Ũbea ne cadjiruarã Ãcõrẽba zebisida

Egiptoɗebemarãba israelerãra õgo bio zarea trajabibadjiɗaa. Jeowaba diabuesida Moiseda dji djaba Aaroʉ̃me jaraɗamãrẽã naʉ̃ beɗea biada: “Idu wãbidua mʉ̃ purura, mʉ̃́a dji iwiɗiɗamãrẽã ẽjũã jeweɗaɗe”. Paraoʉ̃ra bio cadjirua ɓasida. Maʉ̃ bʉrʉ panusida: “Mʉ̃a quĩrĩãcada ãyã wãnira, ũrĩcada Jeowaba jara ɓʉra”. Mãwãnacarea, Paraoʉ̃ba õgo obisida zarea trajaɗamãrẽã israelerãra. Baribʉrʉ ãdjirãra Jeowaba carebasida. ¿Sãwã carebasi? Jeowaba diabuesida ne cadjiruada Egiptoɗaa. Jeowaba jarasida Moisea: “Paraoʉ̃ba ĩjãẽ́ ɓasida. Diapeɗe Nilo doeɗa wãbʉrʉɗe idjimaa jaraɗe wãida, israelerãra waɗi wãbiẽ́ ɓʉ bẽrã jũma Nilo dora oaba ɓaida”. Moiseba ĩjãsida, maʉ̃ bʉrʉ acʉɗe wãsida. Paraoʉ̃ unusida Aaroʉ̃ba bardonaba usida baidoda Nilo doɗe. Ara maʉ̃da dora mĩguia ʉ̃ nũmesida jũma ɓedara quinina bẽrã. Ni aɓaʉba baido doɗaẽ́ basía. Baribʉrʉ Paraoʉ̃ba israelerãra idu wãbiẽ́ basída.

Domia aɓa baɗacarea Jeowaba diabuesida Moise wãyã beɗeai carea Paraoʉ̃me. Idjia jarasida: “Ãyã wãbiẽ́bʉrʉ mʉ̃ purura, Egipto purura biraida bocorrorãba”. Paraoʉ̃ba ĩjãnaẽ́ basi bẽrã Aaroʉ̃ba idji bacuruda ʉ̃tʉ edasida, maʉ̃ bʉrʉ jũma birasida bocorrorãba ẽjũã entero. Maʉ̃ bʉrʉ zocãrã barasida bocorrorã deɗe, cãĩbadamae, epeɗecoɗe. ¡De jũma bira nũmesida bocorrorãba! Paraoʉ̃ba jarasida Moisea: “Iwiɗida Jeowa jõbimãrẽã jãʉ̃ ne cadjiruara, mʉ̃a idji purura iduaribisida ”. Maʉ̃ bʉrʉ Jeowaba jãʉ̃ ne cadjirua diabueɗara ara mama nũmʉsida. Egipto puruɗe bio quinisiɗada bocorrorãra. Maʉ̃ bʉrʉ bio mĩguia ʉ̃ nũmesida baribʉrʉ Paraoʉ̃ba iduaribiẽ́ ɓasida ãyã wãnira israelerãra.

Mãwãnacarea Jeowaba jarasida Moisea: “Aaroʉ̃ba naʉ̃ ẽjũãda uida jãʉ̃gʉ egoro pora quichiquichirã powua nũmeya”. Maʉ̃ bʉrʉ bio cabadjiɗada ẽberãrãra. Ẽjũãra quichiquichirã bira nũmesida, maʉ̃ bʉrʉ jarasiɗada egiptorãba jãʉ̃gʉ animarã zaquera: “¡Ãcõrẽba jãʉ̃ra diabuesida!”. Mãwã eroɓaɗamĩna israelerãra ãyã wãbiẽ́ ɓasida Paraoʉ̃ba.