Se ifọnde ye Se Idiokde: Se Bible Etịn̄de Ekeme Ndin̄wam Fi

1. Ndọ

Mme owo ẹnyene nsio nsio ekikere ẹban̄a ndọ ye se ẹkpenamde man ndọ enem.

SE ỌWỌRỌDE: Abasi ọkọtọn̄ọ ndọ, ntre enye ọdiọn̄ọ se idinamde ebe ye n̄wan ẹkop inem ndọ mmọ. (Mark 10:6-9) Ebe ye n̄wan ẹma ẹkere ẹban̄a kiet eken utu ke ndikere mban̄a idemmọ kpọt, ndọ mmọ eyenem. Ebe emi amade n̄wan esie esinam n̄kpọ ọfọn ye enye onyụn̄ ekere aban̄a enye. Ndien n̄wan emi okponode ebe esie ọyọdiọn̄ọ nte etịn̄de ikọ onyụn̄ anamde n̄kpọ ye ebe esie.

SE BIBLE ETỊN̄DE ESIN̄WAM: Quang ye Thi, emi ẹtode Vietnam, ẹkekere ke mmimọ idikopke inem ndọ mmimọ tutu amama. Quang ama ọdiọk ido etieti. Enye ọdọhọ ete: “N̄kesiyomke ndidiọn̄ọ nte etiede Thi ke idem, n̄kesisesuene enye kpukpru ini.” Thi ama oyom ndidian̄ade ndọ. Enye ọdọhọ n̄ko ete: “Eketie mi nte ndikemeke ndikpono nnyụn̄ mma ebe mi aba.”

Nte ini akade, Quang ye Thi ẹma ẹdikpep Bible ẹnyụn̄ ẹdikụt nte mmọ ẹkemede ndinam se idude ke Ephesus 5:33 ke ndọ mmọ. Quang ọdọhọ ete: “Itie Bible oro ama edin̄wam mi nsifọn ido. Mma nnam Thi an̄wan mi okụt ke mmenen̄ede mma enye, n̄kere mban̄a enye, nnyụn̄ nnọ enye se enye oyomde. Ini n̄kọtọn̄ọde ndinam mme n̄kpọ emi, n̄wan mi ama ama onyụn̄ okpono mi akan nte ekesikponode.” Thi ọdọhọ eke esie ete, “Nte n̄kanamde se Ephesus 5:33 etịn̄de nnyụn̄ n̄wụtde ke mmokpono ebe mi, enye ama enen̄ede ama, ese aban̄a mi, ima inyụn̄ idu ke emem.”

2. Nte Ikpanamde N̄kpọ ye Mme Owo

Ẹsiwak ndifiomo mme owo ke ntak emi mmọ ẹdide afia m̀mê obubịt m̀mê nte mmọ etiede, ke ntak ebiet emi mmọ ẹtode, nte mmọ ẹsikponode Abasi, m̀mê ke ntak emi mmọ ẹkerede ke idiọkke erenowo ndinam ima ye erenowo, n̄wan ndinam ima ye n̄wan m̀mê owo ndidan̄ ye unam.

SE ỌWỌRỌDE: Bible idọhọke isua owo ke ntak emi enye edide afia mmê obubịt, ke ntak ebiet enye otode, m̀mê ke ntak emi enye esinamde ima ye erenowo nte enye m̀mê n̄wan nte enye. Utu ke oro, Bible ọdọhọ ikpono kpukpru owo, inamke n̄kpọ m̀mê owo oro oto m̀mọ̀n̄, edi afia m̀mê obubịt, edi imọ m̀mê ubuene. (Utom 10:34) Ekpededi nnyịn inịmke se mbon en̄wen ẹnịmde inyụn̄ imaha nte mmọ ẹsinamde n̄kpọ, imosụk ikeme ndikpono nnyụn̄ mfọn ido ye mmọ.​—Matthew 7:12.

SE BIBLE ETỊN̄DE ESIN̄WAM: Ẹkekpep Daniel ndida mbon emi ẹtode Asia nte mme asua idụt mmọ. Enye ama esisua owo ekededi emi otode Asia onyụn̄ esisụn̄i mmọ ke ebiet ekededi emi enye okụtde mmọ. Daniel ọdọhọ ete: “N̄kekere ke se n̄kanamde oro okowụt ke mma idụt mi, n̄kekereke-kere ke se n̄kesinamde oro ikọfọnke.”

Daniel ama edikpep Bible nte ini akade. Daniel ọdọhọ ete: “Akana n̄kpụhọde nte n̄kesikerede n̄kpọ, nda mme owo nte Abasi esidade, nnyụn̄ ndiọn̄ọ ke kpukpru nnyịn idi ukem inamke n̄kpọ m̀mê ito m̀mọ̀n̄.” Daniel etịn̄ nte esitiede enye ke idem idahaemi enye ama okụt mme owo. Enye ọdọhọ ete: “Nsiyomke-yom ndidiọn̄ọ ebiet emi mmọ ẹtode aba, mmama kpukpru owo idahaemi. Mmonyụn̄ nnyene mme ufan ke nsio nsio itie ke ererimbot.”

Edieke oyomde ndidiọn̄ọ n̄kpọ en̄wen, kot Edemede! No. 3 2020, emi ibuotikọ ọdọhọde “Nso Iditre Asari?” ke jw.org.

3. Okụk

Ediwak owo ẹsịn ibuot ẹsịn itọn̄ ẹyom inyene, ẹkere ke oro ayanam mmimọ ikop inemesịt, ini iso mmimọ onyụn̄ ọfọn.

SE ỌWỌRỌDE: Imoyom okụk, edi ndinyene okụk iwọrọke ke iyokop inemesịt m̀mê ke ini iso nnyịn ọyọfọn. (Mme N̄ke 18:11; 23:4, 5) Utu ke oro, nnyịn ndinam se Bible etịn̄de ayanam ikop inemesịt, ini iso nnyịn onyụn̄ ọfọn.​—1 Timothy 6:17-19.

SE BIBLE ETỊN̄DE ESIN̄WAM: Cardo, emi otode Indonesia, ama esịn ibuot esịn itọn̄ an̄wana n̄kpọ. Enye ọdọhọ ete: “Mma nnyene kpukpru mme n̄kpọ oro mme owo ẹkeyomde-yom. Mma nsika ebiet ekededi oro nyomde, ndeme moto, ufọk ye nsọn̄urua n̄kpọ eken.” Edi kpukpru oro ikebịghike. Cardo ọdọhọ ete: “Ẹma ẹbre mi utọtọ, ndien ofụri okụk oro n̄kesịnde idem n̄n̄wana ke ediwak isua ama atak ke edibọp enyịn ntat. N̄kada ofụri uwem mi n̄n̄wana okụk, edi etise, n̄kọwọrọke n̄kpọ aba, ofụri se n̄kenyenede ama atak.”

Cardo ama ọtọn̄ọ ndinam se Bible etịn̄de aban̄a nte ikpadade okụk. Enye ikesịnke ofụri odudu esie in̄wana okụk aba. Edi ama oyụhọ ye ekpri se enye ekenyenede. Enye ọdọhọ ete: “Mmenyene se ikponde ikan okụk idahaemi, sia ndidi ufan Abasi. Mmenen̄ede n̄kop inemesịt idahaemi nnyụn̄ nde idap mma enyịn.”

Edieke oyomde ndidiọn̄ọ n̄kpọ en̄wen oro Bible etịn̄de aban̄a okụk, kot ibuotikọ emi “Ndi Ifiọkn̄wed ye Okụk Ayanam N̄kpọ Ọfọn Fi?” ke Enyọn̄ Ukpeme No. 3 2021, ke jw.org.

4. Idan̄

Awawak n̄kpọ aban̄ade idan̄ emi mme owo ẹdade ke ọfọn m̀mê ifọnke.

SE ỌWỌRỌDE: Bible etịn̄ nte ikpanamde n̄kpọ iban̄a idan̄. Ikọ emi ẹkabarede nte “use” ke Bible esịne efịbe, usan̄a akpara, erenowo ye n̄wan emi mîdọhọ ndọ ndinam ima, erenowo ndinam ima ye erenowo, n̄wan ndinam ima ye n̄wan ye owo ndidan̄ ye unam. (1 Corinth 6:9, 10) Abasi oyom erenowo ye n̄wan emi ẹma ẹkedọ ndọ kpọt ẹnam idan̄.​—Mme N̄ke 5:18, 19.

SE BIBLE ETỊN̄DE ESIN̄WAM: N̄wan kiet emi otode Australia emi ekerede Kylie ọdọhọ ete: “Ini mmen̄kọdọhọ ebe, n̄kekere ke mma nnam idan̄ ye owo ke owo oro ayama mi onyụn̄ ese aban̄a mi, edi ikedịghe nte n̄kekerede. Esịt ama esiduọ mi, okonyụn̄ etie nte owo imaha mi.”

Nte ini akade, Kylie ama edikpep onyụn̄ anam se Bible etịn̄de aban̄a idan̄. Enye ọdọhọ ete: “Mmedikụt ke nte Abasi ọdọhọde idu uwem esifọn ye nnyịn, anam inyene emem. Ndidu uwem nte Jehovah ọdọhọde anam esịt ana mi sụn̄ nnyụn̄ ndu ke emem. Ndinam se Bible etịn̄de anam esịt iduọhọ mi aba!”