke Bethel oyom odudu. Emi esinam ẹwak ndikot n̄kparawa emi ẹma ẹkeyak idem ẹnọ Abasi ẹnyụn̄ ẹna baptism, emi ẹnyenede odudu, mînyụn̄ inyeneke udọn̄ọ. Edieke ẹyomde owo ke n̄kọk itieutom emi ẹsede ẹban̄a idụt mbufo, ndien edi ke afo akpama nditiene n̄kanam utom do, emekeme ndineme ye mbiowo esop mbufo.

NDIBỌP N̄KPỌ NNỌ ESOP ABASI

21 Mbon emi ẹbọpde n̄kpọ ẹnọ esop Abasi ẹnam ata akpan utom ẹnọ Abasi. Utọ utom emi ke ikọt Abasi emi ẹkebọpde temple Solomon ẹkenam. (1 Ndi. 8:13-18) Ediwak nditọete nnyịn irenowo ye iban ẹsiwụt nte imade Abasi ke ndida ini mmọ ye se mmọ ẹnyenede n̄n̄wam esop Abasi mbọp n̄kpọ.

22 Ndi emekeme nditiene nnam utom emi? Edieke edide ama ana baptism, omonyụn̄ ama nditiene nnam utom emi, nditọete emi ẹdade iso ke utom ubọpn̄kpọ ke edem mbufo ẹyema editiene an̄wam mmimọ. Mmọ ẹyekpep fi utom emi edieke mûnen̄ekede ufiọk utom ubọpufọk. Nam mbiowo mbufo ẹdiọn̄ọ ke akpama ndin̄wam ke utom emi. Ndusụk mme asuanetop oro ẹma ẹkena baptism, emi ẹdotde, ẹsinyịme ndika idụt en̄wen n̄kan̄wam mbọp n̄kpọ nnọ esop Abasi.

23 Nsio nsio usụn̄ odu emi owo ekemede nditiene n̄n̄wam esop Abasi mbọp n̄kpọ. N̄kọk itieutom ẹsimek mme asuanetop emi ẹma ẹkena baptism, emi ẹnịmde eti uwụtn̄kpọ, ẹnyụn̄ ẹnyenede ubọkutom nte mme andin̄wam Otu Emi Ẹsibọpde N̄kpọ Ẹnọ Esop Abasi. Mmọ ẹsito ufọk mmọ ẹka ẹketiene ẹbọp n̄kpọ ẹnọ esop Abasi ke ebiet emi mîyomke usụn̄ ikpọn̄ ufọk mmọ. N̄kọk itieutom ẹsimek n̄ko mbon en̄wen ẹketiene ẹbọp n̄kpọ ke ebiet emi oyomde usụn̄ ọkpọn̄ ufọk mmọ ke ufan̄ urua iba esịm ọfiọn̄ ita. Ẹkot mmọ mme ọbọpn̄kpọ ibio ini. Enyene ndusụk mbon emi ẹmekde ẹte ẹbọp n̄kpọ ẹnọ esop Abasi ke anyan ini. Ẹkot mmọ mme ọbọpn̄kpọ ofụri ini. Imonyụn̄ inyene mme ọbọpn̄kpọ ofụri ini emi ẹsinọde ẹka idụt en̄wen. Ke ini esop Abasi ẹyomde ndibọp n̄kpọ ekededi, Otu Emi Ẹsibọpde N̄kpọ Ẹnọ Esop Abasi, emi esịnede mme ọbọpn̄kpọ ofụri ini ye mme ọbọpn̄kpọ ibio ini ẹsida iso. Mme andin̄wam Otu Emi Ẹsibọpde N̄kpọ Ẹnọ Esop Abasi ye nditọete emi ẹbọpde n̄kpọ oro ẹnọ ẹsitiene ẹnam utom oro. Otu Emi Ẹsibọpde N̄kpọ Ẹnọ Esop Abasi ẹsisan̄a ke nsio nsio itie ke idụt mmọ ẹbọp n̄kpọ.

NSO YE NSO KE ADUAK NDINAM NNỌ ABASI?

24 Edieke edide amayak idemfo ọnọ Jehovah, ọwọrọ omoyom ndinam n̄kpọ esie ke nsinsi. Edi nso ye nso ke aduak ndinam nnọ Abasi? Edieke edide emebiere se aduakde ndinam nnọ Abasi, emi ayan̄wam fi ọdiọn̄ọ se akpadade odudu ye inyene fo anam. (1 Cor. 9:26) Mme n̄kpọ emi ẹyenam fi enen̄ede ekpere Abasi, idinyụn̄ iyakke abiat ini ke se mîdịghe akpan n̄kpọ, edi ayan̄wam fi anam n̄kpọ emi edinamde odot se ẹnọde mme utom en̄wen ke esop.—Phil. 1:10; 1 Tim. 4:15, 16.

25 Apostle Paul ama enịm eti uwụtn̄kpọ ọnọ nnyịn ke nte enye akanamde utom Abasi. (1 Cor. 11:1) Paul ama enen̄ede esịn idem anam n̄kpọ Jehovah. Enye ama ọdiọn̄ọ ke Jehovah ọnọ imọ nsio nsio utom inam. Enye ọkọdọhọ nditọete ke Corinth ete: “Akwa usụn̄ emeberede ọnọ mi ndinam utom.” Ukem oro ke edi ye nnyịn. Nsio nsio n̄kpọ ẹdu emi ikpanamde ke esop Jehovah, akpan akpan ndikwọrọ eti mbụk Obio Ubọn̄ Abasi. Edi mbemiso ikemede ndinam emi, ana in̄wana ye “ediwak mme andibiọn̄ọ” kpa nte Paul akan̄wanade. (1 Cor. 16:9) Paul ama esitụnọ idemesie. Enye ọkọdọhọ ete: “Ntọn̄ọ idem mi ita, nnam enye odụk ufụn.” (1 Cor. 9:24-27) Ndi iyanam ntre n̄ko?

Edieke edide emebiere se aduakde ndinam nnọ Abasi, emi ayan̄wam fi ọdiọn̄ọ se akpadade odudu ye inyene fo anam

26 Owo idọhọke owo ndomokiet anam se enye mîkemeke, edi ẹdọhọ kpukpru owo ẹnam se mmọ ẹkemede ẹnọ Abasi. Ediwak mbon emi ẹnamde utom ofụri ini idahaemi ẹma ẹbebiere ke idemmọ ke se mmimọ idinamde edi oro, idịghe nte ẹnyenyịk mmọ. Idem ke ini mmọ ẹkedide n̄kpri, mme ete ye eka mmọ ye mbon en̄wen ẹma ẹdọhọ mmọ ke ọfọn ndinam utọ utom emi. Mmọ inyụn̄ ituaha n̄kpọfiọk sia utom Jehovah asan̄a ye ediwak edidiọn̄. (N̄ke 10:22) Emekeme ndibiere n̄ko ndisika ukwọrọikọ kpukpru urua, ntọn̄ọ ukpepn̄kpọ Bible ye owo, m̀mê ndisida ini n̄kpep se ẹdinemede ke mbono esop kpukpru urua. Akpan n̄kpọ akam edi afo ndika iso nnam n̄kpọ Abasi nnyụn̄ nnam utom fo ọfọn. Edieke anamde oro, ọyọnọ Jehovah ubọn̄, oyonyụn̄ etiene anam n̄kpọ esie ke nsinsi nsinsi.—Luke 13:24; 1 Tim. 4:7b, 8.

    Mme N̄wed Ikọ Efịk (1982-2025)
    Wọrọ
    Dụk
    • Efịk
    • Share
    • Mek nte amade
    • Copyright © 2025 Watch Tower Bible and Tract Society of Pennsylvania
    • Nte Ẹkpedade Ikpehe Intanet Emi Ẹnam N̄kpọ
    • Ediomi
    • Privacy Settings
    • JW.ORG
    • Dụk
    Share