Mateo
Ãcõrẽ de droma jũma ãrĩni Jesuba jaraɗa
24 Jesura Ãcõrẽ de droma dajadaare ɓaɗada wãbʉrʉ basía. Maʉ̃ne idji ume nĩbabadarãda idji caita zeɗapeɗa jarasiɗaa:
–Acʉdua Ãcõrẽ de dromara, caita ɓea de siɗa sãwã bia queɗeada.–
2 Maʉ̃ne Jesuba ãdjirãa jarasia:
–Mãẽ, bãrãba unu panʉra bia queɗeaa. Baribʉrʉ wãrã arada mʉ̃a jaraya: naʉ̃ mõgara capeɗaɗara jũma toɗogozoaya.–
3 Jesu Olivo eyaɗe chũmasiɗe idji ume nĩbabadarãra idjimaa wãnapeɗa ãduɓa nãwã iwiɗisiɗaa:
–Dairãa jaradua, Ãcõrẽ de dromara ¿sãʉ̃be toɗogozoai? ¿Cãrẽneba cawaɗi bʉra zeboɗoda? Idjaɓa ¿cãrẽneba cawaɗi naʉ̃ ewarira jõbʉrʉda?–
4 Jesuba panusia:
–Quĩrãcuita ɓeaɗadua ni aɓaʉba cũrũgarãnamãrẽã. 5 Zocãrãba jaraɗia ãdjidrʉ Ãcõrẽba ẽdrʉ edabari diai jaraɗada. Mãwã ẽberãrãda zocãrã cũrũgaɗia.
6 Bãrãba ũrĩnia aɓaʉ puruda dewara ume djõ duanʉda idjaɓa drua ãyã biɗa mãwã duanʉda. Baribʉrʉ ne wayarãnadua. Maʉ̃gʉra jũma mãwãida ɓʉa. Baribʉrʉ naʉ̃ ewarira waɗi jõẽ́a. 7 Aɓaʉ puruda dewara puru ume djõnia. Aɓaʉ druaɗebema boroda dewara druaɗebema boro ume djõnia.* Zocãrã druaɗe jarrabada baraya idjaɓa de uremiada baraya. 8 Baribʉrʉ maʉ̃ naãrã mĩgabʉdara maãrĩ ɓaya wẽrã warra pua za ɓʉ quĩrãca.
9 Maʉ̃ ewariɗe ẽberãrãba bãrãra zarrarãa jida diaɗia biẽ́ oɗapeɗa beaɗamãrẽã. Mʉ̃ ĩjã panʉ carea jũmarãba bãrãra quĩrãmania. 10 Maʉ̃ carea zocãrãba mʉ̃ ĩjã panʉra igaraɗia. Maʉ̃ne dji jidabiɗia idjaɓa dji quĩrãmania. 11 Ãcõrẽneba beɗeabada dji wãrãẽ́ ɓeada zeɗia. Maʉ̃gʉrãba ẽberãrãra zocãrã cũrũgaɗia. 12 Cadjiruara auɗuara yõbʉrʉ bẽrã zocãrãba djãrã quĩrĩã pananara igaraɗia. 13 Baribʉrʉ bãrãba maʉ̃ ewari zareaɗe mʉ̃ ĩjã panʉda igaraɗaẽ́bʉrʉ, Ãcõrẽba ẽdrʉ edaya idji ume ewariza zocai panani carea. 14 Maʉ̃ne beɗea bia Ãcõrẽba pe eroɓʉɗebemada jũma naʉ̃ ẽjũãne jaraɗia puru ɓeaza ũrĩnamãrẽã. Mãwãnacareabʉrʉ naʉ̃ ewarira jõya.
15 24:15-16 Ãcõrẽneba beɗeabari Danielba cartaɗe ɓʉsia Ãcõrẽ de dromane eɗa dji biara ɓʉ dejãne Ãcõrẽba quĩrĩãcada aɓaʉba ɓʉida.* (Dji carta acʉ ɓʉba cãrẽ jara ɓʉda cawaida ɓʉa.) Bãrãba maʉ̃ unubʉdaɗe Judea druaɗe ɓeara eyaɗaa mĩrũ wãnida panʉa. 17 Ẽberã idji de ʉ̃rʉ̃ ɓʉra idji deɗe eɗa wãiẽ́ ɓʉa ne edai carea. 18 Dji peaɗe ɓʉba idjia ʉ̃rʉ̃ jʉ̃barira jẽda edaɗe wãiẽ́ ɓʉa. 19 Maʉ̃ ewariɗe wẽrãrã ɓiogoa ɓeara, warra ju dawa eroɓea siɗa bio mĩã djuburi ɓeaɗia. 20 Ãcõrẽa iwiɗiɗadua cue jara wa ʉ̃nãũbada ewariɗe mĩrũ wãna amaaba. 21 Maʉ̃ ewariɗe ẽberãrãra bio bia mĩgaɗia. Ãcõrẽba naʉ̃ ẽjũã oɗaɗeba ʉ̃taa ẽberãrãra maʉ̃ quĩrãca bia mĩgaɗacaa idjaɓa mãwãnacarea waa ara maʉ̃ quĩrãca mĩgaɗaẽ́a. 22 Maʉ̃ ewarira dãrãya. Ãcõrẽba jũma daucha bia mĩgabibara, ni aɓaʉda ẽdrʉɗaẽ́ bacasia. Baribʉrʉ Ãcõrẽba edaɗa ẽberãrã carea jũma daucha bia mĩgabiẽ́a.
23 24:23-24 Maʉ̃ ewariɗe ʉ̃cʉrʉba sewaɗeba jaraɗia ãdjira Ãcõrẽba ẽdrʉ edabari diai jaraɗada. Idjaɓa ʉ̃cʉrʉba sewaɗeba jaraɗia ãdjira Ãcõrẽneba beɗeabarida. Maʉ̃gʉrãba ne ununaca waiɓʉa ɓeada oɗia ẽberãrã cũrũgaɗi carea. Ãcõrẽba edaɗarã siɗa poya cũrũgaɗibara, ãdjirã siɗa cũrũgacasiɗaa. Maʉ̃ bẽrã aɓaʉba bãrãa jaraibʉrʉ, “Acʉɗadua, Ãcõrẽba ẽdrʉ edabari diai jaraɗara nama ɓʉa,” maʉ̃ra ĩjãrãnadua. Dewaraʉba idjira jarima ɓʉaɗa aibʉrʉ, maʉ̃ siɗa ĩjãrãnadua. 25 Jũma maʉ̃gʉra mʉ̃a bãrãa jarasia mãwãi naẽna.
26 Maʉ̃ bẽrã aɓaʉba bãrãa jaraibʉrʉ: “Ũrĩnadua, Ãcõrẽba ẽdrʉ edabari diai jaraɗara ẽjũã põãsa ewaraga ɓʉɗe ɓʉa,” jãmaa wãrãnadua. Dewaraʉba jaraibʉrʉ: “Acʉɗadua, idjira nama deɗe eɗa ɓʉa,” maʉ̃ra ĩjãrãnadua. 27 Naʉ̃ Djara Edaɗa zebʉrʉra jũmarãba ebuɗa ununia ʉ̃mãdau odjabariareba ʉ̃mãdau ɓaebariɗaa baa purewa edabʉrʉɗe ebuɗa unubada quĩrãca. 28 Jũmarãba cawa panʉa ãgoso powua nũmʉma ne beuɗara taɓʉda. Ara maʉ̃ quĩrãca mʉ̃ zebʉrʉra jũmarãba ununia.–
Naʉ̃ Djara Edaɗa zeiɗebema
Marco 13:24-37; Luca 21:25-33; 17:26-30, 34-36
29 Ẽberãrã bio bia mĩga pananacarea ara maʉ̃da ʉ̃mãdaura pãĩmaya. Jeɗeco siɗa ʉ̃naẽ́a. Chĩdaura bajãneba ɓaecuaɗia. Jũma bajãne ɓeara quĩrã awara ɓeya.* 30 Maʉ̃ne bajãne ne ununia. Maʉ̃gʉra mʉ̃, Naʉ̃ Djara Edaɗa zebʉrʉɗebemaa. Maʉ̃ unubʉdaɗe jũma naʉ̃ ẽjũãne ɓea purura ne wayaaɗeba jĩãnia.* Mʉ̃ra jʉ̃rãrãne ʉɓʉa bara zebʉrʉda idjaɓa quĩrãwãrẽã dorrodorroa ɓʉda ununia.* 31 Maʉ̃ne cachiru jĩguabʉrʉɗe mʉ̃a bajãnebema nezocarãda drua ɓeaza wãbiya Ãcõrẽba edaɗarãda ãbaa jʉreɗamãrẽã.
32 Higojõneba ne jarabʉrʉda cawaɗadua. Dji jʉwatera tucu nũmepeɗa quedua barabaria. Maʉ̃neba jũmarãba cawa panʉa dãrãẽ́ne poara zeida. 33 Ara maʉ̃ quĩrãca mʉ̃a jaraɗa unubʉdaɗe cawaɗadua mʉ̃ zei ewarira jũẽboɗoda. 34 Mʉ̃a bãrãa wãrãda jaraya: naʉ̃ ewariɗebema ẽberãrã beuɗi naẽna maʉ̃ra jũma mãwãya. 35 Bajãra jõya, naʉ̃ ẽjũã siɗa jõya, baribʉrʉ mʉ̃a jaraɗara wãrãda mãwãya.
36 Baribʉrʉ ni aɓaʉba maʉ̃ ewarira sãʉ̃be mãwãida cawaɗaẽ́a. Ãcõrẽ bajãnebema nezocarã biɗa adua panʉa. Mʉ̃, Naʉ̃ Djara Edaɗa biɗa adua ɓʉa.* Aɓabe mʉ̃ Zezabʉrʉ cawa ɓʉa. 37 Naʉ̃ Djara Edaɗa zei ewarira Noé ewariɗe ɓaɗa quĩrãca ɓaya.* 38 Dopapa zei naẽna ẽberãrãra ne co duanabadjia, mĩã cãĩ duanabadjia, dji caurãra quima diacua duanabadjia. Mãwã duanabadjia aɓa Noé jãba dromane ɓadobʉrʉɗaa. 39 Ãdjirãba dopapa zeiɗebemada cawaɗaca basía. Baribʉrʉ wãrãda zesiɗe ãdjirãra jũma nãbʉrʉ quinisiɗaa.* Ara dopapa cawaẽ́ne zeɗa quĩrãca mʉ̃, Naʉ̃ Djara Edaɗara cawaẽ́ne zeya. 40 Maʉ̃ ewariɗe ẽberãda umé ãdji ẽjũãne traja panʉne mʉ̃, Naʉ̃ Djara Edaɗaba aɓa edeya baribʉrʉ dewarabemara ɓeya. 41 Wẽrãrãda umé aɓari yuɗe ne ɓa panʉne mʉ̃, Naʉ̃ Djara Edaɗaba aɓa edeya baribʉrʉ dewarabemara ɓeya.
42 Maʉ̃ carea dau ʉɓʉa ɓeaɗadua. Bãrã Borora sãʉ̃be zeida adua panʉa. 43 Naʉ̃da cawaɗadua: de djibariba ne drʉabarira sãʉ̃be zeida cawa ɓʉbara, cãĩẽ́ bacasia ni cãrẽ siɗa drʉabi amaaba. 44 Ara maʉ̃ quĩrãca bãrã biɗa jʉ̃ã ɓeaɗadua. Bãrãba mʉ̃, Naʉ̃ Djara Edaɗa zeẽ́da crĩcha panʉne zeya.
Nezoca umé panʉneba ne jara ɓʉ
45 Nezoca crĩcha cawa ɓʉba jipa obari quĩrãca ɓeaɗadua. Idji boroba waabema nezocarãda idji jʉwaeɗa ɓʉsia ariɗe ne cobi ɓamãrẽã. 46 Nezocaba mãwã o ɓʉda idji boroba unune zeibʉrʉ, idjira bio bia ɓaya. 47 Wãrã arada mʉ̃a jaraya: dji boroba jũma idjia eroɓʉra maʉ̃ nezoca jʉwaeɗa ɓʉya. 48 Baribʉrʉ maʉ̃ nezocara dji cadjirua baibʉrʉ, idji soɗe mʉ̃ boro zeira dãrãyana aya. 49 Maʉ̃ne waabema nezocarãra biẽ́ o ɓaya idjaɓa beu nĩbabadarã ume ne co ɓepeɗa itua do ɓaya. 50 Aɓeɗa idji boro zeida jʉ̃ãẽ́ ɓaya. Mãwã ɓʉɗe idji borora cawaẽ́ne zeya. 51 Maʉ̃be dji boroba bio cawa opeɗa dji biaca ɓearã ume biẽ́ ɓʉya. Mama jũmarãda aujĩã panania idjaɓa puaba quiɗa ĩchia panania.